ཕྱི་ལོ་༢༠༢༦ ཟླ་༩ ཚེས་༡༡ ཉིན། ལྡི་ལིར་བོད་མི་བརྒྱ་ཕྲག་མང་པོས་རྒྱ་དམར་སྲིད་འཛིན་ཞི་ཅིང་ཕིང་ལ་ངོ་རྒོལ་གྱི་ལས་འགུལ་སྤེལ་འདུག སྐབས་དེར། ཁོང་ཚོས་རྒྱ་ནག་གི་སྲིད་འཛིན་ཞི་ཅིན་ཕིང་ནི་བོད་ཀྱི་སྐད་ཡིག་རིག་གཞུང་དང༌། མི་རིགས་ངོ་བོ་དང་བཅས་པ་རྩ་མེད་གཏོང་མཁན་གྱི་བྱེད་ལྟེ་གཙོ་བོ་དེ་ཡིན་པས། ནག་ཉེས་ཅན་གྱི་མི་སྣ་དེ་ཕྱི་ལོ་༢༠༢༦ ལོའི་བྷི་རིག་སེ་ BRICS ཚོགས་ཆེན་ནང་མཉམ་ཞུགས་བྱེད་རྒྱུར་ངོ་རྒོལ་སྐྱོན་བརྗོད་ཤུགས་ཆེན་བྱེད་ཀྱི་ཡོད། རྒྱ་ནག་གི་སྲིད་འཛིན་ཞི་ཅིན་ཕིང་རྒྱ་གར་གྱི་ས་ཐོག་ཏུ་ཡོང་སྐབས་དེ་སྔ་རྒྱ་དམར་སྲིད་གཞུང་གི་གདུག་རྩུབ་ཅན་གྱི་སྲིད་བྱུས་འོག་དཀའ་སྡུག་ཚད་མེད་མྱོང་ཡོད་པའི་བཙན་བྱོལ་རང་དབང་ལུང་པའི་ནང་འཚོ་གནས་བྱེད་བཞིན་པའི་བོད་ནང་གི་བོད་མི་ཚོའི་སྐུ་ཚབ་ཚོར་མཚོན་ན། འདི་ནི་རྒྱལ་སྤྱིའི་སྤྱི་ཚོགས་ལ་བོད་ཀྱི་གནད་དོན་ཐག་གཅོད་མ་བྱུང་བར་དྲན་སྐུལ་བྱེད་པའི་དུས་ཚོད་གལ་ཆེན་ཞིག་རེད་ལ། འཛམ་གླིང་འགོ་ཁྲིད་རྣམས་ལའང་རྒྱ་ནག་གི་སྲིད་བྱུས་དང་ཁ་མཁས་ཚིག་སྙན་གྱི་ཁས་ལེན་ལ་ནམ་ཡང་ཡིད་ཆེས་བྱེད་མི་རུང་བའི་དྲན་སྐུལ་བྱེད་བཞིན་ཡོད། ཅེས་བརྗོད་སོང་།

ཕྱི་ལོ་༢༠༢༦ ཟླ་བ་༩ ཚེས་༢ ཉིན། བཞུགས་སྒར་དྷ་རམ་སའི་ཐེག་ཆེན་ཆོས་གློང་གཙུག་ལག་ཁང་དུ། དབུས་བོད་མིའི་སྒྲིག་འཛུགས་ཀྱིས་བོད་ཀྱི་མང་གཙོ་དབུ་བརྙེས་ཏེ་ལོ་ངོ་༦༦ འཁོར་བའི་དུས་ཆེན་སྲུང་བརྩི་གནང་སོང་། སྐབས་དེར། སྲིད་སྐྱོང་མཆོག་གིས་གསུང་དོན། རྒྱ་དམར་གཞུང་གིས་བོད་མི་རིགས་རྩ་གཏོར་གྱི་དམིགས་གཏད་གཙོ་བོར་བོད་ཀྱི་ཆོས་རིག་དང་སྐད་ཡིག་རྩ་མེད་གཏོང་རྩིས་ཡིན་པ་ལྟར། ང་ཚོ་གཞིས་བྱེས་གཉིས་ནས་སྒེར་སོ་སོའི་ཁྱིམ་ཚང་ནང་བོད་སྐད་ཤོད་པ་དང་། བོད་ཡིག་ཀློག་འདོན། བོད་བརྒྱུད་ནང་བསྟན་གྱི་བྱམས་བརྩེའི་བསླབ་བྱ་ངོ་སྤྲོད་དང་། རྒྱུན་ལྡན་ཆོ་ག་ལག་ལེན། སྲོལ་རྒྱུན་དུས་སྟོན་བརྩི་སྲུང་དང་། ཆས་གོས་དང་སྒྱུ་རྩལ་ལ་གོམས་འདྲིས་བསྟེན་ཐབས་ཐོག །དེར་མཐུན་གྱི་སྤྱི་ཚོགས་དང་སྒྲིག་འཛུགས་ཀྱི་བྱེད་སྒོ་ཁག་ནང་མཉམ་ཞུགས་ཡོང་ཐབས་འབད་བརྩོན་བྱ་རྒྱུ་ནི་གཞན་གྱི་གནོན་ཤུགས་ཀྱིས་ཁ་ལོ་བསྒྱུར་ཐུབ་པ་ཞིག་མིན་པས། ཕ་མ་སོ་སོས་ཕྲུ་གུའི་དགེ་རྒན་དང་པོ་རང་ཉིད་ཡིན་པའི་འགན་ཁུར་ལེན་ཐུབ་དགོས།

ཕྱི་ལོ་༢༠༢༦ ཟླ་༨ ཚེས་༢༧ ཉིན། གངས་སྐྱིད་སྲིད་སྐྱོང་ཚོགས་ཁང་དུ། བོད་མིའི་སྤྱི་མཐུན་མཉམ་འབྲེལ་གྱི་གཙོ་སྐྱོང་འོག རྒྱ་གར་རྒྱལ་ཡོངས་ས་གནས་ཁག་༡༥ ནས་ཕེབས་པའི་བོད་མིའི་མཉམ་འབྲེལ་ཚོགས་པའི་ཚོགས་གཙོ་༡༥ དང་དྲུང་ཆེ་༡༥ བཅས་༣༠ མཉམ་བཞུགས་གནང་ནས་བོད་མིའི་མཉམ་འབྲེལ་ཁག་བཅོ་ལྔའི་འཛིན་སྐྱོང་ཚོགས་ཆེན་ཐེངས་༢༥ དྷ་སར་དབུ་འཛུགས་གནང་སོང་། ཚོགས་ཆེན་འདི་ནི་ཚེས་༢༧ ནས་་༣༠ བར་འཚོགས་འཆར་ཡོད་འདུག

ཕྱི་ལོ་༢༠༢༦ ཟླ་༨ ཚེས་༢༠ ཉིན། བཞུགས་སྒར་དྷ་རམ་སའི་ཐེག་ཆེན་ཆོས་གླིང་གཙུག་ལག་ཁང་དུ། བཀའ་སྤྱི་གཉིས་ཀྱི་གོ་སྒྲིག་འོག རྒྱལ་གཅེས་དཔའ་བོ་བློ་དགའ་རང་བཙན་མཆོག་ནས་རྒྱ་ནག་གཞུང་གིས་བོད་ཐོག་འཛིན་པའི་གདུག་རྩུབ་ཅན་གྱི་སྲིད་བྱུས་ལ་ངོ་རྒོལ་བྱེད་ཆེད་དང་བོད་རང་དབང་རང་བཙན་ཆེད། ཕྱི་ལོ་ ༢༠༢༦ ཟླ་ ༧ ཚེས་ ༢ ཉིན་ཨ་རིའི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་ཐང་དུ་རང་ལུས་མེར་བསྲེགས་ཀྱིས་འདས་གྲོངས་སུ་གྱུར་ཏེ་ཞག་ཞེ་དགུ་འཁོར་བ་དང་བསྟུན། དམ་པ་དེ་ཉིད་དང་། བོད་ཕྱི་ནང་གཉིས་སུ་བསྟན་སྲིད་མི་རིགས་ཆེད་ལུས་སྲོག་ལོངས་སྤྱོད་བློས་གཏོང་གནང་མཁན་རྣམ་པར་གདུང་སེམས་མཉམ་བསྐྱེད་དང་། མྱ་ངན་གུས་འདུད་བཅས་ཀྱི་ཆེད་མཆོད་འབུལ་སྨོན་ལམ་ཞིག་ཚོགས་སོང་།

ཕྱི་ལོ་༢༠༢༦ ཟླ་༨ ཚེས་༢༠ ཉིན། རྒྱལ་གཅེས་དཔའ་བོ་བློ་དགའ་ལགས་ཀྱི་ཞེ་དགུའི་ཉིན་མོ་དང་བསྟུན་ཏེ་གཅིག་ནས་དཔའ་བོ་བློ་དགའ་རང་བཙན་མཆོག་གཙོས་པའི་ད་བར་བོད་རྒྱལ་ཁབ་དང་མི་རིགས་ཆེད་དུ་རང་གི་གཅེས་པའི་ལུས་སྲོག་བློས་གཏོང་གནང་མཁན་གྱི་རྒྱལ་གཅེས་དཔའ་བོ་དཔའ་མོ་རྣམས་ལ་རྗེས་དྲན་དང༌། གཉིས་ནས་བོད་ནང་གི་ཛ་དྲག་གི་གནས་སྟངས་སྐོར་གོ་རྟོག་དང་ཞུ་འབོད་ཆེད་བཞུགས་སྒར་རྡ་ས་ནས་རྒྱལ་ས་ལྡི་ལི་བར། དྷ་ས་ས་གནས་གཞོན་ནུའི་དྲུང་ཆེ་ཚེ་རིང་མཐར་ཕྱིན་ལགས་ཀྱིས་ཞི་བའི་གོམ་བགྲོད་ལས་འགུལ་ཞིག་དྷ་རམ་ས་ལ་ནས་དབུ་འཛུགས་གནང་སོང་།

ཕྱི་ལོ་༢༠༢༦ ཟླ་༨ ཚེས་༦ ཉིན། རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་བདུན་ཚེས་ལྔ་པ་དང་བསྟུན། དྷ་རམ་སར་བོད་ཀྱི་བུད་མེད་ལྷན་ཚོགས་དབུས་ས་གཉིས་ནས་མཉམ་འབྲེལ་རྒྱལ་ཚོགས་ཀྱི་ངོས་ནས་བོད་མིའི་བདེན་པའི་འཐབ་རྩོད་དང་དཔའ་བོ་བློ་དགའ་རང་བཙན་ལགས་ཀྱི་བློས་གཏོང་ལ་བརྡ་ལན་དང་ཡ་ལེན་བྱེད་དགོས་པ། དེ་བཞིན་རྒྱལ་སྤྱིའི་མཉམ་འབྲེལ་རྒྱལ་ཚོགས་དང་བོད་དོན་རྒྱབ་སྐྱོར་བ་། དེ་བཞིན་མང་གཙོ་དོན་གཉེར་བ་རྣམས་ནས་རྒྱ་ནག་དམར་གཞུང་ལ་གནོན་ཤུགས་སྤྲོད་དགོས་པའི་འབོད་སྐུལ་གྱི་ངག་བཅད་ཀྱི་ལས་འགུལ་སྤེལ་སོང་།