ཕྱི་ལོ་༢༠༢༥ ཟླ་༤ ཚེས་༥ ཉིན། བཞུགས་སྒར་རྡ་རམ་སའི་ནོར་བུ་གསོལ་མགྲོན་ཁང་དུ། བོད་ལྗོངས་མདོ་སྨད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་གཙོས་པའི་སྤྲུལ་སྐུ་ཧཱུྃ་ཀར་རྡོ་རྗེ་མཆོག་གི་སློབ་མ་སོགས་ཀྱིས་ཁོང་ནི་རྒྱ་གཞུང་གིས་ཉེས་མེད་ཉེས་འཛུགས་ཀྱིས་སྐུ་དཀྲོངས་པ་རེད་ཅེས་དང་། ཝི་ཏི་ནམ་(Vietnam) སྲིད་གཞུང་ནས་རིན་པོ་ཆེ་མཆོག་གི་གྲོངས་རྐྱེན་རྒྱལ་སྤྱིའི་ཁྲིམས་ལུགས་ལྟར་བརྟག་དཔྱད་ཞིབ་འཇུག་ནན་ཞིབ་ཡོང་བའི་འབོད་སྐུལ་ནན་ཏན་ཞུས་སོང་། གལ་སྲིད་དེ་ལྟར་གསལ་ཁ་མ་གནང་ན་ཁོང་ཚོས་མུ་མཐུད་ནས་ལས་འགུལ་སྤེལ་རྒྱུ་ཡིན་སྐོར་སོགས་གསུངས་སོང་།

ཕྱི་ལོ་༢༠༢༥ ཟླ་༢ ཚེས་༡༨ ཉིན། བོད་ཀྱི་གླུ་བ་བློ་བཟང་ལགས་གློ་བུར་དུ་འདས་གྲོངས་སུ་ཕྱིན་ཡོད་པའི་ཡིད་སྐྱོ་བའི་གནས་ཚུལ་ཐོན་འདུག་པར་གཞིས་བྱེས་གཉིས་ཀྱི་བོད་མི་ཚོས་ཁོང་ལ་མྱ་ངན་ཞུས་སོང་། ཁོང་ནི་ཕ་སྐད་གཙང་མའི་ལམ་ནས་གླུ་ལེན་མཁན་ཞིག་ཡིན་ཞིང་། ཁོང་གིས་སྐྱབས་མགོན། འཛམ་གླིང་ཞི་བདེ། ཁ་བའི་སྐྱིད་སྡུག ཉི་ཟླ་སྐར་གསུམ། བོད་རིགས་སྤུན་ཟླ། རྒྱང་འབོད་སེམས་ཀྱི་རི་མོ། བུ་མོ་དབྱངས་དཀར་སྒྲོལ་མ་སོགས་སྐད་གྲགས་ཅན་གྱི་གླུ་གཞས་མང་པོ་ལེན་ཡོད་པ་མ་ཟད། ༸གོང་ས་མཆོག་ལ་བསྟོད་གླུ་དང་བླ་མ་བཟང་པོ། དེ་བཞིན་མཐུན་སྒྲིལ་གྱི་རང་སྒྲ་ཞེས་པའི་གཞས་སོགས་བསྐྱར་ལེན་གནང་འདུག

ཕྱི་ལོ་༢༠༢༥ ཟླ་༡ ཚེས་༧ ཉིན་གྱི་སྔ་དྲོ་བོད་ནང་ཆུ་ཚོད་༩་དང་སྐར་མ་༥་ཡི་ཐོག གཞིས་རྩེ་གྲོང་ཁྱེར་དིང་རི་རྫོང་དང་གཏིང་སྐྱེས་རྫོང་། ལྷ་རྩེ་རྫོང་། ས་སྐྱ་རྫོང་། ངམ་རིང་རྫོང་བཅས་ལ་ས་ཡོམ་འགུལ་ཚད་རིམ་པ་༧.༡ བརྒྱབ་ནས། བོད་མི༡༢༦་ཡི་ཚེ་སྲོག་འཕྲོག་ཡོད་པ་དང་བོད་མི་༡༨༨ ལྷག་ལ་རྨས་སྐྱོན་བྱུང་བའི་ཡིད་སྐྱོ་བའི་གནས་ཚུལ་བྱུང་འདུག དེ་བཞིན་བོད་མིའི་ཁྱིམ་ཚང་༣༦༠༩་གཏོར་སྐྱོན་ཐེབས་ཡོད་འདུག ༸རྒྱལ་བ་རིན་པོ་ཆེ་མཆོག་དང་བོད་མིའི་སྒྲིག་འཛུགས་གཙོས་པའི་བཙན་བྱོལ་བོད་མི་རྣམས་ཀྱིས་གོ་ཆག་བྱུང་བའི་བོད་མི་རྣམས་ལ་གདུང་སེམས་མཉམ་བསྐྱེད་གནང་བཞིན་འདུག

ཕྱི་ལོ་༢༠༢༤ ཟླ་༡༢ ཚེས་༡༨ ཉིན་སྤེལ། བོད་མདོ་ཁམས་ཚ་བ་དཔའ་ཤོད་ནས་ཡིན་པའི་སྐྱེས་པ་དགྲ་འདུལ་ལགས་ཀྱིས་༸གོང་ས་མཆོག་གི་བཀའ་སློབ་དང་བརྙན་ཐུང་། གསུང་རྩོམ་དུམ་བུ་ཅན་སྙིང་བསྡུས་རྣམས་སྐད་འཕྲིན་བརྒྱུད་ནས་ལན་མང་སྤེལ་བར་བརྟེན། རྒྱ་གཞུང་ཉེན་རྟོག་པས་ཁོང་བཟུང་བཙན་ཁྲིད་བྱས་ནས་ཟླ་བ་ལྔ་ལྷག་གཅར་རྡུང་ཚད་མེད་བཏང་ནས་གློད་གྲོལ་བཏང་ཡོད་ཀྱང་འདས་གྲོངས་སུ་ཕྱིན་འདུག

ཕྱི་ལོ་༢༠༢༤ ཟླ་༡༡ ཚེས་༢༠ ཉིན་སྤེལ། ཁ་སང་བོད་ནང་བོད་མི་ཞིག་གིས་བོད་ཀྱི་རྩོམ་པ་པོ་རོང་བོ་དགེ་འདུན་ལྷུན་གྲུབ་ལགས་གློད་གྲོལ་བཏང་ཡོད་སྐོར་གྱི་སྙན་ངག་བྲིས་གནང་འདུག རྩོམ་པ་པོ་རོང་བོ་དགེ་འདུན་ལྷུན་གྲུབ་ལགས་ལོ་བཞིའི་བཙོན་འཇུག་དུས་ཡུན་རྫོགས་ནས་གློད་གྲོལ་བཏང་ཡོད་འདུག འོན་ཀྱང་། ཁོང་ད་དུང་ཡང་དམ་བསྒྲགས་དང་ལྟ་རྟོག་ནན་པོ་འོག་གནས་ཡོད་འདུག གཞན་ཡང་། བོད་ཀྱི་ཁོར་ཡུག་སྲུང་སྐྱོབ་པ་དང་ཚོང་པ་གྲགས་ཅན་ཀརྨ་བསམ་གྲུབ་ལགས་ཡང་ཁ་སང་བཙོན་འཇུག་དུས་ཡུན་མི་ལོ་༡༥ རྫོགས་ནས་གློད་གྲོལ་གཏོང་ཡོད་འདུག

ཕྱི་ལོ་༢༠༢༤ ཟླ་༡༠ ཚེས་༥ ཉིན་སྤེལ། བོད་མདོ་ཁམས་ཚ་བ་དཔལ་ཤོད་དགོན་གྱི་སྤྲུལ་སྐུ་ངག་དབང་འཕྲིན་ལས་ཀྱི་ཕྱག་མཛོད་དགེ་འདུན་པ་ཨ་འཛིན་ལགས་རྒྱ་གར་དུ་བཙན་བྱོལ་དུ་བྲོས་འབྱོར་ཡོང་སྐབས། རྒྱ་གཞུང་ཉེན་རྟོག་པས་འཛིན་བཟུང་བཀག་ཉར་བྱས་ཡོད་འདུག ཁོང་བཀག་ཉར་བྱེད་རིང་ཉེན་རྟོག་པས་འདྲི་གཅོད་འདྲ་མིན་བྱས་ནས་བཅར་རྡུང་དང་མནར་གཅོད་ཚད་མེད་བཏང་ནས་ཁོང་གི་གཟུགས་པོའི་གནས་སྟངས་ཛ་དྲག་ཏུ་གྱུར་ཡོད་འདུག གློད་གྲོལ་ཐོབ་ནས་ཟླ་བཞི་རྗེས་སུ་འདས་གྲོངས་སུ་ཕྱིན་ཡོད་འདུག