པཎ་ཆེན་རྫུན་མས་༸རྒྱལ་བའི་ཡང་སྲིད་རྒྱ་གཞུང་གི་ཁྲིམས་དང་མཐུན་དགོས་ལུགས་བརྗོད་པར་གཞོན་ལྷན་ནས་ངོ་རྒོལ་གྱི་བསྒྲགས་གཏམ་སྤེལ་སོང་།
ཕྱི་ལོ་༢༠༢༥ ཟླ་༡༢ ཚེས་༡༢ ཉིན། ཉེ་ཆར་རྒྱ་གཞུང་གིས་ངོས་འཛིན་བྱས་པའི་པཎ་ཆེན་རྫུན་མ་རྒྱལ་མཚན་ནོར་བུས་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་ནི་རྒྱ་གཞུང་གི་ཁྲིམས་དང་མཐུན་པ་དགོས་ཞེས་བརྗོད་ཡོད་པར། བོད་ཀྱི་གཞོན་ནུ་ལྷན་ཚོགས་ནས་མཐའ་གཅིག་ཏུ་ངོ་རྒོལ་དང་ངོས་ལེན་མེད་ཅེས་གསར་འགོད་གསལ་བསྒྲགས་ཤིག་སྤེལ་སོང་། སྐབས་དེར་སྤྱི་ནོར་༸གོང་ས་སྐུ་ཕྲེང་བཅུ་བཞི་པའི་ཡང་སྲིད་ངོས་འཛིན་ནི་དགའ་ལྡན་ཕོ་བྲང་དགེ་རྩ་ཚོགས་པར་ཡོད་པ་ལས་རྒྱ་གཞུང་ལ་མེད། རྒྱ་གཞུང་གིས་རྒྱལ་མཚན་ནོར་བུ་བེད་སྤྱད་བཏང་ནས་༸གོང་ས་ཏཱ་ལའི་བླ་མ་མཆོག་གི་སྐུའི་ཡང་སྲིད་དང་འབྲེལ་བའི་གནད་དོན་ཐད་བཤད་དུ་བཅུགས་ཡོད་པ་ནི་ཧ་ཅང་གི་ངོ་ཚ་དང་ཇུས་མེད་ཇུས་འཁྲི་རང་རེད། ཅེས་བརྗོད་སོང་།
