སྲིད་སྐྱོང་སྤེན་པ་ཚེ་རིང་མཆོག་བསྐྱར་དུ་བོད་མིའི་སྒྲིག་འཛུགས་ཀྱི་་སྲིད་སྐྱོང་ལ་འདེམས་ཐོན་བྱུང་འདུག

དེ་ཡང་། གོང་ཚེས་ཉིན་གྱི་སྔ་དྲོ་ཆུ་ཚོད་༢ཿ༣༠ ཐོག་བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ། དབུས་འོས་བསྡུ་ལས་ཁང་གི་འགན་འཛིན་བློ་བཟང་ཡེ་ཤེས་མཆོག་དང་། འོས་བསྡུའི་ལས་རོགས་འཕར་མ་ཚེ་རིང་གཡུ་སྒྲོན་ལགས་དང་། སྣང་ས་ཆོས་སྒྲོན་ལགས་བཅས་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་དང་བོད་མི་མང་སྤྱི་འཐུས་སྐབས་༡༨ པའི་སྔོན་འགྲོ་འོས་བསྡུའི་གྲུབ་འབྲས་གསལ་བསྒྲགས་གནང་སོང་།

ཐོག་མར། དབུས་འོས་བསྡུའི་སྤྱི་ཁྱབ་འགན་འཛིན་བློ་བཟང་ཡེ་ཤེས་མཆོག་གིས་གསར་འགོད་གསལ་བསྒྲགས་སྒྲོགས་སྦྱང་གནང་དོན། བོད་རྒྱལ་ལོ་ ༢༡༥༢ ཕྱི་ལོ་ ༢༠༢༦ ཟླ་ ༢ ཚེས་ ༡༣ ཉིན་ཕྱི་ལོ་ ༢༠༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། བོད་མི་མང་སྤྱི་འཐུས་སྐབས་ ༡༨ པའི་སྔོན་འགྲོའི་འོས་བསྡུའི་ལས་དོན་ཁག་ལེགས་གྲུབ་བྱུང་བར་ས་གནས་འོས་བསྡུ་ལས་ཁང་ཁག་གི་འགན་འཛིན་དང་། འགན་འཛིན་ལས་རོགས། ཚོགས་མི། ཟུར་དཔང་། ལས་བྱེད། དང་བླངས་བཅས་ཐུགས་འགན་བཞེས་མཁན་ཡོངས་ལ་དབུས་འོས་བསྡུ་ལས་ཁང་ནས་ལེགས་གསོལ་ཞུ་རྒྱུ་ཡིན།

༡། བོད་མིའི་སྒྲིག་འཛུགས་ཀྱི་སྲིད་སྐྱོང་གི་སྔོན་འགྲོའི་འོས་བསྡུའི་གྲུབ་འབྲས་གསལ་བསྒྲགས།

བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༦༧ པའི་ནང་གསེས་ ༣ (ཀ) པའི་ནང་། “འོས་གཞི་གཏན་འབེབས་གསལ་བསྒྲགས་མ་བྱས་པའི་ཉིན་གྲངས་ ༢༠ ནང་ཚུན་འོས་དམིགས་དྲུག་ལས་མ་མང་བ་སྔོན་འགྲོའི་འོས་གཞིར་གསལ་བསྒྲགས་བྱེད་དགོས་” ཞེས་པའི་དགོངས་དོན་ལྟར་དབུས་འོས་བསྡུ་ལས་ཁང་ནས་སྲིད་སྐྱོང་གི་འོས་དམིགས་དྲུག་གཏན་འབེབས་ཞུ་དགོས་པ་དེ་ལྟར་ཡང་། དོན་ཚན་ ༦༧ པའི་ནང་གསེས་ ༤ ནང་གསལ་ “་་་འོན་ཀྱང་སྔོན་འགྲོའི་སྐབས་འོས་མི་གཅིག་ལ་འོས་ཤོག་ཁྱོན་འབོར་གྱི་བརྒྱ་ཆ་ ༦༠ ཡན་ཐོབ་ཡོད་ཚེ་དངོས་གཞིའི་ལས་རིམ་འགྲོ་མི་དགོས་པར་སྲིད་སྐྱོང་ལ་འདེམས་ཐོན་བྱུང་བར་ངོས་འཛིན་གསལ་བསྒྲགས་བྱ་རྒྱུ།” ཞེས་གསལ་བ་ལྟར་འདི་ལོའི་སྔོན་འགྲོའི་འོས་བསྡུའི་ནང་སྲིད་སྐྱོང་འོས་མི་ལས་ཐོག་སྲིད་སྐྱོང་སྐུ་ངོ་སྤེན་པ་ཚེ་རིང་མཆོག་ལ་འོས་ཤོག་ཁྱོན་འབོར་གྱི་བརྒྱ་ཆ་ ༦༠ ཡན་ཐོབ་ཡོད་སྟབས་སྲིད་སྐྱོང་ལ་འདེམས་ཐོན་བྱུང་བའི་གསལ་བསྒྲགས་ཞུ་རྒྱུ་ཡིན། སྤྱི་ཡོངས་ནས་ད་ལན་སྔོན་འགྲོའི་འོས་བསྡུའི་ནང་ཆ་ཤས་ལེན་མཁན་འོས་འཕེན་པ་གྲངས་ ༥༡,༡༤༠ ནས་སྲིད་སྐྱོང་གི་འོས་མི་གྲངས་ ༡༠༣ ལ་འོས་འཕེན་ཡོད། གོང་གསལ་འོས་མིའི་ཁོངས་ནས་འོས་ཐོབ་གྲངས་འབོར་མང་རིམ་རྩེ་བཏོགས་ཀྱིས་འོས་མི་གསུམ་གྱི་གྲུབ་འབྲས་གསལ་བསྒྲགས་ཞུ་རྒྱུ་ཡིན།

༢། བོད་མི་མང་སྤྱི་འཐུས་སྐབས་ ༡༨ པའི་སྔོན་འགྲོའི་འོས་བསྡུའི་གྲུབ་འབྲས་གསལ་བསྒྲགས།

བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༤༩ ནང་གསེས་ ༡ (ཀ) པའི་ནང་། “འོས་གཞི་གཏན་འབེབས་གསལ་བསྒྲགས་མ་བྱས་པའི་ཉིན་གྲངས་ ༣༠ གོང་ཐོབ་ཁུངས་སོ་སོའི་ཐོབ་ཆའི་གྲངས་ཚད་ཀྱི་གསུམ་ལྡབ་ལས་མི་ཉུང་བའི་སྔོན་འགྲོའི་འོས་གཞི་གསལ་བསྒྲགས་བྱེད་དགོས་” ཞེས་པའི་དགོངས་དོན་ལྟར། དབུས་འོས་བསྡུ་ལས་ཁང་ནས་བོད་མི་མང་སྤྱི་འཐུས་སྐབས་ ༡༨ པའི་སྔོན་འགྲོའི་འོས་བསྡུའི་གྲུབ་འབྲས་ཁོངས་ཐོབ་ཁུངས་སོ་སོའི་འོས་ཐོབ་རྩེ་བཏོགས་ཀྱིས་ཆོལ་ཁ་རེ་ནས་འོས་གཞི་ ༣༠ རེ་དང་། ཆོས་ལུགས་ཁག་ལྔ་དང་། ལྷོ་བྱང་ཨ་རི། ཡུ་རོབ་དང་ཨ་ཕི་རི་ཀ་བཅས་ནས་འོས་གཞི་གྲངས་ ༦ རེ། རྒྱ་བལ་འབྲུག་གསུམ་ཕུད་པའི་ཨེ་ཤི་ཡ་དང་ཨོ་སེ་ཀྲེ་ལེ་ཤི་ཡའི་ཁོངས་ནས་འོས་གཞི་གྲངས་ ༣ བཅས་གསལ་བསྒྲགས་ཞུ་རྒྱུ་ཡིན།

ཕྱི་ལོ་ ༢༠༢༦ ཟླ་ ༢ ཚེས་ ༢༧ ནང་ཚུད་བོད་མི་མང་སྤྱི་འཐུས་ཀྱི་འོས་དམིགས་དངོས་གཞིར་ཞུགས་མཁན་རྣམས་ཀྱི་སོ་སོའི་མིང་དང་ཁྱད་མིང་། སྐྱེས་ལོ་སྐྱེས་ཚེས། དང་བླངས་དཔྱ་དེབ་ཀྱི་ཤོག་གྲངས་དང་པོ་དང་མཐའ་མའི་པར་བཤུས། དོ་བདག་སོ་སོའི་ལོ་རྒྱུས་སྙིང་བསྡུས་འགེངས་ཤོག་མ་དཔེ་བཞིན་ཡིག་འབྲུ་ ༣༠༠ ལས་མ་མང་བ་སྨོན་ལམ་བོད་ཡིག་གཉིས་པའི་ (Monlam Uni Ouchan2) ཡིག་ཚད་ ༡༤ སྟེང་རྒྱབ་པ། ཉེ་ཆར་བརྒྱབ་པའི་ཕྱེད་པར་མཚོན་ཁྲ་ཅན་གཉིས་རེ། ཡིག་ཆ་ངོ་མ་དང་མཉེན་བཤུས་ (Soft Copy) བཅས་ས་གནས་འོས་བསྡུ་ལས་ཁང་བརྒྱུད་དབུས་འོས་བསྡུ་ལས་ཁང་ལ་འབུལ་འབྱོར་དགོས་པ་དང། དེ་བཞིན་འོས་གཞི་ནས་དགོངས་པ་ཞུ་འདོད་ཡོད་རིགས་ནས་དབུས་འོས་བསྡུ་ལས་ཁང་ལ་ཕྱི་ཟླ་ ༢ ཚེས་ ༢༨ ནང་ཚུད་འབུལ་དགོས། དངོས་གཞིའི་འོས་གཞི་གཏན་འབེབས་གསལ་བསྒྲགས་ཟིན་རྗེས་དགོངས་ཞུ་མི་ཆོག

ད་ཐེངས་ཀྱི་གསལ་བསྒྲགས་ཞུས་པའི་མཚན་གཞུང་ཁག་ནི་འོས་བསྡུའི་སྒྲིག་གཞི་དོན་ཚན་༤༧ པའི་དགོངས་དོན་སྔོན་འགྲོའི་འོས་མིའམ་སྔོན་འགྲོའི་འོས་ཐོབ་ཀྱི་གནས་སྟངས་མང་ཚོགས་སུ་གསལ་བསྒྲགས་ཞུས་པ་ཞིག་ཡིན་པས། ཕྱི་ལོ་༢༠༢༦ ལོའི་བོད་མི་མང་སྤྱི་འཐུས་སྐབས་ ༡༨ པའི་དངོས་གཞིའི་འོས་གཞི་དེ་བཞིན་ཕྱི་ལོ་ ༢༠༢༦ ཟླ་ ༤ ཚེས་ ༣ ཉིན་ལས་རིམ་བཞིན་གསལ་བསྒྲགས་གནང་རྒྱུ་ཡིན།

༣། འོས་བསྡུའི་དེབ་སྐྱེལ་དུས་ཚོད།

བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༡༨ པའི་ནང་གསལ་ལྟར་ཕྱི་ལོ་ ༢༠༢༦ ཟླ་ ༢ ཚེས་ ༡༥ ནས་ཟླ་ ༣ ཚེས་ ༡༥ བར་རང་ལོ་ ༡༨ ཧྲིལ་པོ་གསར་དུ་སོན་མཁན་རྣམས་དང་། སྔོན་འགྲོའི་སྐབས་མིང་གཞུང་དེབ་སྐྱེལ་བྱས་མ་ཐུབ་པའི་རིགས་ལ་མིང་གཞུང་དེབ་སྐྱེལ་བྱ་རྒྱུའི་དུས་ཚོད་གཏན་འབེབས་ཞུས་ཡོད་པར་འོས་སྒྲིག་དགོངས་དོན་ལྟར་ས་གནས་འོས་བསྡུ་ལས་ཁང་སོ་སོ་ནས་འོས་བསྡུའི་མིང་གཞུང་དེབ་སྐྱེལ་ཟིན་དགོས་པའི་བཀོད་ཁྱབ་ཞུ་རྒྱུ་ཡིན་ཞེས་གསུངས་སོང་།