ཕྱི་ལོ་༢༠༢༦ ལོའི་སྲིད་སྐྱོང་འོས་མི་དང་ཁོང་རྣམ་པའི་ལོ་རྒྱུས་དང་དམིགས་ཡུལ་ངོ་སྤྲོད།

ཕྱི་ལོ་༢༠༢༦ ལོའི་སྲིད་སྐྱོང་འོས་མི་རྣམས་ཀ་ནས་འགོ་བརྩམས་ནས་ངོ་སྤྲོད་ཞུ་རྒྱུ་ཡིན། ཐོག་མར་སྲིད་སྐྱོང་འོས་མི་ནི་སྐལ་བཟང་རྡོ་རྗེ་ལགས་དང་། དེ་ནས་བཀྲ་ཤིས་སྟོབས་རྒྱས་ལགས། རྒྱལ་ཐང་ངག་དབང་དགའ་ལྡན་ལགས། སྤེན་པ་ཚེ་རིང་ལགས། ཚེ་རིང་ཕུན་ཚོགས་ལགས་བཅས་ཡིན།

༡ ༽ ཕྱི་ལོ་༢༠༢༦ ལོའི་སྲིད་སྐྱོང་འོས་མི་དབུ་དཀར་ཚང་སྐལ་བཟང་རྡོ་རྗེ་ལགས།

སྐལ་བཟང་རྡོ་རྗེ་(སྐལ་རྡོར) ལགས་ནི་ཕྱི་ལོ་༡༩༦༨་ལོར་རྒྱ་གར་བྱང་ཕྱོགས་མངའ་སྡེ་ནུབ་བྷན་གྷལ་གྲོང་འཁྱེར་ཀ་ལིམ་པོང་དུ་སྐྱེས། ཁོང་གིས་ཅག་ར་ཏ་བོད་དམག་སློབ་གྲྭར་(༡༩༧༣-༡༩༧༥) བར་སློབ་སྦྱོང་དང་། ཀ་ལིམ་པོང་གི་སན་ཊི་ཨོ་གྷུ་སུ་ཊིན་ཎེ་(St. Augustine's School) སློབ་གྲྭར་(༡༩༧༥-༡༩༨༦)་སློབ་སྦྱོང་གནང་ཡོད་འདུག དེ་ནས་ལྡེ་ར་རྡུན་སན་ཊི་ཇོ་སེ་ཧྥུ་(St. Joseph’s Academy) ནས་སློབ་སྦྱོང་དང་། ལྡི་ལི་གཙུག་ལག་སློབ་ཆེན་གྱི་སན་ཊི་སི་ཊེ་ཧྥན་(St. Stephen’s College)མཐོ་སློབ་ནས་དབྱིན་ཇི་ནང་རྩོམ་རིག་ཐོག་ཉེ་བའི་གཙུག་ལག་རབ་འབྱམས་པ་སློབ་མཐར་སོན། ཕྱི་ལོ་༡༩༩༦ ནས་༡༩༩༨ བར་ཨ་རིའི་ཧྥ་ལེ་ཁྱུ་སློབ་ཆེན་(The Fletcher School of Tufts University) ནས་རྒྱལ་སྤྱིའི་ཚོང་འབྲེལ་དང་རྒྱ་ནག་གི་ཕྱི་འབྲེལ་སྲིད་ཇུས་དང་། དཔལ་འབྱོར་དང་ཚོང་དོན་ཐབས་ཇུས་སོགས་གཙོ་བོར་བཟུང་ནས་ཁྲིམས་ལུགས་དང་ཕྱི་འབྲེལ་སྲིད་ཇུས་ཐོག་གཙུག་ལག་རབ་འབྱམས་པ་སློབ་མཐར་སོན།

སྐལ་རྡོར་ལགས་ཀྱི་ལས་ཀའི་ཉམས་མྱོང་ནི། ལྡི་ལིའི་ས་གནས་གཞོན་ནུའི་རྒྱུན་ལས་དང་། ཨ་རིའི་རྒྱལ་ས་ཨ་ཤིན་ཊོན་གྱི་བོད་རིགས་ཚོགས་པའི་ཚོགས་གཙོ། རྒྱལ་སྤྱིའི་བོད་དོན་ལས་འགུལ་ཁང་གི་ལས་བྱེད། བོད་མིའི་དྭངས་བླངས་ཞབས་ཞུ་འཛུགས་སྐྱོང་གནང་མཁན། ཁེ་ལི་ཧྥོ་ནི་ཡའི་བོད་རིགས་སྤྱི་མཐུན་ཚོགས་པའི་ཚོགས་གཙོ། བྱང་ཨ་རིའི་སྐུ་ཚབ་དོན་གཅོད་དང་། བོད་མིའི་སྒྲིག་འཛུགས་བབ་བསྟུན་ཚོགས་གཙོ། དཔལ་འབྱོར་ཡར་རྒྱས་ཐེབས་རྩའི་འགན་འཛིན་གནང་མྱོང་ཡོད་པ་དང་། ད་ལྟར་ཨེཊ་ལན་ཊིག་ལྷན་ཚོགས་ཀྱི་ལྷན་ཚོགས་ཀྱི་རྒྱལ་སྤྱིའི་རྒྱ་ནག་ཉམས་ཞིབ་ཚན་པའི་ཕྱོགས་བཞུགས་ཉམས་ཞིབ་པ་རྒན་པ་དང་། ཨེ་ཤི་ཡའི་རང་དབང་ལྟེ་གནས་ཁང་འཛུགས་མཁན་དང་ལས་ཐོག་ཚོགས་གཙོ་བཅས་ཡིན་འདུག

སྐལ་རྡོར་ལགས་ཀྱིས་ཕྱི་ལོ་༢༠༢༥ ཟླ་༡༡ ཚེས་༡༩ ཉིན་དྲ་ལམ་བརྒྱུད་ནས་ཕྱི་ལོ་༢༠༢༦ ལོའི་འོས་བསྡུ་ཆེན་མོ་ནང་སྲིད་སྐྱོང་གི་འོས་མིར་ལང་རྒྱུའི་གསལ་བསྒྲགས་གནང་ཡོད།

ཁོང་གི་འབོད་ཚིག་གསུམ་ནི། མཐུན་སྒྲིལ་དང་བོད་དོན་དྲིལ་བསྒྲགས་རྒྱ་བསྐྱེད། རང་ཁ་རང་གསོ་དང་དཔལ་འབྱོར་སྲ་བརྟན། བཅས་རེད་འདུག

དང་པོ་དེ་བོད་མི་རྒན་གཞོན་དབར་དང། ལུང་ཚན་དང་ཆོལ་ཁའི་དབར། འཛམ་གླིང་ས་ཕྱོགས་གང་སར་བཞུགས་པའི་ཁ་ཐོར་གྱི་བོད་མི་ཡོངས་རྫོགས་དབར་མཐུན་སྒྲིལ་ལ་ཤུགས་སྣོན་གྱིས་བོད་མིའི་སྒྲིག་འཛུགས་དེ་བཞིན་ཚང་མས་ནུས་པ་མཉམ་སྤུངས་ཀྱིས་དེ་ལས་ཀྱང་ཚགས་ཚུད་དུ་གཏང་རྒྱུ། ཞེས་དང་།
གཉིས་པ་དེ་བོད་མིའི་སྒྲིག་འཛུགས་ཀྱི་ལས་དོན་གཙོ་བོ་ཞིག་ནི་ད་ལྟའི་བོད་ཀྱི་གནས་སྟངས་དང་བོད་དོན་འཐབ་རྩོད་ཀྱི་གནས་བབ་དེ་བཞིན་རྒྱལ་སྤྱིའི་སྡིངས་ཆའི་ཐོག་དྲིལ་བསྒྲགས་བྱ་རྒྱུ་དེ་ཡིན་པས། བོད་དོན་དྲིལ་བསྒྲགས་ཀྱི་ལས་གཞི་ལ་ད་ལྟ་ལས་ཐབས་ཇུས་བཟང་དུ་དང་ནུས་ཤུགས་ཆེ་རུ་གཏང་རྒྱུ་ཞེས་དང་།
གསུམ་པ་དེ་བོད་མིའི་སྒྲིག་འཛུགས་དེ་བཞིན་རང་ཁ་རང་གསོ་དང་དཔལ་འབྱོར་སྲ་བརྟན་ཞིག་ཡོང་ཆེད། དཔལ་འབྱོར་རོགས་རམ་ཤོར་བ་རྣམས་སླར་གསོ་ཐུབ་པ་བྱ་རྒྱུ་དང། ལྷག་པར་དུ་དེ་ལས་གཞན་པའི་དཔལ་འབྱོར་རོགས་རམ་འཕར་མ་གང་མང་གསར་རྙེད་ཐུབ་པ་བྱ་རྒྱུ། ཞེས་འགྲེལ་བརྗོད་གནང་འདུག

༢ ༽ ཕྱི་ལོ་༢༠༢༦ ལོའི་སྲིད་སྐྱོང་འོས་མི་བཀྲ་ཤིས་སྟོབས་རྒྱལ་ལགས།

བཀྲ་ཤིས་སྟོབས་རྒྱལ་ལགས་ནི་རྒྱ་གར་བྱང་ཕྱོགས་ལ་དྭགས་ནས་སྐྱེས་ཞིང་། རང་ལོ་༡༦ དབར་དུ་ལུག་རྫི་བྱས་ཡོད་པ་དང་དེ་རྗེས་ལོ་༡༤ རིང་དམག་མི་ནང་ཞུགས་མྱོང་ཡོད་འདུག ད་ལྟར་ཁོང་གིས་ཚོང་ལས་གཉེར་བཞིན་ཡོད་འདུག

བཀྲ་ཤིས་སྟོབས་རྒྱལ་ལགས་ཀྱིས་ཕྱི་ལོ་༢༠༢༦ ཟླ་བ་༡༡ ཚེས་༢༩ ཉིན། བཞུགས་སྒར་དྷ་ས་ས་གནས་འགོ་འཛིན་ཚོགས་ཁང་དུ། ཁོང་རང་ཕྱི་ལོ་༢༠༢༦ ལོའི་སྲིད་སྐྱོང་འོས་མིར་ལངས་རྒྱུའི་གསར་འགོད་གསལ་བསྒྲགས་སྤེལ་སོང་།

སྐབས་དེར། ཁོང་གིས་བསྒྲགས་གཏམ་ཡང་ན་འབོད་ཚིག་གཉིས་ནི་ང་དང་ང་ཚོའི་གཞུང་། ང་དང་ང་ཚོའི་སྒྲིག་འཛུགས། ཞེས་པ་རེད་འདུག

ང་དང་ང་ཚོའི་གཞུང་། ང་དང་ང་ཚོའི་སྒྲིག་འཛུགས་ཞེས་པ་ནི་སྲིད་སྐྱོང་གི་འགོ་ཁྲིད་ནས་བོད་སྤྱི་པའི་ལས་དོན་ནང་མི་ཚང་མས་མཉམ་ཞུགས་གནང་ནས། མི་མང་དང་གཞུང་དབར་ལ་འབྲེལ་བ་དམ་ཟབ་གཏོང་རྒྱུ་དང་། རྒྱལ་ཁབ་ཤོར་བའི་མི་རིགས་ཤིག་ཡིན་ཕྱིན། བོད་སྤྱི་པའི་རྩ་དོན་རྩོད་གཙོ་བོར་རྩོད་རྒྱུ། བོད་ཀྱི་ཆོས་དང་རིག་གཞུང་སྲུང་སྐྱོབ་བྱེད་དགོས། ཆོལ་ཁ་དང་ལུང་ཚན་དབྱེར་མེད་ཐོག་ནས་ང་དང་ང་ཚོའི་གཞུང་ལམ་ནས་མཉམ་དུ་ཁྲིད་ཐུབ་པ་བྱ་རྒྱུ། དེར་ལྟར་བྱས་ན་བོད་པའི་སྤྱི་ཚོགས་ནང་ཆིག་སྒྲིལ་རང་བཞིན་ཡོང་གི་རེད། ཅེས་འགྲེལ་བརྗོད་གནང་སོང་།

འོན་ཀྱང་། འོས་བསྡུ་དང་འབྲེལ་བའི་དྲིལ་བསྒྲགས་བྱེད་ཕྱོགས་ཀྱི་རྩ་འཛིན་ལམ་སྟོན་གྱི་དོན་ཚན་དང་པོར། ༼ སྲིད་སྐྱོང་དང་སྤྱི་འཐུས་ཀྱི་འོས་གཞིར་ཞུགས་མཁན་རྣམས་ཀྱིས་འོས་བསྡུའི་རྒྱལ་ཁ་ཐོབ་ཆེད་དྲིལ་བསྒྲགས་ཡིག་ཆའི་སྟེང་༸གོང་ས་མཆོག་གི་སྐུ་པར་དང་བོད་རྒྱལ་ཁབ་ཆེན་པོའི་རྒྱལ་དར། བོད་མིའི་སྒྲིག་འཛུགས་ཀྱི་ལས་རྟགས། བོད་ཀྱི་ས་ཁྲ་སོགས་གང་བྱུང་བེད་སྤྱོད་མི་ཆོག༽ ཅེས་པ་བཀོད་ཡོད་ཀྱང་། བཀྲ་ཤིས་སྟོབས་རྒྱལ་ལགས་ཀྱིས་ཕྱི་ལོ་༢༠༢༦ ལོའི་སྲིད་སྐྱོང་འོས་མིར་ལང་རྒྱུའི་གསར་འགོད་གསལ་བསྒྲགས་སྤེལ་སྐབས། ཁོང་གི་ཁྱབ་བསྒྲགས་ལས་ཤོག་ཐོག བོད་ཀྱི་རྒྱལ་དར་དང་༸གོང་ས་མཆོག་གི་སྐུ་པར་བེད་སྤྱོད་བཏང་ཡོད་རྐྱེན། ཕྱི་ལོ་༢༠༢༥ ཟླ་༡༢ ཚེས་༢༣ ཉིན། དབུས་འོས་བསྡུ་ལས་ཁང་ནས་སྲིད་སྐྱོང་འོས་མི་བཀྲ་ཤིས་སྟོབས་རྒྱལ་(ལུག་རྫི)་གྱིས་ཕྱི་ལོ་༢༠༢༥ ཟླ་༡༡ ཚེས་༢༩ ཉིན་སྲིད་སྐྱོང་འོས་མི་ལང་རྒྱུའི་གསལ་བསྒྲགས་སྤེལ་སྐབས་བོད་ཀྱི་རྒྱལ་དར་དང་༧གོང་ས་མཆོག་གི་སྐུ་པར་བེད་སྤྱོད་བཏང་རྐྱེན་འོས་བསྡུའི་སྒྲིག་གཞི་འགལ་ཡོད་པས་གདམ་བྱ་དང་འདེམས་བྱེད་པའི་ཐོབ་ཐང་མེད་པའི་ཉེས་ཆད་བཅད་པའི་གསལ་བསྒྲགས་སྤེལ་སོང་། དེར་བརྟེན། ཁོང་ཕྱི་ལོ་༢༠༢༦་སྲིད་སྐྱོང་འོས་མི་ལང་རྒྱུ་དང་འོས་བླུགས་རྒྱུའི་ཐོབ་ཐང་མེད། བཀྲ་ཤིས་སྟོབས་རྒྱལ་ལགས་ནི་ཕྱི་ལོ་༢༠༡༦་ལོ་དང་ཕྱི་ལོ་༢༠༢༡་ལོའི་སྲིད་སྐྱོང་འོས་མིར་ལངས་ཡོད།

༣ ༽ ཕྱི་ལོ་༢༠༢༦ ལོའི་སྲིད་སྐྱོང་འོས་མི་ངག་དབང་དགའ་ལྡན་ལགས།

ངག་དབང་དགའ་ལྡན་ལགས་ནི་བོད་ཁམས་རྒྱལ་ཐང་དུ་ཕྱི་ལོ་༡༩༧༦ ལོར་སྐྱེས་ཡོད་འདུག སློབ་གྲྭ་རིམ་བཞིན་འགྲེམས་ནས་ཆིང་ཧཱ་སློབ་ཆེན་ནས་ཆབ་སྲིད་རིག་པའི་ཐོག་ནས་སློབ་མཐར་སོན་ཡོད་འདུག རྗེས་སུ་བོད་ནས་བཙན་བྱོལ་དུ་འབྱོར། དེ་ནས་བོད་ཀྱི་དགུ་བཅུ་གསུམ་ལས་འགུལ་ཚོགས་པ་ནང་ལས་ཀ་བྱས་ཡོད་འདུག ཕྱི་ལོ་༢༠༢༢་ལོར་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོར་ཆགས་ཡོད་འདུག ཕྱི་ལོ་༢༠༢༥་ཕྱི་ཚེས་༢༦ ཉིན་གྱི་སྔ་དྲོ་ཆུ་ཚོད་ ༡༡། ༣༠ ཙམ་ལ་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ཟུར་པ་རྒྱལ་ཐང་ངག་དབང་དགའ་ལྡན་ལགས་ཀྱིས་ཕྱི་ལོ་༢༠༢༦ ལོའི་སྲིད་སྐྱོང་གི་འོས་མིར་ལང་རྒྱུའི་གསལ་བསྒྲགས་གནང་སོང་།

རྒྱལ་ཐང་ངག་དབང་དགའ་ལྡན་ལགས་ཀྱི་འབོད་ཚིག་གསུམ་ནི། དབུ་ཁྲིག་གཅིག མི་རིགས་གཅིག རྩ་དོན་གཅིག་བཅས་རེད་འདུག ཁོང་གིས་འབོད་ཚིག་གསུམ་ཐོག་ནས་འགྲེལ་བརྗོད་གནང་དོན། དབུ་ཁྲིག་གཅིག་ཅེས་པ་ནི་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་དང་། མི་རིགས་གཅིག་ནི་བོད་མི་རིགས། རྩ་དོན་གཅིག་ནི་དབུ་མ་ལམ་ཡིན་ཞེས་དང་། ཆོས་ལུགས་མཐུན་སྒྲིལ་ཡོང་ཐབས། བོད་ལ་རང་དབང་ཡོང་ཐབས་སུ་རང་གཙང་དང་དབུ་མ་ལམ་གཉིས་ཀྱི་ཐབས་ལམ་གང་ཞིག་གི་ཐོག་འགྲོ་རྒྱུ་ཡིན་མིན་མི་མང་ནས་འོས་ཤོག་བླུགས་ནས་ཐག་གཅོད་བྱ་རྒྱུ་ཡིན་སྐོར་དང་། རང་བཙན་ལྟ་གྲུབ་ཡོད་མཁན་ཤེས་ཡོན་པ་བཀའ་བློན་བསྐོ་རྒྱུ། བོད་མིའི་སྒྲིག་འཛུགས་ཀྱི་ལས་ཁུངས་ཁག་ནང་ཆོལ་གསུམ་གྱི་བོད་མི་དབྱེར་མེད་ཐོག་ནས་འདེམ་རྒྱུ། སྤྱི་འཐུས་རྣམས་ལོ་ལྔ་དང་བཅུ་ལས་མང་བ་བྱེད་མི་ཆོག་པའི་གྲོས་ཆོད་སྟོན་རྒྱུ། བོད་ཁྱིམ་སློབ་གྲྭ་ཁག་ཟླ་སྒྲིལ་གཏོང་རྒྱུ། དགེ་རྒན་གླ་ཆ་སྤེལ་རྒྱུ། བོད་པའི་སློབ་གྲྭ་ནང་སློབ་མ་ཚོ་འཛིན་གྲྭ་དང་པོ་ནས་བཅུ་གཉིས་བར་རིན་མེད་གཏོང་རྒྱུ། ཕ་མ་ཚོས་བྱིས་པ་གསུམ་ལས་མང་བ་སྐྱེས་ན་མཐོ་སློབ་སློབ་ཡོན་ཆ་ཚང་སྤྲོད་རྒྱུ། བོད་མིའི་སྒྲིག་འཛུགས་ནང་གཞོན་སྐྱེས་ཤེས་ཡོན་ཅན་ལ་གདན་འདྲེན་ཞུ་རྒྱུ་ཡིན་སྐོར་སོགས་གསུངས་སོང་།

༤ ༽ ཕྱི་ལོ་༢༠༢༦ ལོའི་སྲིད་སྐྱོང་འོས་མི་སྤེན་པ་ཚེ་རིང་ལགས།

སྤེན་པ་ཚེ་རིང་ལགས་ཀྱི་ལོ་རྒྱུས་མདོ་བསྡུས་ནི། ཁོང་ནི་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་སུ་སྐྱེས། ཁོང་གིས་སྦེལ་ཀོབ་བོད་ཁྱིམ་སློབ་གྲྭ་ནས་འཛིན་རིམ་བཅུ་གཉིས་བར་སློབ་སྦྱོང་གནང་། ཕྱི་ལོ་༡༩༨༥ ནས་༡༩༨༨ བར་མ་དྷ་ར་སི་ཁིརི་ཤན་མཐོ་སློབ་ཏུ་དཔལ་འབྱོར་རིག་པའི་ཉེ་བའི་གཙུག་ལག་རབ་འབྱམས་པའི་སློབ་མཐར་སོན། ལས་ཀའི་ཉམས་མྱོང་ནི། ཕྱི་ལོ་ ༡༩༩༤ ནས་ ༡༩༩༧ བར་མདོ་སྨད་དབུས་རྒྱུན་དྲུང་ཆེའི་ལས་འགན་བཞེས། ཕྱི་ལོ་ ༡༩༩༦ ལོ་ནས་ ༢༠༡༦ བར་མདོ་སྨད་སྤྱི་འཐུས་སུ་བདམས་ཐོན་བྱུང་། ཕྱི་ལོ་ ༢༠༠༨ ནས་ ༢༠༡༦ བར་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་གནང་། ཕྱི་ལོ་༢༠༡༦ ནས་ལོ་གཅིག་ལྷག་གི་རིང་བྱང་ཨ་རིའི་སྐུ་ཚབ་དོན་གཅོད་གནང་། ཕྱི་ལོ་༢༠༢༡ ལོར་ཁོང་དབུས་བོད་མིའི་སྒྲིག་འཛུགས་ཀྱི་བཀའ་ཤག་སྐབས་༡༦ པའི་སྲིད་སྐྱོང་དུ་འདེམས་ཐོན་བྱུང་།

སྤེན་པ་ཚེ་རིང་ལགས་ཀྱིས་ཕྱི་ལོ་༢༠༢༦ ལོའི་སྲིད་སྐྱོང་ལང་རྒྱུ་ཡིན་སྐོར་ལས་འོས་བསྡུ་ཁྱབ་བསྒྲགས་བྱ་རྒྱུ་མིན་སྐོར་གསུངས་ཡོད། གལ་སྲིད་ཁོང་གི་སྐོར་དང་ལངས་ཕྱོགས་ཤེས་འདོད་ཡོད་ཚེ་ཕྱི་ལོ་༢༠༢༡་ལོའི་འོས་བསྡུ་ཁྱབ་བསྒྲགས་སྐབས་ཀྱི་བསྒྲགས་གཏམ་གཟིག་ཅེས་གསུངས་ཡོད། དེར་བརྟེན་ཁོང་གི་ཕྱི་ལོ་༢༠༢༡་ལོའི་སྲིད་སྐྱོང་འོས་མིར་ལངས་དགོས་པའི་རྒྱུ་མཚན་གཤམ་འོག་ལ་བཀོད་ཡོད།

སྤྱིར་ཁོང་གིས་འབོད་ཚིག་གསུམ་ནི་སྤྱི་སྙོབས་དྲང་བདེན། ནུས་པ་མཉམ་སྤུངས། གོམ་པ་མདུན་སྤོ། བཅས་ཡིན།

སྲིད་སྐྱོང་འོས་མིར་ལངས་དགོས་པའི་རྒྱུ་མཚན་ནི།

༡ ༽ སྤྱི་པའི་ལས་དོན་སྒྲུབ་སྐབས། ཕྱི་ནང་གི་རྐྱེན་སྣ་ཚོགས་ཤིག་འཕྲད་སྲིད་ཀྱང་། ངའི་མི་ཚེ་ཧྲིལ་པོ་བོད་སྤྱི་ པའི་ཞབས་ཞུའི་ཐོག་འབུལ་རྒྱུའི་དམ་བཅའ་དེ་འགྱུར་བ་མེད་པར་བརྟན་པོར་གནས་ཡོད།

༢༽ སྤྱི་པའི་ཞབས་ཞུ་བསྒྲུབ་པ་ལ་གོ་གནས་ཡོད་མེད་ཁྱད་པར་མེད་ནའང་། ཕན་ནུས་འདོན་སྟངས་མི་འདྲ་བ་ཡོང་གི་ཡོད།

༣༽ སྲིད་སྐྱོང་གི་ལས་གནས་ནི་ྋ༸གོང་ས་༸ྋསྐྱབས་མགོན་ཆེན་པོ་མཆོག་གི་དགོངས་གཞི་གཙོ་བོར་བཞག་སྟེ་ བོད་དང་བོད་མིར་སྲི་ཞུ་ཞབས་འདེགས་སྒྲུབ་པའི་ནུས་པ་ཐོན་ཆེ་ཤོས་ཀྱི་ལས་གནས་ཤིག་ཡིན།

༤༽ ངའི་ལོ་ནའི་བབ་དང་། གཟུགས་བབ་གནས་སྟངས། བསམ་བློའི་གནས་ཚད། ཉམས་མྱོང་། འཇོན་ཐང་ བཅས་ཀྱི་ཆ་ནས་ཀྱང་སྲིད་སྐྱོང་ལས་གནས་ཐོག་ནུས་པ་འདོན་རྒྱུའི་དུས་ལ་བབས་ཡོད།

༥༽ ངའི་ལྷག་བསམ་དང་། ཉམས་མྱོང་། འཇོན་ཐང་། མི་གཤིས་བཅས་པར་རྒྱུས་མངའ་ཡོད་པའི་མི་སྣ་མང་པོ་ ཞིག་གིས་ཀྱང་ང་རང་ཐེངས་འདིའི་སྲིད་སྐྱོང་འོས་གཞིར་ལངས་རྒྱུའི་རེ་བ་འཆང་གི་ཡོད།

༦༽ ངའི་ཆབ་སྲིད་དང་། འཛིན་སྐྱོང་། དཔལ་འབྱོར། སྤྱི་ཚོགས་བཅས་ཀྱི་རིགས་ལམ་དང་འཆར་སྣང་ཁག་གིས་བོད་ཀྱི་རྩ་དོན་སྒྲུབ་ཐབས་དང་། བཙན་བྱོལ་བོད་མིའི་སྤྱི་ཚོགས་བདེ་དོན་ལ་ཕན་འབྲས་ངེས་ཅན་ཞིག་འདོན་ཐུབ་པའི་ཡིད་ཆེས་ཡོད། ཅེས་བཀོད་འདུག

༥༽ ཕྱི་ལོ་༢༠༢༦ ལོའི་སྲིད་སྐྱོང་འོས་མི་ཚེ་རིང་ཕུན་ཚོགས་ལགས།

ཚེ་རིང་ཕུན་ཚོགས་ལགས་ནི་ཕྱི་ལོ་༡༩༨༠ ལོར་བོད་དབུས་གཙང་མང་ཡུལ་སྐྱིད་གྲོང་དུ་སྐྱེས་ཞིང་། ཕྱི་ལོ་༡༩༨༨ ལོར་རྒྱ་གར་བཙན་བྱོལ་དུ་འབྱོར་རྗེས་མ་སུ་རི་སློབ་གྲྭ་རུ་སློབ་སྦྱོང་བྱས་ཏེ་དེ་ནས་སློབ་མཐར་སོན། དེ་རྗེས་ཀར་ན་ཊ་ཀ་མཐོ་སློབ་ནས་སྒྱུ་རྩལ་རིག་པའི་ཐོག་ཉེ་བའི་གཙུག་ལག་རབ་འབྱམས་པའི་སློབ་མཐར་ཕྱིན་པ་དང་། མའེ་སོར་མཐོ་རིམ་སློབ་གཉེར་ཁང་དུ་ས་ཁམས་ཆབ་སྲིད་ཐོག་གཙུག་ལག་རབ་འབྱམས་པའི་བསླབ་པ་མཐར་སོན་ཡོད་འདུག

ལས་ཀའི་ཉམས་མྱོང་ནི། ཕྱི་ལོ་༡༩༩༨ ལོར་རྒྱ་གར་གྱི་རྒྱལ་ས་ལྡི་ལི་རུ་བོད་དོན་སླད་ཟས་བཅད་ངོ་རྒོལ་གྱི་ལས་འགུལ་ནང་མཉམ་ཞུགས་བྱས་ཡོད་པ་མ་ཟད། མའེ་སོར་ས་གནས་གཞོན་ནུ་འགན་འཛིན། མའེ་སོར་ (Mysore) ནས་བྷེང་ལོར་བར་དུ་བོད་དོན་སླད་ཞི་བའི་གོམ་བགྲོད་ཀྱི་ལས་འགུལ་སྤེལ། འདས་པའི་ལོ་ངོ་༢༠ རིང་རྒྱ་གར་དུ་ཡོད་པའི་མ་སུ་རི་སློབ་གྲྭ་དང་། སྦེལ་ཀོབ་བོད་ཁྱིམ་སློབ་གྲྭ། སྦེལ་ཀོབ་སཾ་བྷོ་ཊ་སློབ་གྲྭ་སོགས་ལ་དགེ་རྒན་གྱི་ལས་གནས་གཉེར་ཡོད་ཅིང་། ད་ལྟའི་ཆར་སྦེལ་ཀོབ་སཾ་བྷོ་ཊ་སློབ་གྲྭ་རུ་ས་ཁམས་རིག་པའི་དགེ་རྒན་གྱི་ཕྱག་ལས་གནང་མུས་ཡིན་འདུག

ཁོང་གི་འབོད་ཚིག་ལྔ་ཡོད་པ་ལས་དང་པོ་ནི། འགྲན་ཟླ་མེད་པ། གཉིས་པ་ནི་གཅིག་མཚུངས། གསུམ་པ་ནི་གོང་འཕེལ། བཞི་པ་ནི་ཆིག་སྒྲིལ། ལྔ་པ་ནི་དབུ་མ་ལམ་བཅས་རེད་འདུག

ཁོང་གིས་བརྗོད་དོན། བོད་ཀྱི་ཆོས་དང་རིག་གཞུང་། སྐད་ཡིག་སོགས་ནི་འགྲན་ཟླ་མེད་པ་ཞིག་རེད། དེར་བརྟེན་དེ་དག་ལའང་འགྲན་ཟླ་མེད་པའི་འཆར་གཞི་དང་སྲིད་བྱུས་དགོས་པ་གལ་ཆེན་པོ་རེད། ལས་འཆར་དང་ལས་འགུལ་ག་འདྲ་ཞིག་ཡིན་ན་གཅིག་མཚུངས་སྤེལ་ཐུབ་ན་ཆིག་སྒྲིལ་རང་བཞིན་ཡོང་ཐུབ་ཀྱི་རེད། ཆིག་སྒྲིལ་བྱུང་ན་བོད་པའི་སྤྱི་ཚོགས་ནང་མང་གཙོ་དང་། ཤེས་ཡོན། དཔལ་འབྱོར་རིམ་བཞིན་གོང་འཕེལ་ཡོང་གི་རེད། དབུ་མ་ལམ་ཐོག་ནས་བོད་ཀྱི་བདེན་མཐའ་སེལ་རྒྱུ་གལ་ཆེན་པོ་རེད། བོད་ལ་རང་སྲིད་རང་སྐྱོང་ཐོབ་ན། ༸རྒྱལ་བ་རིན་པོ་ཆེའི་དགོངས་པ་དང་མི་རབས་རྒན་པ་རྣམས་ཀྱི་དགོངས་པ། བོད་མི་མང་སྤྱི་འཐུས་ལྷན་ཚོགས་ཀྱིས་གཏན་ལ་འབེབས་པའི་སྲིད་བྱུས་བསྒྲུབ་རྒྱུ་རེད། ཅེས་འགྲེལ་བརྗོད་གནང་སོང་།