ཕྱི་ལོ་༢༠༢༦ ཟླ་༥ ཚེས་༢༨ ཉིན། དྷ་རམ་སའི་ཉེ་འགྲམ་དུ་ཡོད་པའི་ཉེན་རྟོག་པའི་ཐང་ཆེན་དུ། བོད་ཀྱི་ཕྱི་དྲིལ་ལས་ཁུངས་དང་དྷ་ས་ས་གནས་འགོ་འཛིན་ལས་ཁུངས་ཀྱི་གོ་སྒྲིག་དང་། བོད་ཀྱི་སྨན་རྩིས་ཁང་། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་། བོད་ཀྱི་འགྲེམས་སྟོན་ཁང་། བོད་ཀྱི་ཟློས་གར། བོད་ཁྱིམ་སློབ་གྲྭ བོད་ཀྱི་དཔེ་མཛོད་ཁང་། འཇམ་དབྱངས་ཤེས་ཡོན་ཞབས་ཞུ་ཁང་བཅས་མཉམ་ཞུགས་ཐོག དེ་རིང་ནས་ཚེས་༣༠་བར་བོད་ཀྱི་ཞབས་བྲོ་འཁྲབ་སྟོན་དང་སྒྱུ་རྩལ་དང་ལག་ཤེས་འགྲེམས་སྟོན། བོད་སྨན་བསྟེན་གཏུགས། པར་རིས་འགྲེམས་སྟོན། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་དང་འབྲེལ་བའི་གློག་བརྙན་གཟིགས་འབུལ། བྱིས་པའི་བྱེད་སྒོ། ཟས་རིགས་ཚོང་ཁང་། རོལ་དབྱངས་འཁྲབ་སྟོན་སོགས་བརྒྱུད་ནས་རྒྱ་གར་མི་མང་ལ་བོད་ཀྱི་རིག་གཞུང་ངོ་སྤྲོད་གནང་རྒྱུ་ཡིན་འདུག

ཕྱི་ལོ་༢༠༢༦ ཟླ་༥ ཚེས་༢༧ ཉིན། བཞུགས་སྒར་དྷ་རམ་སའི་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་ར་བའི་ནང་དུ། སྤྱི་ནོར་ྋགོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གི་མདུན་ནས་བདམས་ཐོན་སྲིད་སྐྱོང་སྤེན་པ་ཚེ་རིང་མཆོག་གིས་སྐབས་༡༧ པའི་བཀའ་ཤག་གི་ལས་འཁུར་དམ་འབུལ་ཞུས་སོང་།

ཕྱི་ལོ་༢༠༢༦་ཟླ་༥ ཚེས་༢༡ ཉིན། བོད་བརྒྱུད་ནང་བསྟན་ཁྲོད་བུད་མེད་ནུས་སྟོབས་གོང་སྤེལ་ཚོགས་ཆེན་དེ་རིང་མཇུག་བསྡུས་གནང་ཡོད་པ་དང་། ཉིན་གཉིས་ཀྱི་ཚོགས་ཆེན་རིང་དགེ་བཤེས་མའི་ཕྱག་འཁྱེར་འབུལ་སྲོལ་གྱི་བྱུང་རིམ་དང་། ཤེས་ཡོན་གྱི་གནས་ཚད་དང་བསླབ་གཞིའི་རྩ་འཛིན་ཡར་རྒྱས་གཏོང་ཐབས། འཕགས་བོད་གྲུབ་ཆེན་སྐྱེས་མ་ཉེར་གཅིག་གི་རྣམ་ཐར། མ་འོངས་པའི་འཆར་སྣང་། རྒྱལ་སྤྱིའི་ནང་ངོས་འཛིན་དང་མཉམ་ལས། སྤྱི་ཚོགས་དང་དགོན་སྡེའི་ནང་དུ་དགེ་བཤེས་མའི་འགོ་ཁྲིད། སྒྲིག་འཛུགས་ཀྱི་རྒྱབ་སྐྱོར་དང་ངོས་འཛིན། གདོང་ལེན་དང་ཐབས་ལམ་བཅས་ཀྱི་ཐོག་བགྲོ་གླེང་གནང་འདུག

ཕྱི་ལོ་༢༠༢༦ ཟླ་༥ ཚེས་༢༠ ཉིན། བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། མདོ་ཁམས་ཆུ་བཞི་སྒང་དྲུག་གཞིས་བྱེས་གཉིས་དང་། ཧི་མ་ལ་ཡ་ནང་པའི་རིག་གཞུང་མཐུན་ཚོགས་ཐུན་མོང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྒྲོལ་དཀར་ཚེ་སྦྱིན་ཡིད་བཞིན་འཁོར་ལོའི་སྒོ་ནས་བརྟན་བཞུགས་བསྟར་འབུལ་ཞུས་སོང་། སྐབས་དེར། ཚོགས་པ་གཉིས་ཀྱིས་སྤྱི་ནོར་ ༸གོང་ས་སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་གཟེངས་རྟགས་གཉིས་འབུལ་བཞེས་མཛད་སོང་།

ཕྱི་ལོ་༢༠༢༦ ཟླ་༥ ཚེས་༡༣ ཉིན། བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ། བོད་མིའི་སྒྲིག་འཛུགས་དབུས་འོས་བསྡུ་ལས་ཁང་ནས་སྐབས་༡༨ པའི་བོད་མི་མང་སྤྱི་འཐུས་ཀྱི་དངོས་གཞིའི་འོས་བསྡུའི་གྲུབ་འབྲས་གསལ་བསྒྲགས་གནང་སོང་། ཐེངས་འདིར་ཆོལ་ཁ་དང་ཆོས་བརྒྱུད། ཨ་རི་དང་ཡུ་རོབ། ཨོ་གླིང་བཅས་ནས་སྤྱི་འཐུས་གསར་པ་༡༧ སླེབས་འདུག དངོས་གཞིའི་འོས་བསྡུའི་ནང་འོས་འཕེན་པ་གྲངས་ ༤༡༦༣༨ བྱུང་ཡོད་ཅིང་། དེའི་ཁོངས་འོས་ཤོག་རྩིས་མེད་གྲངས་ ༥༧༠ བྱུང་འདུག

ཕྱི་ལོ་༢༠༢༦ ཟླ་༤ ཚེས་༣༠ ཉིན། གངས་སྐྱིད་རྟེན་གཞི་བྱས་པའི་བོད་ཀྱི་འགྲེམས་སྟོན་ཁང་དུ། ཕྱི་དྲིལ་བོད་ཀྱི་འགྲེམས་སྟོན་ཁང་དང་གདན་ས་དཔལ་སྤུངས་ཤེས་རབ་གླིང་ཐུན་མོང་ནས་བོད་ཀྱི་ཡིག་གཟུགས་ཉིན་མོ་སྲུང་བརྩི་ཞུས་སོང་། སྐབས་དེར། སྐུ་མགྲོན་གཙོ་བོར་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ཕེབས་གནང་འདུག གདན་ས་དཔལ་སྤུངས་ཤེས་རབ་གླིང་གི་ཡིག་གཟུགས་མཁས་དབང་ནས་བོད་ཀྱི་ཡིག་གཟུགས་ལོ་རྒྱུས་དང་ལག་ལེན་སྐོར་གཏམ་བཤད་གནང་སོང་།