ཕྱི་ལོ་༢༠༢༦ ཟླ་༤ ཚེས་༢༦ ཉིན། འཛམ་གླིང་རྒྱལ་ཁབ་ཉེར་བདུན་ནང་གི་བོད་མི་ཚོས་ཚ་ཚ་འུར་འུར་ངང་ནས་སྐབས་༡༨ པའི་བོད་མི་མང་སྤྱི་འཐུས་ཀྱི་འོས་མི་རྣམས་ལ་སྔོན་འགྲོའི་འོས་འཕེན་གནང་སོང་། བཞུགས་སྒར་དྷ་སའི་རྒན་གཞོན་དར་གསུམ་གྱིས་རང་འགན་རང་འཁྱེར་གནང་ནས་སྤྱི་འཐུས་འོས་མི་རྣམས་ལ་འོས་བསྡུ་བྱ་ཡུལ་ས་ཚིགས་བཅུ་གཅིག་ནས་འོས་བླུགས་གནང་སོང་། དབུ་འོས་བསྡུ་ལས་ཁུངས་ཀྱི་འགན་འཛིན་མཆོག་གིས་རྒྱ་དམར་གཞུང་ལ་འོས་བསྡུའི་ཐོབ་ཐང་མེད། ང་ཚོས་འོས་བསྡུ་ནང་ཆ་ཤས་ལེན་ནས་རྒྱ་དམར་གཞུང་ལ་བརྡ་ལེན་གསལ་པོ་སྤྲོད་དགོས། ཞེས་བརྗོད་སོང་།

ཕྱི་ལོ་༢༠༢༦ ཟླ་བ་༤ ཚེས་༢༢ ཉིན། བཞུགས་སྒར་དྷ་རམ་སའི་ཐེག་ཆེན་ཆོས་གླིང་གཙུག་ལག་ཁང་དུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མདོ་སྟོད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་ཅེས་པ་དང་བལ་ཡུལ་སྤོག་ར་གློ་སྒྲིག་བདེ་དོན་ཚོགས་པ་ཞེས་པ་གཉིས་ནས་སྒྲོལ་དཀར་ཚེ་སྦྱིན་ཡིད་བཞིན་འཁོར་ལོའི་སྒོ་ནས་བརྟན་བཞུགས་བསྟར་འབུལ་ཞུས་སོང་། སྐབས་དེར། དད་ལྡན་བོད་མི་དང་ནང་པ་གཙོས་པའི་འཛམ་གླིང་གང་ས་ནས་ཕེབས་པའི་མི་༥༠༠༠་ཙམ་མཉམ་ཞུགས་གནང་སོང་།

ཕྱི་ལོ་༢༠༢༦ ཟླ་༤ ཚེས་༣ ཉིན། དྷ་ས་གངས་སྐྱིད་བོད་ཀྱི་འགྲེམས་སྟོན་ཁང་དུ། བོད་རང་བཙན་སྐབས་དབྱིན་ཇིའི་སྐུ་ཚབ་བྷ་སིལ་གྷོ་(Basil Gould)བོད་ཀྱི་རྒྱལ་ས་ལྷ་ས་དང་རྒྱང་རྩེ་ལ་སླེབས་པའི་སྐོར་དང་། ༧གོང་ས་མཆོག་སྐུ་ཕྲེང་བཅུ་བཞི་པའི་གསེར་ཁྲི་མངའ་གསོལ་སྐབས་ཁོང་མཉམ་ཞུགས་གནང་ཡོད་པའི་སྐོར། ༧གོང་ས་མཆོག་གིས་ཁོང་ལ་བསྐུར་བའི་གསུང་འཕྲིན་སོགས་འགྲེམས་སྟོན་གནང་སོང་། འགྲེམས་སྟོན་དེ་ནི་སྲིད་སྐྱོང་སྤེན་པ་ཚེ་རིང་མཆོག་དང་དབྱིན་ཇིའི་སྐུ་ཚབ་བྷ་སིལ་གྷོ་ཡི་ཚ་མོ་གཉིས་ཀྱིས་དབུ་འབྱེད་གནང་སོང་།

ཕྱི་ལོ་༢༠༢༦ ཟླ་༣ ཚེས་༣༡ ཉིན། བོད་ཀྱི་གཞོན་ནུ་ལྷན་ཚོགས་ཀྱིས་དྷ་རམ་ས་ནས་ལྡི་ལི་དབར་ཞི་བའི་གོམ་བགྲོད་ཅིག་གོ་སྒྲིག་ཞུས་འདུག དེར་བོད་མི་༦༥་མཉམ་ཞུགས་གནང་འདུག གོམ་བགྲོད་དེའི་དམིགས་ཡུལ་ནི་རྒྱ་གཞུང་གིས་བོད་ནང་མི་རིགས་དང་ཆོས་རིག་མཉམ་བསྲེས་གྱི་སྲིད་བྱུས་ལག་བསྟར་བྱེད་བཞིན་པར་མཚམས་འཇོག་ཡོང་ཐབས་དང་། བོད་ནང་ཁོར་ཡུག་གཏོར་བཤིག་གཏོང་བཞིན་པར་མཚམས་འཇོག་ཡོང་ཐབས། ༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་གཙོས་པའི་ཉེས་མེད་ཀྱི་ཆབ་སྲིད་བཙོན་པ་རྣམས་གློད་གྲོལ་ཐབས་བཅས་ཡིན་འདུག

ཕྱི་ལོ་༢༠༢༦ ཟླ་༣་ཚེས་༣༠ ཉིན། ལས་ཉིན་གྲངས་༡༣ རིང་ཚོགས་པའི་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་མཐའ་མ་མཇུག་བསྒྲིལ་གནང་བ་དང་། སྐབས་དེའི་གྲོས་ཚོགས་ཐོག་བོད་མིའི་སྒྲིག་འཛུགས་ཀྱི་རྩིས་ལོ་༢༠༢༦་་༢༧ ལོའི་ལས་ཁུངས་མ་ལག་དང་བཅས་པའི་འགྲོ་གྲོན་སྔོན་རྩིས་བཀའ་འཁྲོལ་བསྡོམས་སྒོར་ ༣,༤༠༨,༨༣༦,༣༠༤ སྤྱི་མོས་ཐོག་གཏན་འབེབས་དང་། བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་ཀྱི་གྲོས་འཆར་གཏན་འབེབས། དེ་བཞིན་བོད་ཀྱི་རྒྱལ་དར་དང་། རྒྱལ་རྟགས་བེད་སྤྱོད་བྱེད་ཕྱོགས་ཀྱི་སྒྲིག་གཞི་གཏན་འབེབས་བཅས་གནང་སོང་།

ཕྱི་ལོ་༢༠༢༦ ཟླ་༣ ཚེས་༢༦ ཉིན། གངས་སྐྱིད་བོད་ཀྱི་སྲིད་བྱུས་ཉམས་ཞིབ་ཁང་གི་ཚོགས་ཁང་དུ། རྩོམ་པ་པོ་ལྷ་མོ་དོན་གྲུབ་ལགས་ཀྱིས་བྲིས་པའི་དཔའ་བོ་འཇམ་དཔལ་ཡེ་ཤེས་ཀྱི་སྐོར་གྱི་སྙན་དེབ་ <<བསྐལ་པའི་མེ་འཕྲིན་དམར་པོ།>> ཞེས་པའི་དཔེ་དེབ་ཅིག་དཔའ་བོ་འཇམ་དཔལ་ཡེ་ཤེས་ལགས་ཀྱིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་བའི་ཉིན་མོ་དང་བསྟུན་དབུ་འབྱེད་གནང་སོང་། དཔེ་དེབ་དེ་ནི་དཔའ་བོ་འཇམ་དཔལ་ཡེ་ཤེས་ལགས་གཙོས་པའི་བོད་བསྟན་སྲིད་དང་མི་རིགས་ཆེད་རང་ལུས་མེར་བསྲེགས་གནང་མཁན་གྱི་བོད་ཀྱི་དཔའ་བོ་དཔའ་མོ་ཡོངས་ལ་རྗེས་དྲན་དང་བཀའ་དྲིན་མཚོན་ཆེད་དུ་ཡིན་འདུག