༄༅། །ཕྱི་ལོ་ ༢༠༡༩ ཟླ་ ༣ ཚེས་ ༡༠ འདི་ནི་བོད་མི་རྣམས་ཀྱིས་རྒྱ་ནག་དབང་འཛིན་པར་ཞི་བའི་ངོ་རྒོལ་བྱས་ནས་ལོ་ངོ་ ༦༠ འཁོར་བའི་དུས་ཚིགས་གལ་ཆེན་ཞིག་ཆགས་ཡོད།

༢༠༡༩ལོའི་ཟླ་༣ ཚེས་༨ ཀྱིས་ཉིན། བོད་མིའི་སྒྲིག་འཛུགས་ཀྱི་ཕྱི་དྲིལ་འགྲེམས་སྟོན་ཚན་པའི་གོ་སྒྲིག་འོག་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་ཉེ་འགྲམ་དུ་ཡོད་པའི་བོད་ཀྱི་འགྲེམས་སྟོན་ཁང་དུ་བོད་མིའི་ངོ་རྒོལ་གྱི་ལོ་ངོ་༦༠ ཐམ་པ་བཞེས་པའི་པར་རིས་འགྲེམས་སྟོན་གྱི་དབུ་འབྱེད་མཛད་སྒོ་ཞིག་ཚོགས་སོང་།

༢༠༡༩ལོའི་ཟླ་༣ཚེས་༨ ཉིན།  རྡ་ས་ཐེག་ཆེན་གཙུག་ལག་ཁང་དུ་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་གོ་སྒྲིག་འོག་བོད་ནང་རྒྱ་དམར་འོག་གདུག་རྩུབ་མྱངས་དང་མྱོང་བཞིན་པའི་བོད་རིགས་སྤུན་ཟླ་ཚོར་གདུང་སེམས་མཉམ་བསྐྱེད་ཆེད་དུ་མཆོད་འབུལ་སྨོན་ལམ་ཞིག་འཚོགས་སོང་།

༢༠༡༩ལོའི་ཟླ་༣ ཚེས་༨ ཉིན། འཇར་མ་ནི་ དང་ཁེ་ན་ཌ། སི་ལོ་ཝ་ཀི་ཡ། ཐེ་ཝན་བཅས་ཀྱི་གྲོས་ཚོགས་འཐུས་མི་རྣམས་ཀྱིས་བོད་དོན་ལ་རྒྱབ་སྐྱོར་བྱེད་ཆེད། འདི་ལོའི་གསུམ་བཅུའི་དུས་དྲན་ཐེངས་༦༠ ལ་དམིགས་ཏེ་རྡ་ས་གངས་ཅན་སྐྱིད་གཞུང་དུ་སླེབས། ཁོ་ཚོས་བོད་ཀྱི་འཚེ་མེད་ཞི་བའི་ལས་འགུལ་ལ་བསྔགས་བརྗོད་དང་། ཆོས་དད་རང་དབང་དང་འགྲོ་བ་མིའི་ཐོབ་ཐང་ལ་རྒྱབ་སྐྱོར། ༸གོང་ས་མཆོག་ལ་དད་འདུན་ཡོད་པ་སོགས་ཀྱི་སྐོར་ནས་གསུངས་ཤིང་། གཞན་ཡང་རྒྱ་ནག་གི་སྲིད་ཇུས་ལ་སྐྱོན་བརྗོད་ཀྱང་གནང་སོང་།

༢༠༡༩ལོའི་ཟླ་༣་ཚེས་༨ཉིན། བཞུགས་སྒར་རྡ་ས་མེག་ལོར་སྤྱི་ཐང་དུ་བོད་ཀྱི་བུད་མེད་ལྷན་ཚོགས་ཀྱིས་གསུམ་བརྒྱད་རྒྱལ་སྤྱིའི་བུད་མེད་ཉིན་མོ་སྲུང་བརྩི་ཞུས་ནས་བོད་ཕྱི་ནང་གཉིས་ཀྱི་བུད་མེད་ཤེས་ཡོན་དང་ཆབ་སྲིད། ཆོས་ལུགས། སྤྱི་ཚོགས་ཞབས་ཞུ་བ། སྒྱུ་རྩལ་དང་རྩོམ་རིག་བཅས་ཀྱི་ཐོག་འབུར་དུ་ཐོན་པའི་བུད་མེད་བཅོ་ལྔའི་ལོ་རྒྱུས་དང་བྱས་རྗེས་འགྲེམས་སྤེལ་གནང་སོང་།

༢༠༡༩ལོའི་ཟླ་༣་ཚེས་༤ཉིན། བཞུགས་སྒར་རྡ་ས་༸རྒྱལ་བའི་ཕོ་བྲང་དུ་༸གོང་ས་སྐྱབས་མགོན་ཆེན་པོ་མཆོག་གིས་ཐེ་ལན་ནས་ཕེབས་པའི་གནད་ཡོད་མི་སྣ་ལྔ་བཅུ་ཙམ་ལ་མཇལ་ཁ་གནང་སྟེ། ནང་པ་ཚོས་མཐུན་སྒྲིལ་བྱས་ནས་ལཛམ་གླིང་ཞི་བདེ་གོང་འཕེལ་གཏོང་དགོས་ཞེས་གསུངས་འདུག