ཕྱི་ལོ་༢༠༢༤ ཟླ ༣ ཚེས ༡༢ཉིན། བོད་ཀྱི་བུད་མེད་ལྷན་ཚོགས་གི་གོ་སྒྲིག་འོག བོད་ཀྱི་བཙུན་མ་དང་སློབ་ཕྲུག བོད་ཀྱི་བུད་མེད་རྣམས་ཀྱིས་བཞུགས་སྒར་རྡ་རམ་སའི་ཐེག་ཆེན་ཆོས་གླིང་གཙུག་ལག་ཁང་གི་དཔའ་བོ་རྡོ་རིའི་མདུན་དུ། བོད་ཀྱི་བུད་མེད་སྒེར་ལངས་ཐེངས་༦༥་པ་སྲུང་བརྩི་ཞུའི་མཛད་སྒོ་ཚོགས་རྗེས། བོད་ཀྱི་བུད་མེད་རྣམས་ཀྱིས་གཙུག་ལག་ཁང་ནས་རྡ་ཤོད་ཀ་ཅ་རིའི་བར་དུ་བོད་ལ་རང་དབང་དགོས། བོད་ལ་འགྲོ་བ་མིའི་ཐོབ་ཐང་དགོས། བོད་ཀྱི་ཆབ་སྲིད་བཙོན་པ་རྣམས་གློད་གྲོལ་དགོས། བོད་རང་བཙན་གཙང་མ་ཡིན། བོད་རྒྱལ་ལོ་སོགས་ཀྱི་སྐད་འབོད་བསྒྲོགས་ནས་ཞི་བའི་གོམ་བགྲོད་ལམ་གནང་སོང་།
བོད་མི་རྣམས་ཀྱིས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་༦༥ པ་གོམ་བགྲོད་ལམ་ནས་སྲུང་བརྩི་ཞུས་སོང་།
ཕྱི་ལོ་༢༠༢༤ ཟླ་༣ ཚེས་༡༠ ཉིན། གཞུང་འབྲེལ་མིན་པའི་ཚོགས་པ་ཆེ་ཁག་བཞི་ཡིས་གོ་སྒྲིག་འོག རྡ་རམ་ས་ཁུལ་གྱི་བཀའ་བློན་དང་སྤྱི་འཐུས། དགེ་འདུན་པ་དང་བཙུན་མ། སློབ་ཕྲུག དེ་བཞིན་མི་མང་བརྒྱ་ཕྲག་མང་པོས་གཙུག་ལག་ཁང་ནས་རྡ་ཤོད་ཀ་ཅ་རི་བར་དུ་ཞི་བའི་གོམ་བགྲོད་གནང་ནས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༥ པ་དང་རྒྱལ་གཅེས་དཔའ་བོ་དཔའ་མོའི་ཉིན་མོ་སྲུང་བརྩི་ཞུས་གནང་སོང་། སྐབས་དེར་ཚོགས་འདི་དག་གིས་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་དང༌། རྒྱ་ནག་གིས་བོད་དུ་འཛིན་པའི་དམ་དྲག་སྲིད་བྱུས། བོད་ནང་ཛ་དྲག་གི་གནས་སྟངས་སོགས་ལ་བརྟེན་བོད་མི་སྤྱི་སྒེར་ཡོངས་དང་༌། ལྷག་པར་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་ནས་རྒྱལ་སྤྱིའི་བོད་དོན་རྒྱབ་སྐྱོར་བ་སྤྱི་སྒེར་རྣམས་ལ་འབྲེལ་ལམ་སྔར་ལྷག་དམ་འཛིན་གནང་རྒྱུ་དང་། རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་དང་སྟབས་བསྟུན་གྱིས་གཞུང་འབྲེལ་མ་ཡིན་པའི་ཚོགས་པ་ཆེ་ཁག་རྣམས་ཀྱིས་མཉམ་འབྲེལ་ཐོག་བོད་དོན་འཐབ་རྩོད་ཀྱི་ནུས་ཤུགས་གོང་སྤེལ་གཏོང་རྒྱུ་ཡིན་སྐོར་བརྗོད་སོང་།
༸གོང་ས་མཆོག་མཆོག་གིས་སྟོང་ཉིད་དང་བྱང་སེམས་སྒོམ་པ་ནི་ཚེ་སྒྲུབ་ཀྱི་མཆོག་ཡིན་ཞེས་བཀའ་སྩལ་སོང་།
ཕྱི་ལོ་༢༠༢༤ཟླ་༡ཚེས་༢༢ཉིན། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་འབྲས་ལྗོངས་དང་ནུབ་བྷང་གྷལ། དེ་བཞིན་གནས་མཆོག་རྡོ་རྗེ་གདན་བཅས་ནས་ཟླ་གཉིས་ཙམ་གྱི་མཛད་འཕྲིན་ལེགས་པར་གྲུབ་ནས། དེ་རིང་ལྡི་ལི་མཁའ་དབྱིངས་བརྒྱུད་བཞུགས་སྒར་རྡ་སར་ཞབས་སོར་བདེ་བར་འཁོད་སོང་། བཞུགས་སྒར་རྡ་ས་གཡས་གཡོན་གྱི་བོད་མི་གཙོས་པའི་སེར་སྐྱ་མི་མང་རྒན་གཞོན་ཀུན་གྱིས་ལག་ཏུ་ཁ་བཏགས་དང་། བདུག་སྤོས། མེ་ཏོག་བཅས་བཟུང་ནས། དགའ་དད་སྤྲོ་གསུམ་གྱིས་དགའ་བའི་འཛུམ་དང་བཅས་ལམ་འགྲམ་ནས་ཕྲེང་བསྒྲིགས་ཏེ་བསུ་མ་བྱས་སོང་།
༸གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་ཕུལ་ནས་མི་ལོ་ཧྲིལ་པོ་༣༤ འཁོར་བའི་དུས་དྲན་སྲུང་བརྩི་ཞུས་སོང་།
ཕྱི་ལོ་༢༠༢༣ ཟླ་༡༢ ཚེས་༡༠ ཉིན། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་ཕུལ་ནས་མི་ལོ་ཧྲིལ་པོ་ ༣༤ འཁོར་བའི་དུས་དྲན་སྲུང་བརྩི་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཐེངས་༧༥ བཅས་སྲུང་བརྩི་ཞུ་བའི་གཞུང་འབྲེལ་མཛད་སྒོ་ཞིག་ཚོགས་སོང་།
རྡ་སར་བོད་ཁམས་སྡེ་དགེའི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་ཀྱི་ལས་འགུལ་ཞིག་སྤེལ་སོང་།
ཕྱི་ལོ་༢༠༢༤ ཟླ་༢ ཚེས་༢༢ཉིན། བཞུགས་སྒར་རྡ་རམ་སར་རྟེན་གཞི་བྱས་པའི་བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་བཞི་ནས་རྒྱ་གཞུང་གིས་བོད་ཁམས་སྡེ་དགེ་ལ་ཆུ་མཛོད་ཆེན་པོ་ཞིག་གསར་རྒྱག་གི་ལས་གཞིར་དམིགས་ཏེ་ཡུལ་མི་རྣམས་ས་གནས་གཞན་དུ་གནས་སྤོ་དགོས་པའི་བཙན་བཀའ་བཏང་ཡོད་པར་བོད་མི་མང་པོ་ཞིག་དེར་ངོ་རྒོལ་བྱས་དང་བྱེད་བཞིན་པར་ཛ་དྲག་གནས་སྟངས་ལ་གདུང་སེམས་མཉམ་སྐྱེད་ཀྱི་ལས་འགུལ་ཞིག་སྤེལ་སོང་།
རྡོར་གདན་དུ་རྒྱལ་སྤྱིའི་ནང་པའི་དགེ་འདུན་པའི་ལྷན་ཚོགས་འཚོགས་མགོ་བརྩམས་སོང་།
ཕྱི་ལོ་༢༠༢༣ ལོའི་ཟླ་༡༢ ཚེས་༢༠ ཉིན། གནས་མཆོག་རྡོ་རྗེ་གདན་དུ་རྒྱལ་སྤྱིའི་ནང་པའི་དགེ་འདུན་པའི་ལྷན་ཚོགས་འཚོགས་མགོ་བརྩམས་ཤིང་། སྤྱི་ནོར་༸གོང་ས་རྒྱལ་བ་རིན་པོ་ཆེ་མཆོག་གིས་གཙོས་པའི་ནང་པའི་པཱ་ལི་དང་ལེགས་སྦྱར་ཆོས་བརྒྱུད་གཉིས་ཀའི་བླ་ཆེན་རྣམས་དང་། སྐུ་ཚབ་རྣམས། དགེ་འདུན་པ་བཅས་ཚོགས་ཞུགས་མི་གྲངས་སུམ་སྟོང་ལྷག་ལྷན་འཛོམས་བྱུང་འདུག་ལ། ཁྱོན་ཉིན་གྲངས་གསུམ་གྱི་རིང་ཉན་བཤད་ཀྱི་བགྲོ་གླེང་དང་ཐུན་མོང་གི་སྨོན་ལམ་བཅས་འཚོགས་འཆར་ཡོད་འདུག
༸གོང་ས་མཆོག་གི་གཟེངས་རྟགས་སྒྲིག་གཤོམ་ཁང་མང་ཚོགས་ལ་དངོས་སུ་སྒོ་ཕྱེ་སོང་།
ཕྱི་ལོ་༢༠༢༣ ལོའི་ཟླ་༡༢ ཚེས་༡༠ ཉིན། ༸གོང་ས་རྒྱལ་བ་རིན་པོ་ཆེ་མཆོག་ལ་ནོ་སྦེལ་ཞི་བདེ་གཟེངས་རྟགས་ཕུལ་བའི་ཉིན་མོ་དང་སྟབས་བསྟུན་ནས། བཞུགས་སྒར་རྡ་ས་ལྷ་རྒྱལ་རིར་ཆགས་ཡོད་པའི་༸གོང་ས་ཏཱ་ལའི་བླ་མའི་དཔེ་མཛོད་དང་ཡིག་ཚགས་ཁང་གི་གཟེངས་རྟགས་སྒྲིག་གཤོམ་ཁང་རྒྱ་ཆེའི་མི་མང་ལ་དུས་སྐབས་སོ་སོར་མཇལ་ཁའི་གོ་སྐབས་བསྐྲུན་རྒྱུའི་ལས་གཞི་དབུ་འབྱེད་གནང་སོང་།
དེ་ཡང་། གོང་ཚེས་ཉིན་གྱི་ཞོགས་པ་ཆུ་ཚོད་༨ པའི་ཐོག བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་དང་། སྐུ་མགྲོན་གཙོ་བོ་ཧི་མ་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་ཤར་མཱ་མཆོག་རྣམ་གཉིས་ནས། ༸གོང་ས་ཏཱ་ལའི་བླ་མའི་དཔེ་མཛོད་དང་ཡིག་ཚགས་ཁང་གི་གཟེངས་རྟགས་སྒྲིག་གཤོམ་ཁང་རྒྱ་ཆེའི་མི་མང་ལ་དུས་སྐབས་སོ་སོར་མཇལ་ཁའི་གོ་སྐབས་བསྐུན་རྒྱུའི་ལས་གཞི་དབུ་འབྱེད་གནང་སོང་། སྐབས་དེར། གླིང་རིན་པོ་ཆེ་དང་། བོད་མིའི་སྒྲིག་འཛུགས་ཀྱི་མང་གཙོ་ཀ་བ་གསུམ་གྱི་མཛད་གཙོ་རྣམ་པ་ཡང་དབུ་འབྱེད་མཛད་སྒོར་ཕེབས་འདུག
༸གོང་ས་ཏཱ་ལའི་བླ་མའི་དཔེ་མཛོད་དང་ཡིག་ཚགས་ཁང་འདི་ཉིད་དུ་༸གོང་ས་མཆོག་གི་གསུང་འབུམ་ཕྱོགས་སྒྲིག་ཁང་དང་། ༸གོང་ས་མཆོག་གི་བཀའ་རྩོམ་ཡིག་སྒྱུར་ཚན་པ། སྒྲ་བརྙན་སྡེ་ཚན། ཉམས་ཞིབ་ཚན་པ། ཡིག་ཚགས་ནང་འཇུག་སྡེ་ཚན། དཔེ་མཛོད། ཡིག་ཚགས་ཁང་། གཟེངས་རྟགས་སྒྲིག་གཤོམ་ཁང་བཅས་ཀྱི་སྡེ་ཚན་འདུག དེ་ཡང་གཟེངས་རྟགས་སྒྲིག་གཤོམ་ཁང་གི་ནང་དུ་༸གོང་ས་མཆོག་ལ་ཕུལ་བའི་ནོ་སྤེལ་ཞི་བདེའི་གཟེངས་རྟགས་དང་། ཌེམ་པལ་ཌོན་གསེར་གྱི་རྟགས་མ། ཨ་རིའི་གྲོས་ཚོགས་ཀྱི་གསེར་གྱི་རྟགས་མ། ར་མོན་མེག་སེ་སེ་གཟེངས་རྟགས་ཁག་གིས་གཙོས་པའི་གཟེངས་རྟགས་རྣམས་སྒྲིག་གཤོམ་གནང་འདུག
ཐོག་མར། ༸གོང་ས་ཏཱ་ལའི་བླ་མའི་དཔེ་མཛོད་དང་ཡིག་ཚགས་ཁང་གི་འགན་འཛིན་འཇམ་དཔལ་ལྷུན་གྲུབ་ལགས་ཀྱིས་དཔེ་མཛོད་དང་ཡིག་ཚགས་འདི་ཉིད་ཀྱི་ངོ་སྤྲོད་གནང་དོན། ༸གོང་ས་ཏཱ་ལའི་བླ་མའི་དཔེ་མཛོད་དང་ཡིག་ཚགས་ཁང་ནི། སྤྱི་ནོར་༸གོང་ས་༸སྐྱབས་མགོན་༸སྐུ་ཕྲེང་བཅུ་བཞི་པ་ཆེན་པོ་མཆོག་གི་གསུང་ཆོས་དང་། བཀའ་སློབ། བཀའ་རྩོམ། གསུང་འཕྲིན། བཀའ་ཡིག །སྐུ་པར། གཟེངས་རྟགས་སོགས་ཉར་ཚགས་དང་བདག་གཅེས་སྲུང་སྐྱོབ་སླད། ཆེད་དུ་འཆར་འགོད་འཛུགས་སྐྲུན་བྱས་པ་ཞིག་ཡིན། འདི་ནི་དོན་གཉེར་ཅན་རྣམས་ལ་གང་གི་མཛད་འཕྲིན་སྐོར་ཞིབ་འཇུག་གི་རྒྱུ་ཆ་མཁོ་སྤྲོད་གནང་ས་དང་། མི་རབས་རྗེས་མ་རྣམས་ཀྱིས་སློབ་གཉེར་བྱ་ཆོག་པའི་ལྟེ་གནས་ཁང་ཞིག་ཡིན་པར་མ་ཟད། ལྷག་པར་གང་གིས་ང་ཚོ་དང་མ་འོངས་པའི་མི་རབས་རྣམས་ལ་གནང་བའི་རྩ་ཆེ་བའི་ཤེས་རབ་ཀྱི་མཛད་རྗེས་ཡོངས་རྫོགས་དེང་དུས་ཚན་རིག་དང་མཐུན་པའི་ལམ་ནས་ཉར་ཚགས་དང་སྲུང་སྐྱོབ་ཁྱབ་སྤེལ་བཅས་བྱ་སའི་མཛོད་ཁང་ཡང་ཡིན། ཞེས་གསུངས་སོང་།
དེའི་རྗེས། སྐུ་མགྲོན་གཙོ་བོ་ཧི་མ་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་ཤར་མཱ་མཆོག་གིས་གསུང་དོན། ༸གོང་ས་ཏཱ་ལའི་བླ་མའི་དཔེ་མཛོད་དང་ཡིག་ཚགས་ཁང་འདི་ཉིད་ནི། རྡ་རམ་ས་ལ་དང་། ཧི་མ་ཅལ། རྒྱ་གར་བ་ལ་གལ་ཆེན་པོ་ཡིན་པ་མ་ཟད། རྒྱ་གར་དུ་ཕེབས་མཁན་སུ་འདྲ་ཞིག་ཡིན་ནའང་ཏན་ཏན་འདིར་ཕེབས་ནས་༸གོང་ས་མཆོག་གི་མཛད་རྗེས་ལ་རྒྱུས་ལོན་བྱེད་ངེས་རེད། སྔོན་ཆད་ཡིན་ན། རྡ་རམ་ས་ལ་ནི་ས་ཁུག་རི་ཁུག་ཅིག་ཡིན་ལ་ཤེས་མཁན་ཤིན་ཏུ་ཉུང་། ༸གོང་ས་རྒྱལ་བ་རིན་པོ་ཆེ་མཆོག་འདིར་ཕེབས་པ་ནས་བཟུང་། རྡ་རམ་ས་ལ་ཁོང་གི་བཞུགས་གནས་སུ་གྱུར་པ་དང་། འཛམ་གླིང་གིས་རྡ་རམ་ས་ངོ་ཤེས་ཆགས་ཡོད། ཅེས་གསུངས་སོང་།
དེ་ནས། བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་ནས། ༸གོང་ས་ཏཱ་ལའི་བླ་མའི་དཔེ་མཛོད་དང་ཡིག་ཚགས་ཁང་འདི་ནི། མགོན་པོ་གང་ཉིད་ཀྱི་ཐུགས་དགོངས་ལྟར་ཡིག་ཚགས་སོགས་བདག་གཉེར་གཅེས་སྐྱོང་བྱེད་ས་ཞིག་ཡིན་པ་ལས་འགྲེམས་སྟོན་ཁང་མིན་པས། དཔེ་མཛོད་དང་ཡིག་ཚགས་ཁང་འདི་ཉིད་མི་མང་ལ་སྒོ་ཕྱེ་དགོས་པའི་ལས་འགན་མེད་ནའང་། བར་ལམ་ནས་མང་ཚོགས་ཀྱི་ནང་ནས་དད་འདུན་གྱི་སྒོ་ནས་མགོན་པོ་མཆོག་གི་མཛད་རྗེས་ལ་མཇལ་ཁ་ཞུ་འདོད་ཡོད་པ་དེ་འདྲ་བྱུང་ཡོད་པ་དང་། མང་ཚོགས་ལ་མཇལ་ཁ་ཞུ་རྒྱུའི་གོ་སྐབས་ཤིག་མེད་ན་མ་འོས་པ་ཞིག་ཏུ་དྲན་ནས། དེ་རིང་དཔེ་མཛོད་དང་ཡིག་ཚགས་ཁང་འདི་ཉིད་ཀྱི་གཟེངས་རྟགས་སྒྲིག་གཤོམ་ཁང་རྒྱ་ཆེའི་མི་མང་ལ་དུས་སྐབས་སོ་སོར་མཇལ་ཁའི་གོ་སྐབས་བསྐྲུན་རྒྱུའི་ལས་གཞི་དབུ་འབྱེད་བྱས་པ་ཞིག་ཡིན། ཞེས་ལས་གཞི་འདི་དབུ་འབྱེད་ཀྱི་དགོས་པ་རྒྱུ་མཚན་གསུངས་སོང་།
ཡང་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་ནས། སྤྱི་སྒེར་གང་རུང་གི་ལག་ཏུ་ཡི་གེ་དང་། སྐུ་པར། དངོས་རྫས། མདོར་ན། ༸གོང་ས་མཆོག་གི་མཛད་འཕྲིན་དང་འབྲེལ་གང་ཞིག་ཡིག་ཚགས་སུ་ཉར་ཡོད་པ་དེ་འདྲ་ཡོད་ན། དེ་ངོ་མའམ་འདྲ་བཤུས་དཔེ་མཛོད་དང་ཡིག་ཚགས་འདི་ལ་གནང་ན་སྤྱི་སྒེར་གཉིས་ལ་ཕན་ཐོགས་ཆེ་ཚུལ་ཡང་གསུངས་སོང་།
གཞན་ཡང་། ྋགོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་ནས་མང་ཚོགས་རྣམས་གཟེངས་རྟགས་སྒྲིག་གཤོམ་ཁང་ལ་ཇི་ལྟར་མཇལ་ཁ་ཕེབས་ཚུལ་དང་འབྲེལ་བའི་གསལ་བསྒྲགས་དོན་ཚན་ལྔ་ཅན་ཞིག་ཡོད་པ་གཤམ་གསལ་རེད།
༡༽ བདུན་རེའི་རེས་གཟའ་ཟླ་བ་དང་གཞུང་འབྲེལ་གུང་གསེང་ཁག་ཕུད། གཞན་རེས་གཟའ་མིག་དམར་ནས་སྤེན་པ་བར་མཇལ་བཅར་དུ་གཏོང་རྒྱུ།
༢༽ ཉིན་རེའི་སྔ་དྲོའི་ཆུ་ཚོད་༡༠།༠༠ ནས་༡༡།༠༠ བར་ཆུ་ཚོད་གཅིག་རིང་མི་གྲངས་ ༥༠ དང་ཕྱི་དྲོའི་ཆུ་ཚོད་༣།༠༠ ནས་༤།༠༠ བར་ཆུ་ཚོད་གཅིག་རིང་མི་གྲངས་༥༠ བཅས་ཉིན་རེར་ཁྱོན་མི་གྲངས་༡༠༠ ཐམ་པ་རེ་མཇལ་བཅར་དུ་གཏོང་རྒྱུ། ༣༽ མཇལ་བཅར་དུ་མ་ཕེབས་སྔོན་དཔེ་མཛོད་དང་ཡིག་ཚགས་ཁང་གི་སྒོ་ཆེན་འགྲམ་དུ་ཐོ་འགོད་ངེས་པར་གནང་དགོས་པ་དང། སོ་སོའི་ངོས་འཛིན་ལག་འཁྱེར་ཡང་མཉམ་འཁྱེར་དགོས་པ་ཡིན། ཉིན་རེའི་མཇལ་བཅར་བའི་གྲངས་ཚད་ལོན་མཚམས་ཐོ་འགོད་མཚམས་འཇོག་གིས་ཕྱི་ཉིན་དེ་ལྟར་བྱ་རྒྱུ། ༤༽ གཟེངས་རྟགས་སྒྲིག་གཤོམ་ཁང་དུ་ལག་ཐོགས་ཁ་པར་དང་པར་ཆས། ལྟོ་ཕད་སོགས་མཉམ་འཁྱེར་མི་ཆོག་པས། སྒོ་འགྲམ་དུ་བཅོལ་འཇོག་བྱ་རྒྱུ། ༥༽ གོང་གསལ་མཇལ་བཅར་བའི་མི་གྲངས་ཚད་གཞི་དང་མཇལ་བཅར་གྱི་དུས་ཚོད་ལ་འགྱུར་བ་སོང་ཚེ། སྐབས་དུས་སོ་སོར་གསལ་བསྒྲགས་ཡོང་རྒྱུ། བཅས་དོན་ཚན་ལྔ་སྤེལ་འདུག