ཕྱི་ལོ་༢༠༢༤ ཟླ་༤ ཚེས་༢༥ ཉིན། སྐུ་མགྲོན་གཙོ་བོ་དང་དམིགས་བསལ་སྐུ་མགྲོན། དེ་བཞིན་སྲིད་སྐྱོང་མཆོག་དང་ཚོགས་གཙོ་མཆོགས་རྣམས་ཀྱིས་༸པཎ་ཆེན་རིན་པོ་ཆེ་མཆོག་གི་འཁྲུངས་སྐར་གྱི་རྟེན་འབྲེལ་མཚོན་ཆེད་སྤྲི་གོར་གཏུབ་བཞིན་པ།

ཕྱི་ལོ་༢༠༢༤ ཟླ་༤ ཚེས་༢༥ ཉིན། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ། བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ཀྱིས་གོ་སྒྲིག་འོག ༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་དགུང་གྲངས་ ༣༥ ཕེབས་པའི་༧སྐུའི་འཁྲུངས་སྐར་དུས་ཆེན་སྲུང་བརྩི་ཞུ་ཆེད་གཞུང་འབྲེལ་མཛད་སྒོ་ཤིག་ཚོགས་སོང་། བོད་མིའི་སྒྲིག་འཛུགས་ཀྱི་བཀའ་ཤག་དང་བོད་མི་མང་སྤྱི་ལྷན་ཚོགས་ཀྱིས་༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་མགྱོགས་མྱུར་དུ་གློད་གྲོལ་གཏོང་དགོས་པའི་འབོད་སྐུལ་ཞུས་སོང་།

ཕྱི་ལོ་ ༢༠༢༤ ཟླ་ ༤ ཚེས་ ༡༩ ཉིན། བཞུགས་སྒར་རྡ་རམ་སའི་ཐེག་ཆེན་ཆོས་གླིང་གཙུག་ལག་ཁང་དུ། སོག་པོ་གཙོས་པའི་དད་ལྡན་སེར་སྐྱ་མི་མང་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགའ་ལྡན་ལྷ་བརྒྱ་མའི་ཆོས་འབྲེལ་དབུ་འཛུགས་གནང་སོང་། སྐབས་དེར། ༸གོང་ས་མཆོག་གིས་ཤེས་པའི་རྒྱུན་གྱི་ཆ་ནས། ཁྲི་སྲུང་ལྡེའུ་བཙན་གྱི་སྐྱེ་བ་ཡིན་པ་རྟགས་དང་རྨི་ལམ་ནས་གསལ་པོར་བསྟན་ཡོང་གི་འདུག” ཅེས་གསུངས་སོང་།

ཕྱི་ལོ་༢༠༢༤ ཟླ་༤ ཚེས་ ༡ ཉིན། བོད་ཀྱི་སྲིད་བྱུས་ཉམས་ཞིབ་ཁང་དང་། རུ་སོག་དོན་གཅོད་ལས་ཁུངས། ཏེ་ལོ་རིན་པོ་ཆེའི་ཆོས་ཚོགས་གསུམ་བཟུང་འབྲེལ་ཐོག་ ༼བོད་སོག་འབྲེལ་ལམ་༽ དུས་རབས་༢༠་ནས་བཟུང་བོད་སོག་འབྲེལ་ལམ་ཆད་པའི་རྒྱུ་རྐྱེན་དང་། བསྐྱར་གསོ་ཡོང་བའི་བརྒྱུད་རིམ། མ་འོངས་པ་འཕེལ་ཕྱོགས་སྐོར་གླེང་བ། ཞེས་པའི་བརྗོད་གཞི་ཐོག་བགྲོ་གླེང་ཚོགས་འདུ་ཞིག་དབུ་འཛུགས་གནང་སོང་། སྐབས་དེར། ཏེ་ལོ་རིན་པོ་ཆེ་མཆོག་གིས་བོད་ཀྱི་གྲོགས་རྙིང་ཤོས་དང་མཐུན་གྲོགས་ནི་སོག་པོ་ཡིན་པ་དང་། བོད་སོག་གཉིས་ཀྱི་འབྲེལ་ལམ་ཉམས་པ་སླར་གསོ་དང་མི་ཉམས་གོང་འཕེལ་གཏོང་དགོས་པ་གལ་ཆེན་པོ་ཡིན་སྐོར་གསུངས་སོང་།

ཕྱི་ལོ་ ༢༠༢༤ ཟླ་ ༤ ཚེས་ ༡༩ ཉིན། བཞུགས་སྒར་རྡ་རམ་སའི་ཐེག་ཆེན་ཆོས་གླིང་གཙུག་ལག་ཁང་དུ། སོག་པོ་གཙོས་པའི་དད་ལྡན་སེར་སྐྱ་མི་མང་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགའ་ལྡན་ལྷ་བརྒྱ་མའི་ཆོས་འབྲེལ་དབུ་འཛུགས་གནང་། སྐབས་དེར། མགོན་པོ་ཉིད་ཀྱིས་ཐུགས་ཚོར་བ་ཆེན་པོ་དང་ནན་ཏན་གྱི་སྒོ་ནས་གསུང་དོན། ངོས་རང་ཨ་མདོ་སྐུ་འབུམ་ཡུལ་ནས་སྐྱེས་ནའང་། ཤེས་པའི་རྒྱུན་གྱི་ཆ་ནས། ཁྲི་སྲུང་ལྡེའུ་བཙན་གྱི་སྐྱེ་བ་ཡིན་པ་རྟགས་དང་རྨི་ལམ་ནས་གསལ་པོར་བསྟན་ཡོང་གི་འདུག ཆོས་རྒྱལ་ཁྲི་སྲུང་ལྡེའུ་བཙན་གྱིས་ལམ་སྟོན་མཛད་གནང་ཡོད་པའི་སངས་རྒྱས་པའི་བསྟན་པ་འདི་ད་ལྟ་ངོས་རང་ཚོས་ཉམས་ལེན་ལག་བསྟར་དང་འཛིན་སྐྱོང་བདག་པོ་རྒྱག་གི་ཡོད་ཅེས་ཀྱང་གསུངས་སོང་།

ཕྱི་ལོ་༢༠༢༤ ཟླ་༤ ཚེས་༣ ཉིན། ༸གོང་ས་༸སྐྱབས་མགོན་ཆེན་པོ་མཆོག་ལ་སྟོད་པ་སྐྱིད་སྡུག་དང་། སྤུ་ཧྲེང་མི་མང་ནས་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བརྟན་བཞུགས་བསྟར་འབུལ་ཞུས་སོང་། སྐབས་དེར། ༸གོང་ས་མཆོག་གིས་བཀའ་བསྩལ་དོན། བརྟན་བཞུགས་སེམས་པ་རྣམ་དག་དང་སྦྱོར་དངོས་རྗེས་ཚང་ཡག་པོ་ཞེ་དྲག་བྱུང་སོང་། ངོས་རང་ལ་ཆ་བཞག་ན་ལོ་བརྒྱ་ཕྲག་ལྷག་སྡོད་རྒྱུའི་སྨོན་ལམ་རྒྱག་བཞིན་ཡོད། སེམས་ཤུགས་སྐྱེད་བཞིན་ཡོད། ད་དུང་དགུང་ལོ་བཅོ་ལྔ་ཉི་ཤུ་ཞིག་བཞུགས་ཀྱི་རེད་ཞེས་བཀའ་བསྩལ་སོང་།

ཕྱི་ལོ་༢༠༢༤ ཟླ་༣ ཚེས་༢༩ ཉིན། ཉིན་བཅུ་གཅིག་གི་རིང་གྲོས་ཚོགས་ནང་དུ་བོད་མིའི་སྒྲིག་འཛུགས་ཀྱི་རྩིས་ལོ་༢༠༢༤་་་༢༥ ཡི་སྔོན་རྩིས་སྐོར་བགྲོ་གླེང་གནང་མཐའ། བོད་མིའི་སྒྲིག་འཛུགས་ལས་ཁུངས་མ་ལག་དང་བཅས་པའི་དགོས་དངུལ་སྔོན་རྩིས་བཀའ་འཁྲོལ་བསྡོམས་སྒོར་༣,༣༣༡,༠༢༢,༢༣༤ གྲོས་ཚོགས་བཀའ་ཁྲོལ་གནང་ཡོད་འདུག དེ་བཞིན་བོད་ནང་གི་ཛ་དྲག་གནས་སྟངས་ཐོག་ལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཞིག་དང་གཞུང་འབྲེལ་མྱ་ངན་གུས་འདུད་ཀྱི་གྲོས་ཆོད་ཅིག་བཞག་འདུག གཞན་ཡང་། བཙན་བྱོལ་བོད་མིའི་བཅའ་ཁྲིམས་བསྐྱར་བཅོས་ཁག་ཅིག་གནང་ཐུབ་ཡོད་པ་དང་ཁག་ཅིག་འགྲོ་ཐུབ་མེད་པ་རེད། དེ་རིང་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པ་མཇུག་སྒྲིལ་གནང་སོང་།