ཉེ་ཆར་ཕྱི་ལོ་༢༠༢༠ཟླ་༣ཚེས་༢༡ཉིན་ཨ་རི་ནས་ཕྱིར་རྒྱ་གར་དུ་ཕེབས་པའི་རང་ལོ་ ༦༩ཡིན་མཁན་ཞིག་ལ་རྒྱ་ནག་ཝུ་ཧན་ནས་ཁྱབ་གདལ་བྱུང་བའི་ཏོག་དབྱིབས་གཉན་རིམ་འགོས་ཤིང༌། ཕྱི་ཚེས་༢༣རེས་གཟའ་ཟླ་བའི་ཉིན་ཀངྒར་ཊན་ཌ་སྨན་ཁང་དུ་འདས་གྲོངས་སུ་གྱུར་ཡོད་པའི་གནས་ཚུལ་ཐོན་ཡོད་པ་རེད། དེར་བརྟེན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཕྱི་ལོ་ ༢༠༢༠ཟླ་༣ཚེས་༢༤རེས་གཟའ་མིག་དམར་ཉིན་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་གསར་འགོད་ལྷན་ཚོགས་ཤིག་འཚོགས་གནང་ཡོད་པདང་སྐབས་དེར་ཁོང་གིས་ཐོག་གསུངས་དོན། བོད་མི་མང་པོ་ཞིག་གིས་གནས་ཚུལ་དེ་མཁྱེན་གྱི་ཡོད་པ་རེད།

ཁ་སང་ཕྱི་ཚེས་༢༣ཉིན་བོད་མི་བསྟན་འཛིན་ཆོས་འཕེལ་ལགས་རང་ལོ་༦༩ཅན་ཞིག་ཏོག་དབྱིབས་ནད་དུག་གི་རྐྱེན་པས་འདས་གྲོངས་སུ་གྱུར་ཡོད། ས་གནས་རྒྱ་གར་གཞུང་རྫོང་གྱི་གནད་ཡོད་ཀྱི་མི་སྣ་དང་ལྷན་དུ་ཐད་ཀར་འབྲེལ་བ་བྱེད་རྗེས་གནད་དོན་རྩད་གཅོད་བྱས་པ་དང་ཕུང་པོ་རག་ཐུབ་པ་བྱུང་སོང༌། དེའི་ཐོག་ཞིབ་ཕྲ་ཞུ་ན་བསམ་སོང༌། གང་ཡིན་ཟེར་ན་བོད་མི་མང་པོ་ཞིག་ལ་སེམས་ཁྲལ་ཡོང་བཞིན་འདུག

གཞི་རྩའི་འདས་པོ་བསྟན་འཛིན་ཆོས་འཕེལ་ལགས་དང་ཀུན་ཟླ་གཉིས་ཨ་རི་ནས་ཕྱི་ཚེས་༡༥སྔ་དྲོ་ཆུ་ཚོད་༣ཐོག་རྒྱ་གར་ལྡི་ལིར་འབྱོར་འདུག གནམ་ཐང་དུ་ལུས་པོའི་ཚ་བ་སོགས་བརྟག་དཔྱད་བྱས་རྗེ་ལྡི་ལི་བསམ་ཡས་གླིང་མགྲོན་ཁང་དུ་ཉིན་གྲངས་༥བསྡད་འདུག དེ་རྗེས་ཕྱི་ཚེས་ ༢༡ཉིན་གྱི་ཞོགས་པ་ལྡི་ལི་ནས་རྡ་སར་ཐོན་ནས་དགོང་དྲོ་ཆུ་ཚོད་༦རྡ་སར་འབྱོར་འདུག ཕྱི་ཚེས་༢༢ཉིན་རྒྱ་གར་གྱི་སྲིད་བློན་མཆོག་གིས་གསུང་པ་གཞིར་བཟུང་ Janta Curfew ཞེས་རང་ཁྱིམ་དུ་བསྡད་དགོས་པའི་བཀོད་ཁྱབ་བཏང་བ་ལྟར་རང་ཁྱིམ་དུ་བསྡད་འདུག ཕྱི་ཚེས་ ༢༣ ཉིན་ཀངྒར་ཊན་ཌ་སྨན་ཁང་དུ་བརྟག་དཔྱད་སླད་བཅར་འདུག

སྐབས་དེར་སྨན་ཁང་དུ་འདས་གྲོངས་སུ་གྱུར་འདུག འདས་པོ་ཁོང་སྔོན་འགྲོ་བརྟག་དཔྱད་སྐབས་ཏོག་དབྱིབས་ནད་ཡམས་ཡིན་པར་སྨན་པས་ར་སྤྲོད་བྱུང་འདུག ཏོག་དབྱིབས་ནད་ཡམས་ཀྱི་རྐྱེན་པས་འདས་གྲོངས་སུ་གྱུར་བར་གཞུང་འབྲེལ་ནས་གསལ་བསྒྲགས་བྱེད་འདུག

ནང་མི་དེ་དག་ཕུང་པོ་དང་འབྲེལ་བ་བྱུང་ཡོད་སྟབས་ངེས་པར་དུ་ quarantine དུ་བཞུགས་དགོས་ཀྱི་ཡོད་སྟབས། བཞུགས་སྒར་ཉེ་འདབས་སུ་ཡོད་པའི་དབུས་སྣེ་ལེན་ཁང་དུ་ནང་མི་རྣམས་ཞོགས་པ་ཆུ་ཚོད་༢།༢༠ནས་བསྡད་ཡོད། ཕྱོགས་མཚུངས་ནང་མི་དང་འབྲེལ་བ་བྱུང་བ་ཆ་ཚང་ད་ལྟར་ཉིན་གྲངས་༡༤རིང་ quarantine བསྡད་རྒྱུ་ཡིན་འདུག

འདས་པོ་ཁོང་དང་ནང་མི་རྣམས་རྣམས་ལྡི་ལིའི་མགྲོན་ཁང་གང་དུ་བསྡད་ཡོད་སྐོར་སོགས་ལྡི་ལི་དོན་གཅོད་དང་ལྡི་ལི་ས་གནས་འགོ་འཛིན་སོགས་སུ་འབྲེལ་བ་གནང་ཡོད། ཕྱོགས་མཚུངས་ལྡི་ལི་མངའ་སྡེ་གཞུང་གི་འཕྲོད་བསྟེན་ལས་ཁུངས་དང་འབྲེལ་བ་བྱས་ཟིན་འདུག

འདས་པོ་བསྟན་འཛིན་ཆོས་འཕེལ་ལགས་ནི། ཕྱི་ལོ་༢༠༡༦ལོར་སྲིད་སྐྱོང་དང་སྤྱི་འཐུས་ཀྱི་འོས་བསྡུའི་སྐབས་ལ་འོས་བསྡུ་ལས་ཁུངས་ཀྱི་འགན་འཛིན་ལས་རོགས་ཀྱི་ཕྱག་ལས་གནང་འདུག བོད་མི་ཚང་མས་ཐུགས་སྨོན་གནང་རོགས། ཞེས་ཞུ་རྒྱུ་ཡིན།

གཞན་ཡང་ས་གནས་རྒྱ་གར་གཞུང་གི་ནད་ཡམས་སྔོན་འགོག་སླད་འབྱུང་འགྱུར་ཉིན་གྲངས་ ༣ རིག་མེ་གྷན་ཆ་ཚང་སྒོ་བརྒྱག་རྒྱུ་ཡིན་སྐོར་བཀོད་ཁྱབ་ལྟར། བོད་པ་སུ་འདྲ་ཞིག་ཡིན་རུང་རང་ཁྱིམ་ནས་ཕྱིར་ཐོན་མི་ཆོག་པའི་བཀོད་ཁྱབ་ནན་པོ་གནང་ཡོད་སྟབས། བོད་མིའི་ཚང་མས་དེ་དེ་བཞིན་ལག་བསྟར་གནང་རོགས་ཞེས་འབོད་སྐུལ་ཞུ་རྒྱུ་ཡིན། ཅི་སྟེ་བོད་མི་སུ་རུང་བརྩི་བཀུར་མ་ཞུས་པར་ཁྲིམས་འགལ་གྱི་གནས་ཚུལ་བུང་ཚེ་བོད་མིའི་སྒྲིག་འཛུགས་ངོས་ནས་འགན་ནམ་ཡང་ཞུ་རྒྱུ་མིན། བོད་མི་ས་ཕྱོགས་གང་སར་ཡོད་པ་རྣམས་རང་གནས་སུ་བཞུགས་རོགས།

ནད་ཡམས་དེའི་ཐོག་ལས་དོན་ཚོགས་ཆུང་ཞིག་ཟུར་འཛུགས་གནང་ཡོད།  བཞུགས་སྒར་ཁུལ་དུ་ས་གནས་ཉེན་རྟོག་མི་སྣ་ནང་དུ་སླེབས་ཏེ་ཞིབ་འཇུག་སླད་འདྲི་རྩད་སོགས་གནང་སྐབས་མཐུན་འགྱུར་རོགས་རོམ་གནང་རོགས་ཞེས་འབོད་སྐུལ་ཞུ་རྒྱུ་ཡིན། །
གནས་ཚུལ་ཡོང་ཁོངས་དབུས་བོད་མིའི་སྒྲིག་འཛུགས་ཀྱི་གསར་འགྱུར་དྲ་ཚིགས།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ཕྱི་ལོ་ ༢༠༡༨ ཟླ་ ༡༢ ཚེས་ ༢ རེས་གཟའ་ཉི་མ་ཉིན་གྱི་སྔ་དྲོ་ཆུ་ཚོད་ ༧།༣༠ ཙམ་ལ་བཞུགས་སྒར་ྋརྒྱལ་བའི་ཕོ་བྲང་ནས་སྟོན་འཁོར་ཧྲག་བསྡུས་བཅས་རྒྱ་གར་གྱི་རྒྱལ་ས་ལྡི་ལི་བརྒྱུད་རྒྱ་གར་ཨུ་ཏྟར་པྲ་དེཤ་མངའ་སྡེའི་སན་ཀི་སའམ་ལྷ་བབས་ཀྱི་གནས་ཞེས་པའི་ནང་པའི་གནས་ཆེན་དུ་ྋཞབས་སོར་བདེ་བར་འཁོད་ཡོད།

དེ་ཡང་མགོན་པོ་གང་ཉིད་མཆོག་རྒྱ་གར་ཨུ་ཏྟར་པྲ་དེཤ་མངའ་སྡེའི་ཕ་རུ་ཁཱ་བྷཏ་ (Farukhabad) གནམ་ཐང་དུ་ྋཞབས་སོར་འཁོད་སྐབས། ས་གནས་ཀྱི་གྲོས་ཚོགས་ཚོགས་མི་སྐུ་ཞབས་མུ་ཀེཤ་ཤཱར་མ་ Mukesh Sharma ལགས་དང༌། རྫོང་དཔོན། སྐོར་སྲུང་སྤྱི་ཁྱབ་སོགས་ས་གནས་ཀྱི་དཔོན་རིགས་དང༌། དེ་བཞིན་ཆིབས་སྒྱུར་གོ་སྒྲིག་ཚོགས་ཆུང་གི་ཚོགས་གཙོ་དང་ཚོགས་མི་སོགས་ནས་ཕེབས་བསུ་གཟབ་རྒྱས་ཞུས་འདུག

དེ་ཡང་མགོན་པོ་གང་ཉིད་མཆོག་རྒྱ་གར་ཨུ་ཏྟར་པྲ་དེཤ་མངའ་སྡེའི་ཕ་རུ་ཁཱ་བྷཏ་ (Farukhabad) གནམ་ཐང་དུ་ྋཞབས་སོར་འཁོད་སྐབས། ས་གནས་ཀྱི་གྲོས་ཚོགས་ཚོགས་མི་སྐུ་ཞབས་མུ་ཀེཤ་ཤཱར་མ་ Mukesh Sharma ལགས་དང༌། རྫོང་དཔོན། སྐོར་སྲུང་སྤྱི་ཁྱབ་སོགས་ས་གནས་ཀྱི་དཔོན་རིགས་དང༌། དེ་བཞིན་ཆིབས་སྒྱུར་གོ་སྒྲིག་ཚོགས་ཆུང་གི་ཚོགས་གཙོ་དང་ཚོགས་མི་སོགས་ནས་ཕེབས་བསུ་གཟབ་རྒྱས་ཞུས་འདུག

དེ་ནས་མགོན་པ་གང་ཉིད་མཆོག་ Royal Residency ཞེས་པའི་བཞུགས་གནས་སུ་ྋཞབས་སོར་བདེ་བར་འཁོད་དེ་རྒྱ་གར་གཞོན་ནུ་ནང་ཆོས་ཚོགས་པའི་དང་བླངས་ལས་བྱེད་རྣམས་ལ་དམིགས་བསལ་མཇལ་ཁ་དང་བཀའ་སློབ་སྩལ་དོན། ད་རེས་སླར་ཡང་ལྷ་བབས་ཀྱི་གནས་བྱིན་རླབས་ཅན་འདིར་འབྱོར་བ་རེད། རྩ་བའི་ཁྱེད་རང་ཚོས་ངོས་རང་འདིར་ཤོག་ཟེར་ནས་སྐད་བཏང་བ་རེད། ངོས་རང་འདིར་བདེ་པོའི་ངང་འབྱོར་ཐུབ་སོང༌། ཐུགས་རྗེ་ཆེ་ཟེར་གྱི་ཡིན།

སྤྱིར་སང་གནངས་སྐད་ཆ་ཡོང་གི་རེད། གང་ལྟར་མི་སྒེར་སོ་སོའི་མི་ཚེ་འདི་དོན་དང་ལྡན་པ་དགོས་རྒྱུ་གལ་ཆེན་པོ་རེད། འཛམ་གླིང་འདིའི་སྟེང་ལོ་སྟོང་ཕྲག་ལྷག་རིང་མི་གསོད་རེས་དང་འཁྲུག་པ་བརྒྱབ་པ་ག་ཚོད་བྱུང་འདུག དེར་བརྟེན་འཕགས་པའི་ཡུལ་འདིར་ Asimsa ཞེས་ལོ་སྟོང་ཕྲག་ལྷག་རིང་འཚེ་བ་མེད་པ་འདི་ལྟར་གནས་པ་རེད། Asimsa ཞེས་པ་ནི་འཚེ་བ་མེད་པའི་སྤྱོད་པ་རེད། འཚེ་བ་མེད་པའི་སྤྱོད་པ་ཡོང་བའི་རྩ་བ་ནི་སྙིང་རྗེར་ཐུག་ཡོད།

དངོས་འབྲེལ་འཚེ་བ་མེད་པའི་སྤྱོད་པ་རྒྱུན་འཛིན་དང་གོང་འཕེལ་གཏོང་རྒྱུར་སྙིང་རྗེ་ཧ་ཅང་རྩ་ཆེན་པོ་རེད། སེམས་ནང་ཁོང་ཁྲོ་ཧ་ཅང་ཟ་བ་ཡིན་ན་ Asimsa ཡོང་བ་འདུག་གམ། ང་ཚོས་འཚེ་བ་མེད་པའི་སྤྱོད་པ་ཞེས་བརྗོད་བཞིན་པ་འདི་འཛམ་གླིང་ནང་དགོས་མཁོ་ཡོད་པ་ཞིག་རེད་འདུག ཆོས་ཡོད་ནའང་རེད། ཆོས་མེད་ནའང་རེད། མི་སུ་ཡིན་རུང་སོ་སོའི་སྲོག་དེ་རྩ་ཆེན་པོར་རྩི་གི་རེད། དེར་བརྟེན་འཚེ་བ་མེད་པ་ཟེར་རྒྱུ་འདི་གཞན་གྱི་སྲོག་ལ་གུས་བརྩི་བྱས་ནས་འཚེ་བ་མེད་པ་ཡོང་དགོས། ཞེས་སོགས་ཀྱི་བཀའ་སློབ་སྩལ།

སྤྱིར་སན་ཀི་ས་ཞེས་པའི་ནང་པའི་གནས་ནི། སྔོན་སྟོན་པ་ཤཱཀྱ་ཐུབ་པའི་ཡུམ་སྒྱུ་མ་ལྷ་མཛེས་ལྷ་ཡུལ་དུ་འཁྲུངས་པ་མངོན་ཤེས་ཀྱིས་གཟིགས་ཏེ། ཆོས་གསུང་པའི་ཆེད་དུ་སྟོན་པ་ལྷ་གནས་སུམ་ཅུ་རྩ་གསུམ་དུ་ཕེབས་ནས་ཡུམ་དང་ལྷ་ཚོགས་རྣམས་ལ་ཆོས་གསུངས་ཤིང་དབྱར་ཞལ་གྱི་བཞེས་ཤིང་བཞུགས་པར་སན་ཀི་སའི་རྒྱལ་པོ་གསལ་རྒྱལ་སྟོན་པ་དྲན་ནས་རྫུ་འཕྲུལ་ལ་ཐོགས་མེད་མོའུ་གལ་གྱི་བུ་རྒྱུད་སྟོན་པ་མི་ཡུལ་དུ་བྱོན་པའི་གསོལ་འདེབས་ཞུས་པར། སྟོན་པ་ལྷ་མིའི་འཁོར་དང་བཅས་པ་རྫུ་འཕྲུལ་གྱི་སྐས་འཛེགས་བརྒྱུད་ནས་སླར་མི་ཡུལ་དུ་བྱོན་པའི་གནས་དེ་ཡིན་པ་ངོས་འཛིན་བྱེད་བཞིན་པ་དང༌། ཡོངས་གྲགས་སུ་ལྷ་ལས་བབས་པའི་གནས་སམ་ལྷ་བབས་གནས་ཞེས་ཀྱང་བརྗོད་ཀྱི་ཡོད། །

༢༠༡༨ ཟླ་ ༨ ཚེས་ ༡ ཉིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ལ་དྭགས་བོད་ཁྱིམ་སློབ་གྲྭའི་ཐང་ཆེན་དུ་བསོད་ནམས་གླིང་མི་མང་དང་བོད་ཁྱིམ་དགེ་སློབ་ལས་བྱེད་ཡོངས་ལ་བཀའ་སློབ་བཀའ་དྲིན་སྩལ་དོན། དེ་རིང་ངོས་ཀྱིས་འདིར་སྐད་ཆ་བཤད་རྒྱུ་ནི་བོད་གངས་ཅན་པ་ཞིག་ཡིན་པའི་ངོས་ནས་སྐད་ཆ་བཤད་ཀྱི་ཡོད།

གཉིས་ནས་གཞིས་ལུས་རྒྱ་ཆེ་མི་མང་ས་ཡ་དྲུག་ཙམ་ཡོད་པ་དེ་དག་གིས་ངོས་ལ་ཡིད་ཆེས་བྱེད་ཀྱི་ཡོད་པ་རེད། དེ་བཞིན་བཙན་བྱོལ་ལ་ཡོད་པའི་བོད་པ་ཆིག་འབུམ་ལྔ་ཁྲི་ཙམ་ཡོད་པ་དེ་དག་གིས་ངོས་ལ་ཡིད་ཆེས་བྱེད་ཀྱི་ཡོད་པ་རེད། དེར་བརྟེར་བོད་གངས་ཅན་ལྗོངས་ཀྱི་བོད་མི་གཞིས་བྱེས་ཡོངས་རྫོགས་ཀྱི་ཚབ་བྱས་ཏེ་ངོས་ཀྱིས་ཚིག་ཁ་ཤས་ཤོད་འདོད་བྱུང་། ཁྱེད་རང་ཚོ་སློབ་གྲྭ་ཐོན་པ་དེ་དག་གི་ཤེས་ཀྱི་རེད།

འཛམ་གླིང་གི་ས་ཁྲའི་ནང་ཨ་ཤི་ཡ་བརྗོད་དུས་འཛམ་གླིང་གི་མི་མང་པོས་འཛམ་གླིང་གི་ཡང་ཐོག་རྩི་རྒྱུ་ཞིག་དང་། བོད་གངས་ཅན་གྱི་ལྗོངས་འདི་ས་ཆའི་བབ་ཀྱི་ཐོག་ནས་ཡང་ཐོག་ལྟ་བུ་ཞིག་ཆགས་ཡོད། བོད་མི་རིགས་ནི་བར་སྐབས་ས་འོག་ནས་དངོས་རྫས་ཐོན་པ་དེ་འདྲ་དང་མིའི་རུས་པ་ཐོན་པ་དེ་འདྲའི་ཐོག་ནས་མིའི་འགྲོ་བ་སླེབས་ནས་ལོ་ཇི་ཙམ་ཕྱིན་པ་བར་སྐབས་ལོ་ ༣༥༠༠ བཤད་ཀྱི་འདུག ལོ་སྟོང་ཕྲག་སུམ་ཅུ་སོ་ལྔ་བཤད་ཀྱི་འདུག

གང་ལྟར་བོད་ལ་མི་རིགས་ཆགས་རྒྱུ་ནི་ཧ་ཅང་སྔ་པོ་རེད་འདུག དེ་འདྲའི་མི་རིགས་འདི་གནའ་སྔ་མོ་ཞང་བོད་གཉིས་ཞེས་ཞང་ཞུང་དང་བོད་ཅེས་ཞང་ཞུང་བོན་གྱི་རིག་གནས་དེ་འདྲ་ཧ་ཅང་མང་པོ་བཤད་རྒྱུ་ཡོད་པ་རེད། དེ་ནས་རིམ་པས་དུས་རབས་བདུན་པའི་ནང་ཆོས་རྒྱལ་སྲོང་བཙན་སྒམ་པོས་རྒྱ་བཟའ་ཀོང་ཇོ་དང་ཁྲུང་ས་བསྐྱོན། དེ་བཞིན་བལ་བཟའ་བསྐྱོན་ནས་རྒྱ་ནག་དང་བལ་པོ་བཅས་ཁྱིམ་མཚེས་ས་ཁུལ་གཉིས་ནས་ཁྲུང་ས་བསྐྱོན་པ་དེ་འདྲ་བྱས་ནས་སྐབས་དེར་གོང་མ་ཐང་གི་དུས་སུ་རྒྱ་ནག་ལ་ནང་ཆོས་ཤུགས་ཆེན་པོ་དར་ཟིན་པ་རེད། ཐོག་མ་བོད་ལ་སངས་རྒྱས་པའི་ཆོས་ལ་དོ་སྣང་དེ་དུས་ནས་ཕལ་ཆེར་བྱུང་བ་ཡིན་ས་རེད།

དེ་ནས་ཆོས་རྒྱལ་སྲོང་བཙན་སྒམ་པོའི་སྐབས་སུ་བོད་ཡིག་གསར་དུ་ཆགས་པ་ཡིན་ནའང་འདྲ། གཞན་ཡང་ཞང་ཞུང་སྨར་ཡིག་ཡོད་པ་འདི་ཡར་རྒྱས་བཏང་བ་ཡིན་ནའང་གང་ལྟར་ཐུ་མི་སམ་བྷོ་ཊའི་སྐབས་སུ་བོད་ཡིག་རྒྱ་ཡིག་ལ་དཔེ་བལྟས་མེད། རྒྱ་གར་གྱི་དེ་བ་ནཱ་ག་རཱི་ཡི་གེར་དཔེ་བལྟས་ཏེ་དབྱངས་དང་གསལ་བྱེད་ཡོད་པའི་བོད་ཡིག་གསར་གཏོད་གནང་བ་རེད། བོད་ཡིག་ཅེས་སུ་གཅིག་དང་མ་འདྲ་བ་ཞིག་ང་རང་ཚོ་རང་གི་རང་སྐྱ་ཐུབ་པའི་ཡི་གེ་ཅིག་བཟོས་འདུག ཡིག་གེ་ཡོད་པ་ཙམ་མ་ཟད།

དུས་རབས་ ༨ ནང་བཙན་པོ་ཁྲི་སྲོང་ལྡེའུ་བཙན་སྐབས་གཞི་ནས་རྒྱ་གར་ནས་སངས་རྒྱས་པའི་ཆོས་སྤེལ་རྒྱུའི་དགོངས་པ་བཞེས་ནས་བཙན་པོ་ཁྲི་སྲོང་ལྡེའུ་བཙན་གྱིས་མཁན་ཆེན་ཞི་བ་འཚོ་གདན་ཞུ་གནང་། སློབ་དཔོན་རིན་པོ་ཆེ་ཡོད་པ་རེད། མཁན་སློབ་ཆོས་གསུམ་ཞེས་དེ་འདྲའི་ཐོག་ནས་གཙོ་བོ་མཁན་ཆེན་ཞི་བ་འཚོས་ནཱ་ལེནྡྲའི་མཁས་པའི་བཞེད་གཞུང་དེ་དག་བོད་ལ་ངོ་སྤྲོད་གནང་།

ཕྱི་ལོ་༢༠༡༨ཟླ་༧ཚེས་༡༦རེས་གཟའ་ཟླ་བ་ཉིན་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་ལ་དྭགས་ལྡུམ་ར་བསམ་གཏན་གླིང་དགོན་པར་མི་མང་སྟོང་ཕྲག་བརྒལ་བར་རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་དང༌། སེམས་སྐྱེས་བཀའ་བརྒྱ་མ། དེ་བཞིན་འཇམ་དཔལ་མཚན་བརྗོད་ཀྱི་ལྗགས་ལུང་སྩལ་གནང་ཡོད་པ་རེད།

དེ་ཡང་ཐོག་མར་ནང་ཆོས་ངོ་སྤྲོད་སྩལ་དོན། ཆོས་འདི་ལམ་དང་ལུགས་སྲོལ་ལྟ་བུ་བྱས་ནས་ཕྱིན་པ་ཡིན་ན་དེར་དེ་ཙམ་གྱི་དོན་གཉེར་དང་དོ་སྣང་བསླེབ་ཐུབ་རྒྱུ་མེད། ཆོས་དེ་དེ་རིང་ཁ་སང་དུས་རབས་ ༢༡ ནང་འབྲེལ་བ་ཡོད་པ་གཅིག་ཡིན་ན། དེར་དོ་སྣང་བྱེད་དགོས་པ་ཞིག་ཆགས་ཡོད། ཅེས་གསུངས།

ཡང་ཁོང་གིས་གསུངས་དོན། སྤྱིར་ཆོས་ལུགས་ཚང་མའི་ནང་བྱམས་བརྩེའི་བསླབ་བྱ་ཡོད་པ་ལྟར་ངོས་ཀྱི་ངོས་ཤེས་ཡེ་ཤུའི་ཆོས་པ་ཁག་གཅིག་གིས་བྱམས་བརྩེའི་ཉམས་ལེན་ཧ་ལས་པ་འདུག ཕྱོགས་མཚུངས་དཔེར་ན་ཀོལ་ཀ་ཏའི་ཨ་མ་ཊེ་རེ་སར་ Mother Teresa མཚོན་ན་ཡེ་ཤུའི་ཆོས་པ་རེད། གཞན་ཕན་ཧ་ལས་པ་རེད། བྱང་ཆུབ་ཀྱི་སེམས་ཞེས་བརྗོད་ཐུབ་རྒྱུ་མ་རེད། ཤེས་རབ་ཀྱི་ཆ་ནས་བྱང་ཆུབ་ལ་དམིགས་པ་དེ་མེད་སྟབས་བྱང་ཆུབ་ཀྱི་སེམས་ཞེས་བརྗོད་མ་ཐུབ་ཀྱང་གཞན་དོན་དོན་གཉེར་གྱི་སེམས་ཤུགས་ཧ་ལས་པ་རེད། ཅེས་གསུངས་ཡོད།