ཕྱི་ལོ་༢༠༢༣་ཟླ་༤་ཚེས་༧་ཉིན་སྤེལ། རྒྱ་གཞུང་གིས་“བོད་བཅིངས་གྲོལ་བཏང་བའི་ལོ་རྒྱུས”ཞེས་པ་ཁྱབ་བསྒྲགས་བྱེད་ཆེད་ཁང་པ་དང་འགྲེམས་སྟོན་ཁག་ཅིག་ལ་“རྒྱལ་གཅེས་རིང་ལུགས་ཀྱི་སློབ་གསོའི་རྟེན་གཞི་”ཟེར་བ་ཁག་ཅིག་གསར་དུ་མིང་བཏགས་ཡོད་འདུག་པ་མ་ཟད། ད་དུང་བོད་ལ་བཙན་འཛུལ་བྱས་པར་“བོད་བཅིངས་གྲོལ་བཏང་བ་”ཟེར་ནས་དྲིལ་བསྒྲགས་དང་སློབ་གསོ་ཡང་སྤེལ་བཞིན་ཡོད་འདུག

ཕྱི་ལོ་༢༠༢༣་ཟླ་༣་ཚེས་༡་ཉིན་སྤེལ། རྒྱ་གཞུང་གིས་ཕྱི་ལོ་༢༠༢༢་ལོའི་ནང་དུ་ནག་འཇོམས་ངན་སེལ་ཟེར་བའི་སྲིད་བྱུས་ཀྱི་འོག་ནས། ཚོགས་པ་མང་པོ་ཞིག་ནག་ཚོགས་དང་ཁྲིམས་འགལ་རེད་ཟེར་ནས་མེད་པར་བཟོས་ཡོད་སྐོར་གསལ་འདུག འདི་ནི་རྒྱ་གཞུང་གིས་རང་གི་ལྟ་བ་དང་མི་མཐུན་པའི་ཚོགས་པ་དང་མི་སྒེར་རྩ་མེད་བཟོ་བའི་སྲིད་བྱུས་ཞིག་དང་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བའི་སྲིད་བྱུས་ཞིག་ཡིན་པར་བརྗོད་ཀྱི་འདུག

ཕྱི་ལོ་༢༠༢༣ ལོའི་ཟླ་༢ པའི་ཚེས་༢༨ ཉིན་སྤེལ། སློབ་དཔོན་ཆེན་མོ་དང་། ཞུས་ཆེན་གྱི་ལོ་ཙཱ་བ་ཆེན་མོ། བོད་རིག་པའི་མཁས་དབང་སངས་རྒྱས་ལགས་ཟླ་༢ ཚེས་༢༦ ཉིན་ཕ་ཡུལ་རེབ་གོང་རོང་པོ་ལྷ་སྡེར་དགུང་གྲངས་༧༡ སྟེང་སྐུ་གཤེགས་པར་བོད་ཕྱི་ནང་གཉིས་ཀྱི་དྲ་ངོས་སོགས་སུ་མྱ་ངན་གྱི་རྣམ་པ་ཤུགས་ཆེན་བསྟན་ནས། ཁོང་གི་བྱས་རྗེས་ལ་དྲན་གསོ་དང་། རྗེས་དྲན། ཡི་རང་། ཁོང་གཤེགས་པར་ཕངས་སེམས་ཀྱི་རྩོམ་ཡིག་སོགས་མང་པོ་སྤེལ་ནས་གདུང་སེམས་མཉམ་སྐྱེད་ཞུ་བཞིན་འདུག

ཕྱི་ལོ་༢༠༢༣ ཟླ་༩ ཚེས་༡༩ ཉིན། བཞུགས་སྒར་རྡ་ས་གངས་སྐྱིད་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཁང་དུ། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པ་དབུ་འཛུགས་གནང་སོང་། ཉིན་དང་པོར་གཞུང་འབྲེལ་མྱ་ངན་གུས་དུད་ཀྱིས་རྗེས་དྲན་གྲོས་ཆོད་གྲོས་འཆར་དང་། བོད་ནང་གི་ཛ་དྲག་གི་གནས་སྟངས་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་བཞག་རྒྱུ་དང་། དེ་ནས་ཆོས་རིག་ལས་ཁུངས་ཁྱབ་ཁོངས་དང་བཅས་པའི་ཕྱི་ལོ་༢༠༢༢་་་༢༣ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་ཞུ་རྒྱུ། སྤྱི་འཐུས་རྒྱུན་ལས་ཀྱིས་ཆོས་རིག་ལས་ཁུངས་ཁྱབ་ཁོངས་དང་བཅས་པའི་ལོ་འཁོར་ལས་བསྡོམས་རྒྱས་པར་ཞིབ་འཇུག་གནང་བའི་སྙན་ཐོ་སྙན་སྒྲོན་ཞུ་རྒྱུ། ལོ་འཁོར་ལས་བསྡོམས་ཐོག་དྲི་བ་དང་དྲི་ལན་གྱི་ལས་རིམ་དང་དེའི་ཐོག་བགྲོ་གླེང་གནང་རྒྱུ་བཅས་ཡིན་འདུག

ཕྱི་ལོ་༢༠༢༣ ཟླ་༩ ཚེས་༡༤ ཉིན། བཞུགས་སྒར་རྡ་ས་གངས་སྐྱིད་དུ། བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས། རིན་སྨོན་ཚེ་རིང་བསམ་གྲུབ་ལགས་བཅས་ཀྱིས་༼ བོད་ཀྱི་སྤྲུལ་སྐུའི་ལམ་ལུགས་སྐོར་གྱི་དཔྱད་རྩོམ་ཕྱོགས་བསྒྲིགས། ༽ཞེས་པའི་དཔེ་དེབ་གསར་པ་ཞིག་དབུ་འབྱེད་གནང་སོང་། བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག ཉིན་གཉིས་རིང་༸རྒྱལ་མཆོག་བཅུ་གསུམ་པ་ཐེངས་གཉིས་ལ་ཉེན་ཡོལ་དུ་ཕེབས་པའི་བརྒྱུད་རིམ་ལ་ཞིབ་ལྟ་དང་། ༼ སྡེ་པ་གཞུང་གི་ལོ་རྒྱུས་ཉིན་བྱེད་སྣང་བ། ༽ལས་འཕྲོས་ཏེ་དགའ་ལྡན་ཕོ་བྲང་དང་ཧོན་ཤོད་རྒྱལ་ཁང་ཟེར་བའི་གནས་བབ་ལ་དཔྱད་པ། གཞུང་དགའ་ལྡན་ཕོ་བྲང་གི་དུས་ཀྱི་དགེ་ལུགས་པའི་དགོན་སྡེའི་མ་ལག་གྲུབ་ཚུལ་གྱི་འགྱུར་ལྡོག་གླེང་བ་བཅས་ཀྱི་བརྗོད་གཞི་ཐོག་ནས་འཆད་ཁྲིད་གནང་རྒྱུ་ཡིན་འདུག

ཕྱི་ལོ་༢༠༢༣ ཟླ་༩ ཚེས་༦ ཉིན། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་ཉིན་གཉིས་ལ་ལྷོ་ཤར་ཨེ་ཤ་ཡའི་དད་ལྡན་ཆོས་ཞུ་བ་གཙོས་པའི་བོད་རིགས་དང་ཕྱི་རྒྱལ་སྟོང་ཕྲག་ཁ་ཤས་ལ་དབུ་མ་འཇུག་པ་དང་དེའི་རང་འགྲེལ་གྱི་གསུང་ཆོས་ལེགས་པར་གྲུབ་སོང་། ༸གོང་ས་མཆོག་གིས་བྱང་ཆུབ་ཀྱི་སེམས་ནི་དངོས་གནས་རང་གཞན་ཀུན་ལ་བདེ་སྐྱིད་ཡོང་བ་དང་། འཕྲལ་དུ་བདེ་བ། ཕུགས་ལ་ཕན་པ། མཐའ་ལུས་བདེ་བ་དང་སེམས་བག་ཕེབས་པོ་ཡོང་བ་ཞིག་བྱང་ཆུབ་ཀྱི་སེམས་ཀྱིས་ཡོང་གི་འདུག་ཅེས་གསུངས་སོང་།

ཕྱི་ལོ་༢༠༢༣་ཟླ་༩་ཚེས་༩ ཉིན། རྒྱ་གར་གཞུང་གི་གོ་སྒྲིག་འོག སྟོབས་ཆེན་རྒྱལ་ཁབ་ཉི་ཤུའི་ཐེངས་བཅོ་བརྒྱད་པའི་ཚོགས་ཆེན་དེ་རྒྱ་གར་གྱི་རྒྱལ་ས་ལྡི་ལིར་དབུ་འཛུགས་གནང་འདུག དེར་ར་ཤི་ཡ་དང་རྒྱ་ནག་གི་སྲིད་འཛིན་མ་གཏོགས་རྒྱལ་ཁབ་གཞན་གྱི་སྲིད་འཛིན་དང་སྲིད་བློན་རྣམས་ཕེབས་ཡོད་འདུག ཚོགས་ཆེན་དེར་གཙོ་བོར་འཛམ་གླིང་ནང་ཁོར་ཡུག་ཡར་རྒྱས་དང་གནམ་གཤིས་འགྱུར་ལྡོག་སྐོར། རྒྱལ་སྤྱིའི་དཔལ་འབྱོར་གནས་སྟངས་སོགས་ཀྱི་སྐོར་གླེང་རྒྱུ་ཡིན་འདུག

ཕྱི་ལོ་༢༠༢༣ ལོའི་ཟླ་༨ ཚེས་༢༣ ཉིན། རྒྱ་གར་གྱིས་ཟླ་བའི་ཐོག་ཏུ་ཟླ་བའི་འགྲུལ་འཁོར་གྱི་འཕུར་མདའ་ཡང་ན་ཅན་ཌི་ར་ཡན་གསུམ་པ་(Chandrayaan-3)་མཁའ་དབྱིངས་སུ་བཏང་ནས་ཟླ་གཅིག་ལྷག་སོང་རྗེས། དེ་རིང་ཟླ་བའི་ལྷོ་སྣེའི་ཐོག་བདེ་ལེགས་ངང་བབས་ཐུབ་ཡོད་ཅིང་། དེ་ནི་རྒྱ་གར་ཟླ་བའི་ལྷོ་སྣེར་བབས་ཐུབ་མཁན་རྒྱལ་ཁབ་ཐོག་མར་དང་མཁའ་དབྱིངས་སྟོབས་ཆེན་རྒྱལ་ཁབ་བཞི་པ་དེ་ཆགས་ཀྱི་ཡོད་འདུག དེ་སྔོན་ཨ་རི་དང་ཨུ་རུ་སུ། རྒྱ་ནག་མ་གཏོགས་ཟླ་བའི་ཐོག་བབས་ཐུབ་མེད་པ་རེད། རྒྱ་གར་བ་རྣམས་ཀྱིས་རྣམ་པ་འདྲ་མིན་གྱི་ཐོག་ནས་དགའ་སྟོན་རྒྱ་ཆེན་པོ་བྱས་སོང་།

ཕྱི་ལོ་༢༠༢༣་ཟླ་༦་ཚེས་༡༩ཉིན་སྤེལ། ཨ་རིའི་ཕྱི་སྲིད་ལས་ཁུངས་ཀྱི་དྲུང་ཆེ་ཨན་ཊོན་ཎི-བྷི་ལིན་ཁེན་ལགས་རྒྱ་ནག་པེ་ཅིང་ལ་ཕེབས་ནས། རྒྱ་ནག་གི་སྲིད་འཛིན་དང་ཕྱི་སྲིད་བློན་ཆེན་ལ་ཐུག་འཕྲད་བྱས་ཏེ། བོད་དང་ཤར་ཏུར་ཀི་སི་ཐན། ཧོང་ཀོང་བཅས་ཀྱི་འགྲོ་བ་མིའི་ཐོབ་ཐང་རྡོག་རོལ་བཏང་དང་གཏོང་བཞིན་ཡོད་པར་སེམས་འཚབ་ཡོད་སྐོར་བརྗོད་ཡོད་འདུག

ཕྱི་ལོ་༢༠༢༡་ཟླ་༡༡་ཚེས་༣ཉིན། བཞུགས་སྒར་རྡ་ས་བོད་ཀྱི་ཟློས་གར་ཚོགས་པའི་ཚོགས་ཁང་དུ། ལི་ཐང་གཟེངས་རྟགས་གོ་སྒྲིག་ཚོགས་ཆུང་ནས། ༸གོང་ས་མཆོག་ལ་བྱམས་བརྩེའི་དྲིན་གྱིས་བསྐྱངས་པའི་རྗེས་དྲན་འཆི་མེད་བུམ་བཟང་གི་གསེར་གཟེངས་རྟགས་དང་། སྲིད་ཟུར་དང་བཀའ་ཟུར་རྣམས་ལ་ྋརྒྱལ་བའི་བཀའ་བཞིན་སྒྲུབ་བའི་རླབས་ཆེན་གྱི་སྐྱེས་བུའི་དངུལ་གྱི་གཟེངས་རྟགས་ཞེས་པ་འབུལ་ལམ་ཞུས་སོང་།

༢༠༢༠་ལོའི་ཟླ་༡༡་ཚེས་༣་ཉིན་སྤེལ། འདི་ག་རྒྱལ་སྤྱིའི་བོད་ཀྱི་ཆ་འཕྲིན་གསར་ཁང་ནས་གཞོན་སྐྱེས་ཉེར་གཅིག་ལ་སྤྱི་ལོ་༢༠༢༡ལོའི་སྲིད་སྤྱི་འོས་མི་དང་འབྲེལ་བའི་གཤམ་གསལ་དྲི་བ་གཉིས་ཀྱི་ཐད་ལ་བཅར་འདྲི་བྱས་ཡོད།

༢༠༢༠་ལོའི་ཟླ་༡༠་ཚེས་༢༦ཉིན། འདི་ག་རྒྱལ་སྤྱིའི་བོད་ཀྱི་ཆ་འཕྲིན་གསར་ཁང་ནས་གཞོན་སྐྱེས་ཉེར་གཅིག་ལ་སྤྱི་ལོ་༢༠༢༡ལོའི་སྲིད་སྤྱི་འོས་མི་དང་འབྲེལ་བའི་གཤམ་གསལ་དྲི་བ་གཉིས་ཀྱི་ཐད་ལ་བཅར་འདྲི་བྱས་ཡོད།