༢༠༡༩ལོའི་ཟླ་༤་ཚེས་༡༨་ཉིན། བཞུགས་སྒར་དུ་རྟེན་གཞི་བྱེད་པའི་དབུས་བོད་ཀྱི་བུད་མེད་ལྷན་ཚོགས་ཀྱིས་༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་༣༠ ཕེབས་པའི་སྐུའི་འཁྲུངས་སྐར་ཉིན་བོད་ཀྱི་བུད་མེད་ལྷན་ཚོགས་དབུས་ས་ཡོངས་ནས་རྒྱ་གར་རྒྱལ་ཡོངས་ནང་གཞི་རྒྱ་ཆེ་བའི་ཞི་བའི་གོམ་བགྲོད་ཀྱི་ལས་འགུལ་སྤེལ་རྒྱུ་ཡིན་པའི་གསར་འགོད་གསལ་བསྒྲགས་ཤིག་སྤེལ་གནང་སོང་།

༢༠༡༩ལོའི་ཟླ་༤་ཚེས་༡༢་ཉིན། ༸སྤྱི་ནོར་༸གོང་ས་སྐྱབས་མགོན་མཆོག་གི་སྐུའི་སྙུག་གཞི་དྲག་སྐྱེད་བྱུང་ནས་རྒྱ་གར་རྒྱལ་ས་ལྡི་ལིའི་མེ་ཁུ་སི་སྨན་ཁང་ནས་ཐོན་གནང་ཡོད་པ་དང་། ཁོང་གིས་ཁོང་སྙུང་བའི་རིང་བོད་ཕྱི་ནང་གཉིས་ཀྱི་བོད་མི་དང་འཛམ་གླིང་མི་མང་ཚོས་ཞལ་འདོན་དང་སྨོན་ལམ་བརྒྱབ་གནང་བར་ཐུགས་རྗེ་ཆེ་ཞུ་གནང་འདུག

༢༠༡༩ལོའི་ཟླ་༤་ཚེས་༤་ཉིན། བཞུགས་སྒར་རྡ་ས་གངས་སྐྱིད་ཀྱི་ཆེས་མཐོའི་ཁྲིམས་ཞིབ་ཁང་གི་ཚོགས་ཁང་དུ་ཁྲིམས་དྲུང་བཀྲ་ཤིས་རྒྱ་མཚོ་ལགས་ཀྱིས་ཉེ་ཆར་སྤྱི་འཐུས་ལྷན་ཚོགས་ནས་བཀའ་བློན་དུ་བདམས་ཐོན་བྱུང་ཡོད་པའི་རྫོང་ཁ་སྟོབས་རྒྱལ་ཚེ་རིང་ལགས་བཀའ་བློན་གྱི་འོས་གཞིར་བཅའ་ཁྲིམས་དོན་ཚན་ ༢༢ ལྟར་གྱི་བརྒྱ་ཆ་མ་ལོན་པའི་སྐོར་ལ་ཆེས་མཐོའི་ཁྲིམས་ཞིབ་ཁང་གིས་ཐག་གཅོད་བྱས་པའི་ཡོངས་ཁྱབ་གསལ་བསྒྲགས་ཤིག་སྤེལ་སོང་།

༢༠༡༩ལོའི་ཟླ་༤་ཚེས་༡༤་ཉིན། རྒྱ་གར་རྒྱལ་ས་ལྡི་ལིའི་༸གོང་ས་མཆོག་གི་བཞུགས་གནས་མགྲོན་ཁང་དུ་རྒྱ་གར་གྱི་འཕྲོད་བསྟེན་བློན་ཆེན་མཆོག་ཕེབས་ཏེ། མགོན་པོ་ཁོང་གི་སྐུའི་འཕྲོད་བསྟེན་ཐོག་རྒྱ་གར་གཞུང་ངོས་ནས་གང་གནང་དགོས་རུང་རོགས་རམ་གནང་རྒྱུ་ཡིན་ཞེས་གསུངས་འདུག

༢༠༡༩ལོའི་ཟླ་༤་ཚེས་༨་ཉིན། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལི་ནང་ཉིན་བཞིའི་མཛད་འཕྲིན་ཁག་ལེགས་པར་གྲུབ་རྗེས་བཞུགས་སྒར་རྡ་རམ་སར་༸ཞབས་སོར་བདེ་བར་འཁོད་གནང་སོང་བ་དང་། རྡ་ས་ཁུལ་གྱི་གཞུང་དང་གཞུང་འབྲེལ་མ་ཡིན་པའི་མི་སྣ་དང་སྐུ་ཚབ། དེ་བཞིན་སེར་སྐྱ་ཕོ་མོ་མང་ཚོགས་དང་ཕྱི་རྒྱལ་བ་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་གནང་སོང་།

༢༠༡༩ལོའི་ཟླ་༤་པའི་ཚེས་༢་ཉིན། རྡ་སར་དཔལ་ལྡན་དཔལ་འབྱོར་བཀའ་བློན་མཆོག་གིས་བོད་པའི་གསར་གཏོད་ (Tibet Innovations)་ནས་རྒྱ་གར་ནང་དུ་ཡོད་པའི་བོད་མིའི་གཞིས་ཆགས་སྲ་བརྟན་ཡོང་ཆེད་དང་གཞོན་སྐྱེས་ཚོར་ལས་ཀའི་གོ་སྐབས་བསྐྲུན་ཆེད་དུ་བོད་མི་ཚོང་གཉེར་དང་ལས་འཆར་ཡག་པོ་ཡོད་མཁན་ལ་ཧིན་སྒོར་ས་ཡ་༡༠་མ་དངུལ་རོགས་རམ་གནང་རྒྱུ་ཡིན་པར་བསྒྲགས་སོང་།