༢༠༡༨ལོའི་ཟླ་༩ཚེས་༢༦ཉིན། སྤྱི་ནོར་༸གོང་ས་སྐྱབས་མགོན་རིན་པོ་ཆེ་མཆོག་གིས་ཟླ་ཕྱེད་ཅིག་གི་རིང་དུ་ཡུ་རོབ་རྒྱལ་ཁབ་སི་བེ་ཌིན། ནེ་ཌིར་ལན་ཌི། འཇར་མན། སུད་སི་བཅས་རྒྱལ་ཁབ་ཁག་བཞི་ནས། ཚན་རིག་པ་དང་ལྷན་དུ་བགྲོ་གླེང་། དད་ལྡན་དང་སློབ་མ་ཚོར་མཇལ་འཕྲད། བཟང་སྤྱོད་དང་ཤེས་ཡོན་སྐོར་གྱི་བཀའ་སློབ། ད་དུང་གསུང་ཆོས་བཅས་ཀྱི་མཛད་འཕྲིན་རྣམས་ལེགས་པར་གྲུབ་ཏེ་བཞུགས་སྒར་དུ་ཞབས་སོར་བདེ་བར་བཀོད།

དེ་ཡང་། ༢༠༡༨ལོའི་ཟླ་༩་པའི་ཚེས་ ༡༠ ཉིན། སྤྱི་ནོར་༸གོང་ས་སྐྱབས་མགོན་རིན་པོ་ཆེ་མཆོག་བཞུགས་སྒར་ངྷ་ས་ནས་ཡུ་རོབ་ཀྱི་རྒྱལ་ཁབ་ཁག་ཏུ་ཆིབས་སྒྱུར་བསྐྱངས་ཤིང་། ཚེས་༡༢་ཉིན། སི་བེ་ཌིན་རྒྱལ་ཁབ་དུ་བདེ་འབྱོར་བྱུང་སྟེ། མལ་མའོ་གྲོང་ཁྱེར་དུ་ཨ་ཡེ་ཨེམ་(Individuell Människohjälp (IM))ཞེས་པའི་ཚོགས་པས་ཇི་ལྟར་གསོལ་འདེབས་ཞུས་དོན་ལྟར། མལ་མའོ་ལེ་ཧྥུ་(Malmö Live)ཞེས་པའི་ཚོགས་ཁང་དུ། ཞི་བདེ་དང་བདེ་སྐྱིད་སྒྲུབ་ཐབས་ཞེས་པའི་བརྗོད་གཞིའི་ཐོག་མི་མང་ལ་བཀའ་སློབ་བསྩལ་བ་དང་། ཚེས་ ༡༣ ཉིན། སི་བེ་ཌིན་མལ་མོ་མཐོ་སློབ་དགེ་ལས་སློབ་ཕྲུག་རྣམས་ལ་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་བཀའ་སློབ་བསྩལ། ཚེས་༡༥ཉིན། ནེ་ཌིར་ལན་ཌིའི་རྒྱལ་ས(Amsterdam)ཨ་མོ་སི་ཊམ་ནས། ཡུ་རོབ་རྒྱལ་ཁབ་ཁག་ནས་ཕེབས་པའི་ཚན་རིག་པ་དང་ཆེད་མཁས་པ་རྣམས་ལ་མཇལ་འཕྲད་གནང་སྟེ། ལོ་ངོ་སུམ་སྟོང་གི་ལོ་རྒྱུས་ལྡན་པའི་རྒྱ་གར་གྱི་གནའ་བའི་ཤེས་རིག་གིས་འགྲོ་བ་མིའི་ནང་སེམས་ཀྱི་ཐད་ལ་ཞབས་འདེགས་རླབས་པོ་ཆེ་བསྐུན་ཡོད་སྐོར་གསུངས་ཏེ། གནའ་བའི་ཤེས་རིག་དེར་གུས་བརྩི་དང་བསྔགས་བརྗོད་གནང་། ཚེས་ ༡༦ ཉིན་གྱི་སྔ་དྲོར། ནེ་ཌིར་ལན་ཌི་རྒྱལ་ཁབ་གྲོང་ཁྱེར་རོ་ཊིར་ཌམ་ནས་དཀའ་རྙོག་ཆེ་བའི་འཛམ་གླིང་ནང་ཅིའི་ཕྱིར་སྙིང་རྗེ་དགོས་གལ་ཆེ་བ་ཡིན་ཞེས་པའི་བརྗོད་གཞིའི་ཐོག་མི་མང་ལ་བཀའ་སློབ་བསྩལ། ཚེས་ ༡༧ ཉིན། ནེ་ཌིར་ལན་ཌིའི་གྲོང་ཁྱེར་རོ་ཊིར་ཌམ་ནས་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མའི་ཆོས་འབྲེལ་གནང་།

ཚེས་ ༡༩ ཉིན་གྱི་སྔ་དྲོར། འཇར་མན་གྱི་ཌར་མ་སུ་ཊ་ཊྲི་གྲོང་ཁྱེར་དུ་འཇར་མན་བོད་དོན་རྒྱབ་སྐྱོར་ཚོགས་པ་དང་སུད་སི་ཏཱ་ལའི་བླ་མའི་དགའ་ལྡན་ཕོ་བྲང་དགེ་རྩ་གཉིས་ཀྱིས་གོ་སྒྲིག་ཞུས་པའི་འཚེ་བ་མེད་པ་དང་ཞི་བདེ་ཞེས་པའི་ཚོགས་འདུར་དབུ་བཞུགས་གནང་ཞིང་། སྐབས་དེར། ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་པོ་ལེན་ཡུལ་གྱི་སྲིད་འཛིན་ཟུར་པ་སྐུ་ཞབས་ལེག་ཝ་ལེ་ས་ (Lech Welesa)མཆོག་དང་། དེ་སྔ་པོ་ལེན་ཡུལ་དུ་དམར་ཤོག་ཚོགས་པ་མགོ་རྟིང་སློག་མཁན་ཆིག་སྒྲིག་ལས་འགུལ་ཚོགས་པའི་ (Solidarnosch) ཚོགས་མི་དང་། རྒྱལ་སྤྱིའི་རྡུལ་ཕྲན་མཚོན་ཆ་རྩ་མེད་ལས་འགུལ་ཚོགས་པའི་ཚོགས་གཙོ་ནོ་བེལ་ཞི་བདེའི་གཟེངས་རྟགས་༼༢༠༡༧༽ ཐོབ་མྱོང་མཁན་ལྕམ་སྐུ་རེ་བྷེ་ཀ་ཇོན་སོན་(Rebecca Johnson )མཆོག་བཅས་ལྷན་འཛོམས་ཐོག འཚེ་མེད་ཞི་བའི་ཐབས་ལམ་སྐོར་ལ་བགྲོ་གླེང་གནང་སྟེ། དཀའ་རྙོག་སེལ་བའི་ཐབས་ལམ་ཡག་ཤོས་དེ་ནི་འཚེ་མེད་ཞི་བའི་ལམ་ཡིན་པའི་སྐོར་ཀུན་གྱིས་གསུངས།

ཚེས་ ༢༠ ཉིན། སྤྱི་ནོར་༸གོང་ས་༸སྐྱབས་མགོན་ཆེན་པོ་ཆེ་མཆོག་སུད་སིའི་གྲོང་ཁྱེར་ཛུ་རིག་ནང་ཞབས་སོར་བདེ་བར་འཁོད་ཅིང་། ཕྱི་ཚེས་༢༡ དང་ ༢༢ ཉིན་གྱི་སྔ་དྲོར། སུད་སིར་རྟེན་གཞི་བྱས་པའི་རི་ཀོན་ཆོས་འཁོར་དགོན་གསར་བཞེངས་གནང་སྟེ། ལོ་ངོ་ ༥༠ འཁོར་བའི་མཛད་སྒོའི་ཐོག་དབུ་བཞུགས་མཛད་པ་དང་། སུད་སིའི་རྒྱལ་ཡོངས་བརྙན་འཕྲིན་ཚན་པ་ཞིག་གི་གསར་འགོད་པའི་དྲི་བར་བཀའ་ལན་མཛད། དེ་ནས། ཕྱི་ཚེས་༢༣ ཉིན་གྱི་སྔ་དྲོར། སུད་སི་ཛི་རིག་གྲོང་ཁྱེར་དུ་རི་ཀོང་ཆོས་འཁོར་དགོན་དང་སུད་སི་དང་། ལེག་ཏེན་སིཊ་ཡན་བོད་རིགས་ཚོགས་པས་ཇི་ལྟར་གསོལ་འདེབས་ཞུས་དོན་ལྟར། ཛུ་རིག་ཧ་ལེན་སཊ་ཌི་ཨོན་ (Zurich Hallenstadion) ཚོགས་ཁང་དུ་མགོན་པོ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བ་དང་། སློབ་དཔོན་ཀ་མ་ལ་ཤཱི་ལ་མཆོག་གིས་མཛད་པའི་བསྒོམ་རིམ་བར་པ། རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ་བཅས་ཀྱི་གསུང་ཆོས་བསྩལ་ཞིང་། སུད་སིར་གནས་སྡོད་བོད་རིགས་རྣམས་ལ་མཇལ་ཁ་དང་བཀའ་སློབ་ཡང་བསྩལ། ད་དུང་། ཚེས ༢༤ ཉིན་གྱི་སྔ་དྲོར། ཛུ་རིག་གི་ཚན་རིག་མཐོ་སློབ་ཏུ་འགྲོ་བ་མི་སྤྱིའི་བཟང་སྤྱོད་དང་ཤེས་ཡོན་སྐོར་གྱི་བགྲོ་གླེང་ཐོག་དབུ་ཞུགས་མཛད་པ་བཅས་སོ། །

གཞན་ཡང་། རྒྱལ་བ་རིན་པོ་ཆེའི་དྲ་རྒྱའི་སྟེང་བཀོད་པའི་མཛད་འཆར་ལྟར་ན། ཟླ་ ༡༠ པའི་ཚེས་ ༣ ནས་ ༦ བར་ཐའེ་ཝན་གྱི་དད་ལྡན་ཆོས་ཞུ་བས་ཇི་ལྟར་གསོལ་བ་བཏབ་པ་ལྟར་བཞུགས་སྒར་རྡ་རམ་ས་ལར་ཉིན་གྲངས་བཞིའི་རིང་ལོ་སྔོན་མར་གནང་བའི་དབུ་མ་འཇུག་པའི་གསུང་ཆོས་ཀྱི་མཇུག་སྐྱོང་མཛད་རྒྱུ་དང་། ཚེས་ ༡༢ དང་ ༡༣ ཉིན་གཉིས་རིང་གི་སྔ་དྲོ་མ་ན་ལི་རུ་ཡོད་པའི་འོན་མངའ་རིས་དགོན་པས་ཇི་ལྟར་གསོལ་བ་བཏབ་པ་ལྟར་དགོན་པ་དེ་གར་མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་དང་། རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ། དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མ་བཅས་ཀྱི་གསུང་ཆོས་བཀའ་དྲིན་རྒྱུ་དང་། ཚེས་ ༡༤ ཉིན་ཚེ་དབང་བཀའ་དྲིན་སྩལ་རྒྱུ། ཡིན་འདུག

༢༠༡༨ལོའི་ ཟླ་ ༩ ཚེས་ ༡༨ ཉིན། སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པ་། ཟླ་འདིའི་ཚེས་༡༨ནས་ཚེས་ ༢༨བར་ཉིན་གྲངས་བཅུའི་རིང་། བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་ཀྱི་གྲོས་ཚོགས་ཁང་དུ་དངོས་སུ་དབུ་འཛུགས་གནང་། དེ་ཡང་སྔ་དྲོ་ཆུ་ཚོད་ ༩།༣༠ ཐོག་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་ཚོགས་གཞོན་ཨ་ཅཱརྱ་ཡེ་ཤེས་ཕུན་ཚོགས་མཆོག དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དབུས་བཀའ་བློན་རྣམ་པ། ཆོལ་གསུམ་ཆོས་ལུགས་དང་བཅས་པའི་བོད་མི་མང་སྤྱི་འཐུས་རྣམ་པ། ལྷན་ཁང་ཁག་གི་དྲུང་ཆེ་རྣམ་པ། ཟུར་ཉན་པ་རྣམ་པ། གསར་འགོད་པ་དང། ཟུར་ཉན་གཞན་རྣམས་བཅས་ཚང་འཛོམས་ཐོག་གྲོས་ཚོགས་ཚོགས་དུས་དྲུག་པ་དབུ་འཛུགས་ཀྱིས་ཐོག་མར་རྟེན་འབྲེལ་གསོལ་ཇ་དང་། འབྲས་སིལ་ཕུལ་གྲུབ་རྗེས་ཚང་མ་སྐུ་བཞེངས་ཀྱིས་བོད་རྒྱལ་ཁབ་ཆེན་པོའི་རྒྱལ་གླུ་བཏང་སྟེ། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གྲོས་ཚོགས་དབུ་འཛུགས་ཀྱི་གསུང་བཤད་གནང་དོན།

༢༠༡༨ལོའི་ཟླ་ ༩ ཚེས་ ༡༧ ཉིན། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བོད་མིའི་སྒྲིག་འཛུགས་དང་། སུད་སིར་རྟེན་གཞི་བྱས་པའི་ནོར་བཟང་ཐེབས་རྩ་ཚོགས་པས་དཔལ་འབྱོར་མཐུན་འགྱུར་རོགས་རམ་འོག བོད་ཀྱི་ཟློས་གར་ཚོགས་པའི་ཚོགས་ཁང་གསར་རྒྱག་གི་དབུ་འཛུགས་གནང་།

༢༠༡༨ལོའི་ཟླ་༩པའི་ཚེས་༢༥ཉིན། དྷ་ས་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག རྒྱལ་གཅེས་དཔའ་བོ་དཔའ་མོའི་རྗེས་དྲན་གྱི་སིལ་སྤོལ་འགྲན་སྡུར་ཐེངས་ ༡༧ པ་གངས་སྐྱིད་སིལ་སྤོལ་ཐང་དུ་མགོ་འཛུགས་བྱས་སོང་བ་དང་། མགོ་འཛུགས་ཀྱི་མཛད་སྒོའི་སྐུ་མགྲོན་གཙོ་བོར་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་རྟ་མགྲིན་སྲི་གཅོད་ལགས་ཀྱི་གཙོའི་གཞུང་འབྲེལ་མ་ཡིན་པའི་ཚོགས་པ་ཁག་ཅིག་གི་འཐུས་ཚབ་དང་། སིལ་སྤོལ་རྩེད་འགྲན་རུ་ཁག་ ༡༦ གི་རྩེད་མོ་བ་སོགས་ཁྱོན་མི་གྲངས་ ༨༠ ལྷག་འཛོམས་འདུག

༢༠༡༨ལོའི་ ཟླ་ ༩ ཚེས་ ༡༣་ཉིན། དཔལ་ལྡན་སྲིད་སྐྱོང་མཆོག་གིས་ལྔ་དང་ལྔ་བཅུའི་རྒྱལ་སྤྱིའི་ལྷན་ཚོགས་ཀྱི་སྟེང་གནང་བའི་གསུང་བཤད། དེ་རིང་འདིར་ཆར་པ་རྒྱག་སྟངས་ལ་བལྟས་ན། བོད་པའི་འགྲོ་ལུགས་ལྟར་རྟེན་འབྲེལ་བཟང་པོ་ཞིག་ཆགས་པའི་རྣམ་པ་གསལ་པོ་ཞིག་འདུག ཞེས་ཞུ་རྒྱུ་ཡིན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གུས་ཕྱག་སྔོན་དུ་བཏང་བའི་སྒོ་ནས་སྐྱབས་ནས་དགེ་འདུན་གྱི་སྡེ། དཔལ་ལྡན་བོད་མི་མང་སྤྱི་འཐུས་ཚོགས་གཙོ་སྦྲེལ་པོ་མཆོག་གིས་དབུས་པའི་རྒྱུན་ལས་རྣམ་པ། ཁྲིམས་ཞིབ་པ་ཆེ་བ་མཆོག འདེམས་བསྐོ་ལྷན་ཁང་གི་འགན་འཛིན། རྩིས་ཞིབ་ལྷན་ཁང་གི་འགན་འཛིན། ལས་ཁུངས་ཁག་གི་དྲུང་ཆེ་ཆུང་རྣམ་པ། དེ་བཞིན་རྒྱ་བལ་འབྲུག་གསུམ་དང་ཕྱི་རྒྱལ་ཡུལ་གྲུ་ཁག་ནས་ཕེབས་པའི་སྐུ་ཚབ་རྣམ་པ་ཚང་མར་འདིར་ཚོགས་འདུའི་ཐོག་བདེ་ཐང་ངང་འབྱོར་བར་ཐོག་མར་ངས་བཀའ་ཤག་གི་ཚབ་ཞུས་ཏེ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།

༢༠༡༨ལོའི་ཟླ་༩་ཚེས་༡༤ཉིན། ལྔ་དང་ལྔ་བཅུའི་རྒྱལ་སྤྱིའི་ལྷན་ཚོགས་ཉིན་གཉིས་པའི་ཐོག་བོད་མི་སྒྲིག་འཛུགས་ཀྱི་བཀའ་བློན་རྣམ་པས་སྐར་མ་ ༨ རིང་ལས་ཁུངས་སོ་སོའི་ལས་དོན་སྙིང་བསྡུས་ངོ་སྤྲོད་གསུང་བཤད་གནང་དང་སྲིད་སྐྱོང་མཆོག་གིས་ཚོགས་འདུའི་བརྗོད་གཞིའི་སྙིང་དོན་འགྲེལ་བརྗོད། དེ་བཞིན་ཝ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་ཁང་གི་ཉེ་བའི་རིགས་བདག་དགེ་བཤེས་ངག་དབང་བསམ་གཏན་ལགས། རྡ་ས་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་མཁས་དབང་བཀྲ་ཤིས་ཚེ་རིང་ལགས། སུ་ཇ་བོད་ཁྱིམ་སློབ་གྲྭའི་རྒན་བསྟན་འཛིན་དར་རྒྱས་ལགས་བཅས་ཀྱིས་གསུང་བཤད་གནང་འདུག