ཕྱི་ལོ་༢༠༢༤ ཟླ་༣ ཚེས་༡༠ ཉིན། གཞུང་འབྲེལ་མིན་པའི་ཚོགས་པ་ཆེ་ཁག་བཞི་ཡིས་གོ་སྒྲིག་འོག རྡ་རམ་ས་ཁུལ་གྱི་བཀའ་བློན་དང་སྤྱི་འཐུས། དགེ་འདུན་པ་དང་བཙུན་མ། སློབ་ཕྲུག དེ་བཞིན་མི་མང་བརྒྱ་ཕྲག་མང་པོས་གཙུག་ལག་ཁང་ནས་རྡ་ཤོད་ཀ་ཅ་རི་བར་དུ་ཞི་བའི་གོམ་བགྲོད་གནང་ནས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༥ པ་དང་རྒྱལ་གཅེས་དཔའ་བོ་དཔའ་མོའི་ཉིན་མོ་སྲུང་བརྩི་ཞུས་གནང་སོང་། སྐབས་དེར་ཚོགས་འདི་དག་གིས་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་དང༌། རྒྱ་ནག་གིས་བོད་དུ་འཛིན་པའི་དམ་དྲག་སྲིད་བྱུས། བོད་ནང་ཛ་དྲག་གི་གནས་སྟངས་སོགས་ལ་བརྟེན་བོད་མི་སྤྱི་སྒེར་ཡོངས་དང་༌། ལྷག་པར་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་ནས་རྒྱལ་སྤྱིའི་བོད་དོན་རྒྱབ་སྐྱོར་བ་སྤྱི་སྒེར་རྣམས་ལ་འབྲེལ་ལམ་སྔར་ལྷག་དམ་འཛིན་གནང་རྒྱུ་དང་། རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་དང་སྟབས་བསྟུན་གྱིས་གཞུང་འབྲེལ་མ་ཡིན་པའི་ཚོགས་པ་ཆེ་ཁག་རྣམས་ཀྱིས་མཉམ་འབྲེལ་ཐོག་བོད་དོན་འཐབ་རྩོད་ཀྱི་ནུས་ཤུགས་གོང་སྤེལ་གཏོང་རྒྱུ་ཡིན་སྐོར་བརྗོད་སོང་།

ཕྱི་ལོ་༢༠༢༤ ཟླ་༢ ཚེས་༢༢ཉིན། བཞུགས་སྒར་རྡ་རམ་སར་རྟེན་གཞི་བྱས་པའི་བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་བཞི་ནས་རྒྱ་གཞུང་གིས་བོད་ཁམས་སྡེ་དགེ་ལ་ཆུ་མཛོད་ཆེན་པོ་ཞིག་གསར་རྒྱག་གི་ལས་གཞིར་དམིགས་ཏེ་ཡུལ་མི་རྣམས་ས་གནས་གཞན་དུ་གནས་སྤོ་དགོས་པའི་བཙན་བཀའ་བཏང་ཡོད་པར་བོད་མི་མང་པོ་ཞིག་དེར་ངོ་རྒོལ་བྱས་དང་བྱེད་བཞིན་པར་ཛ་དྲག་གནས་སྟངས་ལ་གདུང་སེམས་མཉམ་སྐྱེད་ཀྱི་ལས་འགུལ་ཞིག་སྤེལ་སོང་།

ཕྱི་ལོ་༢༠༢༣ ལོའི་ཟླ་༡༢ ཚེས་༢༠ ཉིན། གནས་མཆོག་རྡོ་རྗེ་གདན་དུ་རྒྱལ་སྤྱིའི་ནང་པའི་དགེ་འདུན་པའི་ལྷན་ཚོགས་འཚོགས་མགོ་བརྩམས་ཤིང་། སྤྱི་ནོར་༸གོང་ས་རྒྱལ་བ་རིན་པོ་ཆེ་མཆོག་གིས་གཙོས་པའི་ནང་པའི་པཱ་ལི་དང་ལེགས་སྦྱར་ཆོས་བརྒྱུད་གཉིས་ཀའི་བླ་ཆེན་རྣམས་དང་། སྐུ་ཚབ་རྣམས། དགེ་འདུན་པ་བཅས་ཚོགས་ཞུགས་མི་གྲངས་སུམ་སྟོང་ལྷག་ལྷན་འཛོམས་བྱུང་འདུག་ལ། ཁྱོན་ཉིན་གྲངས་གསུམ་གྱི་རིང་ཉན་བཤད་ཀྱི་བགྲོ་གླེང་དང་ཐུན་མོང་གི་སྨོན་ལམ་བཅས་འཚོགས་འཆར་ཡོད་འདུག

ཕྱི་ལོ་༢༠༢༤ ཟླ་༣ ཚེས་༡༠ ཉིན། བཞུགས་སྒར་རྡ་རམ་སའི་ཐེག་ཆེན་ཆོས་གླིང་གཙུག་ལག་ཁང་དུ། བོད་མིའི་སྒྲིག་འཛུགས་ཀྱིས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་༦༥ པ་དང་རྒྱལ་གཅེས་དཔའ་བོ་དཔའ་མོའི་ཉིན་མོ་སྲུང་བརྩིའི་གཞུང་འབྲེལ་མཛད་སྒོ་ཤིག་ཚོགས་སོང་། སྐབས་དེར། སྲིད་སྐྱོང་མཆོག་གིས་རྒྱ་གཞུང་གི་དབང་ཤེད་དྲག་གནོན་འོག་ལུས་སྲོག་ཤོར་བའི་དཔའ་བོ་དཔའ་མོ་རྣམས་རྗེས་སུ་དྲན་པའི་སྒོ་ནས་མཆོག་གསུམ་རྒྱལ་བ་རྒྱ་མཚོར་བསྔོ་སྨོན་གསོལ་འདེབས་དང༌། ད་ལྟའང་རྒྱ་གཞུང་གི་བཙན་འོག་ཏུ་མནར་གཅོད་མྱོང་བཞིན་པའི་སྤུན་ཟླ་རྣམས་ལ་གདུང་སེམས་མཉམ་བསྐྱེད་ཞུ་རྒྱུ་ཡིན། ཞེས་གསུངས་སོང་།

ཕྱི་ལོ་༢༠༢༤ཟླ་༡ཚེས་༢༢ཉིན། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་འབྲས་ལྗོངས་དང་ནུབ་བྷང་གྷལ། དེ་བཞིན་གནས་མཆོག་རྡོ་རྗེ་གདན་བཅས་ནས་ཟླ་གཉིས་ཙམ་གྱི་མཛད་འཕྲིན་ལེགས་པར་གྲུབ་ནས། དེ་རིང་ལྡི་ལི་མཁའ་དབྱིངས་བརྒྱུད་བཞུགས་སྒར་རྡ་སར་ཞབས་སོར་བདེ་བར་འཁོད་སོང་། བཞུགས་སྒར་རྡ་ས་གཡས་གཡོན་གྱི་བོད་མི་གཙོས་པའི་སེར་སྐྱ་མི་མང་རྒན་གཞོན་ཀུན་གྱིས་ལག་ཏུ་ཁ་བཏགས་དང་། བདུག་སྤོས། མེ་ཏོག་བཅས་བཟུང་ནས། དགའ་དད་སྤྲོ་གསུམ་གྱིས་དགའ་བའི་འཛུམ་དང་བཅས་ལམ་འགྲམ་ནས་ཕྲེང་བསྒྲིགས་ཏེ་བསུ་མ་བྱས་སོང་།

ཕྱི་ལོ་༢༠༢༣ ཟླ་༡༢ ཚེས་༡༠ ཉིན། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་ཕུལ་ནས་མི་ལོ་ཧྲིལ་པོ་ ༣༤ འཁོར་བའི་དུས་དྲན་སྲུང་བརྩི་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཐེངས་༧༥ བཅས་སྲུང་བརྩི་ཞུ་བའི་གཞུང་འབྲེལ་མཛད་སྒོ་ཞིག་ཚོགས་སོང་།