ཕྱི་ལོ་༢༠༢༣ ལོའི་ཟླ་༦ ཚེས་༡༡ ཉིན། རྒྱལ་ཡུམ་ཆེན་མོའི་དྲན་རྟེན་གསེར་གྱི་བུམ་པའི་རྐང་སྤོལ་འགྲན་བསྡུར་ཐེངས་༢༨ པའི་རྟིང་རྩོད་འགྲན་བསྡུར་རྡ་ས་ཆིག་སྒྲིལ་རུ་ཁག་དང་དོན་གྲུབ་གླིང་རུ་ཁག་གཉིས་ཀྱི་བར་རྩེས་ནས། དུས་ཡུན་སྐར་མ་དགུ་བཅུ་ནང་དུ་རུ་ཁག་གཉིས་ནས་སྤོ་ལོ་གཅིག་ཀྱང་བླུགས་མ་ཐུབ་སྟབས། དུས་ཡུན་འཕར་མ་སྐར་མ་ཉི་ཤུའི་ནང་ལ་རྡ་ས་རུ་ཁག་གིས་སྤོ་ལོ་གཉིས་བླུགས་ཏེ། མཐའ་མའི་རྒྱལ་ཁ་རྡ་ས་ཆིག་སྒྲིལ་རུ་ཁག་ལ་ཐོབ་སོང་། འདི་ནི་རྡ་ས་རུ་ཁག་གིས་རྒྱལ་ཡུམ་ཆེན་མོའི་གསེར་གྱི་བུམ་པ་བཀྱགས་པ་ཐེངས་དང་པོ་ཡིན་འདུག

ཕྱི་ལོ་༢༠༢༣ ཟླ་༥ ཚེས་༢༤ ཉིན། བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཐེག་ཆེན་འཛིན་སྐྱོང་ཚོགས་པས་བརྟན་བཞུགས་བསྟར་འབུལ་ཞུས་སོང་། སྐབས་དེར་༧གོང་ས་མཆོག་གིས་ངོས་ནས་ད་དུང་ལོ་བཅུ་ཕྲག་གཉིས་གསུམ་ཞིག་ལ་ཧུར་ཐག་བྱེད་དེ། ཕྱོགས་གང་ས་ནས་བསྟན་པ་དང་འགྲོ་བའི་དོན་དུ། ཆོས་ཁས་མི་ལེན་མཁན་ཚོར་ཡང་སེམས་པ་བཟང་པོ་བྱེད་དགོས་པ་དང་། ཡ་རབས་བྱེད་དགོས་པ། ཡ་རབས་བྱས་ན་སེམས་ལ་ཞི་བདེ་འབྱུང་བ་དང་། སེམས་ལ་ཞི་བདེ་བྱུང་ཚེ་ལུས་ཀྱི་བདེ་ཐང་ལ་ཕན་པ་ངོས་རང་གི་ཉམས་མྱོང་གི་ཐོག་ནས་མི་མང་པོར་བཤད་བཞིན་ཡོད། ཅེས་གསུངས་སོང་།

ཕྱི་ལོ་༢༠༢༣ ཟླ་༥ ཚེས་༢༣ ཉིན། བཞུགས་སྒར་རྡ་རམ་ས་ནས་༧གོང་ས་མཆོག་གིས་ཉེ་ཆར་ཉི་ཧོང་གི་གྲོང་ཁྱེར་ཧི་རོ་ཤི་མར་ཚོགས་པའི་སྟོབས་ཆེན་རྒྱལ་ཁབ་བདུན་གྱིས་རྡུལ་ཕྲན་མཚོན་ཆ་མེད་པའི་འཛམ་གླིང་བསྐྲུན་རྒྱུའི་འབོད་སྐུལ་ལ་དགའ་བསུའི་གསུང་འཕྲིན་བསྩལ་འདུག ཁོང་གིས་ངོས་ལ་མཚོན་ན་འཛམ་གླིང་ཁྱོན་ཡོངས་སུ་དམག་འཁྲུག་དང་རྡུལ་ཕྲན་མཚོན་ཆ་མེད་པ་བཟོ་རྒྱུའི་ལས་འགུལ་སྤེལ་མཁན་ཞིག་ཡིན་པའི་ཆ་ནས་ལས་གཞི་འདི་ནི་བཟང་ཕྱོགས་ཀྱི་འགྱུར་བ་ཞིག་ཡིན་པའི་ཡིད་ཆེས་བརྟན་པོ་ཡོད། ཅེས་གསུངས་འདུག

ཕྱི་ལོ་༢༠༢༣ ཟླ་༥ ཚེས་༣༠ ཉིན། བཞུགས་སྒར་རྡ་རམ་སའི་ཐེག་ཆེན་ཆོས་གླིང་གཙུག་ལག་ཁང་དུ། ༸གོང་ས་མཆོག་གིས་བོད་རིགས་གཞོན་སྐྱེས་གཙོ་བོར་གྱུར་པའི་དད་ལྡན་ཆོས་ཞུ་བ་ཚོར་སེམས་བསྐྱེད་ཀྱི་ཆོས་འབྲེལ་གནང་སྐབས། འཛམ་གླིང་འདིའི་ཐོག་བདེ་སྐྱིད་ཡོང་བའི་རྩ་བ་ནི་སེམས་བཟང་པོ་རེད། སེམས་བཟང་པོ་ཡོད་ན་རང་ཉིད་སྐྱིད་པ་མ་ཟད། ཐ་ན་དགོང་མོའི་གཉིད་ཀྱང་སྐྱིད་པོ་ཡོང་གི་རེད། ཅེས་སོགས་གསུངས་སོང་།

ཕྱི་ལོ་༢༠༢༣ ཟླ་ ༥ ཚེས་ ༢༤ ཉིན་སྤེལ། བོད་ཀྱི་གཞོན་ནུ་ལྷན་ཚོགས་ཀྱིས་ཟླ་གཅིག་ཙམ་གྱི་བོད་དོན་ཛ་དྲག་གླེང་སློང་གོམ་བགྲོད་ཀྱི་ལས་འགུལ་ཨ་སམ་མངའ་སྡེའི་ཏིཛ་སྤུར་ལ་མཇུག་སྡུད་གནང་འདུག གོམ་བགྲོད་ཀྱི་ལས་འགུལ་བརྒྱུད་ནས་ས་གནས་མི་མང་ལ་བོད་དོན་གོ་རྟོགས་ཡག་པོ་སྤེལ་ཐུབ་ཡོད་པ་དང་རྒྱ་གར་གསར་ཁང་ཆེ་ཁག་ནང་བོད་དོན་ཐོག་གནས་ཚུལ་སྤེལ་ཡོད་སྐོར་འགྲེལ་བརྗོད་གནང་སོང་།

ཕྱི་ལོ་༢༠༢༣་ཟླ་༥་ཚེས་༢༣ཉིན། བཞུགས་སྒར་༧རྒྱལ་བའི་ཕོ་བྲང་གི་མཇལ་ཁ་ཁང་དུ། བོད་པའི་བུ་མོ་ཆུང་ཆུང་ཞིག་གིས་༧གོང་ས་མཆོག་ལ་སྙན་ངག་སྙན་སྒྲོག་ཞུས་ཡོད་པ་དང་། སྙན་ངག་དེའི་ནང་དུ་གཞིས་ལུས་བོད་མི་རྣམས་ཀྱིས་ཉིན་མཚན་ཀུན་ཏུ་༧རྒྱལ་བ་རིན་པོ་ཆེ་བོད་ལ་ཕེབས་རྒྱུའི་རེ་སྒུལ་བྱེད་བཞིན་ཡོད་པ་དང་། ཐེངས་གཅིག་མཇལ་རྒྱུར་རེ་བ་དང་སྨོན་ལམ་གྱིས་སྒུག་ནས་བཞུགས་འདུག ༧རྒྱལ་བ་རིན་པོ་ཆེ། ཁྱེད་ཕ་ཡུལ་ལ་ཕེབས་རན་སོང་། ཞེས་བཀོད་འདུག