སྤྱི་འཐུས་ཚོགས་གཙོ་མཆོག་གིས་ཨ་རིའི་སྲིད་འཛིན་གསར་པ་ཇོར་བྷ་ཌན་ལ་འཚམས་འདྲི་གནང་འདུག

དེ་ཡང་། ཟླ་འདིའི་ཚེས་༢༠ཉིན། ཨ་རིའི་རྒྱལ་ས་ཝ་ཤིང་ཊོན་གྱི་ཕོ་བྲང་དཀར་པོ་མདུན་དུ། ཨ་རིའི་སྲིད་འཛིན་གསར་པ་ཇོར-བྷ་ཌན(Joe Biden)་དང་སྲིད་འཛིན་གཞོན་པ་ཀཱ་མཱ་ལཱ-ཧཱ་རིས(Kamala Harris)གཉིས་ཀྱིས་ལས་ཁུར་དམ་འབུལ་གནང་སོང་། སྐབས་དེར། ཇོར་བྷ་ཌན་གྱིས་ཨ་རི་མི་མང་རྣམས་མཐུན་སྒྲིལ་དང་འདྲ་མཉམ་ཡོང་ཐབས་ལ་འབད་བརྩོན་གནང་རྒྱུ་དང། ཨ་རི་ནང་དུ་ཏོག་དབྱིབས་ནད་དུག་འགོག་ཐབས་གང་ཐུབ་གནང་རྒྱུ། ཁོར་ཡུག་སྲུང་སྐྱོབ་སོགས་ཀྱི་ཐོག་ཤུགས་སྣོན་རྒྱག་རྒྱུ་ཡིན་པ་སོགས་གསུངས་སོང་།

དཔལ་ལྡན་ཚོགས་གཙོ་མཆོག་གི་འཚམས་འཕྲིན་ནང་དུ་འཁོད་དོན། ཨ་རིའི་གཞུང་མང་གཉིས་ནས་བོད་མི་དང་། བོད་ཀྱི་འཚེ་མེད་ཞི་བའི་འཐབ་རྩོད་ཐོག་འགྱུར་བ་མེད་པར་རྒྱབ་སྐྱོར་གནང་དང་གནང་མུས་ཡིན་པར་སོང་། ཨ་རིའི་གཞུང་མང་གཉིས་ནི་འཛམ་གླིང་ཡུལ་གྲུ་གང་སར་གནས་པའི་བོད་མི་ཚོར་ཤིན་ཏུ་ནས་བཀའ་དྲིན་ཆེན་པོ་ཡིན། ཉེ་ཆར་གཏན་འབེབས་གནང་བའི་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་ཡིག་གི་འབྲུ་དོན་རྣམས་སྐུ་ཉིད་ཀྱི་དབུ་འཁྲིད་འོག་ཕྱག་བསྟར་གནང་རྒྱུར་ང་ཚོས་ཡིད་ཆེས་ཆེན་པོ་བྱེད་ཀྱི་ཡོད། སྔ་ལོའི་ཕྱི་ཟླ་ ༩ པའི་ནང་སྐུ་ཉིད་ནས་བོད་ནང་གི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་མཁན་རྒྱ་ནག་གཞུང་གི་ལས་བྱེད་མི་སྣ་རྣམས་ལ་དམ་བསྒྲགས་བཀའ་ཆད་གཅོད་རྒྱུ་ཡིན་པ་དང་། བོད་མི་རྣམས་ལ་རྒྱབ་སྐྱོར་གནང་རྒྱུ་ཡིན་པ་གསུངས་པར་ང་ཚོས་ཐུགས་རྗེ་ཆེ་ཞུ་རྒྱུ་ཡིན་པ་དང་། སྐུ་ཉིད་ཀྱི་སྲིད་འཛིན་ལས་ཡུན་དེ་བཞིན་ལམ་ལྷོངས་དང་ལྡན་པ་ཡོང་བའི་སྨོན་འདུན་ཞུ་རྒྱུ་ཡིན། ཞེས་དང་།

རྒྱ་དམར་གཞུང་གིས་ག་དུས་ཡིན་ནའང་བོད་ལ་ཞི་བའི་བཅིངས་གྲོལ་དང་ཡར་རྒྱས་བཏང་ཡོད་པ་བརྗོད་བཞིན་ཡོད་ཀྱང་། དོན་དངོས་སུ་ཕྱི་ལོ་ ༡༩༥༩ ལོར་རྒྱ་དམར་གཞུང་གིས་བོད་ས་བཙན་བཟུང་བྱས་པ་ནས་བཟུང་ད་བར་བོད་ནང་གི་གནས་སྟངས་ནི་ཡ་ང་བ་ཞིག་དང་ཛ་དྲག་ཅན་ཞིག་ཡིན། ཕྱི་ལོ་ ༢༠༠༩ ནས་བཟུང་ད་བར་བོད་མི་གྲངས་ ༡༥༥ ཡིས་རྒྱ་ནག་དམར་གཞུང་གི་གདུག་རྩུབ་ཅན་གྱི་སྲིད་བྱུས་ལ་ངོ་རྒོལ་གྱིས་བོད་དོན་ཆེད་རང་ལུས་མེར་བསྲེགས་བཏང་ཡོད་པ་དང་། ཁོང་རྣམ་པས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་དགོས་པ་དང་། བོད་ལ་རང་དབང་དགོས་པའི་འབོད་སྒྲ་བསྒྲགས་ཡོད་པ་དེ་དག་གིས་རྒྱ་གཞུང་གིས་བོད་ནང་གཞི་རྩའི་འགྲོ་བ་མིའི་ཐོབ་ཐང་ཡོངས་རྫོགས་རྩིས་མེད་བཏང་དང་གཏོང་བཞིན་ཡོད་པ་མཚོན་ཐུབ།

ཨ་རི་ནི་བོད་ཀྱི་གནད་དོན་དང་། བོད་མིའི་ཐུན་མོང་མ་ཡིན་པའི་རིག་གཞུང་དང་ངོ་བོ་སྲུང་སྐྱོབ་ཡོང་རྒྱུར་རོགས་རམ་གནང་མཁན་གྱི་རྒྱལ་ཁབ་ཐོག་མའི་གྲས་ཤིག་ཡིན། ཨ་རིའི་གཞུང་ནས་བོད་རྒྱ་འབྲེལ་མོལ་བསྐྱར་གསོ་ཡོང་རྒྱུར་རྒྱ་དམར་གཞུང་ལ་རྟག་ཏུ་སྐུལ་མ་དང་གནོན་ཤུགས་སྤྲད་དང་སྤྲོད་བཞིན་ཡོད་ཀྱང་། རྒྱ་དམར་གཞུང་གི་ངོས་ནས་དེར་བཟང་ཕྱོགས་ཀྱི་ཡ་ལན་ཞིག་ང་ཚོར་རྩ་བ་ནས་སྤྲོད་ཀྱི་མེད། ཡིན་ནའང་། སྐུ་ཉིད་ཀྱི་དབུ་འཁྲིད་འོག་ཨ་རིིའི་གཞུང་གིས་མུ་མཐུད་རྒྱབ་སྐྱོར་དང་། རྒྱལ་སྤྱིའི་ནུས་པ་མཉམ་སྤུངས་ཐོག་ནས་གཉིས་སྨན་དབུ་མའི་ལམ་གྱི་སྲིད་བྱུས་གཞིར་བཞག་སྟེ་བོད་དོན་ཞི་བའི་ཐོག་ནས་གསལ་རྒྱུར་ཡིད་ཆེས་ཆེན་པོ་ཡོད། སྲིད་བྱུས་དེས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་བྱེད་བཞིན་ཡོད་པ་མ་ཟད། དེ་ནི་བོད་རྒྱ་གཉིས་ཀར་ཁེ་ཕན་ཡོད་པ་ཞིག་ཡིན།

སྐུ་ཉིད་ཀྱིས་ཨ་རིའི་མི་མང་གི་མངོན་འདོད་བསྒྲུབ་རྒྱུའི་ལས་དོན་མཐའ་དག་ལམ་ལྷོངས་ལྡན་པ་ཡོང་བའི་སྨོན་འདུན་ཞུ་རྒྱུ་ཡིན། ཞེས་བཀོད་འདུག