ཕྱི་ལོ་༢༠༢༢་ལོའི་ཟླ་༡་ཚེས་༤་ཉིན། བཞུགས་སྒར་རྡ་ས་ནས་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ལྔ་ཐུན་མོང་གི་ཐོག་ནས། པེ་ཅིང་གི་དགུན་དུས་ཨོ་རྩལ་འགྲན་ཚོགས་ལ་ངོ་རྒོལ་གྱི་ལས་འགུལ་ཞིག་སྤེལ་སོང་། ལུས་འགུལ་འདི་ཉིད་ནི། རྒྱ་ནག་དམར་ཕྱོགས་ཚོགས་པས་བཙན་གནོན་གྱིས་འགྲོ་བ་མིའི་ཐོབ་ཐང་དང་གཞི་རྩའི་རང་དབང་རྡོག་རོལ་གཏོང་བཞིན་ཡོད་པར་མ་ཟད། རྒྱལ་སྤྱི་ཁྱོན་ཡོངས་ལའང་ཉེན་ཁ་བཟོ་བཞིན་ཡོད་སྟབས། དེ་རིང་གི་ཉིན་མོ་འདིར་བོད་དང་། ཤར་ཏུར་ཀི་སི་ཐན། ཧོང་ཀོང་། ལྷོ་སོག རྒྱ་ནག ཐེ་ཝན་བཅས་ཀྱི་ལས་འགུལ་བ་རྣམས་མཉམ་འབྲེལ་གྱིས་འཛམ་གླིང་ཡོངས་སུ་སྤེལ་བཞིན་པའི་རྒྱལ་སྤྱིའི་ལས་འགུལ་ཞིག་ཆགས་འདུག

ཕྱི་ལོ་༢༠༢༡་ཟླ་༡༠་ཚེས་༢༢ཉིན། རྡ་སར་བོད་ཀྱི་ཚོགས་པ་དྲུག་གིས་འཚོགས་ལ་ཉེ་བའི་མཉམ་འབྲེལ་རྒྱལ་ཚོགས་ཀྱི་གོ་ལའི་ཁོར་ཡུག་ཚོགས་ཆེན་ཐེངས་༢༦ (COP26)་ཐོག བོད་ཀྱི་ཁོར་ཡུག་འཛམ་གླིང་ལ་གལ་ཆེ་སྐོར་ངོས་འཛིན་དགོས་པ་དང་། འཛམ་གླིང་གི་ཁོར་ཡུག་སྐོར་གླེང་སློང་གནང་སྐབས་བོད་ཀྱི་ཁོར་ཡུག་གཙོ་བར་འཛིན་དགོས་པའི་ལས་འགུལ་ཞིག་སྤེལ་སོང་།

ཕྱི་ལོ་༢༠༢༡་ཟླ་༡༠་ཚེས་༡༡ཉིན། བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོའི་ཐོག དཔལ་ལྡན་སྲིད་སྐྱོང་མཆོག་གིས་བཅའ་ཁྲིམས་དོན་ཚན་༢༢ པའི་དགོངས་དོན་ལྟར། རང་གི་བཀའ་ཤག་ལྷན་ཚོགས་སུ་བསྐོ་གཞག་ཞུ་རྒྱུའི་བཀའ་བློན་འོས་དམིགས་རྣམས་ཀྱི་མཚན་དང་ལོ་རྒྱུས་སྙིང་བསྡུས་རེ་སྤྱི་འཐུས་ལྷན་ཚོགས་སུ་སྒྲོགས་སྦྱང་གནང་རྗེས། གྲོས་ཚོགས་འཐུས་མི་རྣམས་ཀྱིས་ནོར་འཛིན་སྒྲོལ་མ་ལགས་ལ་འོས་༢༧་དང་། ལྕང་ར་ཐར་ལམ་སྒྲོལ་མ་ལགས་ལ་འོས་༢༧། རྒྱ་རི་སྒྲོལ་མ་ལགས་ལ་འོས་༣༠་བཅས་སྤྱི་འཐུས་ངོ་ཡོད་བརྒྱ་ཆ་ལྔ་བཅུ་ཡན་གྱིས་རྒྱབ་སྐྱོར་ཐོབ་ནས་དཔལ་ལྡན་ཚོགས་གཙོ་མཆོག་གིས་བཀའ་བློན་དུ་འདེམས་ཐོན་བྱུང་བའི་གསལ་བསྒྲགས་གནང་སོང་།

ཕྱི་ལོ་༢༠༢༡་ཟླ་༡༢་ཚེས་༡་ཉིན། བཞུགས་སྒར་རྡ་སའི་ཉེ་འཁོར་ལ་འཕྲོད་བསྟེན་ལས་ཁུངས་དང་། བོད་གཞུང་སྨན་རྩིས་ཁང་། བདེ་ལེགས་སྨན་ཁང་། རྡ་ས་ས་གནས་བུད་མེད་ལྷན་ཚོགས་། ཀུན་ཕན་ནད་གསོ་ཁང་བཅས་ཀྱིས་བོད་མི་དང་རྒྱ་གར་བ་སོགས་ལ་གཉན་ནད་རེག་དུག(AIDS)་སྐོར་ལ་ཡིག་ཆ་འགྲེམས་སྤེལ་དང་གོ་རྟོགས་ཀྱི་ལས་འགུལ་སྤེལ་སོང་། སྐབས་དེར། གཉན་ནད་རེག་དུག་གི་ནད་གཞི་དེ་གང་འདྲ་བྱས་ནས་འགོས་ཀྱི་ཡོད་མེད་ཤེས་རྟོགས་མེད་པར་ནད་པར་ཞེ་སྣང་དང་ཐེ་ཚོམ་སོགས་ཀྱི་ཚོར་སྣང་བྱུང་བའི་རྐྱེན་གྱིས་ནད་པར་དབྱེ་འབྱེད་བྱས་པའི་གནས་སྟངས་ཡོང་གི་ཡོད། ནད་པར་ཕན་ཐོགས་ན་རབ་དང༌། དེ་མིན་ནད་པར་ཚིག་རྩུབ་དང་གནོད་སྐྱོན་རིགས་ནམ་ཡང་བྱེད་མི་རུང་། ཞེས་འཕྲོད་བསྟེན་བཀའ་བློན་མཆོག་གིས་བརྗོད་སོང་།

ཕྱི་ལོ་ ༢༠༢༡ ཟླ་ ༡༠ ཚེས་༡༧ ཉིན། བཞུགས་སྒར་རྡ་ས་སྨན་རྩིས་ཁང་གི་ཚོགས་ཁང་དུ། ྋརྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་ཨ་རི་གསེར་གྱི་གཟེངས་རྟགས་འབུལ་བཞེས་མཛད་ནས་ལོ་ངོ༌༡༤ འཁོར་བའི་ཉིན་མོ་དང་། ྋརྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་མཆོག་ནས་བོད་ཀྱི་རྒྱལ་ས་ལྷ་སར་སྨན་རྩིས་ཁང་གསར་འཛུགས་བསྐྱངས་ཏེ་ལོ་ངོ༌༡༠༥ འཁོར་བ། བྱེས་སུ་༧རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ནས་འཕགས་ཡུལ་རྡ་སར་སྨན་རྩིས་ཁང་བསྐྱར་འཛུགས་བསྐྱངས་ནས་ལོ་ངོ་༦༠ འཁོར་བ་བཅས་དུས་དྲན་གསུམ་འཛོམས་ཀྱི་མཛད་སྒོ་ཞིག་ཚོགས་སོང་།

ཕྱི་ལོ་༢༠༢༡ཟླ་༡༠ཚེས་༡༡ཉིན། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཁང་དུ། སྐབས་༡༧་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོ་དབུ་འཛུགས་གནང་སོང་། གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་ཁག་ཅིག་དང་། བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཞིག་བཞག་གནང་སོང་།