ཕྱི་ལོ་༢༠༢༦ ཟླ་༢ ཚེས་༡༣ ཉིན། བཞུགས་སྒར་དྷ་ས་བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། དབུས་འོས་བསྡུ་ལས་ཁང་ནས་གསར་འགོད་གསལ་བསྒྲགས་སྤེལ་དོན་ལྟར་ན། ལས་ཐོག་སྲིད་སྐྱོང་སྤེན་པ་ཚེ་རིང་མཆོག་ལ་འོས་གྲངས་༣༡༣༢༥ ཐོབ་ནས་བརྒྱ་ཆ་༦༡ %་བརྒལ་ཡོད་པར་བརྟེན། འོས་བསྡུའི་སྒྲིག་གཞི་གཞིར་བཟུང་སྲིད་སྐྱོང་གི་དངོས་གཞིའི་འོས་བསྡུའི་ནང་འགྲོ་མི་དགོས་བསྐྱར་དུ་སྲིད་སྐྱོང་ལོ་ལྔར་འདེམས་ཐོན་བྱུང་སོང་། དབུ་དཀར་ཚང་སྐལ་བཟང་རྡོ་རྗེ་ལགས་ལ་འོས་གྲངས་༡༧༨༤༣ ཐོབ་ཡོད་འདུག གཞན་ཡང་། ༢༠༢༦ ལོའི་སྲིད་སྤྱི་གཉིས་ཀྱི་འོས་བསྡུ་ལ་བཙན་བྱོལ་བོད་མི་ཁྱོན་ ༩༡༠༤༢ ནས་དེབ་སྐྱེལ་གནང་ཡོད་ཀྱང་། དེའི་ཁྲོད་ནས་བོད་མི་ ༥༡༡༥༠ མ་གཏོགས་སྔོན་འགྲོའི་འོས་བསྡུའི་ནང་ཆ་ཤས་བླངས་མི་འདུག

ཕྱི་ལོ་༢༠༢༦ ཟླ་༢ པའི་ཚེས་༡ ཉིན། འཛམ་གླིང་རྒྱལ་ཁབ་ཉེར་བདུན་ནང་གི་བོད་མི་ཚོས་ཚ་ཚ་འུར་འུར་ངང་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། སྐབས་༡༨ པའི་བོད་མི་མང་སྤྱི་འཐུས་ཀྱི་འོས་མི་རྣམས་ལ་སྔོན་འགྲོའི་འོས་འཕེན་གནང་སོང་། བཞུགས་སྒར་དྷ་སའི་རྒན་གཞོན་དར་གསུམ་གྱིས་རང་འགན་རང་འཁྱེར་གནང་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་དང་སྤྱི་འཐུས་འོས་མི་རྣམས་ལ་འོས་བསྡུ་བྱ་ཡུལ་ས་ཚིགས་བཅུ་གཅིག་ནས་འོས་བླུགས་གནང་སོང་།

ཕྱི་ལོ་༢༠༢༦ ཟླ་༡ ཚེས་༢༨ ཉིན། བཞུགས་སྒར་དྷ་རམ་སའི་ས་གནས་འགོ་འཛིན་ཚོགས་ཁང་དུ། དབུས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག ༸ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་རྒྱ་གཞུང་གིས་སྐུ་དཀྲོངས་པའི་ཉིན་མོར། ཁོང་ལ་བཀའ་དྲིན་རྗེས་དྲན་ཞུ་ཆེད་བོད་ཀྱི་སྐད་ཡིག་ཉིན་མོ་ཞེས་སྲུང་བརྩི་ཞུས་སོང་། སྐབས་དེར། ༸ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་གིས་བོད་ཀྱི་ཆོས་དང་སྐད་ཡིག སློབ་གསོ། དེ་བཞིན་ཆབ་སྲིད་བཅས་ཀྱི་སྐོར་ཕྱག་ལས་གང་དང་གང་གནང་ཡོད་མེད་སྐོར་ལ་འབུམ་རམས་པ་དགེ་བཤེས་རོང་པོ་བློ་བཟང་སྙན་གྲགས་ལགས་དང་། ལོ་རྒྱུས་སློབ་དཔོན་གཙང་ཕྲུག་སྟོབས་ལགས། འབུམ་རམས་པ་རྒྱལ་ལོ་ལགས། ཆབ་སྲིད་བཙོན་ཟུར་ངག་དབང་འོད་འབར་ལགས་བཅས་ནས་གཏམ་བཤད་གནང་སོང་། བོད་ཀྱི་གཞོན་ནུ་ལྷན་ཚོགས་དྲུང་ཆེ་བསྟན་འཛིན་བློ་བཟང་ལགས་ནས་གཙོ་སྐྱོང་གནང་སོང་།

དབུས་འོས་བསྡུ་ལས་ཁང་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་དང་བོད་མི་མང་སྤྱི་འཐུས་སྐབས་༡༨ པའི་འོས་བསྡུ་ཆེན་མོའི་ལས་རིམ་དང་འབྲེལ་བའི་གསར་འགོད་ལྷན་ཚོགས་ཤིག་ཚོགས་སོང་། སྐབས་དེར། དབུས་འོས་བསྡུ་ལས་ཁང་ནས་སྐུ་ཞོགས་རྡོ་རྗེ་ལགས་ཀྱིས་གཞུང་བསྟེན་དགྲ་ལྷའི་བཀའ་ལུང་ཇི་བཞིན་འགྲེལ་བརྗོད་གནང་སྐབས་ཁོང་ནས་འཕྲོས་བཤད་ཀྱིས་ཆབ་སྲིད་དང་འབྲེལ་བའི་བཀའ་མོལ་མང་དག་གནང་ཐལ་གྱི་རྐྱེན་པས་སྤྱི་ཚོགས་འཁྲུག་གཞི་དང་། འོས་བསྡུའི་ལས་རིམ་ལ་དོ་ཕོག་འགྲོ་ཉེན་ཡོད་པར་སོང་། བཙན་བྱོལ་བོད་མིའི་འོས་བསྡུའི་སྒྲིག་གཞི་དང་། རྩ་འཛིན་ལམ་སྟོན་བཅས་འགལ་འཛོལ་བྱུང་བའི་ཁོང་ལ་ཉེན་བརྡ་བཏང་ཡོད་འདུག དེ་བཞིན་ངག་དབང་བློ་གྲོས་ (ཨེམ་རྗེ་རྟ་ར་) ནས་སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས་ལ་སྒྲོ་བཏགས་དང་གཞི་མེད་སྐྱོན་འཛུགས་བྱེད་པར་འོས་བསྡུ་སྒྲིག་གཞི་དང་འགལ་ནས་ཁོང་ལ་ལོ་བརྒྱད་རིང་གཞུང་འབྲེལ་གདམ་བྱ་འདེམས་བྱེད་ཀྱི་ཐོབ་ཐང་འཕྲོག་རྒྱུའི་ཐག་གཅོད་ཞུས་པའི་བཅད་ཁྲ་བཏང་ཡིན་ཞེས་གསུངས་སོང་།

ཕྱི་ལོ་༢༠༢༦ ཟླ་ ༡ ཚེས་ ༢༡ ཉིན་། རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དགའ་ལྡན་བླ་སྤྱིའི་འདུ་ཁང་དུ། དགའ་ལྡན་དགོན་གྱི་འདུས་སྤྱི་ཡོངས་དང་འདོད་རྒུ་གླིང་བོད་མི་ཡོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས་སོང་། སྐབས་དེར། འདོད་རྒུ་གླིང་བོད་མི་ཡོངས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་གཟེངས་རྟགས་འབུལ་བཞེས་མཛད་སོང་།

ཕྱི་༢༠༢༦་ལོ་ཟླ་བ་༡ ཚེས་༡༦ ཉིན་སྤེལ། ཕྱི་ལོ་༢༠༢༦་ལོའི་སྲིད་སྐྱོང་འོས་བསྡུའི་ནང་ཞུགས་མཁན་ཁྱོན་སྲིད་སྐྱོང་འོས་མི་ལྔ་བྱུང་ཡོད་ཅིང༌། དེ་དག་ནི་ལས་ཐོག་སྲིད་སྐྱོང་སྤེན་པ་ཚེ་རིང་མཆོག་དང༌། དབུ་དཀར་ཚང་སྐལ་བཟང་རྡོ་རྗེ་ལགས། ཚེ་རིང་ཕུན་ཚོགས་ལགས། བཀྲ་ཤིས་སྟོབས་རྒྱལ་ལགས། རྒྱལ་ཐང་ངག་དབང་དགའ་ལྡན་ལགས་བཅས་ཡིན། འདི་ག་གསར་ཁང་ངོས་ནས་ཕྱི་ལོ་༢༠༢༦ འོས་བསྡུ་ཆེན་མོ་ནང་སྲིད་སྐྱོང་འོས་མི་ཚང་མའི་ལོ་རྒྱུས་མདོ་བསྡུས་དང་སྲིད་སྐྱོང་ལངས་དགོས་པའི་དམིགས་ཡུལ་ངོ་སྤྲོད་བྱ་རྒྱུ་ཡིན། འོན་ཀྱང་བཀྲ་ཤིས་སྟོབས་རྒྱལ་ལགས་འོས་བསྡུའི་ཁྲིམས་སྒྲིག་འགལ་ལུགས་ཀྱིས་དབུས་འོས་བསྡུ་ལྷན་ཁང་གིས་སྲིད་སྐྱོང་འོས་མི་ནས་ཕྱིར་འཕུད་གནང་ཚར་ཡོད།