སྐབས་༡༧ བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པ་དབུ་འཛུགས་གནང་སོང་།

དེ་ཡང་། གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། ཚོགས་གཞོན་སྒྲོལ་མ་ཚེ་རིང་མཆོག བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་གཙོས་པའི་དཔལ་ལྡན་བཀའ་བློན་རྣམ་པ། དེ་བཞིན་བོད་མི་མང་སྤྱི་འཐུས་རྣམ་པ་བཅས་ཀྱིས་ཐོག་མར་ཚོགས་གཙོ་མཆོག་གིས་ཚོགས་འདུ་དབུ་འཛུགས་ཀྱི་གསལ་བསྒྲགས་དང་འབྲེལ། ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས་དཔལ་ལྡན་ཚོགས་གཙོ་མཆོག་གིས་ཚོགས་འདུ་དབུ་འཛུགས་ཀྱི་གསུང་བཤད་གནང་སོང་།

དེ་ནས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་དབུ་འཛུགས་གསུང་བཤད་གནང་དོན། དེ་རིང་ང་ཚོའི་གྲོས་ཚོགས་འདི་དབུ་འཛུགས་ཞུ་ཡི་ཡོད་རེད། སྤྱིར་བཏང་ང་ཚོས་ལོ་གཅིག་ལ་གྲོས་ཚོགས་ཐེངས་གཉིས་ཚོགས་ཀྱི་ཡོད་རེད། ཕྱི་ཟླ་ ༣ པའི་གྲོས་ཚོགས་དེ་སྔོན་རྩིས་གྲོས་ཚོགས་དང་། དེ་ག་ནང་བཞིན་ཕྱི་ཟླ་ ༩ པའི་གྲོས་ཚོགས་དེ་ཡོངས་གྲགས་ཀྱིས་ལས་བསྡོམས་གྲོས་ཚོགས་ཞེས་ཚོགས་ཀྱི་ཡོད་རེད། དེ་རིང་ང་ཚོའི་སྔོན་རྩིས་གྲོས་ཚོགས་ཆགས་བསྡད་ཡོད་རེད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་པ་འཕྲིན་ལས། ང་རང་ཚོའི་མི་རབས་རྒན་པ་དེ་ཚོའི་བློས་བཏང་དང་ལྷག་བསམ་རྣམ་དག་གིས་ཞབས་འདེགས་ལ་བརྟེན་ནས་ང་ཚོ་བཙན་བྱོལ་ནང་དུ་བོད་མིའི་གཞིས་ཆགས་ཁག་རེད། དེ་བཞིན་ཆོས་ཕྱོགས་ནས་ཞུས་པ་ཡིན་ན་དགོན་སྡེ་ཁག དགོན་སྡེ་ཁག་ནང་དུ་བཤད་སྒྲུབ་ཚད་ལྡན་བྱུང་བ། དེ་ག་ནང་བཞིན་བོད་ཀྱི་ཆོས་དང་རིག་གཞུང་། སྐད་ཡིག་དང་བཅས་པ་མ་ཉམས་པར་སླར་གསོ་ཡོང་བ། དེ་ནས་རྒྱལ་སྤྱིའི་ཁྱོན་དུའང་བོད་ཀྱི་སྐད་ཡིག་དང་ནང་ཆོས་ལ་དོ་སྣང་ཤུགས་ཆེན་པོ་སླེབས་ཐུབ་པའི་གནས་བབ་གཅིག་ཆགས་བསྡད་ཀྱི་རེད། དེར་ང་རང་ཚོས་དགའ་བ་སྒོམ་འོས་པའི་གནས་སྟངས་ཤིག་ཆགས་བསྡད་ཀྱི་འདུག

བོད་ཀྱི་གནས་སྟངས་ཀྱི་ཐོག་ལ་ཚང་མས་མཉམ་དུ་འགན་ཁུར་ཞུ་རྒྱུ་དང་། བོད་ཀྱི་གནས་སྟངས་འདིའི་བརྒྱུད་ནས་རྒྱལ་སྤྱིའི་གནས་བབ་རེད། ལྷག་པར་དུ་རྒྱ་ནག་གི་ཆབ་སྲིད་ཀྱི་གནས་བབ་ལ་ཤུགས་རྐྱེན་འགྲོ་ཡི་ཡོད་པ་དེ་ངོས་འཛིན་གསལ་པོ་བྱེད་ཐུབ་པ་དེ་ཡག་པོ་ཞེ་པོ་ཞིག་ང་ཚོར་ཆགས་བསྡད་ཀྱི་འདུག མ་འོངས་པར་ཡིན་ན་ཡང་ང་རང་ཚོས་དེའི་ཐོག་ལ་འབད་བརྩོན་བྱེད་དགོས་པའི་གནས་སྟངས་གཅིག་དེ་ཆགས་སྡོད་ཀྱི་འདུག དེ་ག་ནང་བཞིན་ང་རང་ཚོའི་ཆབ་སྲིད་ཀྱི་ཐོག་ནས་བསམ་བློ་བཏང་བ་ཡིན་ན། ཕྱི་ལོ་ཆིག་སྟོང་དགུ་བརྒྱ་བདུན་ཅུ་དོན་གྲངས་ནས་རྒྱ་ནག་མཉམ་དུ་འབྲེལ་བ་བྱེད་རྒྱུ་འགོ་བཙུགས། འབྲེལ་བ་དེ་ཡང་ཕན་ཚུན་སྐུ་ཚབ་ཀྱི་རྣམ་པའི་ཐོག་ནས་འབྲེལ་བ་བཙུགས་རྒྱུ། ད་ལྟ་ཡིན་ན་ཡང་འབྲེལ་བ་ཆད་སྡོད་པ་རེད་དེ། འབྲེལ་བ་བསྐྱར་གསོ་ཡོང་ཐུབ་པར་འབད་བརྩོན་བྱེད་རྒྱུ་དེ་ཚོའི་ཐོག་ལ་ཡང་ང་ཚོས་འགན་ཁུར་ཞུས་སྡོད་ཀྱི་ཡོད་རེད།

ཉེ་ཆར་རྒྱ་ནག་གི་ནང་ཚོགས་འདུ་གཉིས་ཟེར་ནས་རྒྱལ་ཡོངས་སྲིད་གྲོས་ཀྱི་ཚོགས་འདུ་དང་། རྒྱལ་ཡོངས་མི་མང་འཐུས་མིའི་ཚོགས་ཆེན་ཟེར་ནས་ཚོགས་འདུ་གཉིས་ཚོགས་ཚར་ཙམ་རེད། ཚོགས་འདུ་གཉིས་ཀ་ལ་ཏོག་ཙམ་འབྲེལ་བ་ཡོད་པའི་བཟོ་འདྲ་ཞིག་ཆགས་བསྡད་ཡོད་རེད། དེ་ག་ནང་བཞིན་དཔེར་ན། སྲིད་གྲོས་གྱི་ཚོགས་འདུ་འདྲ་པོར་མཚོན་པ་ཡིན་ན། སྐབས་དེ་དུས་རྒྱ་ནག་གཞུང་གིས་བསྐོ་བཞག་བྱས་པའི་པཎ་ཆེན་གྱིས་ཆོས་ཕྱོགས་ཀྱི་ཐོག་ནས་གསུང་བཤད་གནང་པ། དེའི་ནང་ནས་བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་རྒྱུ་ཞེས་པ་དེའི་ཐོག་ལ་དམིགས་བསལ་གསུང་བཤད་ཟུར་འདོན་བྱས་པ་དེ་འདྲ་བྱུང་བཞག དེ་ཡིན་དུས་དེ་ཚོའི་ཐོག་ལ་ཕྱོགས་ཡོངས་ནས་དོ་སྣང་བྱེད་དགོས་པ་དེ་གལ་ཆེན་པོ་ཞིག་ཆགས་བསྡད་ཀྱི་འདུག དེ་ག་ནང་བཞིན་མི་དམངས་འཐུས་མི་ཚོགས་ཆེན་གྱི་ཉིན་མཐའ་མ་དེ་ལ་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་དེ་གཏན་འབེབས་བྱས་འདུག འདས་པའི་ལོའི་ནང་ལ་འཆར་ཟིན་བཟོས། དེ་རིང་ལོ་འདིའི་འཐུས་མིའི་ཚོགས་ཆེན་གྱི་ཉིན་མ་མཐའ་མ་དེ་ལ་གཏན་འབེབས་བྱས་འདུག དེའི་ནང་ལ་རྒྱ་ནག་གིས་བཙན་བཟུང་བྱས་པའི་མི་རིགས་མང་པོ་ཞིག་དང་འབྲེལ་བ་ཆགས་བསྡད་ཡོད་རེད། དེ་ནང་བཞིན་ང་རང་ཚོ་བོད་དང་ཡང་འབྲེལ་བ་ཆགས་བསྡད་ཀྱི་འདུག ཁྲིམས་དེའི་ནང་དོན་ཚན་ ༦༥ ཡི་མང་པོ་ཞིག་ང་ཚོ་དང་འབྲེལ་བ་ཡོད་པ་གང་ཞིག་ལ་དེའི་ནང་གི་དོན་ཚན་བཅོ་ལྔ་པ། དོན་ཚན་བཅོ་ལྔ་པ་དེའི་ཐོག་ནས་སྐད་ཡིག་གི་ཐོག་ལ་ཤུགས་རྐྱེན་ཆེ་ཤོས་ཤིག རྒྱ་ནག་སྤྱི་སྐད་ལབ་ཀྱི་འདུག རྒྱ་ནག་ཧན་མི་རིགས་ཀྱི་རྒྱ་སྐད་དེ་གཙོ་བོ་འཛིན་དགོས་པ། དེ་ག་ནང་བཞིན་སྐད་ཡིག་མཉམ་འབྲེལ་བྱེད་ནས་སྒོ་བྱང་དེ་ཚོར་སྦྱར་དགོས་པ་ཡིན་ནའང་རྒྱ་ནག་གི་སྤྱི་སྐད་དེ་ཚུར་འབུར་ཏུ་ཐོན་དགོས་པ། དེ་ག་ནང་བཞིན་ཕྲུ་གུ་ལོ་ན་མ་སོན་པའི་སྐབས་ནས་སྤྱི་སྐད་དེ་བེད་སྤྱོད་བཏང་ན་དེ་ལ་འགོག་རྐྱེན་བྱེད་མི་ཆོག་པ། དེ་འདྲའི་ཁྲིམས་ཡིག་མང་པོ་ཞིག་དེའི་ནང་དུ་གསལ་བསྡད་ཀྱི་འདུག ཁྲིམས་ནང་གསལ་བསྡད་དུས། རང་བཞིན་གྱིས་ང་རང་ཚོའི་བོད་ཀྱི་སྐད་ཡིག་དེ་ལ་ཤུགས་རྐྱེན་འགྲོ་ཡི་ཡོད་པ་གསལ་པོ་རེད། ད་གིན་གོང་དུ་ཞུས་པ་ནང་བཞིན་ནང་ཆོས་དེ་རྒྱ་ནག་ཅན་དུ་བསྒྱུར་རྒྱུ། དེ་ནང་བཞིན་ང་ཚོའི་སྐད་ཡིག་དེ་ཡང་རིམ་པས་ཚང་མས་བེད་སྤྱོད་བྱེད་བཞིན་པའི་སྤྱི་སྐད་དེ་མ་གཏོགས། ཐུན་མིན་གྱི་མི་རིགས་དེའི་སྐད་ཡིག་དེ་རིམ་བཞིན་གྱི་རྩ་བརླག་འགྲོ་རྒྱུ། དེའི་རྒྱུའམ་ཡང་ན་ཁོང་ཚོའི་ལག་པ་ཕྱི་ས་ཟེར་ནའང་འདྲ། དེ་ལ་ཁག་དཀྲིས་ནས་ང་རང་ཚོའི་སྐད་ཡིག་ལ་གཅེས་ཉར་བྱེད་མཁན་དེ་ཚོ་ལ་ཉེས་འཛུགས་བྱས་ནས་ཉེས་པ་ཕོག་པ་དེའི་ལམ་ཁ་དེ་འདིའི་ཐོག་ནས་གསལ་པོ་ཞེ་པོ་ཞིག་ཆགས་བསྡད་ཀྱི་འདུག

དེ་བཞིན་མི་རིགས་མཉམ་བསྲེས་བྱས་པ་དེའི་ཐོག་ལ་ཡང་ཁྲིམས་དེའི་ནང་དུ་གསལ་པོ་ཡོད་པ་འདྲ། དེ་ཡིན་དུས་དེ་འདྲའི་ཐོག་ནས་ད་ལྟའི་རྒྱལ་སྤྱིའི་སྤྱི་ཚོགས་ནང་ལ་ཁྲིམས་ཡིག་དེའི་ཐོག་ལ་གླེང་སློང་ཤུགས་ཆེན་པོ་ཞེ་པོ་ཞིག་གནང་སྡོད་ཀྱི་ཡོད་རེད། དེ་ག་ནང་བཞིན་ང་རང་ཚོར་ཐད་ཀར་དེར་འབྲེལ་བ་ཆགས་བསྡད་ཡོད་དུས། མ་འོངས་པར་དེའི་ཐོག་ལ་ཉམས་ཞིབ་བྱེད་ནས་ཐེར་འདོན་གནང་རྒྱུ་དང་། དེ་ག་ནང་བཞིན་ང་རང་ཚོའི་ངོས་ནས་ཞུ་སྐུལ་གནང་རྒྱུ། རྒྱ་ནག་གཞུང་ལ་ཡིན་ནའང་དངོས་གནས་བྱས་ན་བརྡ་ལན་སྤྲོད་དགོས་པ་དེ་གལ་ཆེན་པོ་ཞེ་པོ་ཆགས་བསྡད་ཀྱི་ཡོད་རེད། མི་རིགས་དེ་གནས་མ་གནས་དང་མི་རིགས་དེ་མ་འོངས་མདུན་བསྐྱོད་བྱེད་ཐུབ་མིན་དེ་གཙོ་བོ་སྐད་ཡིག་དེ་ཆགས་བསྡད་ཡོད་རེད། མི་རིགས་དེའི་ཆོས་དང་རིག་གཞུང་ཆ་ཚང་སྐད་ཡིག་དེའི་ཐོག་ལ་གནས་དགོས་དུས། བོད་ཀྱི་སྐད་དེ་བརླགས་སོང་བ་ཡིན་ན། བོད་ཀྱི་ཆོས་དང་རིག་གཞུང་ཚང་མ་བརླག་འགྲོ་ཡི་ཡོད་རེད། བརླག་འགྲོ་དུས། དེའི་ཐོག་ནས་ངོ་བོ་དང་ངོས་འཛིན་བྱེད་ས་ཞིག་མེད་པ་ཆགས་འགྲོ་ཡི་ཡོད་དུས། དེ་རྒྱ་ནག་གཞུང་གིས་ཆེད་མངགས་བཟོ་ཡི་ཡོད་རེད་པཱ། ང་ཚོ་བོད་མི་རིགས་ཀྱི་ངོས་ནས་ནད་དེ་ཆོགས་ཀྱི་ཡོད་མ་རེད་པཱ། ང་རང་ཚོའི་མི་རིགས་དེ་ལོ་ངོ་སྟོང་ཕྲག་མང་པོའི་རིང་གི་ཆོས་དང་རིག་གཞུང་། དེ་ག་ནང་བཞིན་སྐད་ཡིག་གི་ལོ་རྒྱུས་ལྡན་པའི་གནས་སྟངས་དེ་ཆགས་བསྡད་དུས། དེ་སྲུང་སྐྱོབ་བྱེད་པའི་འགན་དེ་བོད་མཐོ་སྒང་དུ་སྐྱེས་པ་ཙམ་གྱིས་སོ་སོ་ལ་རང་བཞིན་ནས་བདག་དབང་ཡོད་མཁན་ཞིག་དང་། རང་བཞིན་གྱིས་སོ་སོའི་མ་འོངས་པ་འབྲེལ་བ་ཆགས་བསྡད་པའི་གནས་སྟངས་ཆགས་བསྡད་ཡོད་རེད་པཱ། དེ་ཡིན་དུས་ཆབ་སྲིད་དང་དེ་ག་ནང་བཞིན་དགོས་མཁོའི་དབང་གིས་དེ་རྩ་མེད་བཟོ་རྒྱུ་དང་། དེ་ཉམས་ཆག་བཏང་བ་ཡིན་ན་དེ་ཏག་ཏག་སྡོད་ཀྱི་ཡོད་མ་རེད། དེར་བརྟེན་རྒྱ་ནག་གཞུང་གི་ངོས་ནས་ཡིན་ནའང་གྲངས་ཉུང་མི་རིགས་ཞེས་ཐ་སྙད་བེད་སྤྱོད་བྱེད་ཀྱི་ཡོད་རེད། གང་ལྟར་ང་ཚོ་བོད་མཐོ་སྒང་གི་མི་རིགས་དེ་བོད་མི་རིགས་ཆགས་བསྡད་ཀྱི་ཡོད་རེད། བོད་མི་རིགས་དེ་ལ་བོད་མི་རིགས་དེའི་ལོ་རྒྱུས་ཤིག་ཡོད་རེད། བོད་མི་རིགས་དེའི་སྐད་ཡིག་ཅིག་ཡོད་རེད། བོད་མི་རིགས་དེའི་རིག་གཞུང་ཞིག་ཡོད་རེད། དེ་སྲུང་སྐྱོབ་བྱ་རྒྱུའི་འགན་དེ་བོད་མི་རིགས་ལ་ཡོད་རེད་པཱ། ཡོད་པ་དེ་རྒྱ་ནག་གཞུང་གིས་ངོས་འཛིན་བྱས་ནས་དེ་ལ་ཆེ་མཐོང་ཞིག་གནང་དགོས་རྒྱུ་དེ་གལ་ཆེན་པོ་རེད་བསམ་གྱི་འདུག དེ་ཡིན་དུས་དེ་འདྲའི་ཐོག་ནས་ང་རང་ཚོས་དེའི་ཐོག་ལ་ཞིབ་འཇུག་བྱས་ནས་བགྲོ་གླེང་ག་རེ་བྱེད་དགོས་ཀྱི་འདུག དེ་ཚོ་ང་ཚོས་བྱེད་དགོས་པའི་དུས་ལ་བབ་པ་འདྲ་པོ་ཞིག་ཆགས་བསྡད་འདུག་ཅེས་དེ་རིང་ཆབ་སྲིད་ཀྱི་ཐོག་ནས་འདི་འདྲ་ཞིག་ཞུས་ན་བསམས་སོང་། ཞེས་སོགས་གསུངས་སོང་།

དེ་ནས་སྤྱི་འཐུས་གསེར་རྟ་ཚུལ་ཁྲིམས་མཆོག་གིས་༧སྐུའི་གཅུང་པོ་སྤྱི་ཟུར་མངའ་རིས་རིན་པོ་ཆེ་བསྟན་འཛིན་ཆོས་རྒྱལ་མཆོག་དམ་པའི་ཆེད་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་བཏོན་རྗེས། ཚང་མ་སྐུ་བཞེངས་ཐོག་ངག་བཅད་མྱ་ངན་སྐར་མ་གཅིག་རིང་ཞུས་གནང་སོང་།

དེའི་རྗེས་སྲིད་སྐྱོང་དང་། དཔལ་འབྱོར་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༦་་་༢༧ ལོའི་སྔོན་རྩིས་འགོད་འབུལ་གྱི་གསུང་བཤད་གནང་སོང་། ཐེངས་འདིའི་གྲོས་ཚོགས་ཐོག་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༦་་་༢༧ ལོའི་རྒྱུན་གྲོན་དང་། དམིགས་བསལ། ཟུར་བཀོལ། དམིགས་བཀར་ལས་འཆར་བཅས་པར་བཀའ་ཤག་གིས་ཕྱོགས་བསྡོམས་འགྲོ་གྲོན་གྱི་དགོས་དངུལ་ཧིན་སྒོར་ས་ཡ་ ༣༤༠༧་༤༢ འཆར་འབུལ་གནང་སོང་། དེའི་ནང་ནས་སྤྱི་ཚོགས་བདེ་དོན་སླད་ཧིན་སྒོར་ས་ཡ་༢༢༥༥་༢༣ (བརྒྱ་ཆ་༦༦་༡༩)དང་། ཆབ་སྲིད་ལས་དོན་ཆེད་ཧིན་སྒོར་ས་ཡ་༧༩༦་༦༩ (བརྒྱ་ཆ་༢༣་༣༨)། འཛིན་སྐྱོང་ཆེད་ཧིན་སྒོར་ས་ཡ་༣༥༥་༥༠ (བརྒྱ་ཆ་༡༠་༤༣)་བཅས་ཡིན་འདུག

དེ་བཞིན་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་ཚོགས་གཙོ་སྤྱི་འཐུས་ཆོས་གྲགས་རྒྱ་མཚོ་མཆོག་གིས་རྩིས་ལོ་ ༢༠༢༦་་་༢༧ ལོའི་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོ་སྙན་སྒྲོན་གནང་སོང་།

དེ་ནས་སྤྱི་འཐུས་ཀརྨ་དགེ་ལེགས་མཆོག་གིས་དཔལ་འབྱོར་བཀའ་བློན་མཆོག་གི་སྔོན་རྩིས་གསུང་བཤད་དང་། སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོར་སྤྱི་ཡོངས་ཀྱི་བགྲོ་གླེང་དགོས་པའི་གྲོས་འཆར་བཏོན་གནང་བར། སྤྱི་འཐུས་འཇུ་ཆེན་དཀོན་མཆོག་ཆོས་སྒྲོན་མཆོག་གིས་རྒྱབ་སྐྱོར་གནང་རྗེས། སྤྱི་འཐུས་རྣམ་པས་བགྲོ་གླེང་གནང་ཞིང་། ད་ལོའི་ཨ་རིའི་སྔོན་རྩིས་ཀྱི་གཏོང་ལེན་ཁྲིམས་ཡིག་ནང་བོད་མིའི་སྒྲིག་འཛུགས་འདི་བཞིན་བཙན་བྱོལ་བོད་གཞུང་ལ་ངོས་འཛིན་བྱེད་ཀྱི་ཡོད་ཅེས་ཚིག་བརྗོད་གསར་འཇུག་གནང་ཡོད་པར་བསྔགས་བརྗོད་དང་། དེ་བཞིན་ཨ་རིའི་རོགས་དངུལ་གྱི་གནས་བབ་སྐོར་དང་། སྔོན་རྩིས་འཆར་འབུལ་ནང་འགྲོ་གྲོན་གཏོང་ཕྱོགས་སྐོར་སོགས་དང་འབྲེལ་བའི་ཐོག་དོགས་འདྲི་དང་བགྲོ་གླེང་གནང་སོང་།