༸གོང་ས་མཆོག་གིས་ད་ལྟ་དུས་རབས་ཉི་ཤུ་རྩ་གཅིག་སྐབས་འདིར་ཡང་དཀའ་ངལ་རྣམས་དྲག་པོའི་སྟོབས་ཤུགས་ཐོག་ནས་སེལ་ཐུབ་རྒྱུ་རེད་བསམ་པའི་ཡིད་ཆེས་བྱེད་བཞིན་འདུག བསམ་ཚུལ་དེ་མཐའ་གཅིག་ཏུ་ནོར་འཁྲུལ་རེད། ད་ལྟ་དུས་རབས་ནི་ ༢༡ འགོ་སྟོད་རེད། འཛམ་གླིང་གི་དངོས་ཡོད་གནས་སྟངས་དེ་སྔ་ལས་རྦད་དེ་འགྱུར་ཟིན་པ་རེད། རྒྱལ་སྤྱིའི་དཔལ་འབྱོར་གྱི་གནས་སྟངས་དང་གོ་ལའི་ཁོར་ཡུག་གི་གནས་སྟངས་ལ་མཚོན་ན་རྒྱལ་མཚམས་མེད། དེར་བརྟེན་འཛམ་གླིང་མི་འབོར་དུང་ཕྱུར་བདུན་ཅུ་ཡོད་པ་རྣམས་ལ་དཀའ་ངལ་དེ་དག་གཅིག་མཚུངས་སུ་འཕྲད་བཞིན་ཡོད་ཅེས་ཞི་བདེ་བསྐྲུན་ཐབས་ཀྱི་བགྲོ་གླེང་ཐེངས་གསུམ་པའི་ཐོག་བཀའ་སྩལ།

རྒྱ་གར་ནག་གཉིས་ཀྱི་དམག་མི་འབྲོག་ལམ་ས་ཁུལ་ནས་གདོང་ཐུག་བྱུང་བའི་རྗེས་ནས། རྒྱ་གར་གྱིས་ཨུ་རུ་སུའི་དམག་སྡེ་ལ་མཉམ་འབྲེལ་བྱས་ཏེ། ཨུ་རུ་སུའི་དམག་དཔུང་གི་དྲག་ཆས་ཉོས་པ་དང་། ཨུ་རུ་སུའི་དམག་དཔུང་དང་ལྷན་དུ་དམག་སྦྱོང་ལ་སོགས་བྱེད་པའི་གྲ་སྒྲིག་གནང་བར་བརྟེན། སྲིད་དོན་དཔྱད་བརྗོད་པ་ཚོ་ལྟར་ན། ཨུ་རུ་སུའི་བྱང་ཕྱོགས་ཀྱི་དམག་དཔུང་གིས་རྒྱ་ནག་ལ་ཚོད་འཛིན་བྱེད་འཆར་ཡོད་སྐོར་བརྗོད་ཀྱི་འདུག

༢༠༡༨ལོའི་ཟླ་༡༠ཚེས་༡༢ཉིན། མཉམ་འབྲེལ་རྒྱལ་ཚོགས་ཀྱི་ཚོགས་ཆེན་སྟེང་ནས། རྒྱ་གར་ནི་༢༠༡༩ཡི་ཟླ་དང་པོའི་ཚེས་གསུམ་ནས་ལོ་གསུམ་གྱི་རིང་ལ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་སུ་འདེམ་ཐོན་བྱུང་འདུག་ཅིང་། སྤྱིའི་འོས་གྲངས་༡༩༣གྱི་ནང་ནས་རྒྱ་གར་ལ་འོས་ཤོག་༡༨༨ཀྱི་ཚད་མཐོ་བའི་འོས་ཤོག་ཐོབ་འདུག

༢༠༡༨ལོའི་ཟླ་༡༠ཚེས་༢༢ཉིན་བརྒྱུད་ལམ་ཁག་དུ་གནས་ཚུལ་ཐོན་གསལ། ཟླ་འདིའི་ཚེས་༢༡ཉིན་གྱི་ཕྱི་དྲོའི་ཆུ་ཚོད་༤དང་སྐར་མ་༥༠ཐོག ཐེ་ཝན་གྱི་ཕུའུ་ཡོའུ་མ་རྟགས་ཅན་གྱི་མེ་འཁོར་ཨང་༦༤༣༢པ་དེ་ཧྲུའུ་ལིན་ནས་ཐེ་ཏུང་དུ་འགྲོ་བའི་ལམ་བར་དུ་ལྕགས་ལམ་ལས་ཤོར་བའི་དོན་རྐྱེན་ཐོན་པ་དང་། མེ་འཁོར་དེར་ཁྱོན་འགྲུལ་བ་༣༦༦་ཡོད་པ་དང། དོན་རྐྱེན་དེའི་ནང་མི་༡༨་རྐྱེན་ལམ་དུ་ཤོར་བ་དང་། མི་༡༨༧་ལ་རྨས་སྐྱོན་ཕོག་ཡོད་འདུག དེ་ནི་ཐེ་ཝན་ལྕགས་ལམ་གྱི་ལོ་ངོ་༣༧་ནང་ཐོན་པའི་དོན་རྐྱེན་ཚབས་ཆེ་ཤོས་ཤིག་ཡིན་པར་བརྗོད་ཀྱིན་འདུག

ཐའེ་བོད་བདེ་དོན་ཚོགས་པའི་ཚོགས་གཙོ་ཆན་ཏ་ཡིས་བརྗོད་དོན། ཐའེ་ཝན་གྱིས་རང་བཙན་མ་གླེང་ན་གཞན་ཅི་ཡང་གླེང་ཆོག ཅེས་རྒྱ་གཞུང་གིས་བརྗོད་དེ་རྣམ་འགྱུར་ལྷོད་པོ་ཞིག་སྟོན་བཞིན་ཡོད་ན་ཡང་། དབུ་མའི་ལམ་དུ་བསྐྱོད་དེ་རང་སྐྱོང་རྩོད་མཁན་གྱི་ཏཱ་ལའི་བླ་མ་མཆོག་གི་རེ་འདུན་དེ་དང་ལེན་བྱེད་ཀྱི་མེད་སྟབས། ཐའེ་ཝན་གྱིས་དེ་ལས་བསླབ་བྱ་ལེན་དགོས་པ་ཞིག་རེད། གནད་འགག་གཙོ་བོ་དེ་ནི། རྒྱ་གཞུང་ལ་སྟངས་འཛིན་བྱེད་པའི་ནུས་པ་ཡོད་དང་མེད་པ་དེ་ཡིན་ཞིང་། ང་ཚོས་ནམ་རྒྱུན་གླེང་གི་ཡོད་པ་ལྟར། དེ་རིང་གི་བོད་ནི། ཕལ་ཆེར་སང་ཉིན་གྱི་ཐའེ་ཝན་ཡིན་པ་དང་། དེ་ནི་ང་ཚོའི་སེམས་ཁྲལ་ཡིན། ཞེས་བརྗོད་འདུག

༢༠༡༨ལོའི་ཟླ་༡༠ཚེས་༦ནས༨ཉིན། རྒྱ་ནག་ཤར་ཕྱོགས་ཀྱི་གྲོང་ཁྱེར་ཧྲན་ཏོང་ནས་དམག་མི་རྒན་ཡོལ་པ་༡༠༠སྐོར་ཞིག་ཡར་ལངས་བྱས་ཏེ་རྒྱ་གཞུང་ལ་ངོ་རྒོལ་བྱས་འདུག ངོ་རྒོལ་བྱེད་དོན་ནི། ཟླ་ཤས་སྔོན་དུ་གཞུང་ལ་ཞུ་གཏུགས་བྱེད་མཁན་གྱི་དམག་མི་རྒན་ཡོལ་པ་ཚོར་གཅེར་རྡུང་བྱས་པར་གཞུང་ནས་དགོངས་དག་ཞུ་དགོས་པ་དང་། དམག་མི་རྒན་ཡོལ་པ་ཚོར་སྣེ་ལེན་དང་ལྟ་རྟོག་གི་ཐད་ནས་སྔར་ལས་ཇེ་བཟང་དུ་གཏོང་དགོས་ཞེས་འབོད་སྐུལ་ཞུ་བཞིན་འདུག