07
Tue, Apr

༢༠༢༠་ལོའི་ཟླ་༡་ཚེས་༦ཉིན། ༸གོང་ས་མཆོག་གིས་གནས་མཆོག་རྡོ་རྗེ་གདན་ལ་གསུང་ཆོས་གནང་སྐབས། པར། ༸རྒྱལ་བ་རིན་པོ་ཆེའི་དྲ་རྒྱ།

བཙན་བྱོལ་གྱི་གསར་འགྱུར།
Typography

༢༠༢༠་ལོའི་ཟླ་༡་ཚེས་༧ཉིན་སྤེལ། རྒྱ་གར་གནས་མཆོག་རྡོ་རྗེ་གདན་ལ་༸གོང་ས་མཆོག་གིས་དད་ལྡན་མི་མང་ཁྲི་གསུམ་ལྷག་ལ་ཉིན་བཞི་རིང་གསུང་ཆོས་གནང་ཡོད་ཅིང་། དེའི་སྐབས་སུ། སེམས་བཏུལ་ན་བདེ་སྐྱིད་དང་། སེམས་མ་བཏུལ་ན་སྡུག་བསྔལ་རེད། སེམས་འདུལ་བྱེད་ཐབས་ཤེས་གཉིས་རེད། བྱང་ཆུབ་ཀྱི་སེམས་ཀྱིས་རང་གཅེས་འཛིན་ཤུགས་ཆུང་དུ་གཏོང་བ་དང་། གཞན་གཅེས་པར་འཛིན་པའི་ཤུགས་གོང་འཕེལ་གཏོང་གི་ཡོད། ཅེས་གསུངས་འདུག

དེ་ཡང་། ཟླ་འདིའི་ཚེས་༢་ཉིན་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་གྱི་དུས་འཁོར་དབང་ཆེན་གསུང་ཆོས་ར་བར་དགའ་ལྡན་ཤར་རྩེ་དང་བྱང་རྩེ་གྲྭ་ཚང་གིས་ཇི་ལྟར་གསོལ་བ་བཏབ་པ་ལྟར་སྤྱན་རས་གཟིགས་ཀྱི་བཀའ་དབང་དང་། འཇམ་དབྱངས་ཆོས་སྐོར་གྱི་ཆོས་འབྲེལ་བཀའ་དྲིན་སྩལ་རྒྱུའི་སྔོན་འགྲོའི་གསུང་ཆོས་སུ་ལག་ལེན་སོ་བདུན་མའི་གསུང་ཆོས་དབཀའ་དྲིན་སྩལ་ཡོད་པ་རེད། དེའི་སྐབས་སུ། ༸གོང་ས་མཆོག་གིས་བཅོམ་ལྡན་འདས་ཀྱིས་ལོ་ ༢༥༠༠ སྔོན་ལ་ངའི་བསྟན་པ་བྱང་ནས་བྱང་དུ་དར་གྱི་རེད་ཅེས་གསུངས་ཡོད་པ་རེད། དེ་བདེན་པ་རེད། རྒྱ་གར་གྱི་བྱང་བོད་དང་། བོད་ཀྱི་བྱང་སོག་པོ་རེད། ངོས་ཀྱི་བསམ་བློར་འདི་འདྲ་ཞིག་འཁོར་བ་རེད། ད་ནི་སངས་རྒྱས་ཀྱི་བསྟན་པ་ལྷོ་ནས་ལྷོ་ལ་དར་བ་ཡོད་པ་ལྟ་བུ་འདུག བོད་ནས་ལྷོ་རྒྱ་གར་དང་ཧི་མ་ལ་ཡའི་རི་རྒྱུད་ཁག དེ་དག་གིས་རྐྱེན་བྱས་ཏེ་འཛམ་གླིང་ཡུལ་གྲུ་མང་པོར་ཁྱབ་འགྲོ་བ་ལྟ་བུ་འདུག དེ་རེད་ཀྱང་རེད། སེམས་མ་སྐྱིད་པ་ཡོད་ཚེ་དངོས་པོ་ཡར་རྒྱས་ཅི་ཙམ་ཡོད་ཀྱང་སྐྱིད་པོ་གང་ཡང་མེད།

དངོས་པོ་ཡར་རྒྱུས་གཅིག་པུས་སེམས་ལ་ཆགས་སྡང་འཕེལ་བ་མ་གཏོགས་མི་འདུག མ་སྐྱིད་པ་བཟོ་མཁན་ཆགས་སྡང་གཉིས་ཀྱིས་བྱེད་ཀྱི་ཡོད། ཆགས་སྡང་གཉིས་ལ་རྒྱུ་དངོས་པོའི་འགྲོ་སོང་བཏང་ནས་ཉུང་དུ་གཏོང་རྒྱུ་ཡོད་པ་མ་རེད། ཁབ་རྒྱག་པ་དང་སྨན་ཟ་བ་ལྟ་བུས་སྐབས་ཐོག་སེམས་འཁྲུག་ཡོད་པ་ལྟ་བུ་ལ་ཕྲན་བུ་འཇགས་རྒྱུ་ཡོང་གི་རེད་མ་གཏོགས། རྩ་བའི་སེམས་ལ་འགུལ་སྐྱོད་གཏོད་ཐུབ་རྒྱུ་ཁྱོན་ནས་མེད། རྒྱ་གར་འཕགས་པའི་ཡུལ་ལ་ལོ་སུམ་སྟོང་གོང་ནས་འཚེ་བ་མེད་པ་དང་། སྙིང་རྗེ་ཞེས་བྱུང་བ་དང་། འཚེ་བ་མེད་པ་ཞེས་པ་ནི་འཚེ་བ་མ་ཡོང་བ་ཤོག་ཟེར་གྱི་ཡོད་པ་མ་རེད། འཚེ་བ་ཡོང་བའི་རྐྱེན་དེ་ཞེ་སྡང་གིས་བྱེད་ཀྱི་ཡོད་པས་སེམས་བཟང་པོ་བྱེད་པར་སྙིང་རྗེ་ཞེས་པ་ཐོན་ཡོང་གི་ཡོད། ཕལ་ཆེར་ལོ་སུམ་སྟོང་གི་མཚམས་སམ་ནང་ཆོས་མ་དར་གོང་ནས་རྒྱ་གར་གྱི་མུ་སྟེགས་པའི་གཞུང་གི་ནང་དུ་སེམས་ལ་བཟོ་བཅོས་རྒྱག་པའི་ཏིང་ངེ་འཛིན་སྒོམ་པ་དང་། སེམས་རྩེ་གཅིག་པའི་ཏིང་ངེ་འཛིན་དང་སོ་སོར་རྟོག་པའི་ཤེས་རབ་ཀྱིས་དཔྱད་ནས་དཔྱད་སྒོམ་བྱེད་པ་ཡོད་པ་ལྟ་བུ་འདུག ཅེས་དང་།

སེམས་བཏུལ་ན་བདེ་སྐྱིད་དང་། སེམས་མ་བཏུལ་ན་སྡུག་བསྔལ་རེད། སེམས་འདུལ་བྱེད་ཐབས་ཤེས་གཉིས་རེད། བྱང་ཆུབ་ཀྱི་སེམས་ཀྱིས་རང་གཅེས་འཛིན་ཤུགས་ཆུང་དུ་གཏོང་བ་དང་། གཞན་གཅེས་པར་འཛིན་པའི་ཤུགས་ཡར་སྤེལ་ནས། སྤྱོད་འཇུག་ལས། བདག་གིས་དེ་རིང་སྐྱོབ་པ་ཐམས་ཅད་ཀྱི།། སྤྱན་སྔར་འགྲོ་བ་བདེ་གཤེགས་ཉིད་དང་ནི།། བར་དུ་བདེ་ལ་མགྲོན་དུ་བོས་ཟིན་གྱིས།། ལྷ་དང་ལྷ་མིན་ལ་སོགས་དགའ་བར་གྱིས།། ཞེས་གསུངས་པ་ལྟར་རེད། ཅེས་དང་། ད་ལྟའི་དངོས་ཡོད་གནས་ཚུལ་ལ་འཛམ་གླིང་འདིའི་སྟེང་སྡུག་བསྔལ་མང་པོ་ཞིག་ཡོད་པ་དང་། མི་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་ཤ་སྟག་ཡིན་ཀྱང་། སྡུག་བསྔལ་མང་པོ་ཞིག་མིས་བཟོ་བཞིན་འདུག སྡུག་བསྔལ་འདོད་ནས་སྡུག་བསྔལ་བཟོས་པ་མིན་ཀྱང་། རྨོངས་ནས་ཆགས་སྡང་དང་དུ་བླངས་ཤིང་། ཆགས་སྡང་ལ་རྐྱེན་ཡོད་པ་དང་གཉེན་པོ་བསྟེན་སྟངས་མ་ཤེས་པ། དེ་བཞིན་དཀོན་མཆོག་ལ་ཡིད་ཆེས་བྱེད་མཁན་ཚོས་ཀྱང་གང་འཚམ་ནས་འུ་ཐུག་ཚེ་དཀོན་མཆོག་གིས་བཟོས་པ་རེད་ཅེས་འགན་དཀོན་མཆོག་ལ་འགེལ་བའི་ཉེན་ཁ་འདུག གང་ལྟར། སེམས་བཏུལ་ན་བདེ་སྐྱིད་དང་། སེམས་མ་བཏུལ་ན་སྡུག་བསྔལ་རེད། སེམས་འདུལ་བྱེད་ཐབས་ཤེས་གཉིས་རེད། བྱང་ཆུབ་ཀྱི་སེམས་ཀྱིས་རང་གཅེས་འཛིན་ཤུགས་ཆུང་དུ་གཏོང་བ་དང་། གཞན་གཅེས་པར་འཛིན་པའི་ཤུགས་ཡར་སྤེལ་ནས། སྤྱོད་འཇུག་ལས། བདག་གིས་དེ་རིང་སྐྱོབ་པ་ཐམས་ཅད་ཀྱི།། སྤྱན་སྔར་འགྲོ་བ་བདེ་གཤེགས་ཉིད་དང་ནི།། བར་དུ་བདེ་ལ་མགྲོན་དུ་བོས་ཟིན་གྱིས།། ལྷ་དང་ལྷ་མིན་ལ་སོགས་དགའ་བར་གྱིས།། ཞེས་གསུངས་པ་ལྟར་རེད། ཅེས་དང་།

རང་གཅེས་འཛིན་ཤུགས་ཆུང་དུ་གཏོང་བ་དང་གཞན་གཅེས་འཛིན་ཤུགས་ཆེ་རུ་གཏོང་བ་ཞིག་མ་བྱུང་ན་སངས་རྒྱས་ཀྱི་གོ་འཕང་ཐོབ་རྒྱུ་མེད་པ་ཨ་ཅང་ཅང་། འཕྲལ་དུ་ཚེ་འདི་ལ་ཡིན་ནའང་དོགས་པ་རྣམ་རྟོག་ཁོ་ནའི་ངང་ནས་འདུག་དགོས་པ་ཞིག་ཆགས་ཀྱི་རེད། སྤྱོད་འཇུག་ལས། བདག་བདེ་གཞན་གྱི་སྡུག་བསྔལ་དག། ཡང་དག་བརྗེ་བར་མ་བྱས་ན།། སངས་རྒྱས་ཉིད་དུ་མི་འགྲུབ་ཅིང་།། འཁོར་བ་ན་ཡང་བདེ་བ་མེད།། ཅེས་གསུངས་པ་ལྟར། མཐོང་ཆོས་ཀྱི་འཛམ་གླིང་འདིར་རྙོག་དྲ་ཧ་ཅང་མང་པོ་ཡོད་པ་དེར་བསམ་བློ་ཐོངས་དང་། ཡར་མགོ་ཁྲིད་ཚོ་ཡིན་ནའང་རེད། བར་གྱི་ཆབ་སྲིད་པ་ཚོ་ཡིན་ནའང་རེད། མི་མང་ཡིན་ནའང་རེད། གང་ལྟར་རང་གཅེས་འཛིན་གྱི་གོང་བུ་བྱས་ནས་སྡོད་ཀྱི་འདུག གཞན་གཅེས་འཛིན་གྱིས་ལྡེང་གི་མི་འདུག

དོན་དངོས་སུ་མང་གཙོ་ཞེས་པ་དེ་ཧ་ཅང་ཡག་པོ་རེད། མང་གཙོ་དཔྱིས་ཕྱིན་པ་ཞིག་ཡོང་བ་ལ་གཞན་གཅེས་འཛིན་དགོས། མང་གཙོ་ཁ་ལ་འཁྱེར་ནས་རང་བདེ་སྒྲུབ་ཚེ་དོན་དག་རང་གཅེས་འཛིན་གྱི་གཞན་དབང་དུ་སོང་ཡོད་པ་ཡིན་པས་བདེ་སྐྱིད་ཡོང་ཐབས་མེད། འཛམ་གླིང་གང་སར་ལྟོས་དང་། ཅུང་ཟད་ལྐོག་གྱུར་མ་ཡིན་པར་མཐོང་བ་མངོན་གྱུར་རེད། མི་རང་གིས་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱིས་དཀའ་ངལ་དང་སྡུག་བསྔལ་ཉུང་དུ་གཏོང་བ་དང་། བདེ་སྐྱིད་མང་དུ་གཏོང་རྒྱུའི་ཚབ་ལ་དྲན་རྒྱུ་རྒོད་པོ་དང་། བྱེད་རྒྱུ་འབེལ་བོ། དཔལ་འབྱོར་གྱི་ཐོག་ནས་བཤུ་གཞོག་གཏོང་བ་དང་། མགོ་སྐོར་གཏོང་བ། དབང་ཡོད་བཤད་པ་སོགས་ཡོང་བཞིན་འདུག དེར་བརྟེན། བདེ་སྐྱིད་ལྡན་པའི་འཛམ་བུ་གླིང་ཞིག་བྱེད་དགོས་ཚེ་དངོས་པོ་ཡར་རྒྱས་གཅིག་པུའི་ལྡེང་གི་མེད་པར་སྔོན་ལ་སེམས་ལ་བྱམས་བརྩེ་དགོས་པ་གལ་ཆེན་པོ་རེད། ཅེས་སོགས་གསུང་ཆོས་སྔོན་འགྲོའི་བཀའ་སློབ་སྩལ་ཡོད་འདུག

དེ་ནས་ཟླ་འདིའི་ཚེས་༣་ཉིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གནས་མཆོག་རྡོར་གདན་དགའ་ལྡན་འཕེལ་རྒྱས་གླིང་ནས་དུས་དབང་གསུང་ཆོས་ར་བར་ཆིབས་བསྒྱུར་གྱིས་རྒྱལ་ཁབ་ ༦༧ ནས་ཕེབས་པའི་ཆོས་ཞུ་བ་ ༣༥༠༠༠ བརྒལ་བར་བྱང་སེམས་ཀྱི་སྡོམ་པ་འབོག་ཆོག་དང་སྤྱན་རས་གཟིགས་ཀྱི་བཀའ་དབང་བཀའ་དྲིན་སྩལ་ཡོད་པ་རེད།

ཁོང་གིས་དེང་སང་གི་དུས་ཚོད་ལ་དངོས་པོ་ཧ་ཅང་ཡར་རྒྱས་ཕྱིན་ཡོད་ཀྱང་། དེས་ཕྱིའི་ལུས་པོ་བདེ་ཐང་ཡོང་བ་དང་། ལུས་པོའི་བདེ་སྐྱིད་ཙམ་མ་གཏོགས་ནང་སེམས་ཁམས་མ་སྐྱིད་པ་ཡོང་བ་ལ་གང་ཡང་བྱ་རྒྱུ་མི་འདུག དེར་བརྟེན། དེང་སང་བདེ་སྐྱིད་ནི་ཕྱི་ལ་མཛུ་གུ་བཙུགས་རྒྱུ་མིན་པར་ནང་བློ་ལ་མཛུ་གུ་འཛུགས་རྒྱུ་ཞིག་དང་། བློ་ལ་ཡང་སྒོ་ལྔའི་ཤེས་པ་དང་ཡིད་བློ་བཅས་ཡོད་པའི་ནང་ནས་དངོས་པོ་ཡར་རྒྱས་རྐྱང་རྐྱང་ཕྱིན་པ་དེ་སྒོ་ལྔའི་ཤེས་པ་རྐྱང་བའི་སྐད་ཆ་རེད། ལྟད་མོ་བལྟས་པ་ཡིན་ན་མིག་དབང་ལ་བརྟེན་པའི་མིག་གི་ཤེས་པས་ཉམས་སུ་མྱང་ནས་ཡིད་བློའི་སྟེང་གནས་སྐབས་ཀྱི་བདེ་བ་ཞིག་དང་། ཇི་སྲིད་མིག་གིས་ལྟད་མོ་མཐོང་བའི་རིང་ལ་ཡིད་ཚིམས་པ་ཞིག་ཡོང་བ་དང་། དེ་འགག་སོང་ན་གང་ཡང་ཡོད་པ་མ་རེད། དེ་བཞིན་རྣ་བའི་ཤེས་པས་སྒྲ་ཉན་ནས་སྒྲ་སྙན་པོ་རོལ་མོ་ལྟ་བུ་ཐོས་སྐབས་ཡིད་བློ་གནས་སྐབས་ཚིམས་སྡོད་པ་ལྟ་བུ་ལས་གང་ཡང་མི་འདུག གང་ལྟར་མ་སྐྱིད་པ་བཟོ་མཁན་དེ་ཡིད་བློའི་སྟེང་ནས་ཡོང་གི་ཡོད་པ་དང་། སེམས་འཁྲུག་ནས་མ་སྐྱིད་པར་ཡོད་པ་དེ་མིག་གི་ཤེས་པས་ལྟད་མོར་བལྟས། རྣ་བའི་ཤེས་པས་སྒྲ་ལ་ཉན་པ་ཡིན་ནའང་ཡིད་ཀྱི་སྡུག་བསྔལ་སེལ་ཐུབ་ཀྱི་མི་འདུག དེར་བརྟེན། སྒོ་ལྔའི་ཤེས་པར་མ་བརྟེན་པར་ཡིད་བློ་རང་གི་སྟེང་ནས་བསམ་བློ་བཏང་ནས་མི་སྐྱིད་པ་ཅི་ཞིག་གིས་བྱེད་བཞིན་པ་དང་། དེའི་རྒྱུ་དང་རྐྱེན་ཅི་ཞིག་ཡིན་པ་ལ་བསམ་བློ་བཏང་ནས་ཡིད་བློའི་སྟེང་ནས་མ་སྐྱིད་པ་ཡོང་བ་ཉུང་དུ་གཏོང་དགོས། རྒྱུ་དང་རྐྱེན་དེའི་ལྡོག་ཟླ་དེ་དག་གིས་ཡིད་ཚིམས་པ་དང་བློ་བག་ཕེབས་པོ་ཞིག་ཡོང་བཞིན་ཡོད། གཙོ་བོ་ཡིད་བློའི་སྟེང་ནས་བདེ་སྐྱིད་འཚོལ་རྒྱུ་གལ་ཆེན་པོ་འདུག་ཅེས་དེའི་སྐབས་བཀའ་སྩལ་འདུག

དེའི་རྗེས་ཟླ་འདིའི་ཚེས་༥་ཉིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་གྱི་དུས་འཁོར་དབང་ཆེན་གྱི་གསུང་ཆོས་ར་བར་འཇམ་དབྱངས་ཆོས་སྐོར་ལས་རྗེ་བཙུན་མ་ནག་མོའི་བཀའ་དབང་བཀའ་དྲིན་སྩལ་ཡོད་པ་རེད། ངོས་ལ་དགའ་མོས་ཡོད་པ་ཚོས་ངོས་ཀྱིས་བརྗོད་ཟིན་པ་དག་སེམས་ལ་ངེས་པར་བྱོས། ཉམས་ལེན་བྱོས་དང་། ཞག་དང་ཟླ་ལ་ཧ་ཅང་ཁག་པོ་ཡིན་ཡང་། ཡུན་བསྐྱངས་པ་ཡིན་ན་ལོ་གཅིག་གི་ནང་ལ་སོ་སོར་འགྱུར་བ་ཅི་ཞིག་བྱུང་འདུག་བསམ་བློ་ཐོངས་དང་ཏན་ཏན་འགྱུར་བ་འགྲོ་གི་རེད། ཅེས་སོགས་བཀའ་སྩལ་འདུག

གསུང་ཆོས་ཉིན་མཐའ་མ་སྟེ། ཟླ་འདིའི་ཚེས་༦་ཉིན། ༸གོང་ས་མཆོག་ནས་གནས་མཆོག་རྡོ་རྗེ་གདན་གྱི་དུས་འཁོར་དབང་ཆེན་གསུང་ཆོས་ར་བ་རུ་ལོ་སྔོན་མར་དབུ་འཛུགས་གནང་བའི་འཇམ་དབྱངས་ཆོས་སྐོར་ལས་ཆོས་རྒྱལ་ཕྱི་ནང་གསང་གསུམ་གྱི་རྗེས་གནང་བཀའ་དྲིན་སྩལ་ཏེ་གནང་སྒོ་ལེགས་པར་གྲུབ་ཡོད་པ་རེད། དེའི་སྐབས། ༸གོང་ས་མཆོག་གིས་དེ་རིང་གནས་ཁྱད་པར་ཅན་རྡོ་རྗེ་གདན་ལ་དད་པའི་འདུས་པའི་སྐྱ་སེར་ཕོ་མོ་སྟོང་ཕྲག་ཁ་ཤས་ཁྲལ་བཀལ་ནས་ཡོང་བ་མ་རེད། ཁེ་སང་ཆེན་པོ་བསམ་ནས་ཡོང་བའང་མ་རེད། དད་པ་དང་འདུན་པའི་ཀུན་ནས་བསླངས་ཏེ་གནས་འདིར་འདུས་པ་རེད། དེ་བཞིན་དྲ་རྒྱ་བརྒྱུད་ནས་གནས་ཚུལ་མཐོང་མཁན་མང་པོ་ཞིག་ཡོད་པ་རེད། དེ་ཚང་མས་དད་འདུན་རྩེ་གཅིག་པའི་ཐོག་ནས་ཉན་པ་རེད། ཁ་སང་ནས་ཞུས་པ་ནང་བཞིན།

དེ་རིང་གི་ཆོས་སྐོར་འདི་ནི་བསྟན་པ་སྤྱི་བཙན་དང་གང་ཟག་སྒོས་བཙན་ཞེས་པའི་ཆོས་སྐོར་ལས་གང་ཟག་སྒོས་བཙན་གྱི་ཆོས་སྐོར་ཆགས་ཡོད། བསྟན་པ་སྤྱི་བཙན་དུ་ངེས་འབྱུང་། བྱང་སེམས། ཡང་དག་པའི་ལྟ་བ་གསུམ་དང་། འདི་དག་ནི་སངས་རྒྱས་པའི་ཆོས་འཛམ་གླིང་སྤྱི་ལ་འགྲོ་བ་ཞིག་རེད། གང་ཟག་སྒོས་བཙན་ནི་བཅོམ་ལྡན་འདས་ཀྱིས་གདུལ་བྱའི་དབང་གིས་དཀྱིལ་འཁོར་གྱི་བདག་པོའི་རྣམ་པར་ཤར་ནས་གང་ལ་གང་འདུལ་གྱིས་ཡི་དམ་ལྷ་ཡི་རྣམ་པ་འདྲ་མི་འདྲ་ལ་སྒྲུབ་ཐབས་འདྲ་མི་འདྲ་བྱས་ཏེ་་སླེབས་ཡོང་གི་ཡོད་པ་རེད། བླ་མེད་ཀྱི་རྒྱུད་ལ་ཆ་བཞག་ན་ཧ་ཅང་མང་པོ་ཡོད། བོད་ལ་འགྱུར་བ་ཡིན་ནའང་མང་པོ་ཞིག་ཡོད་པ་རེད་ལ། མ་འགྱུར་བའང་ཏན་ཏན་མང་པོ་ཞིག་ཡོད་པ་རེད།

གང་ལྟར་གདུལ་བྱའི་ཁམས་དང་མོས་པ་སྣ་ཚོགས་པ་ཡོད་པ་ཡིན་པས་བཅོམ་ལྡན་འདས་ཀྱིས་གང་ལ་གང་འདུལ་གྱིས་སྤྲུལ་བའི་རོལ་གར་བསྟན་ནས་གསུངས་པ་ཞིག་རེད། དེ་ལྟ་བུའི་ཐོག་ནས་དག་སྣང་གི་ཆོས་སྐོར་གྲས་ཀྱང་བཅོམ་ལྡན་འདས་མྱ་ངན་ལས་འདས་པའི་རྗེས་ལ་ཡིན་ནའང་། བཅོམ་ལྡན་འདས་ཀྱི་རྗེས་འབྲང་གྲུབ་ཆེན་ཀླུ་སྒྲུབ་ལ་སོགས་པའི་གྲས་སྐབས་ཐོག་ལ་རེ་རེར་སླེབས་ནས་ལྷག་པའི་ལྷའི་ཞལ་གཟིགས་ནས་གནང་བ་རེད། ཅེས་གསང་སྔགས་ཀྱི་རྒྱུད་པའི་སྐོར་དང་། ཆོས་རྒྱལ་ཕྱི་ནང་གསང་གསུམ་གྱི་རྗེས་གནང་བྱེད་རྒྱུ་ཡིན་པ་སོགས་བཀའ་སློབ་སྩལ་ཏེ་རྗེས་གནང་དབུ་འཛུགས་མཛད་དེ། རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་གྱི་བཤད་ལུང་གནང་རྒྱུ་ཡིན་པ་བཀའ་ཕེབས་པ་དང་། ལམ་གཙོ་རྣམ་གསུམ་ལས་སེམས་བསྐྱེད་དགོས་པའི་རྒྱུ་མཚན་དང་འབྲེལ་ནས། ད་ལྟ་མཐོང་ཆོས་སུ་ཡོད་པའི་འཛམ་བུ་གླིང་འདིར་བསམ་བློ་ཐོངས་དང་། ཤུགས་དྲག་ཆུ་བོ་བཞི་ཡི་རྒྱུན་གྱིས་ཁྱེར།། བཟློག་དཀའི་ལས་ཀྱི་འཆིང་བ་དམ་པོས་བསྡམས།། བདག་འཛིན་ལྕགས་ཀྱི་དྲ་བའི་སྦུབས་སུ་ཚུད།། མ་རིག་མུན་པའི་སྨག་ཆེན་ཀུན་ནས་འཐིབས།། མུ་མེད་སྲིད་པར་སྐྱེ་ཞིང་སྐྱེ་བ་རུ།། སྡུག་བསྔལ་གསུམ་གྱིས་རྒྱུན་ཆད་མེད་པར་མནར།། གནས་སྐབས་འདི་འདྲར་གྱུར་པའི་མ་རྣམས་ཀྱི།། ངང་ཚུལ་བསམས་ནས་སེམས་མཆོག་བསྐྱེད་པར་མཛོད།། ཅེས་པ་ལྟར་རེད།

ད་ལྟའི་འཛམ་གླིང་འདིའི་མཐོང་ཆོས་ལ་ཆ་བཞག་ན་མི་ཡིས་མི་གསོད་རེས་གཏོང་བཞིན་ཡོད་པ་དང་། འཛམ་བུ་གླིང་གི་ཚ་དྲོད་ཡར་འཕེལ་ནས་ཉེ་ལམ་ལྷོ་ཨ་མི་རི་ཀའི་བྷ་ར་ཛིལ་ཡུལ་དུ་ནགས་ལ་མེ་སྐྱོན་ཚབས་ཆེ་ཤོར་བ་མ་ཟད། ད་ལྟ་ཨོ་སི་ཊི་ལི་ཡར་མེའི་འཇིགས་པ་བྱུང་ནས་སེམས་ཅན་ཀངྒ་རོ་ (Kangaroo) སོགས་སེམས་ཅན་ཆུང་ཆུང་སྙིང་རྗེ་མོ་ཞིག་ཡོད་པ་དེ་སོགས་སྟོང་ཕྲག་མང་པོ་མེས་ཚིག་འདུག བདག་ཏུ་མ་བཟུང་བའི་སེམས་ཅན་ས་ཡ་མང་པོས་སྡུག་བསྔལ་མྱང་བཞིན་འདུག མི་ཡང་གང་འཚམས་ལ་སྐྱོན་བྱུང་འདུག ཉི་མའི་ཚ་དྲོད་ཤུགས་ཆེ་རུ་ཕྱིན། འཛམ་བུ་གླིང་དུ་མི་ཡིས་བཟོས་པའི་རྙོག་དྲའི་ཐོག་རང་བཞིན་གྱིས་ཚ་དྲོད་ཡར་འཕེལ་ནས་དཀའ་ངལ་ཧ་ཅང་ཆེན་པོ་འདུག ཚ་དྲོད་རྒྱས་པར་བརྟེན་ནས་དཀའ་ངལ་འཕྲད་བཞིན་པ་ལ་ཁོར་ཡུག་གི་ཐོག་ལ་དོ་སྣང་བྱེད་པ་ལྟ་བུས་ཕྲན་བུ་བྱེད་རྒྱུ་ཡོད་པ་རེད་མ་གཏོགས་གཞན་བྱེད་རྒྱུ་གང་ཡང་མི་འདུག གང་ལྟར་ཚ་དྲོད་ཀྱི་རྐྱེན་པས་རྙོག་དྲ་ཧ་ཅང་མང་པོ་ཡོད། ཨ་ཧྥུ་རི་ཀར་མཚོན་ན་ཆར་པ་མང་དྲགས་ནས་ཆུ་ལོག་གི་རྐྱེན་གྱིས་སྡུག་བསྔལ་གཅིག་དང་། ས་ཆ་མང་པོ་ཞིག་ལ་ཚ་དྲོད་ཀྱི་རྐྱེན་པས་སྡུག་བསྔལ་བཅས་རང་བཞིན་འབྱུང་བའི་གནོད་པ་དེ་ཤུགས་ཆེ་རུ་འགྲོ་བཞིན་ཡོད། རིམ་བཞིན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བསྐལ་བ་མེ་འཇིགས་ཀྱི་སྐབས་སུ་འཇིགས་འགྲོ་བ་ཞིག་དང་། དེ་ནས་བསྐལ་བ་གསར་པ་ཆགས་དགོས་པ་རེད། གནས་པའི་བསྐལ་བ་དང་འཇིགས་པའི་བསྐལ་བ། དེ་ནས་སྟོང་པའི་བསྐལ་བ། དེ་ནས་ཡང་འཛམ་གླིང་བྱེ་བྲག་པ་ཞིག་ཆགས་ཡོང་བ་རེད། དེ་ལ་འདི་ལྟར་བསམ་བློ་བཏང་ན་ཐང་ཆད་པ་ལྟ་བུ་འདུག ཅེས་སོགས་བཀའ་སྩལ་བ་དང་།

འཆི་བ་མི་རྟག་པ་རེད་ལ། མི་རྟག་པ་འདུས་པའི་མཐའ་མར་འབྲལ་བ་ཞེས་པ་ལྟར་ང་ཚོ་ཡང་ཕྱོགས་དང་མཚམས་ལ་གྱེས་འགྲོ་བ་རེད། གང་ལྟར་ལུས་པོ་ཕྱོགས་དང་མཚམས་ལ་འཁོད་ནས་སོ་སོར་གྱེས་འགྲོ་ཡང་། སེམས་རྒྱུད་ཀྱི་དད་པ་དང་དམ་ཚིག་ལ་ཉེ་རིང་ཡོད་པ་མ་རེད། བྱིན་རླབས་ལ་རྒྱང་རིང་ཐུང་མི་མངའ་འོ།། ཞེས་གསུངས་པ་ལྟར་རེད། ངོས་ཀྱིས་ཀྱང་ཁྱོད་ཚོ་དྲན་པ་བྱེད། སྤྱིར་སེམས་ཅན་ཐམས་ཅད་དང་། ཡང་སྒོས་བོད་གངས་ཅན་གྱི་ལྗོངས་ཀྱི་སེམས་ཅན་དང་། དེ་ནས་དེ་རིང་འདིར་འདུས་པའི་མི་རིགས་མི་འདྲ་བའི་སྐྱ་སེར་ཕོ་མོ་ཡོངས་མི་བརྗེད་པ་བྱེད། ཁྱོད་རང་ཚོ་ཡིན་ནའང་ངོས་ཀྱི་ལུས་དྲན་པའི་ཕན་ཐོགས་མེད། ངས་བཤད་ཡོད་པ་དེ། མཛད་པ་ཀུན་ལས་གསུང་གི་ནི༎ མཛད་པ་མཆོག་ཡིན་དེ་ཡང་ནི༎ འདི་ཉིད་ཡིན་ཕྱིར་མཁས་པ་ཡིས༎ འདི་ལས་སངས་རྒྱས་རྗེས་དྲན་བྱོས༎ ཞེས་གསུངས་པ་ལྟར། སངས་རྒྱས་བཅོམ་ལྡན་འདས་ལ་ཆ་བཞག་ནའང་། མཚན་དང་དཔེ་བྱད་ཀྱིས་བརྒྱན་པའི་སྐུ་དེས་ང་ཚོར་བྱིན་རླབས་འབྱུང་བ་ཆེན་པོ་ཡོད་པ་མ་རེད། གཙོ་བོ་སངས་རྒྱས་ཀྱི་གསུང་གི་འཕྲིན་ལས་ཀྱི་ཐོག་ནས་བྱིན་རླབས་འབྱུང་གི་ཡོད།

དེར་བརྟེན། ངོས་ལ་དགའ་མོས་ཡོད་པ་ཚོས་ངོས་ཀྱིས་བརྗོད་ཟིན་པ་དག་སེམས་ལ་ངེས་པར་བྱོས། ཉམས་ལེན་བྱོས་དང་། ཞག་དང་ཟླ་ལ་ཧ་ཅང་ཁག་པོ་ཡིན་ཡང་། ཡུན་བསྐྱངས་པ་ཡིན་ན་ལོ་གཅིག་གི་ནང་ལ་སོ་སོར་འགྱུར་བ་ཅི་ཞིག་བྱུང་འདུག་བསམ་བློ་ཐོངས་དང་ཏན་ཏན་འགྱུར་བ་འགྲོ་གི་རེད། མུ་མཐུད་ནས་ཕྱིན་པ་ཡིན་ན། ཏདྱ་ཐཱ། ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བོ་དྷི་སྭ་ཧཱ། འདིའི་སྒང་ལ་འགྲོ་བ་ཡོད་པ་རེད། ཁྱོད་རང་ཚོས་དེ་སེམས་ལ་ངེས་པར་བྱོས། དེ་མིན་ངོས་ཀྱི་པར་ཞིག་བཞག སྐྱབས་སུ་མཆི་ཞེས་པས་ཕན་ཆེན་པོ་མེད་པས་ངོས་ཀྱིས་བཤད་པ་ལ་ག་ཚོད་ཐུབ་ཐུབ་བྱོས། མཁྱེན་སོང་ངམ། ངོས་ཀྱིས་ཀླུ་སྒྲུབ་ཡབ་སྲས་དང་ཐོགས་མེད་སྐུ་མཆེད་ཀྱི་གཞུང་མ་རྩ་ལ་བཞག་ནས་བཤད་ཀྱི་ཡོད། དེ་དག་གིས་བཅོམ་ལྡན་འདས་ཀྱི་ཤེར་ཕྱིན་གྱི་དགོངས་པ་གསུངས་ཀྱི་ཡོད་པ་རེད། ངོས་ཀྱིས་བཅོམ་ལྡན་འདས་ཀྱི་གསུང་རྗེས་དྲན་གྱིས་ལད་ཟློས་བྱས་ནས་བཤད་ཀྱི་ཡོད་པ་རེད། དེ་ཚང་མས་སེམས་ལ་ཞོག ཚང་མས་ཉམས་ལེན་བྱེད་དགོས་པ་རེད།

ཐེངས་འདིའི་བཀའ་ཆོས་ལ་དགའ་ལྡན་ཁྲི་གདན་ཟུར་དང་བརྒྱུད་ཁག་གཅིག་བླ་ཆེན་གྱིས་གཙོས་ཁྱོན་རྒྱལ་ཁབ་ ༦༧ ནས་ཆོས་ཞུ་བ་གྲངས་ ༣༥༠༠༠ བརྒལ་བ་དང་། སིངྒ་པོར་དང་ཐའེ་ཝན། མ་ལེ་ཞིས་ཡ། ལའོ་སི། ཐའེ་ལན་ཌི་བཅས་ནས་སྟོང་ཕྲག་ཁ་ཤས་དང་། རྒྱ་ནག་སྐམ་ས་ཆེན་མོ་ནས་ ༣༠༠ ལྷག་ཕེབས་ཡོད་པ་རེད།

༸རྒྱལ་བ་རིན་པོའི་དྲ་རྒྱ་ལས་རྩོམ་སྒྲིག་བྱས།

 

བོད་ཀྱི་ལོ་རྒྱུས་ཡིག་ཆ།