ཕྱི་ལོ་༢༠༢༥ ཟླ་ ༡༠ ཚེས་ ༤ ཉིན། བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐའེ་ཝན་གྱི་དད་ལྡན་མང་པོས་ཇི་ལྟར་གསོལ་བ་བཏབ་པ་ལྟར་དགའ་ལྡན་ལྷ་བརྒྱ་མ་དང་སེམས་བསྐྱེད། བྱང་སྡོམ་བཅས་ཀྱི་ཆོས་འབྲེལ་བསྐྱངས་གནང་མཛད་སོང་། སྐབས་དེར། ཐེ་ཝན་དང་མ་ལེ་ཞིས་ཡ། སིངྒ་པོར། ཨ་རི། ཁ་ན་ཊ། ཡུ་རོབ་རྒྱལ་ཁབ་ཁག་དང་བོད་མི་བཅས་ཁྱོན་མི་གྲངས་༥༨༠༠ ཙམ་བཀའ་ཆོས་ཞུ་ཆེད་ཕེབས་གནང་འདུག

ཕྱི་ལོ་༢༠༢༥ ཟླ་༩ ཚེས་ ༢༩ ཉིན། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་ ༡༩ པ་དབུ་འཛུགས་གནང་སྐབས། སྐུ་མགྲོན་གཙོ་བོ་༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག་གིས་གསུང་དོན། ང་ཚོ་ཚང་མས་ང་བོད་པ་ཡིན་བསམ་པའི་བསམ་བློ་དང་། བོད་ཀྱི་གཞོན་སྐྱེས་ཤིག་ཡིན་བསམ་པའི་བསམ་བློ། མ་འོངས་པ་འགན་འཁྱེར་མཁན་ཞིག་ཡིན་བསམ་པའི་བསམ་བློ་དགོས། ང་ཆོལ་ཁ་འདིའི་ཁོངས་སུ་གཏོགས་པ་དང་ལུང་ཚན་འདིའི་ཁོངས་སུ་གཏོགས་པ་དེ་གཙོ་བོ་མི་ཡིན་པ། བོད་པ་ཞིག་ཡིན་པའི་འདུ་ཤེས་བཞག་པའི་ཐོག་ནས་མ་འོངས་པར་ཕྱག་ལས་གནང་བའི་སྐབས་སུ་ནུས་པ་གཅིག་ཏུ་སྒྲིལ་བའི་ཐོག་ཐུགས་འཁུར་བཞེས་དགོས། མཐུན་སྒྲིལ་རྡོག་རྩ་ཧ་ཅང་གལ་ཆེན་པོ་རེད། དེ་ནི་ང་ཚོ་མ་འོངས་པའི་འཐབ་རྩོད་དང་། བོད་གཞིས་བྱེས་མཉམ་འཛོམས་ཡོང་བའི་ནུས་པ་གཙོ་བོ་ཞིག་ཆགས་བསྡད་ཡོད་རེད། ཅེས་བཀའ་སློབ་ལམ་སྟོན་གནང་སོང་།

ཕྱི་ལོ་༢༠༢༥ ཟླ་༩ ཚེས་༡༨ ཉིན། བཞུགས་སྒར་དྷ་ས་གངས་སྐྱིད་སྤྱི་འཐུས་ལྷན་ཚོགས་ཀྱི་ཚོགས་ཁང་དུ། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པ་མཇུག་བསྒྲིལ་གནང་སོང་། ལས་ཉིན་བརྒྱད་ཀྱི་ཚོགས་དུས་རིང་། ༸གོང་ས་མཆོག་ལ་བཀའ་དྲིན་རྗེས་དྲན་གྱི་གྲོས་ཆོད་དང་། བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་ཀྱི་གྲོས་གྲོས་འཆར། གཞུང་འབྲེལ་མྱ་ངན་གུས་འདུད་ཀྱི་གྲོས་ཆོད། བཅའ་ཁྲིམས་གཙོས་པའི་ཁྲིམས་བཟོའི་ལས་དོན་ཁག་དྲུག་ཙམ་གཏན་འབེབས། དེ་བཞིན་བོད་མིའི་སྒྲིག་འཛུགས་ཀྱི་ལྷན་ཁང་བདུན་གཙོས་པའི་ཁྱབ་ཁོངས་ལས་ཁུངས་ཁག་གི་ཕྱི་ལོ་ ༢༠༢༤ ཟླ་༤ ནས་ཕྱི་ལོ་༢༠༢༥ ཟླ་ ༣ ཚེས་ ༣༡ བར་གྱི་ལས་བསྡོམས་ཐོག་བགྲོ་གླེང་རྒྱས་པ་གནང་སོང་།

ཕྱི་ལོ་ ༢༠༢༥ ཟླ་ ༩ ཚེས་ ༡༨ ཉིན། བཞུགས་སྒར་དྷ་ས་གངས་སྐྱིད་སྤྱི་འཐུས་ཚོགས་ཁང་དུ། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ལས་ཉིན་བརྒྱད་པའི་ཐོག སྤྱི་ཟུར་ཚེ་རིང་གཡུ་སྒྲོན་ལགས་དང་། བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ་སྣང་ས་ཆོས་སྒྲོན་ལགས་རྣམ་གཉིས་དབུས་འོས་བསྡུ་ལས་ཁང་གི་འོས་བསྡུའི་འགན་འཛིན་ལས་འཕར་དུ་མང་མོས་ཀྱིས་བདམས་ཐོན་བྱུང་སོང་།

ཕྱི་ལོ་ ༢༠༢༥ ཟླ་ ༩ ཚེས་ ༡༨ ཉིན། བཞུགས་སྒར་དྷ་ས་གངས་སྐྱིད་བོད་ཀྱི་སྲིད་བྱུས་ཉམས་ཞིབ་ཁང་གི་ཚོགས་ཁང་དུ། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་བྲིས་པའི་༼ བོད་ཀྱི་མི་འབོར་འཕེལ་འགྲིབ་ཀྱི་ལོ་རྒྱུས་ཀུན་གསལ་མེ་ལོང་༽ཞེས་པའི་མི་འབོར་ལོ་རྒྱུས་དེབ་ཐེར་ཆེན་མོ་ཞིག་དབུ་འབྱེད་དང་སྦྲགས་དེའི་ཐོག་བགྲོ་གླེང་ཞིག་ཚོགས་གནང་སོང་། དེབ་ཐེར་འདི་ནི་བོད་ཀྱི་ཉེ་རབས་ལོ་རྒྱུས་ཁྲོད་རྒྱ་གཞུང་གིས་བོད་ཀྱི་མི་འབོར་ཐོག་འཁྱོག་བཤད་བྱེད་བཞིན་པར་གདོང་ལེན་དང་ཕྱི་ལོ་༡༩༨༢་ནས་བོད་ནང་མི་འབོར་ག་ཚོད་འཕེལ་རྒྱས་ཕྱིན་ཡོད་མེད་སོགས་ཀྱི་སྐོར་ཉམས་ཞིབ་གནང་བ་ཞིག་ཡིན་འདུག

ཕྱི་ལོ་༢༠༢༥ ཟླ་༩ ཚེས་༡༡ ཉིན། སྐབས་༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ལས་ཉིན་གཉིས་པའི་ཐོག བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༧གོང་ས་༧སྐྱབས་མགོན་༧རྒྱལ་དབང་ཐམས་ཅད་མཁྱེན་པ་སྐུ་ཕྲེང་བཅུ་བཞི་པ་ཆེན་པོ་མཆོག་ལ་བཀའ་དྲིན་རྗེས་དྲན་གྱི་གཞུང་འབྲེལ་གྲོས་ཆོད་གྲོས་འཆར་དོན་ཚན་ལྔ་ཅན་ཞིག་སྤྱི་མོས་ཀྱིས་གཏན་འབེབས་གནང་སོང་།