22
Sun, Sep

༸གོང་ས་མཆོག་གིས་བདེ་སྐྱིད་ཀྱི་ཐབས་ལམ་དང་ཞི་བདེ་སྐྲུན་ཐབས་སྐོར་བཀའ་སློབ་བསྩལ།

རྒྱལ་སྤྱིའི་གསར་འགྱུར།
Typography

༢༠༡༨་ལོའི་ཟླ་༩པའི་ཚེས་༡༢ ཉིན། ༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡུ་རོབ་རྒྱལ་ཁབ་སུ་ཝི་ཌེན་ལྷོ་ངོས་ཀྱི་གྲོང་ཁྱེར་མལ་མོ་ཞེས་པའི་ནང་མི་མང་ཆིག་སྟོང་ཉིས་བརྒྱ་བརྒལ་བ་ཞིག་ལ་བདེ་སྐྱིད་ཀྱི་ཐབས་ལམ་དང་ཞི་བདེ་སྐྲུན་ཐབས་སྐོར་བཀའ་སློབ་བསྩལ་འདུག

དེ་ཡང་ཐོག་མར་༸གོང་ས་མཆོག་གིས་འགྲོ་བ་མི་ཐམས་ཅད་གཅིག་མཚུངས་ཡིན་པའི་སྐོར་ནས་གསུངས་དོན། སྤུན་མཆེད་ཕོ་མོ་རྣམ་པ། ང་ཚོ་ཚང་མ་འགྲོ་བ་མི་ཡིན་པ་གཅིག་མཚུངས་རེད། སུ་ཝི་ཌེན་གྱི་མི་དང་བོད་མི་ཟེར་བ་དེ་དག་རིམ་པ་གཉིས་པའི་གནས་སྟངས་རེད། ང་ཚོ་ཚང་མར་ལུས་སེམས་དང་སེམས་ཚོར་གང་གི་ཆ་ནས་འགྲོ་བ་མིའི་འདུ་ཤེས་ཡོད་པ་གཅིག་མཚུངས་ཡིན་ཞིང་། ང་ཚོ་ཚང་མས་བདེ་བ་འདོད་ཀྱི་ཡོད། ཕན་ཚུན་བརྙས་བཅོས་དང་ཁྱད་གསོད། མགོ་སྐོར་བསླུ་བྲིད། དེ་བཞིན་དབུལ་ཞིང་ཕོངས་པའི་དཀའ་ངལ་སོགས་མིས་བཟོས་པའི་དཀའ་ངལ་རེད། འོན་ཀྱང་མི་རྣམས་སྤྱི་ཚོགས་ལ་བརྟེན་ནས་འཚོ་དགོས་པའི་སྲོག་ཆགས་ཤིག་ཡིན་སྟབས། ཕན་ཚུན་གཅིག་ལ་གཅིག་བརྟེན་ནས་འཚོ་དགོས། དེར་བརྟེན། དཀའ་ངལ་དེ་དག་སེལ་རྒྱུར་ང་ཚོ་མི་ལ་འགན་འཁྲི་ཡོད་པར་མ་ཟད། ང་ཚོས་གཞན་ལ་བདེ་བ་སྒྲུབ་རྒྱུར་ཡང་འབད་བརྩོན་བྱེད་དགོས། ང་ཚོར་གྲོགས་པོ་དགོས། གྲོགས་པོ་ཡོང་བར་ཡིད་ཆེས་སླེབ་ཐུབ་དགོས། ཡིད་ཆེས་ཡོང་བར་གཞན་གྱི་བདེ་སྡུག་ལ་དོན་དམ་སེམས་ཁུར་སྐྱེ་ཐུབ་དགོས། རང་དོན་ཁོ་ནའི་ཐོག་ནས་བརྗོད་ཀྱང་གཞན་ལ་ཕན་བདེ་སྒྲུབ་ན་རང་དོན་ཞོར་ལ་འགྲུབ་ཐུབ། ཅེས་གསུངས།

དེ་ནས་༸གོང་ས་མཆོག་གིས་བྱམས་བརྩེའི་གལ་ཆེན་རང་བཞིན་གྱི་ཐད་ནས། ངོས་ཀྱིས་འདས་པའི་ལོ་ངོ་ ༤༠ ཙམ་རིང་འཇིག་རྟེན་ཁམས་ཀྱི་རིག་པ་དང་དངོས་ཁམས་རིག་པ། དབང་རྩའི་ཚན་རིག་པ། སེམས་ཁམས་རིག་པ་སོགས་ཚན་རིག་པ་དེ་དག་དང་ལྷན་གོ་བསྡུར་སྦྱང་བཤད་བྱས་པར་མ་ཟད། ངག་གི་དབང་པོ་ཡར་རྒྱས་མ་སོན་པའི་བྱིས་པར་ཚན་རིག་པས་ཚོད་ལྟ་བྱས་པ་སོགས་ཀྱང་མཐོང་མྱོང་ཡོད། བྱིས་པ་དེ་ཧ་ཅང་ཆུང་ཆུང་ཡིན་སྟབས། ངག་ནས་སྨྲ་མི་ཤེས་ཀྱང་གཞན་ལ་ཕན་པ་སྒྲུབ་ན་དགའ་སྣང་དང་གནོད་པ་སྐྱེལ་ན་མི་དགའ་བའི་རྣམ་འགྱུར་ཧ་ཅང་མངོན་གསལ་སྟོན་གྱི་འདུག རྣམ་འགྱུར་དེ་དག་ལས་མིའི་ལྷན་སྐྱེས་རང་བཞིན་བྱམས་བརྩེ་ལྡན་པ་ཡིན་པ་དེ་གསལ་རྟོགས་ཐུབ། བྱམས་བརྩེས་ཀུན་ནས་བླངས་པ་ཡིན་ན་ལས་དོན་གང་བྱས་ཀྱང་དྲང་པོ་དྲང་གཞག་དང་ཁ་རི་ཁ་ཐུག་བྱེད་ཐུབ། དེ་ལྟར་བྱུང་ན་ཕན་ཐོགས་པར་མ་ཟད་དོགས་པ་རྣམ་རྟོག་སེལ་ནས་ཡིད་ཆེས་སྐྱེ་ཐུབ་རྒྱུ་རེད། འགྲོ་བ་མི་ཐེར་འབུམ་བདུན་ཡོད་པ་རྣམས་མའི་མངལ་ནས་སྐྱེས་པ་ཤ་སྟག་རེད། ཚང་མ་མའི་བྱམས་སྐྱོང་འོག་ནས་འཚོ་དགོས་པ་ཆགས་ཡོད། ངོས་རང་ཉིད་ལ་མཚོན་ནའང་ངོས་ལ་བྱམས་བརྩེའི་ལམ་སྟོན་གནང་མཁན་དགེ་རྒན་ཆེས་ཐོག་མ་དེ་ངོས་ཀྱི་ཨ་མ་ལགས་ཡིན། ཞེས་གསུངས།

ད་དུང་། ཆོས་ལུགས་མཐུན་སྒྲིལ་གྱི་སྐོར་ལའང་འདི་ལྟར་གསུངས་དོན། ངོས་ཀྱིས་ཆོས་ལུགས་མཐུན་སྒྲིལ་དགོས་གལ་ཐོག་ལའང་གཙོ་འདོན་བྱེད་བཞིན་ཡོད། དེང་སྐབས་ང་ཚོས་ཆོས་ཀྱི་མིང་འོག་ནས་མི་ཕན་ཚུན་གསོད་རེས་བྱེད་བཞིན་པ་འདི་ནི་བསམ་ཡུལ་ལས་འདས་པ་ཞིག་རེད། རྒྱ་གར་ལ་མཚོན་ན་ཆོས་དང་རིག་གཞུང་། སྐད་ཡིག་མི་འདྲ་བ་ཧ་ཅང་མང་པོ་ཡོད་ཀྱང་ཆོས་ལུགས་ཕན་ཚུན་མཐུན་སྒྲིལ་ཧ་ཅང་ཡག་པོ་འདུག ང་ཚོས་རང་གི་ཉམས་མྱོང་ཐོག་ནས་ལྟ་སྐབས། ཁྱིམ་ཚང་འཁོས་ཀ་ཞན་ཡང་ནང་མི་ཕན་ཚུན་ཡིད་ཆེས་བློ་འགེལ་དང་བརྩེ་གདུང་དམ་ཟབ་ཡོད་ཚེ་ཁྱིམ་ཚང་དེ་བདེ་ཞིང་སྐྱིད་པ་དང་། དེ་ལས་ལྡོག་སྟེ་ཁྱིམ་ཚང་འབྱོར་པ་ཆེ་ཡང་ནང་མི་ཕན་ཚུན་དོགས་ཟོན་བྱེད་ནས་སྡོད་དགོས་ཚེ་སྐྱིད་པ་གང་ཡང་མེད། ཅེས་གསུངས།

དེ་ནས་གཙོ་སྐྱོང་བའི་མང་ཚོགས་ཀྱི་དྲི་བ་རྣམས་སྙན་སྒྲོན་ཞུས་པ་ན། ཚོགས་བཅར་བ་ཞིག་གིས་སྤྱི་ཚོགས་ནང་འཁོན་འཛིན་དང་སྡང་སེམས་ཀྱི་བསམ་བློར་གདོང་ལེན་ཇི་ལྟར་དགོས་སྐོར་གྱི་དྲི་བར་༸གོང་ས་མཆོག་གིས་གཞི་རྩའི་མིའི་ལྷན་སྐྱེས་རང་བཞིན་བྱམས་བརྩེ་ལྡན་པ་ཡིན་སྐོར་དང་། དེང་དུས་ཤེས་ཡོན་ལམ་ལུགས་ནང་ཕྱི་དངོས་པོ་དཔལ་འབྱོར་འཛུགས་སྐྲུན་ཁོ་ནར་དམིགས་པ་འདིས་འདང་གི་མེད་སྟབས། ནང་གཤིས་རྒྱུས་དང་འབྲེལ་བའི་བྱམས་པ་དང་བརྩེ་བ། བཟོད་བསྲན། ཆོག་ཤེས་སོགས་རིས་མེད་ཀྱི་ལྟ་གྲུབ་གཞིར་བཟུང་་ནས། བསམ་བློའི་རིན་ཐང་དེ་དག་གོང་མཐོར་གཏོང་ཐབས་དགོས་པ་དང་། ལུས་ཀྱི་འཕྲོད་བསྟེན་གལ་ཆེ་བ་ལྟར་བསམ་བློའི་འཕྲོད་བསྟེན་དགོས་རྒྱུ་དེའང་ཧ་ཅང་གལ་ཆེ་སྟབས། བསམ་བློའི་འཕྲོད་བསྟེན་ཡག་པོ་ཡོང་བར་ཆགས་སྡང་སོགས་ཉོན་མོངས་པའི་བློར་གཉེན་པོ་བསྟེན་ནས་སེམས་ནང་ཞི་བདེ་གོང་འཕེལ་གཏོང་དགོས་སྐོར་དང་། བསམ་བློའི་འཕྲོད་བསྟེན་ཡར་རྒྱས་གཏོང་དགོས་ཚེ་རྒྱ་གར་གནའ་རབས་དཔལ་ནཱ་ལེནྡྲའི་སེམས་ཁམས་རིག་པ་དང་ཚད་མ་རིག་པའི་རྣམ་གཞག་དང་འབྲེལ་བའི་ལེགས་བཤད་དེ་དག་དེང་སྐབས་ཧ་ཅང་དགོས་གལ་ཆེ་བར་གཟིགས་བཞིན་ཡོད་སྐོར་བཀའ་ལན་བསྩལ་འདུག