ཕྱི་ལོ་༢༠༢༤ཟླ་༡ཚེས་༢༢ཉིན། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་འབྲས་ལྗོངས་དང་ནུབ་བྷང་གྷལ། དེ་བཞིན་གནས་མཆོག་རྡོ་རྗེ་གདན་བཅས་ནས་ཟླ་གཉིས་ཙམ་གྱི་མཛད་འཕྲིན་ལེགས་པར་གྲུབ་ནས། དེ་རིང་ལྡི་ལི་མཁའ་དབྱིངས་བརྒྱུད་བཞུགས་སྒར་རྡ་སར་ཞབས་སོར་བདེ་བར་འཁོད་སོང་། བཞུགས་སྒར་རྡ་ས་གཡས་གཡོན་གྱི་བོད་མི་གཙོས་པའི་སེར་སྐྱ་མི་མང་རྒན་གཞོན་ཀུན་གྱིས་ལག་ཏུ་ཁ་བཏགས་དང་། བདུག་སྤོས། མེ་ཏོག་བཅས་བཟུང་ནས། དགའ་དད་སྤྲོ་གསུམ་གྱིས་དགའ་བའི་འཛུམ་དང་བཅས་ལམ་འགྲམ་ནས་ཕྲེང་བསྒྲིགས་ཏེ་བསུ་མ་བྱས་སོང་།