ཕྱི་ལོ་༢༠༢༦ ཟླ་༢ པའི་ཚེས་༡ ཉིན། འཛམ་གླིང་རྒྱལ་ཁབ་ཉེར་བདུན་ནང་གི་བོད་མི་ཚོས་ཚ་ཚ་འུར་འུར་ངང་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། སྐབས་༡༨ པའི་བོད་མི་མང་སྤྱི་འཐུས་ཀྱི་འོས་མི་རྣམས་ལ་སྔོན་འགྲོའི་འོས་འཕེན་གནང་སོང་། བཞུགས་སྒར་དྷ་སའི་རྒན་གཞོན་དར་གསུམ་གྱིས་རང་འགན་རང་འཁྱེར་གནང་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་དང་སྤྱི་འཐུས་འོས་མི་རྣམས་ལ་འོས་བསྡུ་བྱ་ཡུལ་ས་ཚིགས་བཅུ་གཅིག་ནས་འོས་བླུགས་གནང་སོང་།
དེ་ཡང་། བཞུགས་སྒར་དྷ་རམ་སར་དྷ་ས་གནས་འོས་བསྡུ་ལས་ཁང་གིས་སྔོན་འགྲོའི་འོས་བསྡུ་བྱ་ཡུལ་ས་ཚིགས་གཙུག་ལག་ཁང་(ཆུ་ཚོད་༩་ནས་༥་བར)དང་། མེག་གྷན་ཉིན་སློབ་(ཆུ་ཚོད་༩་ནས་༥་བར)། གངས་སྐྱིད་སྣུམ་འཁོར་འཇོག་ཡུལ་(ཆུ་ཚོད་༩་ནས་༥་བར)། བོད་ཁྱིམ་བདེ་སྐྱིད་ཚེ་རིང་ཚོགས་ཁང་། ཤུག་གསེབ་བཙུན་དགོན། ས་རཱ་མཐོ་སློབ། ཤེས་རབ་དགའ་ཚལ་གླིང་། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་། རྒྱུད་སྟོད་དགོན་པ། གྷོ་པལ་པུར་བོད་ཁྱིམ། ཅ་མུན་ཊ་བཅས་སུ་གྲ་སྒྲིག་གནང་འདུག
གོང་ཉིན་གྱི་ཉིན་གྱི་སྔ་དྲོ་ཆུ་ཚོད་༩ པ་ནས་བཞུགས་སྒར་དྷ་ས་གཡས་གཡོན་གནས་མཁན་གྱི་བོད་མི་རྒན་གཞོན་དར་གསུམ་གྱིས་རང་འགན་རང་འཁྱེར་གནང་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་དང་སྤྱི་འཐུས་འོས་མི་རྣམས་ལ་འོས་བསྡུ་བྱ་ཡུལ་ས་ཚིགས་བཅུ་གཅིག་ནས་འོས་བླུགས་གནང་སོང་།
སྤྱིར་འདི་ལོར་རྒྱ་བལ་འབྲུག་གསུམ་ནང་ཁྱོན་འོས་འཕེན་པའི་དེབ་སྐྱེལ་གྲངས་༥༦,༧༤༩ དང་། ཕྱི་རྒྱལ་ཡུལ་གྲུ་ཁག་ནས་འོས་འཕེན་པའི་དེབ་སྐྱེལ་གྲངས་༣༤,༢༩༣ བཅས་ཁྱོན་བསྡོམས་དེབ་འགོད་བྱེད་མཁན་འོས་འཕེན་གྲངས་༩༡,༠༤༢ བྱུང་ཡོད་འདུག
ཕྱི་ལོ་༢༠༢༥་དང་༢༠༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། བོད་མི་མང་སྤྱི་འཐུས་སྐབས་༡༨ པའི་དངོས་གཞིའི་འོས་བསྡུ་དེ་ཕྱི་ལོ་༢༠༢༦ ཟླ་༤ ཚེས་༢༦ རེས་གཟའ་ཉི་མར་བྱ་རྒྱུ་རེད་འདུག
