དབུས་འོས་བསྡུ་ལས་ཁང་ནས་སྲིད་སྤྱི་གཉིས་ཀྱི་འོས་བསྡུ་ཆེན་མོའི་ལས་རིམ་དང་འབྲེལ་བའི་གསར་འགོད་ལྷན་ཚོགས་ཤིག་ཚོགས་སོང་།

དེ་ཡང་། གོང་ཚེས་ཉིན་གྱི་སྔ་དྲོ་ཆུ་ཚོད་ ༡༡ ཐོག དབུས་འོས་བསྡུའི་འགན་འཛིན་བློ་བཟང་ཡེ་ཤེས་མཆོག་དང་། འོས་བསྡུའི་འགན་འཛིན་ལས་འཕར་ཚེ་རིང་གཡུ་སྒྲོན་ལགས་དང་སྣང་ས་ཆོས་སྒྲོན་ལགས། དྲུང་ཆེ་བློ་བཟང་ཆོས་གྲགས་ལགས། དྲུང་འཕར་བསྟན་འཛིན་ནོར་བུ་ལགས་བཅས་ནས་བཞུགས་སྒར་དྷ་རམ་ས་གངས་སྐྱིད་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ། ། དབུས་འོས་བསྡུ་ལས་ཁང་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་དང་བོད་མི་མང་སྤྱི་འཐུས་སྐབས་༡༨ པའི་འོས་བསྡུ་ཆེན་མོའི་ལས་རིམ་དང་འབྲེལ་བའི་གསར་འགོད་ལྷན་ཚོགས་ཤིག་ཚོགས་སོང་།

སྐབས་དེར། དབུས་འོས་བསྡུའི་་གན་འཛིན་བློ་བཟང་ཡེ་ཤེས་མཆོག་གིས་གསར་འགོད་གསལ་བསྒྲགས་སྒྲོགས་སྦྱང་གནང་དོན། ད་སྐབས་འོས་བསྡུའི་གནས་སྟངས་ཐད། ད་བར་སྔོན་འགྲོའི་འོས་བསྡུའི་གྲ་སྒྲིག་བྱེད་ཕྱོགས་སྐོར་སྙན་སེང་ཞུ་རྒྱུར། བཙན་བྱོལ་བོད་མིའི་འོས་བསྡུའི་སྒྲིག་གཞི་དགོངས་དོན་འོས་ཤོག་རྣམས་པར་སྐྲུན་ཟིན་པ་དང་། ས་གནས་སོ་སོ་ནས་འོས་འཕེན་པ་དེབ་སྐྱེལ་གྲངས་འབོར་ལ་གཞིགས་པས་ས་གནས་ཁག་ཏུ་འོས་ཤོག་བཏང་ཟིན་ཡོད། ད་ལན་སྲིད་སྤྱི་གཉིས་ཀྱི་འོས་བསྡུ་ཆེན་མོ་འདི་བཞིན་རྒྱལ་ཁབ་ ༢༧ ནང་ས་གནས་འོས་བསྡུ་ལས་ཁང་ ༨༧ འོག འོས་བསྡུ་བྱ་ཡུལ་གྱི་སྡེ་ཚན་གྲངས་ ༣༠༩ ཚོགས་ཆུང་དང་ལས་བྱེད་ཁྱོན་གྲངས་ ༡༧༣༧ སུད་ཚོང་ཁག་གྲངས་ ༣༡ བཅས་སུ་ཕྱི་ལོ་ ༢༠༢༦ ཟླ་ ༢ ཚེས་ ༡ ཉིན་སྔོན་འགྲོའི་འོས་བསྡུ་ལག་བསྟར་ཞུ་རྒྱུ་ཡིན་པ་དང་། ཕྱི་ལོ་ ༢༠༢༦ ཟླ་ ༢ ཚེས་ ༢༥ ཉིན་སྔོན་འགྲོའི་འོས་བསྡུའི་གྲངས་བཤེར་གྱི་གྲུབ་འབྲས་གསལ་བསྒྲགས་ཞུ་རྒྱུ་ཡིན། ཕྱི་ལོ་ ༢༠༢༦ ཟླ་ ༤ ཚེས་ ༣ ཉིན་དངོས་གཞིའི་འོས་གཞི་གསལ་བསྒྲགས་ཞུ་རྒྱུ་ཡིན། དངོས་གཞིའི་འོས་བསྡུ་དེ་བཞིན་ཕྱི་ལོ་ ༢༠༢༦ ཟླ་ ༤ ཚེས་ ༢༦ ཉིན་ཞུ་རྒྱུ་དང་། ཕྱི་ལོ་ ༢༠༢༦ ཟླ་ ༥ ཚེས་ ༡༣ ཉིན་སྲིད་སྤྱི་གཉིས་ཀྱི་དངོས་གཞིའི་འོས་བསྡུའི་གྲུབ་འབྲས་གསལ་བསྒྲགས་ཞུ་རྒྱུ་ཡིན་པའི་དྲན་སྐུལ་བཅས།

༡༽ ཀུན་གྱི་མཁྱེན་གསལ་བཞིན་སྔོན་འགྲོའི་འོས་བསྡུ་དེ་བཞིན་ཕྱི་ལོ་ ༢༠༢༦ ཟླ་ ༢ ཚེས་ ༡ ཉིན་གཏན་འབེབས་ལྟར་སླེབས་ལ་ཉེ་བར་སོང་། ས་གནས་འོས་བསྡུའི་ལས་ཁང་དང་། སྲི་ཞུའི་ལས་བྱེད་རྣམ་པ། འོས་མི་རྣམ་པ། གསར་འགྱུར་བརྒྱུད་ལམ་ཁག དེ་བཞིན་གཞུང་འབྲེལ་མ་ཡིན་པའི་ཚོགས་སྡེ་ཁག མང་ཚོགས་བཅས་ལ་འོས་བསྡུའི་སྐབས་བྱེད་སྒོ་ལམ་སྟོན་ཁག་གཅིག་བསྐྱར་ནན་ཞུ་རྒྱུ་གཤམ་གསལ།

ཀ ཕྱི་ལོ་ ༢༠༢༥་་༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། བོད་མི་མང་སྤྱི་འཐུས་སྐབས་ ༡༨ པའི་འོས་བསྡུ་ཆེན་མོའི་ལས་རིམ་འཐུས་ཚང་གྲུབ་ཐུབ་པའི་ཐུགས་འགན་གཙོ་བོ་ས་གནས་འོས་བསྡུ་ལས་ཁང་ཁག་ལ་ཡོད་པར་བརྟེན། ས་གནས་འོས་བསྡུ་ལས་ཁང་ཁག་གི་འགན་འཛིན་དང་ཚོགས་མི་རྣམ་པས་རང་འཁྲིའི་ཞུ་སྒོ་ཁག་རང་དབང་དང་དྲང་བདེན་ཐོག་ཐུགས་འགན་ཆེ་བཞེས་ཀྱིས་འོས་བསྡུ་དང་འབྲེལ་བའི་རྩོད་རྙོག་རྣམས་ས་གནས་རང་ནས་ཐག་གཅོད་གང་ཐུབ་གནང་དགོས་པའི་ནན་སྐུལ་ཞུ་རྒྱུ་དང་། མང་ཚོགས་ནས་འོས་འཕེན་རྒྱུའི་ཐོབ་ཐང་རྩ་ཆེ་ཤོས་ཡིན་པས་ས་གནས་སོ་སོར་འོས་འཕེན་གྱི་ཆ་རྐྱེན་ཚང་རིགས་རྣམས་ལ་འོས་འཕེན་ཆོག་པའི་ཐོབ་ཐང་ངེས་པར་གནང་དགོས་རྒྱུ། དེ་བཞིན་འོས་བསྡུའི་ཉིན་ས་གནས་གཞན་ནས་ཕེབས་མཁན་འོས་འཕེན་པའི་ཆ་རྐྱེན་ཚང་རིགས་རྣམས་ལའང་འོས་འཕེན་རྒྱུའི་ཐོབ་ཐང་སྤྲོད་དགོས་རྒྱུ། ལྷག་པར་འོས་བསྡུའི་ཉིན་བྱེད་སྒོ་རྣམ་གཞག་རྣམས་རྩོད་རྙོག་མི་འབྱུང་བའི་ཐོག་གྲུབ་དགོས་རྒྱུ་དང་། དམིགས་བསལ་གྲངས་བཤེར་སྐབས་ལས་དོན་རྣམས་དྲང་བདེན་ངང་ངེས་པར་གྲུབ་དགོས།

ཁ། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་རྣམས་ནས། བོད་མིའི་སྒྲིག་འཛུགས་ཀྱི་བླང་དོར་དང་། ཐོབ་ཐང་གི་སྒྲིག་གཞི་དོན་ཚན་བརྒྱད་པ་ནང་གསེས་ ད༽ ནང་གསལ་ “དབུས་སའི་འོས་བསྡུ་དང་། མང་མོས་ཐག་གཅོད་འོས་བསྡུའི་སྐབས་རང་འཁྲིའི་འོས་བསྡུའི་ལས་འགན་དང་། འོས་འཕེན་གྱི་ཐོབ་ཐང་ལེན་རྒྱུ་ལས། གཞན་ལ་དབང་ཚད་ནུས་ཤུགས་བེད་སྤྱོད་དམ་སྐུལ་སློང་བརྡ་སྟོན། འོས་བསྡུ་དང་འབྲེལ་བའི་འདུ་འཛོམས་དང་ཚོགས་འདུ། བགྲོ་གླེང་ནང་ཞུགས་པ་ལྟ་བུའི་ཐེ་བྱུས་རིགས་གང་ཡང་བྱེད་མི་ཆོག” ཅེས་གསལ་བ་ལྟར་རྩ་འཛིན་དགོས་རྒྱུ་དང་། དམིགས་བསལ་སྐབས་བབ་ཀྱི་སྲིད་སྤྱི་གཉིས་ཀྱི་འོས་མིར་བཞེངས་མཁན་རྣམས་ལ་དངོས་ཤུགས་བརྒྱུད་གསུམ་ནས་རྒྱབ་སྐྱོར་རིགས་གཏན་ནས་མི་ཆོག

ག ཕྱི་ལོ་ ༢༠༢༥་་༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། བོད་མི་མང་སྤྱི་འཐུས་སྐབས་ ༡༨ པའི་འོས་བསྡུའི་ཁོངས་འོས་མིར་བཞེངས་མཁན་རྣམས་ནས་བཙན་བྱོལ་བོད་མིའི་འོས་བསྡུའི་སྒྲིག་གཞི་དང་། དབུས་འོས་བསྡུའི་ལས་ཁང་ནས་གཏན་འབེབས་གནང་བའི་རྩ་འཛིན་ལམ་སྟོན་ཁག་དང་འགལ་མེད་ལག་བསྟར་ངེས་གནང་དགོས་རྒྱུ་སྤྱི་དང་། བྱེ་བྲག་ཏུ་འོས་མི་དང་དེའི་རྒྱབ་སྐྱོར་བ་རྣམས་ནས་དངུལ་དངོས་སོགས་ལྐོག་རྔན་སྤྲོད་ལེན་རྒྱུད་སྐུལ་ཐབས་ཤེས་རིགས་བྱས་པའི་ར་འཕྲོད་བྱུང་ཚེ། སྒྲིག་གསལ་ལྟར་བཟོད་བསྲན་ཀླད་ཀོར་ (Zero Tolerance) ཡིན་པས་དེ་དོན་མི་འབྱུང་བའི་ནན་སྐུལ་ཞུ་རྒྱུ་དང་། དེ་བཞིན་འོས་མིར་བཞེངས་མཁན་རྣམ་པ་དང་རྒྱབ་སྐྱོར་བ་རྣམས་ནས་འོས་བསྡུའི་ཉིན་གཉིས་གོང་འོས་བསྡུའི་དྲིལ་བསྒྲགས་བྱེད་མཚམས་འཇོག་དགོས།

ང་། འདི་ནས་དེ་སྔ་ཕྱི་ལོ་ ༢༠༢༥ ཟླ་ ༡༠ ཚེས་ ༧ ཉིན་གྱི་གསར་འགོད་གསལ་བསྒྲགས་ནང་ “གསར་འགྱུར་བརྒྱུད་ལམ་ཁག་ནི། མང་གཙོའི་ཀ་བ་བཞི་པར་ངོས་འཛིན་ཞུས་པ་ལྟར་དངོས་ཡོད་གནས་ཚུལ་རྣམས་གཞི་རིམ་མང་ཚོགས་ལ་དུས་ཐོག་འཁྱོལ་ཐུབ་པའི་དམིགས་བསལ་ནུས་པ་དང་ལས་འགན་ཡོད་པ་བཞིན། ཕྱི་ལོ་ ༢༠༢༥་་༢༦ ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོའི་ལས་རིམ་སྐབས་མང་ཚོགས་ལ་སྨན་པའི་གནས་ཚུལ་ཁྱབ་སྤེལ་རྒྱ་ཆེ་གནང་བའི་ཡིད་ཆེས་ཞུ་རྒྱུ་ཡིན།” ཞེས་གསལ་ཡོད་པ་ལྟར་གསར་འགྱུར་བརྒྱུད་ལམ་ཁག་ནས་ཀྱང་མང་ཚོགས་ལ་འོས་བསྡུའི་གོ་རྟོགས་ཡོང་ཆེད་དབུས་འོས་བསྡུ་ལས་ཁང་གི་གསར་འགོད་གསལ་བསྒྲགས་ཁག་རྒྱ་ཁྱབ་དང་། འོས་མིའི་ངོ་སྤྲོད་དང་བགྲོ་གླེང་སོགས་གང་ལེགས་གནང་ཡོད་པ་འདི་ག་དབུས་འོས་བསྡུ་ལས་ཁང་ནས་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། འོན་ཀྱང་འོས་བསྡུའི་ལས་རིམ་ལ་འགོག་རྐྱེན་དང་། སྤྱི་ཚོགས་འཁྲུག་གཞིའི་གནད་དོན་རིགས་བྱུང་ཚེ་གསར་འགྱུར་བརྒྱུད་ལམ་ཁག་ནས་བློ་གཟུ་བོར་གནས་པའི་ཐོག་ཁྱབ་སྤེལ་གནང་ཕྱོགས་ལ་ཡིད་གཟབ་ཡོང་བའི་སྐུལ་འདེབས་ཞུ་རྒྱུ་ཡིན།

ཅ། དེང་གི་ཆར་སྤྱི་ཚོགས་ཀྱི་དཀའ་ངལ་ཆེ་གྲས་ཤིག་ནི། འགན་འཁུར་གང་ཡང་མེད་པའི་ཁ་པར་དང་སྤྱི་ཚོགས་དྲྭ་ལམ་སོགས་བེད་ལོག་གིས་བདེན་པ་མིན་པའི་གནས་ཚུལ་ཁྱབ་སྤེལ་གྱིས་སྤྱི་ཚོགས་འཁྲུག་གཞི་དང་། བོད་མིའི་ཆིག་སྒྲིལ་ལ་གནོད་ཚབས་འགྲོ་ཉེན་ལ་སོང་། རྒྱ་ཆེ་མང་ཚོགས་ནས་དགོས་མེད་དཀྲོགས་རྐྱེན་རིགས་ལ་དབུ་མ་འཁོར་བར་དོགས་ཟོན་དང་། ཡོ་བསྲང་དོད་པོས་བྱ་ར་དམ་འཛིན་ངེས་པར་གནང་དགོས་རྒྱུ་ནན་སྐུལ་ཞུ་རྒྱུ་དང་། བོད་བསྟན་སྲིད་མི་རིགས་དང་། རྩ་དོན་ཁོ་ནར་དམིགས་པས་ཕྱོགས་ལྷུང་དོར་བའི་ཐོག་ནས་སྲིད་སྤྱི་གཉིས་ཀྱི་འོས་བསྡུའི་ནང་ཆ་ཤས་ངེས་པར་ལེན་ཐབས་ཡོང་བའི་འབོད་སྐུལ་ཤུགས་དྲག་ཞུ་རྒྱུ་ཡིན།

ཆ། སྤྱིར་གཞུང་འབྲེལ་མིན་པའི་ཚོགས་སྡེ་ཁག་གི་སྒྲིག་འཛུགས་ཀྱི་འཛིན་སྐྱོང་བྱ་ཕྱོགས་དང་། སོ་སོའི་ཚོགས་མི་དང་། དགེ་ལས་རྣམ་པར་རང་རང་གི་ཚོགས་པའི་སྒྲིག་གཞི་གཏན་འབེབས་ཡོད་ངེས་ལྟར་རྩ་འཛིན་ལག་བསྟར་གནང་མུས་ལ་དབུས་འོས་བསྡུ་ལས་ཁང་ནས་དགག་ཆ་དང་ཐེ་བྱུས་སོགས་ཞུ་འོས་མ་མཆིས་ཀྱང་། བཙན་བྱོལ་བོད་མིའི་བཅའ་ཁྲིམས་དོན་ཚན་ ༡༡ ནང་གསལ་བོད་ཀྱི་ཡུལ་མི་ཚང་མར་འོས་གཞིར་ཞུགས་རྒྱུའི་ཐོབ་ཐང་འདྲ་མཉམ་ཡོད་པ་གསལ་ཡོད་ཀྱང་། འོས་བསྡུ་ཆེན་མོའི་ལས་རིམ་འགྲོ་བཞིན་པའི་སྐབས་མཚམས་སུ་ཚོགས་སྡེ་ཁག་གཅིག་ནས་ཚོགས་མི་རྣམ་པ་འོས་མིར་བཞེངས་ཕྱོགས་ཐོག་དྲང་བདེན་དང་འདྲ་མཉམ་མེད་པའི་སྒྲིག་གཞི་བསྐྱར་བཅོས་དང་། གྲོས་ཆོད་སོགས་ཀྱི་ལམ་ནས་འགོག་རྐྱེན་བྱུང་འདུག་པ་ནི་མང་གཙོའི་ལྟ་གྲུབ་དང་ཡོངས་སུ་འགལ་བ་མ་ཟད། བཙན་བྱོལ་བོད་མིའི་མང་གཙོའི་མཚན་སྙན་ལའང་གནོད་འཚེ་གྱུར་ཉེན་ཡོད་པར་བློ་ཕམ་གྱི་རང་བཞིན་དུ་གྱུར། ལར་ནས་རྒྱ་ནག་དམར་གཞུང་གིས་བོད་རྒྱལ་ཁབ་བཙན་འཛུལ་བྱས་རྗེས་བོད་མི་རྣམས་བཙན་བྱོལ་དུ་གྱར་དགོས་བྱུང་བ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་འཁྲིད་ལམ་སྟོན་འོག་བོད་ཀྱི་འཐབ་རྩོད་རྒྱུན་འཁྱོངས་ཆེད་བོད་མིའི་སྒྲིག་འཛུགས་གསར་འཛུགས་གནང་ཡོད་པར་བརྟེན། གཞུང་འབྲེལ་མ་ཡིན་པའི་ཚོགས་སྡེ་ཁག་གཅིག་ནས་སོ་སོའི་ཚོགས་མི་རྣམས་ལ་བོད་ཀྱི་འཐབ་རྩོད་སྣེ་འཁྲིད་ཞུ་ཆེད་སྲིད་སྤྱི་གཉིས་ཀྱི་འོས་བསྡུའི་ལས་རིམ་ནང་ཆ་ཤས་བཞེས་རྒྱུར་འགོག་རྐྱེན་བཟོས་ཡོད་པ་དེས་མ་འོངས་བོད་མིའི་འཐབ་རྩོད་རྒྱུན་འཁྱོངས་ལ་གནོད་འཚེ་ཡོང་རྒྱུ་གདོན་མི་ཟ།

ཇ། འོས་བསྡུ་ལས་རིམ་དེ་བཞིན་དྲང་བདེན་དང་འདྲ་མཉམ་ཐོག་ཡོང་དགོས་རྒྱུ་ནི་མང་གཙོའི་གཞི་རྩའི་དམིགས་ཡུལ་ཡིན་པ་ལྟར། འོས་བསྡུའི་ལས་རིམ་འགོ་འཛུགས་ཟིན་པ་ནས་བོད་མི་མང་སྤྱི་འཐུས་ལྷན་ཚོགས་ནས་འོས་བསྡུ་ཆེན་མོའི་ལས་རིམ་སྐབས་སྤྱི་འཐུས་རྣམ་པ་གཞུང་འབྲེལ་ཕྱོགས་བསྐྱོད་གནང་རྒྱུ་མིན་པའི་ལམ་སྲོལ་ལྟར་ཕྱག་བསྟར་གནང་བཞིན་པ་འདི་ལས་ནས་བསྔགས་བརྗོད་ཞུ་རྒྱུ་དང་། ཕྱོགས་མཚུངས་འོས་བསྡུའི་ལས་རིམ་འགྲོ་བཞིན་པའི་སྐབས་དཔལ་ལྡན་སྲིད་སྐྱོང་མཆོག་ནས་གཞུང་འབྲེལ་ཕྱོགས་བསྐྱོད་མུ་མཐུད་གནང་བཞིན་པ་ལ་མང་ཚོགས་ནས་བསམ་ཚུལ་ཡོང་བཞིན་ཡོད་པར། དེ་ཡང་དཔལ་ལྡན་སྲིད་སྐྱོང་མཆོག་གཞུང་འབྲེལ་ཕྱོགས་བསྐྱོད་སྐབས་ས་གནས་སོ་སོར་སྣེ་ལེན་དང་གོ་སྒྲིག་ཞུ་མཁན་རྣམས་ས་གནས་འོས་བསྡུའི་འགན་འཛིན་ཡིན་པ་དང་། འོས་བསྡུ་དྲང་བདེན་ཡོང་མིན་གླེང་སློང་ཤུགས་ཆེར་མི་འགྲོ་བའི་ཆེད་དུ་དཔལ་ལྡན་སྲིད་སྐྱོང་མཆོག་སྲིད་སྐྱོང་གི་འོས་མི་ཡིན་པའི་ཆ་ནས་འོས་བསྡུ་ཆེན་མོའི་ལས་རིམ་སྐབས་ལྡོག་ཏུ་མེད་པའི་ལས་དོན་ཁག་ཕུད་གཞུང་དོན་ཕྱོགས་བསྐྱོད་དང་། རྒྱུན་ལྡན་མིན་པའི་གཞུང་འབྲེལ་མཛད་སྒོ་ཁག་དངོས་གཞིའི་འོས་བསྡུ་མ་གྲུབ་བར་ཕྱིར་འགྱངས་དགོས་རྒྱུ་གཙོ་དོན་ཞུ་རྒྱུ་དང་། མང་ཚོགས་ཀྱི་དཀའ་སེལ་ལས་གཞི་སོགས་ཀྱི་འོག་གཞིས་ཆགས་ཁག་ཏུ་ས་ཁང་བགོ་འགྲེམས་དང་། མཐུན་རྐྱེན་སྦྱོར་སྤྲོད་ཀྱི་ལས་གཞི་ཁག་དངོས་གཞིའི་འོས་བསྡུ་མ་གྲུབ་བར་ཕྱིར་འགྱངས་གནང་ཕྱོགས་ཀྱི་ས་གནས་སུ་བཀོད་ཁྱབ་ཡོང་བའི་སྐུལ་འདེབས་ཞུ་རྒྱུ་ཡིན།

༢༽ ཕྱི་ལོ་ ༢༠༢༥་་༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། བོད་མི་མང་སྤྱི་འཐུས་སྐབས་ ༡༨ པའི་འོས་བསྡུ་ཆེན་མོའི་ལས་རིམ་འགོ་འཛུགས་ཞུས་པ་ནས་བཟུང་། མང་ཚོགས་ཁག་གཅིག་ནས་དབུས་འོས་བསྡུ་ལས་ཁང་གི་ལས་དོན་བྱེད་ཕྱོགས་ཐད་གནོན་ཤུགས་ཡོད་པའི་རྣམ་རྟོག་དབང་གིས་གཞི་མེད་སྐྱོན་བརྗོད་སོགས་ཡོང་བཞིན་འདུག་པར་སོང་། དབུས་འོས་བསྡུ་ལས་ཁང་ནས་རང་དབང་ལྡན་པའི་ཐོག་ལས་དོན་གྲུབ་ཀྱི་ཡོད་པ་མང་ཚོགས་ཀྱི་མཁྱེན་རྟོགས་སླད་གསལ་བཤད་ཁག་གཅིག་ཞུ་རྒྱུ།

ཀ སྤྱིར་བོད་མིའི་སྒྲིག་འཛུགས་དབུས་འོས་བསྡུ་ལས་ཁང་འདི་བཞིན་རང་དབང་ཅན་གྱི་སྡེ་ཚན་གལ་ཆེ་ཞིག་ཡིན་པ་དང་། དེ་ཡང་བཙན་བྱོལ་བོད་མིའི་བཅའ་ཁྲིམས་དགོངས་དོན་ལྟར་དབུས་འོས་བསྡུའི་འགན་འཛིན་རྣམ་པ་གསུམ། ཆེས་མཐོའི་ཁྲིམས་ཞིབ་པ་ཆེ་བ་དང་། སྤྱི་འཐུས་ཚོགས་གཙོ་ཚོགས་གཞོན། སྲིད་སྐྱོང་བཅས་བཞི་ནས་དམིགས་འཛུགས་བྱས་པའི་ཚོགས་ཆུང་དེས་འོས་འཆར་ཕུལ་བའི་ཐོག་སྤྱི་འཐུས་ལྷན་ཚོགས་ནས་བསྐོ་གཞག་བྱུང་ཡོད་ཅིང་། དབུས་འོས་བསྡུ་ལས་ཁང་ནས་འོས་བསྡུའི་ལས་དོན་རྣམས་རང་དབང་དང་། འདྲ་མཉམ་གྱི་ཐོག་ནས་གྲུབ་བཞིན་ཡོད།

ཁ། སྔ་ལོར་དབུས་འོས་བསྡུའི་སྤྱི་ཁྱབ་འགན་འཛིན་ནས་འདི་ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོའི་ལས་རིམ་འགོ་འཛུགས་ཀྱི་དུས་ཚེས་ཕྱི་ལོ་ ༢༠༢༥ ཟླ་ ༡༠ ཚེས་ ༡ ནས་གནང་རྒྱུ་གཏན་འབེབས་ཞུས་ཏེ་སྒྲིག་དོན་སྙན་སེང་ཞུས་ཡོད་ནའང་། ཕྱི་ལོ་ ༢༠༢༥ ཟླ་ ༦ ཚེས་ ༡༢ ཉིན་དཔལ་ལྡན་སྲིད་སྐྱོང་མཆོག་ནས་གཏན་འབེབས་ཟིན་པའི་འོས་བསྡུའི་ལས་རིམ་དེ་བཞིན་ཕྱི་ཟླ་ ༩ ཚེས་ ༡ ལ་སྔ་བསྣུར་ཡོང་བའི་དགོངས་འཆར་གནང་ཡོད་ཀྱང་འདི་ལས་ནས་དང་ལེན་ཞུས་མེད།

ག གཞི་རིམ་དྭང་བླངས་མི་མང་ལས་འགུལ་ཚོགས་པ་ཞེས་པ་ནས་ཕྱི་ལོ་ ༢༠༢༥ ཟླ་ ༡༠ ཚེས་ ༡༤ ཉིན་དམིགས་བསལ་ཚོགས་ཆེན་གྱི་ལས་འགུལ་ཞིག་བཞུགས་སྒར་དྷ་རམ་ས་ལར་གོ་སྒྲིག་ཞུ་འཆར་གསལ་བསྒྲགས་ཞུས་པའི་གནད་དོན་འདི་ནས་ཤེས་རྟོགས་བྱུང་མ་ཐག་འབྲེལ་ཡོད་ལ་ཞལ་པར་བརྒྱུད་ལས་འགུལ་དེ་བཞིན་འོས་བསྡུའི་ལས་རིམ་སྐབས་གནང་ཐལ་མེད་པས་ཕྱིར་འཐེན་དགོས་སྐོར་དགག་ཆ་ཞུས་དོན་ལྟར་འབྲེལ་ཡོད་ནས་དང་ལེན་གྱིས་ཕྱིར་འཐེན་ཞུས་ཡོད།

ང་། ཨ་རི་སྐུ་ཚབ་དོན་ཟུར་དབུ་དཀར་ཚང་སྐལ་བཟང་རྡོ་རྗེ་ལགས་ནས་ཕྱི་ལོ་ ༢༠༢༥ ཟླ་ ༡༡ ཚེས་ ༢༡ ཉིན་དྷ་ས་ལྷ་རྒྱལ་རིར་ཕྱི་ལོ་ ༢༠༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་འོས་མིར་བཞེངས་རྒྱུའི་གསར་འགོད་གསལ་བསྒྲགས་ཤིག་སྤེལ་སྐབས། “་་་༸རྒྱལ་བ་རིན་པོ་ཆེ་ནང་བཞིན་སུ་གང་གིས་གནང་ཐུབ་ཀྱི་མ་རེད་དེ། ཡིན་ནའི་༸རྒྱལ་བ་རིན་པོ་ཆེ་གཙོས་པའི་ང་ཚོ་ཚང་མ་ད་མི་ཚང་མ་ལ་སྐྱོན་མེད་ཀྱོག་དང་། ག་རེ་ཡིན་ནའི་མི་གཅིག་གིས་ད་ག་ཚོད་འཇོན་ཐང་དང་། ཤེས་འཇོན་དང་། རྒྱབ་ལྗོངས་ཡོད་པ། ཡིན་ནའི་མི་གཅིག་གི་ནུས་པ་དེ་མི་མང་པོ་དང་བསྡུར་ཡས་ཡོད་མ་རེད་་་” ཅེས་གསུངས་ཡོད་པར་མང་ཚོགས་ནང་བསམ་ཚུལ་དང་། སྐྱོན་བརྗོད་རིགས་བྱུང་ཡོད་པར་སོང་། འདི་ལས་ནས་ཕྱི་ལོ་ ༢༠༢༥ ཟླ་ ༡༢ ཚེས་ ༡༦ ཉིན་སྲིད་སྐྱོང་འོས་མི་དབུ་དཀར་ཚང་སྐལ་བཟང་རྡོ་རྗེ་ལགས་ནས་བཅའ་སྒྲིག་དགོངས་དོན་དང་འགལ་འཛོལ་གྱུར་ཉེན་ཡོད་པར། སླད་ཕྱིན་འདི་རིགས་མི་ཡོང་བའི་ཐུགས་གཟབ་དགོས་པའི་ཉེན་བརྡ་བཏང་བ་བྱུང་ཡོད།

ཅ། བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་གོ་སྒྲིག་འོག་ཕྱི་ལོ་ ༢༠༢༦ ཟླ་ ༢ ཚེས་ ༢༤ ནས་ ༢༧ བར་ ༼བོད་རང་དབང་འཐབ་རྩོད་པའི་ལྷན་འཛོམས་༽ ཞེས་པའི་བརྗོད་གཞིའི་ཐོག་ཚོགས་འདུ་རྒྱས་འཛོམས་ཤིག་ཚོགས་གཏན་འཁེལ་བའི་གནད་དོན་འདི་གར་ཤེས་རྟོགས་བྱུང་བར། འདི་ནས་ ༢༠༢༦ ཟླ་ ༡ ཚེས་ ༦ འཁོད་གནས་ནང་ཚོགས་ཆེན་དེ་བཞིན་འོས་བསྡུའི་ལས་རིམ་འགྲོ་བཞིན་པའི་སྐབས་གནང་འོས་མ་མཆིས་པས་དངོས་གཞིའི་འོས་བསྡུ་མ་གྲུབ་བར་ཕར་འགྱངས་དགོས་པའི་བཀོད་ཁྱབ་སོང་བ་ལྟར། བདེ་སྲུང་ལས་ཁུངས་ནས་དང་ལེན་གྱིས་ཚོགས་ཆེན་ཕྱིར་འགྱངས་གནང་བ་བྱུང་ཡོད།

ཆ། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་ཕྱི་ལོ་ ༢༠༢༦ ཟླ་ ༣ ཚེས་ ༡༡ ཉིན་བོད་དོན་རྒྱབ་སྐྱོར་ཚོགས་པའི་གོ་སྒྲིག་འོག་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཞིག་བཞུགས་སྒར་དྷ་རམ་ས་ལར་ཚོགས་གཏན་འཁེལ་བའི་ཐོག་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཆོག་དང་། དཔལ་ལྡན་སྲིད་སྐྱོང་མཆོག་ལ་སྐུ་མགྲོན་གཙོ་བོར་གདན་ཞུ་གནང་འཆར་གྱི་གནས་ཚུལ་ཤེས་རྟོགས་བྱུང་སྐབས། འདི་ནས་འབྲེལ་ཡོད་བརྒྱུད་འོས་བསྡུ་ཆེན་མོའི་ལས་རིམ་སྐབས་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཆོག་དང་། སྲིད་སྐྱོང་འོས་མི་དཔལ་ལྡན་སྲིད་སྐྱོང་མཆོག་རྣམ་གཉིས་ཚོགས་ཆེན་དེར་སྐུ་མགྲོན་གཙོ་བོར་གདན་ཞུ་གནང་མ་དགོས་པའི་ལམ་སྟོན་ཞུས་ཡོད།

ཇ། ཕྱི་ལོ་ ༢༠༢༥ ཟླ་ ༡༢ ཚེས་ ༢༧ ཉིན་གདན་ས་ཆེན་པོ་དཔལ་ལྡན་འབྲས་དཀར་སྤུངས་པའི་བླ་སྤྱི་ནས་གཞུང་བསྟེན་དགྲ་ལྷ་གནས་ཆུང་ཆོས་རྒྱལ་ཆེན་པོའི་སྤྱན་འདྲེན་ཞུས་སྐབས་ཀྱི་བཀའ་ལུང་དང་འབྲེལ་བོད་ཀྱི་རླུང་འཕྲིན་ཁང་ནས་སྐུ་ཞོགས་རྡོ་རྗེ་ལགས་ལ་ཟླ་ ༡༢ ཚེས ༣༠ ཉིན་བཅར་འདྲི་ཞུས་པའི་ལན་འདེབས་སུ། གཞུང་བསྟེན་དགྲ་ལྷའི་བཀའ་ལུང་ཇི་བཞིན་འགྲེལ་བརྗོད་གནང་འོས་གནང་ཡོད་ཀྱང་། ཕྱི་ལོ་ ༢༠༢༥་་༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྤྱི་གཉིས་ཀྱི་འོས་བསྡུའི་ལས་རིམ་འགྲོ་བཞིན་པའི་སྐབས་འདིར་ཁོང་ནས་འཕྲོས་བཤད་ཀྱིས་ཆབ་སྲིད་དང་འབྲེལ་བའི་བཀའ་མོལ་མང་དག་གནང་ཐལ་གྱི་རྐྱེན་པས་སྤྱི་ཚོགས་འཁྲུག་གཞི་དང་། འོས་བསྡུའི་ལས་རིམ་ལ་དོ་ཕོག་འགྲོ་ཉེན་ཡོད་པར་སོང་། བཙན་བྱོལ་བོད་མིའི་འོས་བསྡུའི་སྒྲིག་གཞི་དང་། རྩ་འཛིན་ལམ་སྟོན་བཅས་འགལ་འཛོལ་བྱུང་བའི་ཁོང་ལ་ཉེན་བརྡ་བཏང་ཡོད་པ་བཅས་ཀྱི་གསལ་བཤད་དང་།

༣༽ སྦེལ་ཀོབ་ལུགས་བསམ་གཞིས་མི་ངག་དབང་བློ་གྲོས་ (ཨེམ་རྗེ་རྟ་ར་) ནས་ཕྱི་ལོ་ ༢༠༢༥ ཟླ་ ༡༡ ཚེས་ ༢ ཉིན་རང་གི་སྤྱི་ཚོགས་དྲ་རྒྱ་ YouTube, Dr. Tara Tibet Medicine ཞེས་པའི་ནང་དུ་སྐབས་ ༡༧ པའི་བོད་མི་མང་སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས་ལ་སྒྲོ་བཏགས་དང་གཞི་མེད་སྐྱོན་འཛུགས་བྱེད་པར་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ཉེར་བཞི་པའི་ནང་གསེས་ ༣ དང་། ༡༡། དང་འགལ་འཛོལ་བྱུང་བའི་ར་འཕྲོད་ཀྱིས་སྒྲིག་གཞི་དོན་ཚན་ཉེར་ལྔ་པའི་ནང་གསེས་ ༣ དང་། ༡༡ དགོངས་དོན་ལྟར་ཕྱི་ལོ་ ༢༠༢༦ ཟླ་ ༡ ཚེས་ ༢༨ ནས་ལོ་བརྒྱད་རིང་གཞུང་འབྲེལ་གདམ་བྱ་འདེམས་བྱེད་ཀྱི་ཐོབ་ཐང་འཕྲོག་རྒྱུའི་ཐག་གཅོད་ཞུས་པའི་བཅད་ཁྲ་སྙན་སྒྲོན་ཞུ་རྒྱུ། ཞེས་གསུངས་སོང་།