ཕྱི་ལོ་༢༠༢༦ ཟླ་༡ ཚེས་༢༨ ཉིན། བཞུགས་སྒར་དྷ་རམ་སའི་ས་གནས་འགོ་འཛིན་ཚོགས་ཁང་དུ། དབུས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག ༸ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་རྒྱ་གཞུང་གིས་སྐུ་དཀྲོངས་པའི་ཉིན་མོར། ཁོང་ལ་བཀའ་དྲིན་རྗེས་དྲན་ཞུ་ཆེད་བོད་ཀྱི་སྐད་ཡིག་ཉིན་མོ་ཞེས་སྲུང་བརྩི་ཞུས་སོང་། སྐབས་དེར། ༸ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་གིས་བོད་ཀྱི་ཆོས་དང་སྐད་ཡིག སློབ་གསོ། དེ་བཞིན་ཆབ་སྲིད་བཅས་ཀྱི་སྐོར་ཕྱག་ལས་གང་དང་གང་གནང་ཡོད་མེད་སྐོར་ལ་འབུམ་རམས་པ་དགེ་བཤེས་རོང་པོ་བློ་བཟང་སྙན་གྲགས་ལགས་དང་། ལོ་རྒྱུས་སློབ་དཔོན་གཙང་ཕྲུག་སྟོབས་ལགས། འབུམ་རམས་པ་རྒྱལ་ལོ་ལགས། ཆབ་སྲིད་བཙོན་ཟུར་ངག་དབང་འོད་འབར་ལགས་བཅས་ནས་གཏམ་བཤད་གནང་སོང་། བོད་ཀྱི་གཞོན་ནུ་ལྷན་ཚོགས་དྲུང་ཆེ་བསྟན་འཛིན་བློ་བཟང་ལགས་ནས་གཙོ་སྐྱོང་གནང་སོང་།
དེ་ཡང་། གོང་ཚེས་ཉིན་གྱི་ཉིན་གུང་ཆུ་ཚོད་༣ པའི་ཐོག བཞུགས་སྒར་དྷ་རམ་སའི་ས་གནས་འགོ་འཛིན་ཚོགས་ཁང་དུ། དབུས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག ༸ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་རྒྱ་གཞུང་གིས་སྐུ་དཀྲོངས་པའི་ཉིན་མོར། ཁོང་ལ་བཀའ་དྲིན་རྗེས་དྲན་ཞུ་ཆེད་བོད་ཀྱི་སྐད་ཡིག་ཉིན་མོ་ཞེས་སྲུང་བརྩི་ཞུས་པ་དང་སྦྲགས། ཁོང་གིས་བོད་ཀྱི་ཆོས་དང་རིག་གཞུང་། སྐད་ཡིག། སློབ་གསོ། ཁོར་ཡུག བོད་པའི་སྤྱི་ཚོགས་ཁྱོན་ཡར་རྒྱས་ཡོང་ཐབས་སུ་སྐུ་ངལ་ག་ཚོད་གནང་མེད་སྐོར་མཁས་དབང་ཁག་གདན་འདྲེན་ཞུས་ནས་ཁོང་གི་མཛད་རྗེས་གཏམ་བཤད་གནང་སོང་། གཏམ་བཤད་ཁག་ནི་འབུམ་རམས་པ་དགེ་བཤེས་རོང་པོ་བློ་བཟང་སྙན་གྲགས་ལགས་དང་། ལོ་རྒྱུས་སློབ་དཔོན་གཙང་ཕྲུག་སྟོབས་ལགས། འབུམ་རམས་པ་རྒྱལ་ལོ་ལགས། ཆབ་སྲིད་བཙོན་ཟུར་ངག་དབང་འོད་འབར་ལགས་བཅས་རེད་འདུག བོད་ཀྱི་གཞོན་ནུ་ལྷན་ཚོགས་དྲུང་ཆེ་བསྟན་འཛིན་བློ་བཟང་ལགས་ནས་གཙོ་སྐྱོང་གནང་སོང་།
བོད་ཀྱི་གཞོན་ནུ་ལྷན་ཚོགས་ཚོགས་གཙོ་ཚེ་རིང་ཆོས་འཕེལ་ལགས་ཀྱིས་བོད་ཀྱི་སྐད་ཡིག་ཉིན་མོ་སྲུང་བརྩི་ཞུ་དགོས་པའི་དགོས་འདུན་དང་དམིགས་ཡུལ་སྐོར་ངོ་སྤྲོད་མདོར་བསྡུས་གནང་རྗེས།
ལོ་རྒྱུས་སློབ་དཔོན་གཙང་ཕྲུག་སྟོབས་ལགས་ཀྱིས་ལོ་རབས་བརྒྱད་ཅུ་པའི་ནང་༸ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་ནས་བོད་སྐད་ཡིག་སྦྱོང་སྤྱོད་སྤེལ་གསུམ་གྱི་མཛད་པ་ཞེས་པའི་བརྗོད་གཞི་ཐོག་ནས་གཏམ་བཤད་གནང་སོང་། ཁོང་གིས་གནང་དོན། ༸པཎ་ཆེན་རིན་པོ་ཆེ་མཆོག་གིས་གཞུང་གི་ལས་དོན་ཐོག་བོད་སྐདཡིག་གཙོ་སྤྱོད་དགོས་པའི་བཀའ་གནང་བ་དང་། སློབ་ཆུང་ནས་སློབ་ཆེན་བར་བསླབ་གཞི་བོད་ཡིག་བཟོ་དགོས་པའི་བཀའ་གནང་། དེ་བཞིན་བོད་ཡིག་དགེ་རྒན་གསོ་སྐྱོང་དང་དེ་སྔའི་ཤེས་ལྡན་པ་བོད་དགེ་ལ་གདན་ཞུ་དགོས་པའི་བཀའ་གནང་བ་དང་། བོད་རིགས་ལས་བྱེད་ལས་བཟོས་ངེས་པར་དུ་བོད་ཡིག་སྦྱོང་དགོས་པ། གཞུང་ཞབས་གསར་བསྡུ་དང༌། ཕོགས་རིམ། གོ་གནས་སྤར་སྐབས་བོད་ཡིག་གི་ཆུ་ཚད་མེད་དུ་མི་རུང་བ་གལ་ཆེར་བརྩི་དགོས་པ། གཞུང་ཡིག་དང་། སྦྲག་ཏར། དངུལ་འཛིན། ཚོང་འཛིན་སོགས་ཀྱི་ནང་བོད་ཡིག་སྤྱོད་དགོས་པ། བཀོད་རྒྱར་བོད་ཡིག་མེད་ན་ལེན་མི་དགོས། སྙན་ཞུ་བོད་ཡིག་རྐྱང་པས་ཆོག་པ། བརྙན་འཕྲིན་དང༌། འཁྲབ་སྟོན། གསར་འགྱུར། སྒོང་བྱང་སོགས་ལ་བོད་ཡིག་བེད་སྤྱོད་གཏོང་དགོས་བཀའ་གནང་ནས་བོད་ཀྱི་སྐད་ཡིག་སྤྱི་ཚོགས་ཁྲོད་སྦྱོང་སྤྱོད་སྤེལ་གསུམ་གནང་ཡོད་ཅེས་སོགས་གསུངས་སོང་།
དེའི་རྗེས། འབུམ་རམས་པ་དགེ་བཤེས་རོང་པོ་བློ་བཟང་སྙན་གྲགས་ལགས་ཀྱིས་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གིས་བོད་ཀྱི་ཆོས་ལུགས་ཐོག་གང་གནང་ཡོད་མེད་ཐོག་གཏམ་བཤད་གནང་སོང་། ཁོང་གིས་གསུང་དོན་༸པཎ་ཆེན་རིན་པོ་ཆེ་མཆོག་ནས་ཆོས་ལུགས་མཐུན་སྒྲིལ་ཡོང་ཐབས་སུ་བོད་བརྒྱུད་ནང་བསྟན་སློབ་གླིང་བཙུགས་ནས་ཆོས་ལུགས་རིས་མེད་ཀྱི་བླ་སྤྲུལ་གདན་འདྲེན་ཞུས་ནས་ཆོས་ལུགས་རིས་མེད་ཀྱི་སློབ་གཞི་གངས་ཅན་རིག་བརྒྱའི་སྒོ་འབྱེད་ལྡེ་མིག་བསླབས་ནས་ཆོས་ལུགས་མི་སྣ་སྐྱེད་སྲིང་གནང་ཡོད་ཅེས་སོགས་གསུངས་སོང་།
དེ་ནས་འབུམ་རམས་པ་རྒྱལ་ལོ་ལགས་ཀྱིས་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གིས་མི་རིགས་ཤིག་ལ་ཤེས་ཡོན་སློབ་གསོ་སྤྲོད་ཐབས་ཞེས་པའི་བརྗོད་གཞི་ཐོག་ནས་གཏམ་བཤད་གནང་དོན། ༸པཎ་ཆེན་རིན་པོ་ཆེ་མཆོག་གིས་སློབ་གྲྭ་ཆེད་བཙུགས་གནང་ཡོད་དང་། དགོན་པ་དང་སྒེར་འཛུགས་སློབ་གྲྭ་རྣམས་དངོས་ཤུགས་བརྒྱུད་གསུམ་ནས་རོགས་རོམ་དང་རྒྱབ་སྐྱོར་གནང་ཡོད། བོད་ཀྱི་སློབ་གྲྭ་ཁག་ནང་བོད་ཀྱི་ལོ་རྒྱུས་དང་རིག་གཞུང་སོགས་དང་འབྲེལ་བའི་སློབ་གཞི་སྤྲོད་ཐབས་གནང་ཡོད་ཀྱང་རྒྱ་གཞུང་གིས་སྐུ་དཀྲོངས་པ་རེད་ཅེས་སོགས་གསུངས་སོང་།
མཐའ་མར། བོད་ཀྱི་ཆབ་སྲིད་བཙོན་ཟུར་ངག་དབང་འོད་འབར་ལགས་ཀྱིས་ལོ་རབས་བརྒྱད་ཅུ་པའི་ནང་༸ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་གི་ཆབ་སྲིད་འཐབ་རྩོད་དང་། བོད་ཀྱི་ཆབ་སྲིད་བཙོན་པའི་གནས་བབ་ཅེས་པའི་ཐོག་གཏམ་བཤད་གནང་སོང་། སྐབས་དེར་ཁོང་རྒྱའི་བཙོན་ཁང་དུ་ཡོད་སྐབས། ༸ཀུན་གཟིགས་༸པཎ་ཆེན་རིན་པོ་ཆེ་མཆོག་ལྷ་སར་ཕེབས་གནང་ཡོད་སྐོར་ཐོས་པ་དང་། དེ་ནས་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གི་བཀའ་དྲིན་ལ་བརྟེན་ནས་ཟླ་ཁ་ཤས་རྗེས་ནས་བོད་དོན་ཆེད་ངོ་རྒོལ་ལས་འགུལ་སྤེལ་མཁན་ཚང་མ་གློད་གྲོལ་བཏང་བ་རེད་ཅེས་སོགས་གསུངས་སོང་།
