དེ་ཡང་། གོང་ཚེས་ཉིན་གྱི་སྔ་དྲོའི་ཆུ་ཚོད་༨།༡༠་ཡས་མས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཐེག་ཆེན་ཆོས་གླིང་གཙུག་ལག་ཁང་ཆིབས་བསྒྱུར་བསྐྱ་སྐབས། བོད་ཀྱི་ཟློས་གར་ཚོགས་པའི་ལས་བྱེད་དང་ལས་ཟུར། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ལས་བྱེད་དང་ལས་ཟུར། བོད་ཀྱི་ཨ་ཅེ་ལྷ་མོ་ཚོགས་པ་དང་ཚོགས་ཟུར། བལ་ཡུལ་བོད་ཀྱི་ལྷ་མོའི་ཚོགས་པའི་ལས་བྱེད་དང་ལས་ཟུར་བཅས་ཀྱི་སྐུ་ཚབ་རྣམ་པས་ཕེབས་བསུ་ཞུས་སོང་།

རྣམ་རྒྱལ་གྲྭ་ཚང་གི་སྤྱན་རྒྱ་སྤོས་འཛིན་དང༌། སྦྱིན་བདག་འཐུས་ཚབ་མི་དྲུག་ནས་སྤོས་སྣེ། ཕེབས་ལམ་གཡས་གཡོན་དུ། ཤེལ་གྲོང་འབྲོང་རྩེད། སེངྒེ་གཡུ་རལ་ཅན། མདོ་དབུས་ཁམས་གསུམ་གྱི་གཟབ་མཆོར་སྤྲས་པའི་ཕེབས་བསུ་བ། བོད་ཀྱི་ཟློས་གར་ཚོགས་པའི་བྲོ་པ་བྲོ་མ་རྣམས་ནས་གླུ་དབྱངས། གར་ཁྱུང་དཀར་པོ་འཁྲབ་སྟོན་དང་བཅས་ཕེབས་བསུ་གཟབ་རྒྱས་དང་བཅས་གདན་ཞུས་ཀྱིས་བཞུགས་ཁྲི་རིན་པོ་ཆེར་༸ཞབས་སོར་འཁོད་གྲུབ་པ་དང་བརྟན་བཞུགས་ཀྱི་དབུ་བཞུགས་རྡོར་སློབ་གླིང་རིན་པོ་ཆེ་མཆོག་ནས་མཇལ་དར་རྐྱང་འབུལ་ཞུས་སོང་།

དེ་ནས་བརྟན་བཞུགས་ཀྱི་ཆོ་ག་གསུངས་སོང་། དངོས་གཞི་བླ་མ་ལྷར་བསྐྱེད་ནས་བཟུང་ཞལ་འདོན་ཐར་ཆགས་སུ་གསུངས་ཏེ་ཚེ་འགུགས་རྗེས་ཚེ་མདའ་འབུལ་བཞེས་གནང༌། གསོལ་འདེབས་མཎྜལ་སྐབས་དབུ་བཞུགས་རྡོར་སློབ་ཡོངས་འཛིན་གླིང་མཆོག་སྤྲུལ་རིན་པོ་ཆེ་ནས་མཎྜལ་ཚོམ་བུ་འདེགས་འབུལ་སྐབས་ནོར་གླིང་འགན་འཛིན་བཀའ་ཟུར་བློ་བཟང་སྙན་གྲགས་དང༌། ཟློས་གར་འགན་འཛིན་དོན་གྲུབ་ཚེ་རིང་། བལ་ཡུལ་ལྷ་མོ་ཚོགས་པའི་ཚོགས་གཙོ་བྱམས་པ་རྡོ་རྗེ་གསུམ་ནས་ཟུར་འདེགས། མཎྜལ་གྲུབ་རྗེས་དབུ་བཞུགས་སྐུ་བཞེངས་ཐོག་ཞལ་འདོན་ཚིག་བསྟུན་གྱིས་སྐུ་རྟེན། གསུང་རྟེན། ཐུགས་རྟེན། ཚེ་བུམ། ཚེ་ཆང༌། ཚེ་རིལ། མདའ་དར། དབང༌། དྲག་པོ། ཞི་བ། རྒྱས་པ་བཅས་ཀྱི་ལས་བཞི་འབྲང་རྒྱས་དང༌། བཀྲ་ཤིས་རྟགས་བརྒྱད། རྒྱལ་སྲིད་སྣ་བདུན། བཀྲ་ཤིས་རྫས་བརྒྱད་བཅས་ཕུལ་ཟིན་པ་དང་དབུ་བཞུགས་མཆོག་མཇལ་ཁ་དང་། ཞལ་འདོན་༸རྒྱལ་བའི་ཞབས་བརྟན་གསུང་མུར་སྦྱིན་བདག་གི་འཐུས་ཚབ་མི་བཅོ་བརྒྱད་ནས་མཇལ་ཞུ་དང༌། འབུལ་དངོས་སྤྱན་ལམ་དུ་བསྟར། ཡོན་འགྱེད། ཚོགས་འགྲེམས་གནང་སོང་།

གཏང་རག་མཎྜལ་ཚོམ་བུ་བརྟན་བཞུགས་སྦྱིན་བདག་འཐུས་ཚབ་ནོར་གླིང་འགན་འཛིན་ཚེ་རིང་ཕུན་ཚོགས་ནས་འདེགས་འབུལ། ཟློས་གར་འཐུས་མི་ནས་སྐུ་དང༌། བལ་ཡུལ་ལྷ་མོ་ཚོགས་པ་ནས་གསུང༌། ནོར་གླིང་ནས་ཐུགས་རྟེན་བཅས་རིམ་པར་ཕུལ་ཏེ་ཚོགས་མི་གྲངས་༡༥ ནས་མཇལ་ཁ་ཞུས་སོང་། ཚོགས་མང་ནས་ཉི་གཞོན་འཆར་ཀ་མ་དང༌། བསྟན་འབར་མ། (ཀ་ཁྲི་སྒྲོག) བཀྲ་ཤིས། བདེན་ཚིག་སྨོན་ལམ་བཅས་གསུངས་ནས་བརྟན་བཞུགས་དངོས་གཞི་ལེགས་པར་གྲུབ་སོང་།

བོད་ཀྱི་ཟློས་གར་ཚོགས་པ་ནས་༸གོང་ས་མཆོག་སྐུ་ཚེ་བརྟན་ཆེད་རྟེན་འབྲེལ་མཚོན་ཆེད་དུ་གྲུབ་ཆེན་ཐང་སྟོང་རྒྱལ་པོའི་སྐུ་བརྙན་འདེགས་འབུལ་དང་། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་ནས་༸རྒྱལ་བའི་བཀའ་དྲིན་རྗེས་དྲན་གྱི་ཆོས་ཀྱི་འཁོར་ལོའི་གཟེངས་རྟགས་འདེགས་འབུལ་ཞུས་རྗེས། བོད་ཀྱི་ཟློས་གར་ཚོགས་པ་ནས་བོད་ཀྱི་སྲོལ་རྒྱུན་གར་གླུ་དང་བསྟོད་གླུ་གཟིགས་འབུལ་དང་། བལ་ཡུལ་ལྷ་མོ་ཚོགས་པ་ནས་གླུའི་མཆོད་པ་ཕུལ་སོང་།

མཐའ་མར། འཐུས་ཚབ་མི་དྲུག་ནས་སྤོས་སྣེ་དང༌། རྣམ་གྲྭའི་སྤྱན་རྒྱ་བཅས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕོ་བྲང་དུ་གདན་འདྲེན་ཞུས་སོང་།