13
Tue, Apr

སྤྱི་ལོ་༢༠༢༡་ལོའི་ཟླ་༣་ཚེས་༥ཉིན། ༸གོང་ས་མཆོག་གིས་རྒྱལ་སྤྱིའི་ནང་པའི་ལྷན་ཚོགས་ཀྱི་ཚོགས་ཆེན་ཐོག་གསུང་བཤད་གནང་སྐབས། པར། བསྟན་འཛིན་འཇམ་དཔལ་ལགས།

རྒྱལ་སྤྱིའི་གསར་འགྱུར།
ཡིག་གཟུགས་སྒྲིག་ཆས།

སྤྱི་ལོ་༢༠༢༡་ལོའི་ཟླ་༣་ཚེས་༥ཉིན། ༸གོང་ས་མཆོག་གིས་རྒྱལ་སྤྱིའི་ནང་པའི་ལྷན་ཚོགས་ཀྱི་ཚོགས་ཆེན་ཐོག་བཀའ་སློབ་བསྩལ་དོན། འཛམ་གླིང་འདིའི་སྟེང་གི་ཆོས་ལུགས་ཚང་མར་ལྟ་གྲུབ་མི་འདྲ་བ་ཡོད་ཀྱང་མིའི་སེམས་པ་བཟང་པོ་བྱེད་དགོས་པ་དང་། བྱམས་བརྩེ་ལྡན་པ་ཞིག་བྱེད་དགོས་པ་ཆོས་ལུགས་ཚང་མས་གསུངས་བཞིན་ཡོད། ཅེས་བཀའ་སློབ་བསྩལ་སོང་།

དེ་ཡང་། གོང་ཚེས་ཉིན་གྱི་ཞོགས་པ་ཆུ་ཚོད་༡༠་པའི་ཐོག སིང་གྷ་པོར་གྱི་བོད་བརྒྱུད་ནང་པའི་ཆོས་ཚོགས་ (Tibetan Buddhist Center, Singapore) གཙོས་པའི་ཚོགས་པ་ཁག་ནས་ཇི་ལྟར་གསོལ་བ་བཏབ་པ་བཞིན། རྒྱལ་སྤྱིའི་ནང་པའི་ལྷན་ཚོགས་ཀྱི་ཚོགས་ཆེན་གྱི་ནང་པའི་ལྷག་པའི་བསླབ་པ་གསུམ་གྱི་བརྗོད་གཞིའི་ཐོག་བཀའ་སློབ་བསྩལ་སོང་། ཐོག་མར།་སིང་གྷ་པུར་བོད་བརྒྱུད་ནང་བསྟན་ཚོགས་པའི་ཚོགས་གཙོ་སྐུ་སྐྱེས་མ་ཝེ་ནེ་ (Miss Wee Nee) ལགས་ཀྱིས་རྒྱལ་སྤྱིའི་ནང་པའི་ཚོགས་ཆེན་ངོ་སྤྲོད་དང་། བགྲོ་གླེང་ལྷན་ཚོགས་འདི་བཞིན་ཚོགས་པ་སྡེ་ཚན་བཅུ་གཉིས་ཀྱིས་ལྷན་དུ་གོ་སྒྲིག་ཞུས་ཡོད་པ་དང་། ཉིན་གསུམ་རིང་གི་བགྲོ་གླེང་གཙོ་སྐྱོང་གནང་མཁན་རིམ་པར་སྙན་སེང་ཞུས་སོང་། དེའི་རྗེས་ཐའེ་ཝན་རྒྱ་ནག་ནང་བསྟན་མཐུན་ཚོགས་ཀྱི་ཚོགས་གཙོ་དགེ་སློང་ཅིན་ཡའོ་(Ven Bhikshu Jing Yao)ལགས་ཀྱིས་གསུང་བཤད་གནང་སོང་།

དེ་ནས་༸གོང་ས་མཆོག་གིས་གསུང་དོན། ཐེངས་འདིའི་ནང་པའི་ལྷན་ཚོགས་ཀྱི་ཚོགས་ཆེན་འཚོགས་རིང་། བགྲོ་གླེང་ལྷུད་པོ་ཡོང་བའི་རེ་བ་ཡོད། བགྲོ་གླེང་བྱེད་སྐབས་དགག་བཞག་སྤོང་གསུམ་གྱི་ལམ་ནས་གོ་བསྡུར་ཞིབ་ཚགས་པོ་ཡོང་རྒྱུའི་རེ་བ་ཡོད། དཔེར་ན་ང་རང་ཚོས་གཞུང་ཆེན་ལ་བལྟ་བའི་སྐབས་སུ་དགག་གཞག་སྤང་གསུམ་ཞེས་གཞན་ལུགས་དགག་པ། རང་ལུགས་འཇོག་པ། དེ་ལ་རྩོད་པ་སྤོང་བ་ཞེས་སོ་སོའི་རང་ལུགས་གཞག་པ་དེ་གཅིག་པུ་མར་བཤད་པ་མིན་པར་མཐའ་ཆོད་པའི་ཆེན་དུ་ཧ་ཅང་གལ་ཆེན་པོ་ཆགས་ཀྱི་ཡོད།

གང་ལྟར་སངས་རྒྱས་པའི་ཆོས་དེ་ལོ་ ༢༥༠༠ ལྷག་ཕྱིན་པའི་ཆོས་བརྒྱུད་ཅིག་ཆགས་ཡོད། དེང་སང་འཛམ་གླིང་འདིར་དེ་སྔ་ནང་པ་མིན་པ་ཚོས་ཀྱང་བརྟག་དཔྱད་བྱེད་སྐབས་དམིགས་བསལ་ཞིག་ཡོད་པ་དང་། མདོར་ན་ཚན་རིག་པའི་ནང་ནས་ཀྱང་དོ་སྣང་བྱེད་མཁན་ཡོང་གི་འདུག ང་ཚོས་ནམ་རྒྱུན་ཐེག་པ་ཆེན་པོ་དང་ཐེག་པ་ཆུང་ངུ་ཞེས་བརྗོད་ཀྱི་ཡོད་པ་རེད། ཚིག་དེ་ཡག་པོ་མི་འདུག ངོས་ཀྱིས་ནམ་རྒྱུན་ལེགས་སྦྱར་གྱི་ཆོས་བརྒྱུད་དང་པཱ་ལིའི་ཆོས་བརྒྱུད་ཅེས་སྐད་ཡིག་གི་ཐོག་ནས་དབྱེ་བ་བྱེད་ཀྱི་ཡོད། པཱ་ལིའི་ཆོས་བརྒྱུད་ནང་དུ་འདུལ་བའི་ཉམས་བཞེས་དང་བསླབ་པ་གསུམ་གྱི་ཉམས་བཞེས་གཞི་རྩ་བྱས་ནས་ཡོང་གི་ཡོད་པ་རེད། དེ་བཞིན་ནཱ་ལེནྡྲའི་ལེགས་སྦྱར་གྱི་ཆོས་བརྒྱུད་ལ་ཆ་བཞག་ནའང་བསླབ་པ་གསུམ་གྱི་ཉམས་ལེན་དེ་གཙོ་བོ་རེད། སློབ་དཔོན་ཀླུ་སྒྲུབ་ཡབ་སྲས་སོགས་ཚང་མ་དགེ་སློང་འདུལ་བ་འཛིན་པ་ཤ་སྟག་རེད། ང་རང་ཚོས་མིག་དཔེ་ལྟ་ས་ནི་བཅོམ་ལྡན་འདས་རེད། བཅོམ་ལྡན་འདས་ཁོང་ཡང་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དང་། རང་བྱུང་གི་སྒོ་ནས་བསྙེན་པར་རྫོགས་ཏེ་ཆོས་བསྟན་ཡོང་སྐབས་འདུལ་བའི་ཉམས་ལེན་རྣམས་གཞི་མར་བཞག་པ་དེ་ཚུལ་ཁྲིམས་ཀྱི་བསླབ་པ་དང་། དེ་ནས་གཞི་རྩ་དགེ་ཚུལ་དང་དགེ་བསྙེན་ཡོད་ཀྱང་གཙོ་བོ་ཡོངས་སུ་རྫོགས་པ་དགེ་སློང་གི་སྡོམ་པ་དེ་མཆོག་ལ་བརྩི་གི་ཡོད། པཱ་ལིའི་གཞུང་གི་ནང་དུ་ཆ་བཞག་ནའང་འདུལ་བའི་ཉམས་ལེན་དེ་རྨང་གཞི་ཆགས་འདུག ལེགས་སྦྱར་གྱི་ཆོས་བརྒྱུད་ལ་ཆ་མཚོན་ནའང་འདུལ་བའི་ཉམས་བཞེས་དེ་གཙོ་བོ་ཆགས་ཡོད།

སྤྱིར་ངོས་རང་ལ་ཆ་བཞག་ན་མི་ཞིག་ཡིན་པའི་ཆ་ནས་འཛམ་གླིང་འདིར་བྱམས་བརྩེ་གོང་མཐོར་སྤེལ་རྒྱུ་དང་། དེ་ཡང་སྐྱེ་བ་སྔ་ཕྱི་དང་ཆོས་ལུགས་ཀྱི་སྐད་ཆ་མེད་པར་མི་བཟང་པོ་ཞིག་བྱེད་རྒྱུ་དེ་རིམ་པ་དང་པོར་བརྩི་བཞིན་ཡོད། རིམ་པ་གཉིས་པ་ནི་ངོས་རང་ཆོས་པ་ཞིག་རེད། ཆོས་པ་ཞིག་ཡིན་པའི་ངོས་ནས་འཛམ་གླིང་འདིའི་སྟེང་གི་ཆོས་ལུགས་ཚང་མར་ལྟ་གྲུབ་མི་འདྲ་བ་ཡོད་ཀྱང་མིའི་སེམས་པ་བཟང་པོ་བྱེད་དགོས་པ་དང་། བྱམས་བརྩེ་ལྡན་པ་ཞིག་བྱེད་དགོས་པ་ཆོས་ལུགས་ཚང་མས་གསུངས་བཞིན་ཡོད། ལྟ་གྲུབ་མི་འདྲ་བ་ནི་ནཱ་ལེནྡྲའི་ཆོས་བརྒྱུད་རང་གི་ནང་དུའང་ཡོད་པ་རེད། དེར་བརྟེན། ལྟ་གྲུབ་མི་འདྲ་བ་རྣམས་ནི་ཁམས་དང་མོས་པ་མི་འདྲ་བ་ལ་བརྟེན་ནས་ཡོང་གི་ཡོད་པ་དང་། དེ་ཐམས་ཅད་ཀྱིས་བསླབ་བྱ་གཅིག་གྱུར་ཞིག་ལ་མི་སེམས་པ་བཟང་པོ་བྱེད་དགོས་པ་རེད། གཞན་ཕན་གྱི་ལྷག་བསམ་ཡོད་པ་ཞིག་དགོས་པ་རེད་ཅེས་གསུངས་ཡོད། འཛམ་གླིང་འདིའི་ཆོས་ལུགས་ལ་གཞི་རྩ་དུམ་བུ་གཉིས་སུ་བྱས་པ་ཡིན་ན་འཇིག་རྟེན་བཀོད་པ་པོ་འདོད་མཁན་གྱི་ཆོས་བརྒྱུད་གཅིག་དང་། འཇིག་རྟེན་བཀོད་པ་པོ་མི་འདོད་མཁན་གྱི་ཆོས་བརྒྱུད་གཅིག་བྱས་ཏེ་གཉིས་ཀར་ལྟ་གྲུབ་མི་འདྲ་བ་ཡོད་ཀྱང་། འཇིག་རྟེན་བཀོད་པ་པོ་འདོད་པ་ཚོས་འཇིག་རྟེན་བཀོད་པ་པོ་བྱམས་བརྩེའི་བདག་ཉིད་རེད། ང་ཚོ་ཚང་མ་བྱམས་བརྩེའི་བདག་ཉིད་དེས་བཀོད་པ་རེད་ཟེར་སྐབས་ཕ་ཡི་ཚོད་ལྟ་བུའི་འཇིག་རྟེན་བཀོད་པ་པོ་དཀོན་མཆོག་དེ་བྱམས་བརྩེའི་བདག་ཉིད་ཡིན་དུས་ང་ཚོ་ཚང་མ་དཀོན་མཆོག་དེས་བཀོད་པའི་དཀོན་མཆོག་གི་སྲས་ལྟ་བུ་ཆགས་ཀྱི་ཡོད་པ་རེད། དེར་བརྟེན། ང་ཚོ་ཚང་མས་བྱམས་བརྩེ་ལྡན་པ་ཞིག་བྱེད་དགོས་ཀྱི་འདུག་ཅེས་ཟེར་བ་འཇིག་རྟེན་བཀོད་པ་པོ་འདོད་མཁན་གྱི་ཆོས་ལུགས་ཚང་མས་གསུང་བཞིན་འདུག ལྟ་གྲུབ་མི་འདྲ་བ་ཡོང་གི་ཡོད་པ་རེད།

ང་རང་ཚོ་སངས་རྒྱས་པའི་ཆོས་ལུགས་ནང་དུ་གོང་དུ་ཞུས་པ་ལྟར་ནཱ་ལེནྡྲའི་ཆོས་བརྒྱུད་དང་པཱ་ལིའི་ཆོས་བརྒྱུད་གཉིས་དེ་གཙོ་བོ་སཾ་སྐྲྀ་ཏ་དང་པཱ་ལིའི་སྐད་ལ་བརྟེན་མཁན་མི་འདྲ་བ་གཉིས་འདུག གང་ལྟར་པཱ་ལིའི་གཞུང་དེ་རྣམས་སངས་རྒྱས་པའི་ཆོས་ཀྱི་རྨང་གཞི་ཆགས་ཡོད། ལེགས་སྦྱར་གྱི་ཆོས་བརྒྱུད་ལ་ཆ་བཞག་ནའང་གོང་དུ་ཞུས་པ་ལྟར་འདུལ་བའི་ཉམས་ལེན་རྨང་གཞི་རེད། དེ་ལ་གཞི་ཐམས་ཅད་ཡོད་པར་སྨྲ་བའི་སྡེ་པ། ཕལ་ཆེན་སྡེ་པ། གནས་བརྟན་པའི་སྡེ་པ་སོགས་སྡེ་པ་མི་འདྲ་བ་ཁ་ཤས་ཡོད་པ་རེད། ང་ཚོ་བོད་ལ་ཡོད་ནི་ཕལ་ཆེར་གཞི་ཐམས་ཅད་ཡོད་པར་སྨྲ་བའི་སྡེ་པ་རེད། རྒྱ་ནག་ལ་ཡོད་པ་ཆོས་སྲུང་བའི་སྡེ་པ་རེད། སྡེ་པ་མི་འདྲ་བ་ཡོད་ཀྱང་སོ་སོར་ཐར་བ་ང་ཚོ་ཚང་མར་གཅིག་པ་རེད། ཅེས་སོགས་གསུངས་རྗེས་དྲི་བ་དྲི་ལན་འགོ་འཛུགས་གནང་སོང་།

 

 

བོད་ཀྱི་ལོ་རྒྱུས་ཡིག་ཆ།