03
Wed, Mar

རྒྱལ་སྤྱིའི་གསར་འགྱུར།
ཡིག་གཟུགས་སྒྲིག་ཆས།

༢༠༢༡་ལོའི་ཟླ་༡་ཚེས་༢༡ཉིན། བཞུགས་སྒར་རྡ་ས་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒ་མཆོག་ནས། ཨ་རིའི་སྲིད་འཛིན་གསར་པ་ཇོར་བྷ་ཌན་(Joe Biden)དང་སྲིད་འཛིན་གཞོན་པ་ཀཱ་མཱ་ལཱ-ཧཱ་རིས་(Kamala Harris)གཉིས་ཀྱིས་ལས་ཁུར་དམ་འབུལ་གནང་བར་འཚམས་འདྲི་གནང་རྗེས། ཨ་རི་དང་བོད་གཉིས་ཀྱི་འབྲེལ་བ་སྔར་ལྷག་ཡར་རྒྱས་གོང་འཕེལ་ཡོང་བར་རྒྱབ་སྐྱོར་གནང་བའི་རེ་བ་ཡོད། ཅེས་སྲིད་སྐྱོང་མཆོག་གིས་གསུངས་འདུག

དེ་ཡང་། ཟླ་འདིའི་ཚེས་༢༠ཉིན། ཨ་རིའི་རྒྱལ་ས་ཝ་ཤིང་ཊོན་གྱི་ཕོ་བྲང་དཀར་པོ་མདུན་དུ། ཨ་རིའི་སྲིད་འཛིན་གསར་པ་ཇོར-བྷ་ཌན(Joe Biden)་དང་སྲིད་འཛིན་གཞོན་པ་ཀཱ་མཱ་ལཱ-ཧཱ་རིས(Kamala Harris)གཉིས་ཀྱིས་ལས་ཁུར་དམ་འབུལ་གནང་སོང་། སྐབས་དེར། ཇོར་བྷ་ཌན་གྱིས་ཨ་རི་མི་མང་རྣམས་མཐུན་སྒྲིལ་དང་འདྲ་མཉམ་ཡོང་ཐབས་ལ་འབད་བརྩོན་གནང་རྒྱུ་དང། ཨ་རི་ནང་དུ་ཏོག་དབྱིབས་ནད་དུག་འགོག་ཐབས་གང་ཐུབ་གནང་རྒྱུ། ཁོར་ཡུག་སྲུང་སྐྱོབ་སོགས་ཀྱི་ཐོག་ཤུགས་སྣོན་རྒྱག་རྒྱུ་ཡིན་པ་སོགས་གསུངས་སོང་།

སྲིད་སྐྱོང་མཆོག་གི་འཚམས་འཕྲིན་ནང་དུ་། བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་ཨ་རིའི་སྲིད་འཛིན་ཐེངས་ ༤༦ མཆོག་གི་དམ་འབུལ་མཛད་སྒོའི་ཉིན་མོར་སྐུ་ཉིད་མཆོག་ལ་འཚམས་འདྲི་ཞུ་རྒྱུ་ཡིན། ཞེས་དང་།

འདས་པའི་ལོ་ངོ་བཅུ་ཕྲག་མང་པོའི་རིང་། ཨ་རིའི་གཞུང་མང་གཉིས་ནས་བོད་དོན་ཆེད་རྒྱབ་སྐྱོར་གནང་དང་གནང་བཞིན་པར་ཐུགས་རྗེ་ཆེ་ཞུ་རྒྱུ་ཡིན། དེང་སང་སེམས་ཁུར་བྱེད་རྒྱུ་ནི་བོད་དོན་གཅིག་པུ་ཙམ་མིན་པར། རྒྱལ་སྤྱིའི་མང་གཙོ་དང་རྒྱལ་སྤྱིའི་རིན་ཐང་ཁག་དབང་ཆ་གཅིག་སྡུད་རིང་ལུགས་ཀྱི་གཞུང་རྒྱ་ནག་ལྟ་བུའི་ཉེན་ཁའི་འོག་ལྷུང་ཡོད་པ་དེ་དག་ལ་སེམས་ཁུར་བྱེད་དགོས་པ་ཆགས་ཡོད། ཅེས་དང་།

སྐུ་ཉིད་མཆོག་གིས་ལོ་མང་རིང་ཨ་རིའི་རྒྱལ་ཁབ་དང་མི་མང་གི་ཆེད་དུ་ཞབས་འདེགས་རླབས་ཆེན་ཞུས་པ་དང་། ཨ་རིའི་སྲིད་འཛིན་གྱི་འོས་བསྡུའི་ཁྲོད་སྐུ་ཉིད་མཆོག་ལ་རྒྱལ་ཁ་ཐོབ་པ་ནི་ཨ་རིའི་མི་མང་གིས་སྐུ་ཉིད་མཆོག་ལ་ཡིད་ཆེས་བརྟན་པོ་ཞུ་བཞིན་པ་མཚོན་གྱི་ཡོད། ངས་སྐུ་ཉིད་མཆོག་ལ་ལྷག་བསམ་རྣམ་དག་གིས་འཚམས་འདྲི་དང་སྦྲགས། ལས་ཡུན་རིང་བྱ་གཞག་ཐམས་ཅད་ལམ་ལྷོངས་ཡོང་བའི་སྨོན་འདུན་རྒྱུ་ཡིན། ཞེས་དང་།

གཞན་ཡང་དཔལ་ལྡན་སྲིད་སྐྱོང་མཆོག་གིས། ཨ་རིའི་གཞུང་གི་ལོ་རྒྱུས་ནང་ཐེངས་དང་པོ་མི་རིགས་འདྲེས་མའི་བུད་མེད་ཅིག་ཨ་རིའི་སྲིད་འཛིན་གཞོན་པ་ཆགས་ཐུབ་པ་དེས་རྒྱལ་སྤྱིའི་ཆབ་སྲིད་དང་དབུ་ཁྲིད་ཀྱི་གནད་དོན་ཐད་ནས་བུད་མེད་རྣམས་ལ་དུས་རབས་གསར་པ་ཞིག་བསྐྲུན་ཡོད། ལྷག་པར་ལྕམ་སྐུ་ཀཱ་མཱ་ལཱ-ཧཱ་རིས་མཆོག་ནི་རྒྱ་གར་གྱི་རིགས་རྒྱུད་ཡིན་པའི་ཆ་ནས་འཛམ་གླིང་ནང་གི་རྒྱ་གར་བ་ཡོངས་ལ་སྤོབས་པ་དང་སེམས་ཤུགས་བསྐྱེད་ཡོད། ལྕམ་སྐུ་མཆོག་གིས་ཐད་ཀར་གདོང་ལེན་གནང་དགོས་པའི་འགྲོ་བ་མིའི་ཐོབ་ཐང་དང་། འདྲ་མཉམ། གོ་ལའི་གནམ་གཤིས་འགྱུར་ལྡོག་བཅས་སླར་གསོ་གནང་སྐབས་བོད་དོན་གླེང་སློང་དང་། ཨ་རི་དང་བོད་གཉིས་ཀྱི་འབྲེལ་བ་སྔར་ལྷག་ཡར་རྒྱས་གོང་འཕེལ་ཡོང་བར་རྒྱབ་སྐྱོར་གནང་བའི་རེ་བ་ཡོད། ཅེས་འཁོད་འདུག།

 

བོད་ཀྱི་ལོ་རྒྱུས་ཡིག་ཆ།