16
Sat, Jan

ཕྱི་ལོ་༢༠༢༡་ཟླ་༡་ཚེས་༧ཉིན་སྤེལ། འཛམ་གླིང་ཞི་བདེའི་དེད་དཔོན་ཆེན་པོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཀོ་རི་ཡའི་ནང་པ་ཚོས་ཇི་ལྟར་གསོལ་བ་བཏབ་པ་བཞིན། ཟླ་བ་འདིའི་ཚེས་ ༥ ནས་ ༧ བར་ཉིན་གསུམ་གྱི་རིང་དྲྭ་ལམ་བརྒྱུད་ཤེས་རབ་སྙིང་པོའི་བཀའ་ཆོས་གནང་སྟེ་ཆོས་ཞུ་བ་རྣམས་ཀྱི་བཀའ་འདྲི་ཁག་ལ་ཐུགས་བརྩེ་བ་ཆེན་པོས་བཀའ་ལན་གནང་སོང་། སྐབས་དེར། སེམས་བཟང་པོ་བསྐྱེད་རྒྱུ་དེ་ཕན་ཡོན་ཆེན་པོ་ཞེ་དྲགས་རེད། འཕྲལ་དུ་རང་ཉིད་ཀྱི་སེམས་ལྷོད་ལྷོད་ཆགས་རྒྱུ་མ་ཟད། རང་བཞིན་གྱིས་ངོ་ཤེས་པ་མང་པོ་ཐུག་ན་ཁོ་རང་ཚོ་ཡང་སེམས་ལྷོད་ལྷོད་ཆགས་ཀྱི་རེད། ཅེས་༸གོང་ས་མཆོག་གིས་གསུངས་འདུག

༢༠༢༡་ལོའི་ཟླ་༡་ཚེས་༤ཉིན། བཞུགས་སྒར་རྡ་ས་ནས་༸གོང་ས་མཆོག་དང་བོད་མིའི་སྒྲིག་འཛུགས་ཀྱི་སྲིད་སྐྱོང་རྣམ་གཉིས་ཀྱིས། ལྕམ་ནེན་སཱི་པེ་ལོ་སཱི་(Nancy Pelosi)མཆོག་སླར་ཡང་ཨ་རིའི་གྲོས་ཚོགས་འོག་མའི་ཚོགས་གཙོར་འདེམ་ཐོན་བྱུང་བར་འཚམས་འཕྲིན་གནང་འདུག སྐབས་དེར། ཁོང་མོས་འཛམ་གླིང་ནང་དུ་ཞི་བདེ་དང་ལྷིང་འཇགས་ཡོང་རྒྱུའི་ཐད་གང་ཅིའི་འབད་བརྩོན་མུ་མཐུད་གནང་རྒྱུར་ཡིད་ཆེས་ཡོད། ཅེས་༸གོང་ས་མཆོག་གིས་གསུངས་འདུག

༢༠༢༠་ལོའི་ཟླ་༡༢་ཚེས་༢༡་ཉིན། ཨ་རིའི་གྲོས་ཚོགས་གོང་མ་ནས་༢༠༢༠ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་(Tibetan Policy and Support Act of 2020 )ལ་སྤྱི་མོས་གཏན་འབེབས་གནང་སྟབས། ཨ་རིའི་གཞུང་འབྲེལ་སྲིད་བྱུས་ཤིག་ཏུ་གྱུར་ཡོད་འདུག ཁྲིམས་འཆར་དེའི་ནང་དུ། ༸གོང་ས་མཆོག་གི་ཡང་སྲིད་ཀྱི་སྐུ་དབང་སྐུ་སྒེར་དང་བོད་མི་ཚོར་ཡོད་པ་དང་། བོད་མིའི་སྒྲིག་འཛུགས་དང་དེའི་འགོ་ཁྲིད་སྲིད་སྐྱོང་ངོས་འཛིན་གནང་ཡོད་པ་སོགས་བཀོད་འདུག

༢༠༢༠་ལོའི་ཟླ་༡༢་ཚེས་༡༦ཉིན་སྤེལ། ཨ་རིའི་སྲིད་འཛིན་འོས་བསྡུའི་ལྷན་རྒྱས་ཀྱིས་གཞུང་འབྲེལ་ཐོག་ནས་ཇོར་བྷ་ཌན་ཨ་རིའི་སྲིད་འཛིན་གསར་པ་འོས་འདེམས་བྱུང་བར་གཏན་འབེབས་བྱས་ཡོད་པ་དང་། ཇོར་བྷ་ཌན་གྱིས་གཞུང་འཛིན་ལས་ཁུངས་ལ་ད་བར་མི་སྣ་༡༩་བདམས་ཡོད་པ་དང་། དེའི་ནང་ནས་མི་སྣ་བཅུ་བུད་མེད་ཡིན་འདུག

༢༠༢༠་ལོའི་ཟླ་༡༢་ཚེས་༢༡ཉིན། ཨ་རི་གཞུང་གིས་སླར་ཡང་དྲག་གནོན་སྲིད་བྱུས་ལག་བསྟར་བྱེད་མཁན་རྒྱ་གཞུང་གི་འགོ་ཁྲིད་ཁག་ལ་ཐོངས་མཆན་སྤྲོད་རྒྱུ་དམ་དྲག་གནང་འདུག འགོ་ཁྲིད་དེ་ཚོ་ནི་བོད་ནང་འགྲོ་འོང་བཀག་འགོག་བྱེད་མཁན་དང་། ཡུ་གུར་བ་མང་པོར་གཉའ་གནོན་བྱེད་མཁན། ཧོང་ཀོང་གི་རང་སྲིད་རང་སྐྱོང་ལ་གཏོར་བཤིག་གཏོང་མཁན་བཅས་ཡིན་འདུག གཞན་བོད་ཀྱི་སྐད་ཡིག་ཐོབ་ཐང་རྩོད་ལེན་པ་བཀྲ་ཤིས་དབང་ཕྱུག་སོགས་མྱུར་དུ་གློག་གྲོལ་གཏོང་དགོས། ཞེས་བཀོད་འདུག

༢༠༢༠་ལོའི་ཟླ་༡༢་ཚེས་༡༨་ཉིན། ཨ་རིའི་སྲིད་འཛིན་ཊོམ་གྱིས་ཚོང་འབྲེལ་དང་འབྲེལ་བའི་ཁྲིམས་འཆར་ཞིག་ལ་མཚན་རྟགས་བཀོད་ཡོད་པ་དང་། ཁྲིམས་དེ་ནི་རྒྱ་ནག་གི་ཚོང་གཉེར་ཁང་ཁག་གིས་ཨ་རིའི་ཚོང་གི་རྩིས་ཞིབ་རྩ་འཛིན་དང་མཐུན་པར་བྱེད་མ་ཐུབ་ཚེ། ཨ་རིའི་ཚོང་ཁྲོམ་ནས་ཕྱིར་འབུད་གཏོང་རྒྱུའི་ཁྲིམས་ཤིག་ཡིན་འདུག

༢༠༢༠་ལོའི་ཟླ་༡༢་ཚེ་༢ཉིན། ཧོང་ཀོང་གི་མང་གཙོ་དོན་གཉེར་བ་སྐད་གྲགས་ཅན་ཇོར་ཤྭ་ཝོན་(Joshua Wong)དང་། ཨི་གྷི་ནེ་སུ-ཆོབུ(Agnes Chow)། ཨི་ཝན་ལེམ་(Ivan Lam)བཅས་ཧོང་ཀོང་གི་ཁྲིམས་ཁང་ཞིག་ནས་ཁྲིམས་ཐག་བཅད་ཡོད་འདུག དེ་ཡང་། ཇོར་ཤྭ་ཝོན་ལ་ལོ་གཅིག་དང་ཉིན་ཞེ་ལྔ་ཡི་བཙོན་འཇུག་ཁྲིམས་ཐག་བཅད་འདུག་ཅིང་། ཨི་གྷི་ནེ་སུ-ཆོབུ་ལ་ཟླ་བ་༡༠་ཡི་བཙོན་འཇུག་ཁྲིམས་ཐག་བཅད་འདུག་པ་དང་། ཨི་ཝན་ལེམ་ལ་ཟླ་བ་བདུན་གྱི་བཙོན་འཇུག་ཁྲིམས་ཐག་བཅད་འདུག

More Articles ...

བོད་ཀྱི་ལོ་རྒྱུས་ཡིག་ཆ།