13
Tue, Apr

སྤྱི་ལོ་༢༠༢༡་ལོའི་ཟླ་༣་ཚེས་༡༢་ཉིན། བོད་ཀྱི་བུད་མེད་ཉིན་མོ་སྲུང་བརྩི་ཞུ་སྐབས།

བཙན་བྱོལ་གྱི་གསར་འགྱུར།
ཡིག་གཟུགས་སྒྲིག་ཆས།

སྤྱི་ལོ་༢༠༢༡་ལོའི་ཟླ་༣་ཚེས་༡༢ཉིན། བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ། བུད་མེད་ནུས་སྟོབས་གོང་འཕེལ་ཚན་པས་བོད་ཀྱི་བུད་མེད་ཉིན་མོ་སྲུང་བརྩི་དང་སྦྲགས། གཉན་འཕྲང་ཆེ་བའི་དུས་སྐབས་འདིར་བོད་པའི་བུད་མེད་ཚོས་སྤྱི་ཚོགས་བདེ་འཇགས་ཀྱི་ལས་དོན་ཆེད་འགན་འཁུར་ཆེན་པོ་བཞེས་ཡོད་པ་དེ་དག་རྗེས་སུ་ཡི་རངས་དང་རྗེས་དྲན་ཞུས་སོང་།

དེ་ཡང་། གོང་ཚེས་ཉིན་གྱི་ཉིན་རྒྱབ་ཆུ་ཚོད་གསུམ་དང་ཕྱེད་ཀའི་ཐོག བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ། དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་འཕེལ་ཚན་པས་བོད་ཀྱི་བུད་མེད་ཉིན་མོ་སྲུང་བརྩི་ཞུ་བའི་མཛད་སྒོ་ཞིག་ཚོགས་སོང་། མཛད་སྒོ་དེའི་ཐོག བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒ་མཆོག་དང་བཀའ་བློན་རྣམ་པ། ལས་ཁུངས་ཁག་གི་དྲུང་ཆེ་དང་ལས་བྱེད་བཅས་མཉམ་འཛོམས་གནང་འདུག

ཐོག་མ། བུད་མེད་ནུས་སྟོབས་གོང་འཕེལ་ཚན་པའི་ལས་བྱེད་བསྟན་འཛིན་ཚེ་བརྟེན་ལགས་ཀྱིས་ཉིན་མོ་དང་འབྲེལ་བའི་ཐོག་འགྲེལ་བརྗོད་གནང་དོན། དེ་རིང་བོད་ཀྱི་བུད་མེད་ཉིན་མོ་སྲུང་བརྩི་དང་སྦྲགས། གཉན་འཕྲང་ཆེ་བའི་དུས་སྐབས་འདིར་ང་རང་ཚོ་བོད་པའི་བུད་མེད་ཚོས་སྤྱི་ཚོགས་བདེ་འཇགས་ཀྱི་ལས་དོན་ཆེད་འགན་འཁུར་ཆེན་པོ་བཞེས་ཡོད་པ་དེ་དག་རྗེས་དྲན་ཞུ་བཞིན་ཡོད། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གྲངས་ཐོ་ནང་། ཏོག་དབྱིབས་གཉེན་རིམས་ལས་དོན་ཚོགས་ཆུང་ཁྱབ་ཁོངས་སུ་དྭང་བླངས་ཞབས་ཞུ་བ་དང་། ཆོད་གན་ལས་བྱེད་པ་བརྒྱ་ཆ་ ༨༠ ཡས་མས་ཤིག་བུད་མེད་ཤ་སྟག་ཡིན་པ་མ་ཟད། བུད་མེད་ཀྱིས་སྣེ་ཁྲིད་པའི་ཚོགས་སྡེ་ཁག་གིས་སྤྱི་ཚོགས་ནང་ཟས་གོས་ཀྱི་མཐུན་རྐྱེན་གཙོས་པའི་དཔལ་འབྱོར་གྱི་མཐུན་འགྱུར་སྦྱར་བ་དང་། མང་ཚོགས་ཀྱིས་ལོངས་སུ་སྤྱོད་པའི་ས་ཚིགས་ཁག་ལ་འབུ་སྨན་གཏོར་རྒྱུའི་མཚོན་པའི་གཙང་བཟོའི་ལས་དོན་གནང་བ། དེ་བཞིན་མི་རབས་བགྲས་པ་ཚོར་དམིགས་བསལ་ལྟ་སྐྱོང་སོགས་ཀྱི་ལམ་ནས་རྒྱབ་སྐྱོར་དང་སྲུང་སྐྱོབ་གང་ལེགས་གནང་ཐུབ་པ་བྱུང་ཡོད། བུད་མེད་ཚོས་དུས་ཚོད་དཀའ་ལས་ཁག་པོ་འདི་སྐབས། རང་ཉིད་ཀྱི་ཉམས་མྱོང་མི་འདྲ་བ་མཐའ་དག་དང་། གནས་སྟངས་ལ་ལྟ་ཚུལ་མི་འདྲ་བ་ཁག དེ་བཞིན་རིག་རྩལ་མི་འདྲ་བ་སོགས་ཉམས་སྤུངས་གནང་བ་བརྒྱུད། ཨ་མ་དང་ཆུང་མ། དེ་བཞིན་ཁྱིམ་ཚང་གི་ཕྱིར་ཕྱག་ལས་གནང་མཁན་སོགས་ལས་འགན་དེ་དག་ཆ་ཚང་བ་སྒྲུབ་ཐུབ་པ་བྱ་རྒྱུའི་ནུས་ཡོད་པ་བཏོན་ཡོད། འཛམ་གླིང་གི་ས་ཕྱོགས་གང་སར་དྲང་བདེན་དང་འདྲ་མཉམ་གྱི་སྤྱི་ཚོགས་བསྐྲུན་རྒྱུ་དང་། གོ་ལའི་གནམ་གཤིས་འགྱུར་ལྡོག་ཐོག་གོ་རྟོགས་སྤེལ་རྒྱུ་སོགས་ཀྱི་ལས་འགུལ་མང་དག་ཞིག་དྲ་རྒྱ་དང་སྲང་ལམ་ཁག་གི་ཐོག་བུད་མེད་གཞོན་སྐྱེས་ཀྱིས་སྣེ་ཁྲིད་ཡོད་པ་རེད།

འདི་ལོའི་རྒྱལ་སྤྱིའི་བུད་མེད་ཉིན་མོའི་བརྗོད་གཞི་ནི་༼ ཏོག་དབྱིབས་གཉེན་རིམས་སྐབས་བུད་མེད་འགོ་ཁྲིད་ནུས་པས་འདྲ་མཉམ་གྱིས་དམིགས་ཡུལ་སྒྲུབ་པ།"Women in Leadership: Achieving an Equal future in a COVID19 world"༽ ཞེས་འཛམ་གླིང་ས་ཕྱོགས་གང་སར་མི་ཚོ་ཏོག་དབྱིབས་གཉེན་རིམས་ལས་གསོ་ཐབས་དང་། འདྲ་མཉམ་ལྡན་པའི་སྤྱི་ཚོགས་ཤིག་བསྐྲུན་ཐབས་སུ་བུད་མེད་ཚོས་འབད་བརྩོན་ཧུར་ཐག་གནང་དང་གནང་མུས་ལ་ངོས་འཛིན་ཞུ་བཞིན་ཡོད། མ་ཟད་ཐེངས་འདིའི་བརྗོད་གཞི་འདི་བཞིན་མི་རབས་ཚང་མས་གཅིག་གྲགས་བྱེད་བཞིན་པའི་༼མི་རབས་འདྲ་མཉམ།"Generation Equality" ༽ཞེས་པའི་དགོས་འདུན་དང་མཐུན་ཞིང་། བུད་མེད་ཚོར་རང་ཉིད་ཀྱི་མི་ཚེའི་ནང་གི་གནད་དོན་གང་ཅིའི་ཐོག་ཐག་གཅོད་བྱ་རྒྱུའི་ཐོབ་ཐང་དང་། གླ་ཕོགས་འདྲ་མཉམ། གླ་ཕོགས་མེད་པའི་ནང་ལས་སོགས་འདྲ་མཉམ་གྱི་ཆ་བགོས། བུད་མེད་དང་ན་ཆུང་བུ་མོ་ཚོར་གང་ཅིའི་ཐད་དྲག་སྤྱོད་མཚམས་འཇོག་དང་། ཁོང་ཚོར་འཕྲོད་བསྟེན་དང་འབྲེལ་བའི་དགོས་ངེས་མཐུན་འགྱུར་སྦྱོར་རྒྱུའི་དགོས་འདུན་བཏོན་གྱི་ཡོད།

ཏོག་དབྱིབས་གཉེན་རིམས་ ༡༩ འི་ཁྱབ་བརྡལ་འགོག་ཐབས་དང་། ནད་གཞི་འདི་ལས་གསོ་ཐབས་ཀྱི་ལས་དོན་གྱི་ལས་རིགས་འདྲ་མིན་ཐོག་ལ་ཞུགས་པའི་བུད་མེད་ཚོས་སྣེ་ཁྲིད་ཀྱི་གཙོས་པའི་གཞི་རྒྱ་ཆེ་བའི་ཆ་ཤས་ལེན་ཡོད། བུད་མེད་ཀྱི་འགོ་ཁྲིད་པའི་རྒྱལ་ཁབ་ཁག་གི་ནང་གཉེན་རིམས་དེ་ཁྱབ་བརྡལ་འགོག་ཐབས་ཐད་གཟེངས་སུ་ཐོན་པའི་ལས་དོན་གནང་ཡོད་པ་རེད། ཏོག་དབྱིབས་གཉེན་རིམས་ ༡༩ པར་མདུན་དུ་ཐོན་ཏེ་གདོང་ལེན་གནང་མཁན་ཚན་རིག་པ་དང་། སྨན་པ། སྨན་ཞབས་པ་སོགས་འཕྲོད་བསྟེན་ལས་བྱེད་པའི་ཁོངས་སུ་བུད་མེད་མང་དག་ཞིག་བྱུང་ཡོད་པ་མ་ཟད། ཏོག་དབྱིབས་གཉེན་རིམས་ ༡༩ པར་གཟེངས་སུ་ཐོན་པའི་གདོང་ལེན་གནང་བའི་ལས་གཞི་ཁག་གཅིག་བུད་མེད་ཀྱིས་སྣེ་ཁྲིད་པ་ཆགས་ཀྱི་ཡོད།

རྒྱལ་སྤྱི་བུད་མེད་ཉིན་མོར་མཉམ་འབྲེལ་བུད་མེད་ལྷན་ཚོགས་ཀྱི་གསུང་བཤད་ནང་གནད་དོན་གང་འདྲ་ཞིག་ཡིན་རུང་ཐག་གཅོད་བྱ་རྒྱུའི་བརྒྱུད་རིམ་ནང་བུད་མེད་ཀྱི་ཆ་ཤས་ནི་ད་དུང་ཡང་ཉུང་ཉུང་ལས་མེད། གཞུང་འཛིན་པ་བུད་མེད་ཡིན་པའི་རྒྱལ་ཁབ་ ༢༡ ལས་མེད་པ་མ་ཟད། རྒྱལ་ཡོངས་གྲོས་ཚོགས་འཐུས་མིའི་གྲངས་འབོར་ནང་བུད་མེད་ཀྱི་བརྒྱ་ཆ་ ༢༥ མ་གཏོགས་མེད། ས་གནས་ཁག་གཅིག་ནང་དུས་ད་ལྟའང་སྐྱེས་པ་ཚོ་ལས་བུད་མེད་ཚོར་གླ་ཕོགས་ཉུང་བ་རགས་ཀྱི་ཡོད། མ་ཟད་གཉེན་རིམས་འདིས་རྐྱེན་པའི་ད་ཡོད་སྤྱི་ཚོགས་ནང་འདྲ་མཉམ་མེད་པའི་གནས་སྟངས་དེ་བཞིན་ཟབ་ཏུ་དང་ཛ་དྲག་ཏུ་ཕྱིན་ཡོད། གཉེན་རིམས་འདིར་གདོང་ལེན་གྱི་ལས་དོན་ཐོག་བུད་མེད་མང་བ་ཐོན་ཡོད་ཀྱང་། རྒྱལ་སྤྱིའི་ཏོག་དབྱིབས་གཉེན་རིམས་ ༡༩ དང་འབྲེལ་བའི་སྲིད་བྱུས་ཐོག་བུད་མེད་ཀྱི་ངོ་ཚབ་འདྲ་མཉམ་མེད། ལྷག་པར་དུ་བུད་མེད་ཚོར་གདོང་ལེན་གནང་དགོས་པའི་གནད་དོན་གསར་པ་ཁག་གཅིག་ཐོན་ཡོད། གཉེན་རིམས་འདི་དང་མཉམ་དུ་འཛམ་གླིང་ས་ཕྱོགས་གང་སར་བུད་མེད་དང་ན་ཆུང་བུ་མོ་ཚོར་དྲག་སྤྱོད་བྱེད་པའི་གནད་དོན་གྱི་གཙོས། ཁྱིམ་ཚང་ནང་དྲག་སྤྱོད་དང་ལས་མེད་དང་དབུལ་ཕོངས་ཀྱི་དཀའ་ངལ་ཇེ་མང་དུ་འགྲོ་བཞིན་ཡོད་པ་དེ་ཡང་གཉེན་རིམས་ལྟ་བུ་ཞིག་ཆགས་ཡོད། འཛམ་གླིང་ནང་ད་བར་བྱུང་མྱོང་མེད་པའི་ཡར་རྒྱས་རིམ་པ་འགྲོ་བཞིན་ཡོད་ཀྱང་། ད་བར་ཕོ་མོ་འདྲ་མཉམ་ཅན་གྱི་རྒྱལ་ཁབ་གཅིག་ཀྱང་ཐོན་ཐུབ་མེད་པ་རེད། ད་དུང་ཡང་བུད་མེད་གསུམ་ནས་བུད་མེད་གཅིག་ལ་ཕོ་མོ་དབྱེ་འབྱེད་ཀྱི་རྩུབ་སྤྱོད་བྱུང་གི་ཡོད། ང་ཚོ་ཚང་མའི་མཁྱེན་དགོས་པ་ཞིག་ལ་འགྲུལ་བསྐྱོད་བཀག་བསྡོམས་དང་སྒོ་རྒྱ་བདམས་པ་སོགས་ཏོག་དབྱིབས་གཉན་རིམས་ཁྱབ་བརྡལ་ཚོད་འཛིན་གྱི་ལམ་སྟོན་ཁག་གཅིག་གིས་བུད་མེད་ཚོར་ཉེན་ཁ་ཆེ་བ་བྱུང་བ་དེ་འདྲ་ཡང་བྱུང་ཡོད། གང་ལ་ཞུ་ན། བུད་མེད་མང་པོ་ཞིག་དྲག་སྤྱོད་བྱེད་མཁན་དང་མཉམ་དུ་དུས་ཡུན་རིང་པོ་ཞིག་འཁར་ཏེ་ལུས་ཀྱི་ཡོད། སྦྲུམ་མ་དང་ཕྲུ་གུ་བརྩས་རྒྱུ་ཙམ་མ་ཡིན་པར་བུད་མེད་ཀྱི་འཕྲོད་བསྟེན་ཞབས་ཞུའི་ལས་དོན་མང་པོ་ཞིག་བརྡབ་གསིག་ཕྱིན་པའི་རྐྱེན་གྱིས་དཀའ་ངལ་མང་དག་ཞིག་འཕྲད་ཡོད། ལས་འབུད་བཏང་བ་དང་ལས་མི་ཉུང་རུ་བཏང་བ་སོགས་ཀྱི་རྐྱེན་པའི་བུད་མེད་མང་པོའི་གླ་ཕོགས་ཉུང་རུ་ཕྱིན་པ་དང་གསོག་དངུལ་ཉུང་རུ་ཕྱིན་པ། དེ་བཞིན་ལས་ཀ་གཏན་པོ་མེད་པ་ཆགས་པ་སོགས་དཔལ་འབྱོར་ཐོག་གྱོང་གུན་ཆེན་པོ་ཕོག་བཅས་སེམས་ཚབ་ཆེན་པོ་དང་གལ་ཆེ་བརྩིས་ཏེ་གསུངས་ཡོད།

འདི་ག་ཚན་པ་ནས་རོགས་འབོད་འབྲེལ་མལ་བརྒྱུད་གོང་འཁོད་དཀའ་ངལ་ཕྲལ་རིགས་ལ་རོགས་སྐྱོར་དང་ལམ་སྟོན། དེ་བཞིན་དཀའ་ངལ་སེལ་ཐབས་སུ་ཞབས་ཞུ་ཞུས་དང་ཞུས་མུན་ཡིན། ཕྱི་ལོ་ ༢༠༢༡ ལོ་འདི་བཞིན་ས་ཕྱོགས་གང་སར་གནས་པའི་བུད་མེད་དང་ན་ཆུང་བུ་མོ་ཚོའི་ཆེད་དུ་བཟང་ཕྱོགས་ཀྱི་འགྱུར་བ་ཞིག་ཡོང་རྒྱུ་དང་ལོ་འདི་དོན་ཕན་ལྡན་པ་ཞིག་ཡོང་རྒྱུར་ཚང་མས་འབད་བརྩོན་གང་འོས་གནང་རོགས། ཞེས་བརྗོད་སོང་།

དེའི་རྗེས། སྲིད་སྐྱོང་མཆོག་གིས་བོད་ཀྱི་བུད་མེད་ཉིན་མོ་དང་འབྲེལ་བའི་ཐོག་གསུང་དོན། བུད་མེད་ལ་རང་བཞིན་གྱི་བྱམས་བརྩེ་ལྡན་པ་དང་། འགོ་ཁྲིད་སྐྱེད་སྲིང་ལེགས་པོ་བྱེད་ཐུབ་ཀྱི་རེད། ཅེས་༸གོང་ས་མཆོག་གིས་གསུང་གི་ཡོད་རེད། འཛམ་གླིང་ནང་དུ་ཏོག་དབྱིབས་ནད་དུག་གདོང་ལེན་བྱེད་མཁན་ཡག་ཤོས་ཀྱི་རྒྱལ་ཁབ་ཁག་གི་འགོ་ཁྲིད་རྣམས་ནི་བུད་མེད་རེད། ང་ཚོའི་སྤྱི་ཚོགས་ནང་དུའང་ཏོག་དབྱིབས་ནང་དུག་ཐོག་འགན་ཁུར་མཁན་འཕྲོད་བསྟེན་ལས་ཁུངས་ཆགས་ཡོིད། འཕྲོད་བརྟེན་ལས་ཁུངས་ཀྱི་ལས་བྱེད་བརྒྱ་ཆ་༧༠་བུད་མེད་ཆགས་ཡོད། བོད་མིའི་སྒྲིག་འཛུགས་ཀྱིས་ཏོག་དབྱིབས་ནད་དུག་གདོང་ལེན་བྱེད་སྟངས་དེ་རྒྱལ་ཁབ་གཞན་པ་དང་བསྡུར་ན་འདྲ་མཉམ་གནང་ཐུབ་པ་བྱུང་བར་བུད་མེད་ལས་བྱེད་གཙོས་ལས་བྱེད་རྣམས་ཀྱིས་འགན་ཁུར་ནས་བྱུང་བ་རེད། ཅེས་སོགས་བུད་མེད་རྣམས་ཀྱི་ཕྱག་ལས་ལ་རྗེས་སུ་ཡི་རངས་ཞུས་སོང་།

དེ་ནས། བོད་པའི་སྤྱི་ཚོགས་ནང་དུ་ཏོག་དབྱིབས་ནད་དུག་བྱུང་སྐབས། བུད་མེད་སྨན་པ་དང་སྨན་ཞབས་པ། དེ་བཞིན་ས་གནས་འགན་འཛིན། སྤྱི་ཚོགས་ཞབས་ཞུ་བ་སོགས་ཀྱིས་ལས་དོན་སྒྲུབ་ཕྱོགས་ཐོག་རང་ཉིད་ཀྱི་མྱོང་ཚོར་དྲ་ཐོག་ནས་འགྲེལ་བརྗོད་གནང་སོང་།

 

བོད་ཀྱི་ལོ་རྒྱུས་ཡིག་ཆ།