13
Tue, Apr

༢༠༢༠་ལོའི་ཟླ་༡༢་ཚེས་༡༠ཉིན། བོད་མིའི་སྒྲིག་འཛུགས་ཀྱིས་གཞུང་འབྲེལ་ཐོག་ནས་༸གོང་ས་མཆོག་ལ་ནོ་སྦེལ་ཞི་བདེའི་གཟེངས་ཕུལ་བའི་ཉིན་མོ་བརྩི་ཞུ་སྐབས།

བཙན་བྱོལ་གྱི་གསར་འགྱུར།
ཡིག་གཟུགས་སྒྲིག་ཆས།

༢༠༢༠་ལོའི་ཟླ་༡༢་ཚེས་༡༠ཉིན། བཞུགས་སྒར་རྡ་ས་གངས་སྐྱིད་སྲིད་སྐྱོང་ཚོགས་ཁང་ནང་དུ། བོད་མིའི་སྒྲིག་འཛུགས་ཀྱིས་གཞུང་འབྲེལ་ཐོག་ནས་༸གོང་ས་མཆོག་ལ་ནོ་སྦེལ་ཞི་བདེའི་གཟེངས་ཕུལ་བའི་ཉིན་མོ་བརྩི་ཞུས་སོང་། སྐབས་དེར། ད་ཆ་འཛམ་གླིང་ནང་འཚེ་བ་མེད་པ་དང་བྱམས་བརྩེ་ཞེས་ཐོས་མ་ཐག་ྋགོང་ས་མཆོག་གི་ཞལ་རས་ཡིད་ལ་ལྷམ་མེར་འཆར་བ་ཞིག་ཆགས་ཡོད་ཅིང་། ༸གོང་ས་མཆོག་གི་མཛད་འཕྲིན་ལ་བརྟེན་ནས་བོད་ཀྱི་བདེན་དོན་ལ་རྒྱལ་སྤྱིའི་ངོས་འཛིན་དང་རྒྱབ་སྐྱོར་ཡོད་པ་ཞིག་ཆགས་ཡོད། ཅེས་བཀའ་ཤག་གིས་གསུངས་སོང་།

དེ་ཡང་། ༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་འཛམ་གླིང་ནང་ཆེས་སྙན་གྲགས་ཅན་གྱི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས། མི་ངོ་ ༣༡ འཁོར་བའི་དུས་ཆེན་གྱི་མཛད་སྒོ་ནི་བཞུགས་སྒར་རྡ་ས་གངས་སྐྱིད་སྲིད་སྐྱོང་ཚོགས་ཁང་ནང་སྲུང་བརྩི་ཞུས་སོང་། མཛད་སྒོ་དེའི་ཐོག བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། ལྷན་ཁང་ཁག་གི་དྲུང་ཆེ་ཆུང་རྣམ་པ་བཅས་ལྷན་འཛོམས་གནང་འདུག

སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་བཀའ་ཤག་གི་གསུང་བཤད་གནང་སྐབས་གསུང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདས་པའི་མི་ལོ་ ༦༡ རིང་འཛམ་གླིང་ཞི་བདེ་དང་སྐྱེ་འགྲོ་སྤྱི་ལ་བདེ་སྐྱིད་བསྐྲུན་ཆེད་འཇིག་རྟེན་ཀུན་ཁྱབ་ཀྱི་འགན་ཁུར་དང་། ཆོས་དད་ཡོད་མེད་ཀུན་གྱིས་ཉམས་ལེན་བྱེད་ཐུབ་པའི་བྱམས་པ་དང་། སྙིང་རྗེ། བཟོད་བསྲན། གཞན་ཕན་སོགས་འགྲོ་བ་མིའི་བཟང་སྤྱོད་གོང་སྤེལ་མཛད་དང་མཛད་བཞིན་པ་ལ་བརྟེན་ནས། ད་ཆ་འཛམ་གླིང་ནང་འཚེ་བ་མེད་པ་དང་བྱམས་བརྩེ་ཞེས་ཐོས་མ་ཐག་ྋགོང་ས་མཆོག་གི་ཞལ་རས་ཡིད་ལ་ལྷམ་མེར་འཆར་བ་ཞིག་ཆགས་ཡོད་ཅིང་། ༸གོང་ས་མཆོག་གི་མཛད་འཕྲིན་དེ་དག་ལ་བརྟེན་ནས་བོད་ཀྱི་བདེན་དོན་ལ་རྒྱལ་སྤྱིའི་ངོས་འཛིན་དང་རྒྱབ་སྐྱོར་ཡོད་པ་ཞིག་ཆགས་ཡོད། ཅེས་གསུངས་སོང་།

གཞན་ཡང་དེ་རིང་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོའང་ཡིན་པ་བཞིན། འཛམ་གླིང་ཡུལ་གྲུ་ཕལ་མོ་ཆེར་སྨྲ་བརྗོད་དང་ཆོས་དད་རང་དབང་སོགས་འགྲོ་བ་མིའི་གཞི་རྩའི་ཐོབ་ཐང་རྣམས་ལོངས་སུ་སྤྱོད་བཞིན་ཡོད་ནའང་། བོད་ནང་བོད་མི་ཚོས་བོད་ཀྱི་ཐུན་མོང་མ་ཡིན་པའི་ཆོས་དང་། རིག་གཞུང་། སྐད་ཡིག ཁོར་ཡུག་སོགས་ཀྱི་ཐོག་ལ་ཉམས་པ་སླར་གསོ་མི་ཉམས་རྒྱུན་འཛིན་གྱི་ལས་དོན་སྤེལ་བ་དང་མངོན་འདོད་བཏོན་པ་ཙམ་གྱིས་རྡུང་རྡེག་དང་བཙོན་འཇུག་སོགས་བྱེད་བཞིན་ཡོད། བྱེད་བབས་དེ་དག་ནི་འགྲོ་བ་མིའི་ཐོབ་ཐང་བརྡལ་བཤིག་བཏང་བ་ཞིག་ཡིན་པ་མ་ཟད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་། མི་རིགས་ས་ཁུལ་རང་སྐྱོང་གི་བཅའ་ཁྲིམས་དང་འགལ་བ་ཞིག་ཆགས་ཡོད།

རྒྱ་ནག་གཞུང་གིས་རྒྱལ་ཁབ་ཀྱི་རྩ་ཁྲིམས་སོགས་རྡོག་རོལ་བཏང་ནས་དྲག་གནོན་ཇི་ཙམ་བྱས་ཀྱང་གཞིས་བཞུགས་བོད་མི་ཚོས་བོད་དོན་བདེན་མཐའ་གསལ་ཐབས་སུ་ད་བར་ཞི་བའི་ངོ་རྒོལ་མུ་མཐུད་གནང་ཡོད་པ་དང་། ལྷག་པར་དུ་ཕྱི་ལོ་ ༢༠༠༩ ནས་ད་བར་བོད་ནང་བོད་མི་ ༡༥༤ ཡིས་རང་ལུས་མེར་སྲེག་བཏང་སྟེ་ཞི་བའི་ངོ་རྒོལ་གནང་ཡོད། ཞི་རྒོལ་དེ་དག་གི་རྒྱུ་རྐྱེན་ནི། བོད་མི་རིགས་ཀྱི་ཆོས་དང་རིག་གཞུང་སྐད་ཡིག་བཅས་ཀྱི་གཞི་རྩའི་རང་དབང་ཐོག་བསམ་གཞིགས་རྩ་བ་ནས་མེད་པར་མཁྲེགས་འཛིན་དང་དྲག་གནོན་ཁོ་ནའི་སྒོ་ནས་ཉེས་མེད་བཙོན་འཇུག་དང་རྡུང་རྡེག་སོགས་བྱས་པ་ལ་བརྟེན་ནས་འུ་ཐུག་ཐབས་ཟད་ཀྱིས་རང་གི་ལུས་སྲོག་བློས་བཏང་གནང་ཡོད་པ་རེད།

རྒྱ་ནག་གཞུང་གིས་ད་བར་དུ་བོད་མིའི་མངོན་འདོད་སྟོན་པའི་ཞི་རྒོལ་དེ་དག་ཐད་ལ་དམ་བསྒྲགས་ཇེ་ཆེར་བཏང་བ་ལ་བརྟེན་ནས། གནས་ཚུལ་མང་པོ་ཤེས་རྟོགས་དཀའ་ནའང་ཉེ་ཆར་གནས་ཚུལ་ཐོན་གསལ་ལྟར། ཕྱི་ལོ་ ༢༠༡༩ ཟླ་ ༣ པའི་ནང་འབྲི་རུ་རྫོང་གི་གླུ་པ་ལྷུན་གྲུབ་གྲགས་པ་ལགས་ཀྱིས། ཞྭ་མོ་ནག་པོ། ཞེས་པའི་གླུ་གཞས་ནང་བོད་མིར་དམྱལ་བ་མི་ཡུལ་དུ་འཕོས་པ་ལྟ་བུའི་སྡུག་བསྔལ་ཆེ་ཞིང་། སོ་སོའི་སྐད་ཡིག་བཀོལ་སྤྱོད་ཀྱི་རང་དབང་བྲལ་ནས་བོད་སྐད་བརྗེད་ཉེན་བཅས་ཀྱི་གནད་དོན་བརྗོད་པ་ལ་ལོ་དྲུག་གི་དུས་བཀག་བཙོན་འཇུག་ཁྲིམས་ཆད་ཕོག་ཡོད། ཡང་ཉེ་ཆར་གནས་ཚུལ་འབྱོར་གསལ་ལྟར། རྔ་པ་རྫོང་དཀར་ཤུལ་སྡེ་པ་ནས་ཡིན་པའི་གྲྭ་རིན་ཆེན་ཚུལ་ཁྲིམས་ལགས་ཉེན་རྟོག་པས་བོད་དོན་ཆབ་སྲིད་ལ་འབྲེལ་བ་ཡོད་པར་བསྙད་ནས་འཛིན་བཟུང་བྱས་ཡོད། དེ་བཞིན་ཉིན་ཤས་སྔོན་ལ་རེབ་ཀོང་ནས་ཡིན་པའི་བོད་ནང་གི་སྙན་ངག་པ་གྲགས་ཅན་རོང་པོ་དགེ་འདུན་ལྷུན་གྲུབ་ལགས་རྒྱ་ནག་གཞུང་གིས་རྒྱུ་མཚན་གང་ཡིན་མ་བཤད་པར་གློ་བུར་དུ་འཛིན་བཟུང་བྱས་ཡོད་ཅིང་། ད་ལྟའི་ཆར་ཁོང་གི་སྐད་འཕྲིན་རྒྱབ་ལྗོངས་ཀྱི་གནས་ཚུལ་ཚང་མ་ལྟ་ཀློག་མ་ཐུབ་པ་ཞིག་ཆགས་ཡོད། གོང་གི་གནས་ཚུལ་དེ་དག་གི་ཐོག་ནས་བོད་ལ་རང་དབང་ཇི་ཙམ་ཡོད་མེད་ཀུན་གྱིས་མཁྱེན་ཐུབ། ཅེས་སོགས་གསུངས་སོང་།

མཛད་སྒོ་དེའི་ཐོག དཔལ་ལྡན་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་གནང་རྗེས། ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨ་ཇིཏ་ཀུ་མཱར་ནེཧ་རི་ཡ་ (Ajit Kumar Nehria) ལགས་ཀྱིས་གསུང་བཤད་གནང་སོང་།

གཞན་ལས་རིམ་ཁག་ནི། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་བོད་མིའི་སྤྱི་ཚོགས་ནང་འཕྲོད་བསྟེན་དང་འབྲེལ་བའི་སྲི་ཞུ་གནང་མཁན་ཞབས་ལོ་ ༢༥ ལོན་པའི་ལས་བྱེད་དྲུག་ལ་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་གཟེངས་བསྟོད་ལེགས་སྐྱེས་གནང་སོང་། དཔལ་ལྡན་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གིས་བོད་མིའི་སྒྲིག་འཛུགས་ཆོས་རིག་ལས་ཁུངས་ནས་ཕྱོགས་བསྡེབས་ཞུས་པ་དཔེ་དེབ་ཁག་ ༥ དབུ་འབྱེད་གནང་བ་དང་། སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ནས་༸རྒྱལ་བའི་བཀའ་དྲིན་རྗེས་དྲན་གྱི་ལོ་སྲུང་བརྩི་ཞུ་རྒྱུའི་ལས་རིམ་ཁོངས་དཔེ་དེབ་གཉིས་དབུ་འབྱེད་གནང་སོང་།

 

བོད་ཀྱི་ལོ་རྒྱུས་ཡིག་ཆ།