03
Wed, Mar

ཕྱི་ལོ་༢༠༢༡་ལོའི་ཟླ་༢་ཚེས་༢༣ཉིན། རྡ་སའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ནས། མགོ་མཇུག་འཆོལ་བའི་ཡར་རྒྱས་འཛུགས་སྐྲུན་ཏེ། བོད་ནང་དུ་རྒྱ་གཞུང་གིས་ཡར་རྒྱས་འཛུགས་སྐྲུན་བྱས་པའི་དཔྱད་ཞིབ་སྙན་ཐོ་ཞེས་པའི་དཔེ་དེབ་ཅིག་བཏོན་སོང་། སྙན་ཐོ་དེའི་ནང་དུ། བོད་ནང་དུ་རྒྱ་གཞུང་གིས་འཛུགས་སྐྲུན་གྱི་ལས་འཆར་བཙན་སྤེལ་བྱེད་པ་དང་། དེའི་དམིགས་ཡུལ་ནི་དམར་ཕྱོགས་གཞུང་གི་ཁེ་ཕན་དང་། ཆབ་སྲིད་ལས་དོན། བོད་རིགས་རྒྱ་སྒྱུར་བྱེད་ཐབས་སོགས་ཡིན་སྐོར་བརྗོད་འདུག

༢༠༢༡་ལོའི་ཟླ་༡་ཚེས་༢༥ཉིན། བཞུགས་སྒར་རྡ་ས་བོད་ཀྱི་གསོལ་མགྲོན་ཁང་གི་ཚོགས་ཁང་དུ། ལྔ་དང་ལྔ་བཅུའི་གཞོན་སྐྱེས་གླེང་སྟེགས་ཀྱིས་རང་ཅག་བོད་མིའི་གྲོས་ཚོགས་ནང་དུ་ཕྱི་རྒྱལ་ཡུལ་གྲུ་ཁག་གི་སྤྱི་འཐུས་ས་མིག་སྤར་དགོས་མིན་གྱི་ཞིབ་འཇུག་སྙན་ཐོ་ཞིག་བཏོན་ནས། བོད་མི་༤༠༠༠ལྷག་ལས་བརྒྱ་ཆ་ ༧༥ ཡིས་ཕྱི་རྒྱལ་ཡུལ་གྲུ་ཁག་གི་ནང་དུ་སྤྱི་འཐུས་ས་མིག་སྤར་དགོས་པར་རྒྱབ་སྐྱོར་གནང་འདུག་ཅེས་གསར་འགོད་གསལ་བསྒྲགས་ཤིག་སྤེལ་སོང་།

༢༠༢༡་ལོའི་ཟླ་༡་ཚེས་༣ཉིན། བཞུགས་སྒར་རྡ་སའི་བོད་མི་རྣམས་ཀྱིས་༢༠༢༡་ལོའི་བཙན་བྱོལ་བོད་མིའི་སྲིད་སྐྱོང་དང་སྤྱི་འཐུས་ཀྱི་སྔོན་འགྲོའི་འོས་འཕངས་སོང་། སྐབས་དེར་བཙན་བྱོལ་བོད་མིའི་མང་གཙོ་ནི་རྒྱལ་སྤྱིའི་ཐོག་མང་གཙོའི་རྒྱལ་ཁབ་ཁག་དང་དཔུང་པ་མཉམ་གཤིབས་བྱས་ནས་འགྲོ་ཐུབ་ཀྱི་ཡོད་པ་མ་ཟད། འདི་ནི་ངོམས་སུ་ཆོག་པ་དང་། གཟི་བརྗིད་དང་ལོ་རྒྱུས་ལྡན་པ་ཞིག་རེད། ཅེས་སྲིད་སྐྱོང་མཆོག་གིས་གསུངས་སོང་།

༢༠༢༠་ལོའི་ཟླ་༡༢་ཚེས་༡༠་ཉིན། རྗེ་ཙོང་ཁ་པ་ཆེན་པོའི་དགོངས་རྫོགས་ཀྱི་ཉིན་མོར། ༸གོང་ས་མཆོག་གིས་བཞུགས་སྒར་རྡ་སའི་རྒྱལ་བའི་ཕོ་བྲང་ནས། བོད་ནང་གི་བོད་མི་ཚོས་ངོས་ལ་ཡིད་ཆེས་དང་དད་པ་ཤིན་ཏུ་བྱེད་ཅིང་། ངོས་རང་བོད་མི་རྣམས་ཀྱི་བླ་སྲོག་སྟེ། དད་མོས་འཛིན་མཁན་དེ་ཆགས་ཡོད་དུས། ཁོ་ཚོར་བསམ་བློ་བཏང་ན་ངོས་ཚེ་རིང་པོར་འདུག་དགོས་བསམ་པ་བྱུང་། ཕལ་ཆེར་ལོ་བརྒྱ་དང་བཅུ་གྲངས་སྡོད་རྒྱུ་གཏན་ཁེལ་འདྲ་འདུག ངོས་ཀྱིས་རྟག་པར་སྨོན་ལམ་འདེབས་བཞིན་ཡོད། ཁྱོད་ཚོས་ཀྱང་དེ་ལྟར་སྨོན་ལམ་བརྒྱབ་ཤོག ཅེས་གསུངས་སོང་།

༢༠༢༡་ལོའི་ཟླ་༡་ཚེས་༢༡ཉིན། བཞུགས་སྒར་རྡ་ས་ནས་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་ནས་གཞིས་བྱེས་བོད་མི་ཡོངས་དང་། སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་། ཨ་རིའི་སྲིད་འཛིན་གསར་པ་ཇོར-བྷ་ཌན(Joe Biden)་དང་སྲིད་འཛིན་གཞོན་པ་ཀཱ་མཱ་ལཱ-ཧཱ་རིས(Kamala Harris)་གཉིས་ཀྱིས་ལས་ཁུར་དམ་འབུལ་ཞུས་པར་འཚམས་འདྲི་གནང་འདུག

༢༠༢༠་ལོའི་ཟླ་༡༢་ཚེས་༡༠ཉིན། བོད་མིའི་སྒྲིག་འཛུགས་ཀྱིས་གཞུང་འབྲེལ་ཐོག་ནས་༸གོང་ས་མཆོག་ལ་ནོ་སྦེལ་ཞི་བདེའི་གཟེངས་ཕུལ་བའི་ཉིན་མོ་དང་འགྲོ་བ་མིའི་ཐོབ་ཐང་ཉིན་མོ་སྲུང་བརྩི་ཞུ་སྐབས། གཞིས་ལུས་བོད་མིའི་ཞུམ་པ་མེད་སྙིང་སྟོབས་ལ་བསྔགས་བརྗོད་དང་ཁོང་ཚོའི་མངོན་འདོད་དང་བདེ་སྡུག་བཙན་བྱོལ་བོད་མི་རྣམས་ཀྱིས་ནམ་ཡང་བརྗེད་ཐབས་མེད་པའི་ཐོག་ཉི་མ་སྤྲིན་པའི་འོག་ནས་དྭངས་བའི་དུས་ཤིག་མགྱོགས་མྱུར་ཤར་བར་འབད་བརྩོན་མུ་མཐུད་བྱ་རྒྱུའི་ཆོད་སེམས་བརྟན་པོ་ཡོད། ཅེས་སྤྱི་འཐུས་ཚོགས་གཙོ་མཆོག་གིས་གསུངས་སོང་།

༢༠༢༠་ལོའི་ཟླ་༡༢་ཚེས་༡༠ཉིན། བཞུགས་སྒར་རྡ་ས་གངས་སྐྱིད་སྲིད་སྐྱོང་ཚོགས་ཁང་ནང་དུ། བོད་མིའི་སྒྲིག་འཛུགས་ཀྱིས་གཞུང་འབྲེལ་ཐོག་ནས་༸གོང་ས་མཆོག་ལ་ནོ་སྦེལ་ཞི་བདེའི་གཟེངས་ཕུལ་བའི་ཉིན་མོ་བརྩི་ཞུས་སོང་། སྐབས་དེར། ད་ཆ་འཛམ་གླིང་ནང་འཚེ་བ་མེད་པ་དང་བྱམས་བརྩེ་ཞེས་ཐོས་མ་ཐག་ྋགོང་ས་མཆོག་གི་ཞལ་རས་ཡིད་ལ་ལྷམ་མེར་འཆར་བ་ཞིག་ཆགས་ཡོད་ཅིང་། ༸གོང་ས་མཆོག་གི་མཛད་འཕྲིན་ལ་བརྟེན་ནས་བོད་ཀྱི་བདེན་དོན་ལ་རྒྱལ་སྤྱིའི་ངོས་འཛིན་དང་རྒྱབ་སྐྱོར་ཡོད་པ་ཞིག་ཆགས་ཡོད། ཅེས་བཀའ་ཤག་གིས་གསུངས་སོང་།

More Articles ...

བོད་ཀྱི་ལོ་རྒྱུས་ཡིག་ཆ།