༸གོང་ས་མཆོག་གིས་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་སློབ་དེབ་དབུ་འབྱེད་གནང་འདུག

དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་ལྡི་ལི་མངའ་སྡེའི་སྤྱི་ཁྱབ་བློན་ཆེན་གཞོན་པ་དང་ཤེས་རིག་བློན་ཆེན་གཅིག་ལྕོགས་སྐུ་ཞབས་མན་ཎི་ཤི་སི་སོ་ཌི(Manish Sisodia) མཆོག་དང་། བྱིས་པའི་ཐོབ་ཐང་འཐབ་རྩོད་པ་ནོ་ལྦེལ་ཞི་བདེའི་གཟེངས་རྟགས་བཞེས་མྱོང་མཁན་རྒྱ་གར་བ་སྐུ་ཞབས་ཀེ་ལ་ཤི་སཏྱཱརཐི་མཆོག ཨེ་མོ་རི་གཙུག་ལག་སློབ་གྲྭའི་སློབ་དཔོན་ཆེན་མོ་བློ་བཟང་བསྟན་འཛིན་ནེ་གི་ལགས། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག ཤེས་རིག་བཀའ་བློན་པདྨ་དབྱངས་ཅན་མཆོག ཤེས་ཡོན་སློབ་སྟོན་པ། དཔལ་ས་སྐྱའི་སྐྱབས་མགོན་གོང་མ་ཕུན་ཚོགས་ཕོ་བྲང་གི་གདུང་སྲས་སྐྱབས་རྗེ་ཨ་བི་ཀྲྀ་ཏ་བཛྲ་རིན་པོ་ཆེ་མཆོག དགོན་སྡེ་གྲྭ་ཚང་ཁག་གི་མཁན་པོ་དང་ལས་ཚབ། རྒྱ་གར་གྱིས་གཙོས་འཛམ་གླིང་རྒྱལ་ཁབ་ཁག་ ༣༧ ནས་སློབ་གྲྭ་ཁག་གི་སྐུ་ཚབ་དང་། སྤྱི་ཚོགས་ཞབས་ཞུ་བ། ཤེས་ཡོན་དང་འབྲེལ་བའི་ཚོགས་པ་ཁག་གི་སྐུ་ཚབ་སོགས་ཁྱོན་མི་གྲངས་ ༡༣༠༠ ལྷག་ལྷན་འཛོམས་ཀྱིས་ཐོག་མར་གོ་སྒྲིག་ཚོགས་ཆུང་གི་འབྲེལ་ཡོད་རྣམས་ནས་ཕེབས་བསུའི་གསུང་བཤད་གནང་གྲུབ་མཚམས་བློ་བཟང་བསྟན་འཛིན་ནེ་གི་ལགས་ཀྱིས་ངོ་སྤྲོད་གསུང་བཤད་གནང་།

དེ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་ཆེན་པོ་མཆོག་གིས་སཱི་(See)ཤེས་ཡོན་སློབ་གསོའི་བསླབ་གཞི་དབུ་འབྱེད་མཛད། དེ་རྗེས་ལྡི་ལི་མངའ་སྡེའི་སྤྱི་ཁྱབ་བློན་ཆེན་གཞོན་པ་མཆོག་དང་། ནོ་ལྦེལ་ཞི་བདེའི་གཟེངས་རྟགས་བཞེས་མྱོང་མཁན་རྒྱ་གར་བ་སྐུ་ཞབས་ཀེ་ལཤི་སཏྱཱརཐི་མཆོག་བཅས་ཀྱིས་གསུང་བཤད་གནང་གྲུབ་མཚམས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།

ཀུར་འོས་ཆོས་གྲོགས་ཕོ་མོ་རྣམ་པ། ངོས་རང་ཉིད་ཀྱང་འགྲོ་བ་མི་འཐེར་འབུམ་བདུན་ཡོད་ཁོངས་ནས་གཅིག་ཡིན། དེར་བརྟེན་འགྲོ་བ་མི་རིགས་སྤྱིའི་བདེ་ཐབས་ལ་དམིགས་ནས་ལྷན་ཚོགས་འདི་ལྟ་བུར་བཅར་རྒྱུ་བྱུང་བར་ཧ་ཅང་དགའ་པོ་བྱུང་། འཛམ་གླིང་ཆགས་རྗེས་རིམ་བཞིན་སྲོག་ཆགས་ཐོག་མར་བྱུང་སྐབས་ནུ་ཞོའི་སེམས་ཅན་ཁྲོད་རྙོག་གྲ་མང་ཤོས་བཟོ་མཁན་མི་ཆགས་ཡོད། སྤྱིར་སྲོག་ཆགས་གཞན་ཚོར་ཡང་རང་གཅེས་འཛིན་གྱི་བསམ་བློར་བརྟེན་པའི་ཆགས་སྡང་གི་བློ་ཡོད། སྐབས་རེ་རླུང་ལངས་ནས་གནོད་འཚེ་ཕྲན་བུ་བྱེད་རེས་བྱེད་ཀྱི་ཡོད། ང་ཚོ་འགྲོ་བ་མིར་མཚོན་ན་མིའི་རྣམ་དཔྱོད་ལ་བརྟེན་ནས་གནོད་འཚེ་ཧ་ཅང་ཆེན་པོ་བཟོ་བཞིན་ཡོད། འོན་ཀྱང་རྣམ་དཔྱོད་དེ་ལ་བརྟེན་ནས་རླབས་ཆེན་གྱི་བྱ་བ་མང་པོ་ཞིག་བསྒྲུབ་ཐུབ་བཞིན་ཡོད།

ངོས་ཀྱིས་གོང་དུ་བརྗོད་མ་ཐག་པ་ལྟར་གལ་ཏེ་མིའི་རྣམ་དཔྱོད་དེ་བེད་སྤྱོད་ལོག་པ་བཏང་བ་ཡིན་ན་གཏོར་བཤིག་ཚབས་ཆེན་བྱེད་ཐུབ། གཞི་རྩའི་མིའི་ལྷན་སྐྱེས་རང་བཞིན་དེ་བྱམས་བརྩེ་དང་ལྡན་པ་རེད། ཧ་ཅང་ཡག་པོ་ཡོད། དཔེ་མཚོན་ཞིག་བཞག་པ་ཡིན་ན། ངོས་ཀྱི་དཔའ་བོ་འདིར་ཕེབས་པ་སྐུ་ཞབས་རི་ཆཌ་མོར་ཁོང་བྱང་ཕྱོགས་ཨ་ཡིར་ལེན་དུ་ཆུང་དུས་ཨིན་ཇིའི་དམག་མི་ཞིག་གིས་ཟིང་འཁྲུག་ཞི་འཇགས་ཆེད་འགྱིག་མདེལ་བརྒྱབ་སྟེ་མིག་གཉིས་ཀ་ཞར་བ་རེད། དྲན་པ་གསོས་སྐབས་ཁོང་གི་བསམ་བློ་ཐོག་མ་དེ་ཞེ་སྡང་དང་འཁོན་སེམས་མིན་པར་རང་ཉིད་ཀྱི་ཨ་མ་ལགས་ཀྱི་ཞལ་རས་མཇལ་ཐུབ་ཀྱི་མ་རེད་བསམས་པའི་བསམ་བློ་འཁོར་འདུག ངོ་མཚར་ལྡན་པ་རེད། ངོ་མཚར་ལྡན་པ་རེད། རང་ཉིད་ཞར་བ་བཟོ་མཁན་ཨིན་ཇིའི་དམག་མི་དེར་འཁོན་འཛིན་ནམ་ཡང་བཅངས་མེད། མཐར་ཁོང་གཉིས་བློས་ཐུབ་གྱི་གྲོགས་པོ་ཆགས་ཐུབ་ཡོད། དེས་གང་མཚོན་བཞིན་ཡོད་པ་ཇེ་ན་འགྲོ་བ་མིའི་གཞི་རྩའི་རང་བཞིན་དེ་བྱམས་བརྩེའི་རང་བཞིན་ཡིན་པ་གསལ་པོར་མཚོན་པ་རེད།

དེང་སྐབས་ཚན་རིག་པ་ཚོས་ཀྱང་འགྲོ་བ་མིའི་གཞི་རྩའི་ལྷན་སྐྱེས་རང་བཞིན་དེ་བྱམས་བརྩེ་ལྡན་པ་ཡིན་སྐོར་བཤད་ཀྱི་ཡོད། ང་ཚོ་སྤྱི་ཚོགས་ལ་བརྟེན་པའི་སེམས་ཅན་རེད། རང་ཉིད་འཚོ་བར་གཞན་གྱི་བྱམས་བརྩེ་མཐའ་གཅིག་ཏུ་བརྟེན་དགོས་པ་རེད། ཐོག་མར་ཆུང་བྱིས་པའི་དུས་སུ་མའི་བྱམས་བརྩེར་བརྟེན་དགོས་པ་དང་། ན་ཚོད་ཡར་རྒས་སྐབས་གྲོགས་པོ་གྲོགས་མོའི་བྱམས་བརྩེའི་འབྲེལ་བར་བརྟེན་དགོས། གོང་དུ་གསུང་བཤད་གནང་བ་ལྟར་ཕྲུ་གུ་ཚོར་ཤེས་ཡོན་སློབ་སྦྱོང་སྤྲོད་འགོ་འཛུགས་སྐབས་བཟང་སྤྱོད་དེ་དག་ཐོག་དོ་སྣང་གང་ཡང་བྱེད་ཀྱི་མེད། དེང་དུས་ཤེས་ཡོན་དེ་གཙོ་བོ་ཕྱི་དངོས་པོའི་མཐུན་རྐྱེན་གོང་འཕེལ་གཏོང་ཐབས་ལ་དམིགས་བཞིན་ཡོད། དེར་བརྟེན་བྱིས་པར་ལྷན་སྐྱེས་སུ་ཡོད་པའི་བྱམས་བརྩེའི་བསམ་བློ་དེ་རིམ་བཞིན་བག་ལ་ཉལ་བའི་ཚུལ་དུ་གནས་བཞིན་ཡོད། ལྷན་སྐྱེས་སུ་ཡོད་པའི་བྱམས་བརྩེའི་བློ་དེ་བག་ལ་ཉལ་བའི་ཚུལ་དུ་གནས་ནས་ཕྱི་དངོས་པོའི་མཐོན་རྐྱེན་ལ་དང་དོད་ཤུགས་ཆེན་བྱས་པར་བརྟེན།

འདོད་ཡོན་སྒྲུབ་ཆེད་མིའི་ཕུལ་བྱུང་གི་རྣམ་དཔྱོད་ཚུལ་དང་མི་མཐུན་པའི་སྒོ་ནས་བེད་སྤྱོད་བྱས་ནས་གཏོར་བཤིག་ཚབས་ཆེན་བཟོ་བཞིན་ཡོད། མིའི་རྣམ་དཔྱོད་དེ་སྨོན་ལམ་བརྒྱབ་ནས་ལེགས་པའི་ཆ་ཞིག་བཟོ་མི་ཐུབ། རྒྱུ་མཚན་ལ་བརྟེན་ནས་རྣམ་དཔྱོད་དེ་ལེགས་པའི་ཆ་ཞིག་ཏུ་འགྱུར་ཐུབ། ཐོག་མར་རིགས་་པའི་ལམ་ནས་དཔྱད་པ་བྱས་ཏེ་ཉོན་མོངས་དང་འབྲེལ་བའི་ཚུལ་མིན་གྱི་བློ་དེ་དག་ལ་གཉེན་པོ་བསྟེན་ཐུབ། འཕྲལ་སེལ་ཆགས་སྡང་གི་བློ་དེ་དག་གིས་རང་ཉིད་སྲུང་སྐྱོབ་བྱས་པ་ལྟ་བུར་སྣང་ཡང་དོན་དངོས་སུ་ཉོན་མོངས་པའི་བློ་དེ་དག་གིས་རང་ཉིད་ཕུང་ལ་སྦྱར་རྒྱུ་རེད། མིའི་རྣམ་དཔྱོད་ལ་བརྟེན་ནས་བསམ་བློ་ཡི་ལེགས་ཉེས་དབྱེ་འབྱེད་བྱེད་ཐུབ་པ་མ་ཟད། འཕྲལ་དང་ཕུགས་ཀྱི་ཁེ་ཕན་ཡང་གསལ་པོར་རྟོགས་ཐུབ། དེར་བརྟེན་མིའི་རྣམ་དཔྱོད་ལ་བརྟེན་ནས་ཕྱོགས་ཡོངས་ཀྱི་གནས་ཚུལ་རྟོགས་ཐུབ། མིའི་རྣམ་དཔྱོད་ལ་བརྟེན་ནས་དངོས་ཡོད་གནས་ཚུལ་རྟོགས་ཐུབ་པ་ལས་ཉོན་མོངས་པའི་གཞན་དབང་དུ་སོང་བའི་བློ་དེས་དངོས་ཡོད་གནས་ཚུལ་རྟོགས་མི་ཐུབ།

དཔེར་ན་ཁོང་ཁྲོའི་བློ་སྐྱེ་སྐབས་འཕྲལ་ཙམ་མ་གཏོགས་ཕུགས་རྒྱང་རིང་པོའི་བསམ་བློ་འཁོར་མི་ཐུབ། ལྷག་པར་དེང་སྐབས་ཚད་རྡུལ་དངོས་ཁམས་རིག་པ་དང་རྒྱ་གར་གནའ་རབས་ཀྱི་ལྟ་གྲུབ་དེ་དག་ལས་ཀྱང་ཁོང་ཁྲོའི་གཞན་དབང་དུ་གྱུར་བའི་བློ་དེར་གཞན་མི་སྡུག་པ་མཐོང་སྐབས་དེ་འདྲའི་མི་སྡུག་པའི་ཆ་ཤས་བརྒྱ་ཆ་བརྒྱ་ནས་དགུ་བཅུ་རྣམ་རྟོག་གིས་སྒྲོ་བཏགས་པ་ལས་བྱུང་སྐོར་གསུང་ཡོད། རྣམ་དཔྱོད་ དེས་བརྟག་དཔྱད་ཡག་པོ་བྱས་པ་ཡིན་ན་ཁོང་ཁྲོ་ལངས་པའི་སྐབས་མི་སྡུག་པའི་ཆོས་ཇི་ལྟར་སྣང་བ་ལྟར་གྲུབ་མེད་པ་དེ་གསལ་རྟོགས་ཐུབ་རྒྱུ་རེད། ཤེས་ཡོན་ལ་བརྟེན་ནས་མིའི་རྣམ་དཔྱོད་དང་བྱམས་བརྩེ་ཟུང་འབྲེལ་ཐོག་ནས་བསམ་བློ་ཇེ་བཟང་དུ་གཏོང་རྒྱུ་ཧ་ཅང་གལ་ཆེན་པོ་རེད། དེར་བརྟེན་དེ་རིང་ཨེ་མོ་རི་མཐོ་སློབ་ཀྱིས་གཙོས་འབྲེལ་ཡོད་ཚོས་འགན་ཁུར་གནང་བར་ཡི་རང་བསྔགས་བརྗོད་ཞུ་རྒྱུ་ཡིན། ཞེས་སོགས་ཀྱི་བཀའ་སློབ་སྩལ་འདུག

གཞན་ཡང་ཁ་སང་ཟླ་༤་པའི་ཚེས་༤་ཉིན་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་ཁྱིམ་མཚེས་རྒྱལ་ཁབ་ཨ་ཧྥི་གྷན་ན་སི་ཐན་དང་བྷང་ལ་ཌེ་ཤི། བལ་ཡུལ། འབྲུག མལ་དིབ་ཧྥུ། པ་ཀི་སི་ཐན། ཤྲི་ལངྐཱ་སོགས་ཡོངས་གྲགས་སུ་ SAARC ཞེས་པའི་ཨེ་ཤི་ཡའི་མཐུན་ཚོགས་རྒྱལ་ཁབ་ཁག་ནས་ཚོགས་འདུར་འཛུལ་ཞུགས་གནང་མཁན་གྱི་སློབ་ཕྲུག་རྣམས་ལ་བཀའ་སློབ་སྩལ་རྗེས་གསར་འགོད་ལྷན་ཚོགས་དབུ་འཛུགས་ཀྱིས་ཐོག་མར་སྐུ་ཞབས་ Bren dan Ozawa de Silva ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་འོག་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་བསླབ་གཞི་གཏན་འབེབས་གནང་བའི་རྒྱུད་རིམ་ངོ་སྤྲོད་གནང་འདུག

དེ་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཤེས་ཡོན་སློབ་སྟོན་པ་དང་། གསར་འགོད་པ་བཅས་ལ་བཀའ་སློབ་སྩལ་དོན། བྱམས་བརྩེས་ཕོངས་པའི་མི་སྡེའི་སྤྱི་ཚོགས་བདེ་སྐྱིད་ལྡན་པ་ཞིག་ཡོང་ཐུབ་ཐབས་མེད། དེར་བརྟེན་དེང་དུས་ཀྱི་ཤེས་ཡོན་ལམ་ལུགས་ནང་བྱམས་བརྩེའི་སློབ་གསོ་ངེས་པར་དུ་དགོས། འཛམ་གླིང་ནང་དཀའ་ངལ་མང་པོ་ཞིག་མིས་བཟོས་པ་རེད། དཀའ་ངལ་དེ་དག་མིག་རྒྱང་ཐུང་ཐུང་དང་། ཉོན་མོངས་པའི་གཞན་དབང་དུ་སོང་བར་བརྟེན་ནས་ཡོང་བ་ཞིག་རེད། དེ་འདྲ་ཡིན་སྟབས་སྨོན་ལམ་བརྒྱབ་པ་ཙམ་གྱིས་དཀའ་ངལ་སེལ་རྒྱུ་ཟེར་བ་ཡོང་ཐབས་མེད། བྱ་བ་བཟང་ངན་ཇི་འདྲ་ཞིག་ཡིན་ཡང་གཙོ་བོ་ཀུན་སློང་ལ་རག་ལས་ཡོད། ཀུན་སློང་དེ་གཙོ་བོ་ཡིན་སྟབས་དུས་རབས་འདི་འཚེ་མེད་ཞི་བ་དང་བྱམས་བརྩེའི་དུས་རབས་ཤིག་བཟོ་མིན་མིའི་ཀུན་སློང་ལ་རག་ལས་ཡོད། ཤེས་ཡོན་གྱི་ལམ་ནས་མིའི་ཀུན་སློང་ཇེ་བཟང་དུ་བཏང་ཐུབ་པ་ཡིན་ན་སྤྱི་ཚོགས་ལ་བཟང་ཕྱོགས་ཀྱི་འགྱུར་བ་གཏོང་ཐུབ། ཅེས་སོགས་ཀྱི་བཀའ་སློབ་སྩལ་འདུག

བོད་མིའི་སྒྲིག་འཛུགས་ཀྱི་དྲ་ཚིགས་ལས་བླངས།