སྲིད་སྐྱོང་མཆོག་གིས་ཨ་རིའི་གྲོས་ཚོགས་འཐུས་མིར་ཐུག་འཕྲད་གནང་།

དེ་ཡང་ཟླ་འདིའི་ཚེས་༡༣ ཉིན་ཨ་རིའི་རྒྱལ་ས་ཝ་ཤིན་ཊོན་དུ་རྟེན་གཞི་བྱས་པའི་ཨ་རིའི་རྒྱལ་ཡོངས་མང་གཙོ་ཁྱབ་སྤེལ་ལྟེ་གནས་ཁང་གིས་གོ་སྒྲིག་འོག་བོད་དོན་དང་རྒྱུད་གཅིག་ལམ་གཅིག་གི་འཛུགས་སྐྲུན་ལས་འཆར་གྱི་བརྗོད་གཞི་དང་། འདས་པའི་ལོ་ངོ་༦༠་རིང་བོད་ནང་གི་བོད་མི་ཚོས་མྱངས་པའི་མྱོང་བའི་སྐོར་གསུང་བཤད་གནང་ཡོད་དང་། གཞན་ཡང་རྒྱ་རིགས་ཁག་ཅིག་དང་ཐུག་ནས་མཉམ་དུ་གླེང་མོལ་བྱས་ཡོད་འདུག

དེ་ནས་སྲིད་སྐྱོང་མཆོག་གིས་རྒྱ་ནག་གཞུང་གིས་རྒྱུད་གཅིག་ལམ་གཅིག་གི་འཛུགས་སྐྲུན་ལས་འཆར་བརྒྱུད་འཛམ་གླིང་ཡུལ་གྲུ་འདྲ་མིན་ནང་འཛུགས་སྐྲུན་ལས་གཞི་འགོ་བཙུགས་ཡོད་པ་དང་། རྒྱ་ནག་གཞུང་གི་ལས་འཆར་དེ་དང་འབྲེལ་བ་བྱེད་མཁན་རྒྱལ་ཁབ་དེ་དག་གིས་བོད་ཀྱི་ཉམས་མྱོང་དང་ལོ་རྒྱུར་སློབ་སྦྱོང་བྱེད་ནས་རྒྱ་གཞུང་གི་སྲིད་ཇུས་གཟབ་གཟབ་གནང་དགོས་པའི་སྐུལ་མ་བཏང་འདུག

དེ་རྗེས་དཔལ་ལྡན་སྲིད་སྐྱོང་མཆོག་གིས་ཨ་རིའི་གྲོས་ཚོགས་འཐུས་མི་དང་བོད་དོན་རྒྱབ་སྐྱོར་བ་སྐུ་ཞབས་ཇིམ་མེག་གྷོ་ཝན་(Jim McGovern) མཆོག་གིས་གཙོས་གནད་ཡོད་མི་སྣ་ཁག་ལ་ཐུག་འཕྲད་ཀྱིས་བོད་ནང་ཕར་འགྲོ་ཚུར་འོང་གི་གོ་སྐབས་འདྲ་མཉམ་གྱི་ཁྲིམས་འཆར་དེ་ཨ་རིའི་གྲོས་ཚོགས་གོང་མ་ནས་རྒྱབ་སྐྱོར་གནང་དགོས་པའི་འབོད་སྐུལ་དང་། བོད་དོན་དང་བོད་མི་ཚོར་མུ་མཐུད་རྒྱབ་སྐྱོར་ཤུགས་ཆེ་གནང་དགོས་པའི་སྐོར་གསུང་སྐབས། ཁོང་རྣམ་པས་མུ་མཐུད་བོད་ནང་གི་འགྲོ་བ་མིའི་ཐོབ་ཐང་དང་རང་དབང་གོང་མཐོར་གཏོང་ཆེད་རྒྱབ་སྐྱོར་གནང་རྒྱུ་ཡིན་པའི་ཁས་ལེན་གནང་འདུག

དེ་ནས་ཨ་རིའི་རྒྱལ་ས་ཝ་ཤིང་ཊོན་དུ་སྐུ་ཚབ་དོན་ཁང་གི་གོ་སྒྲིག་འོག་རྒྱ་རིགས་བོད་དོན་རྒྱབ་སྐྱོར་བ་ཁག་གཅིག་ལ་གསོལ་ཚིགས་གོ་སྒྲིག་གནང་འདུག སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་སྐུ་མགྲོན་དུ་ཕེབས་ཡོད་འདུག འདུ་འཛོམས་ཐོག་རྒྱ་རིགས་མང་གཙོ་དོན་གཉེར་བ་དང་། གསར་འགྱུར་ཚན་པ་གྲགས་ཆེ་བ་ཁག་གཅིག་གི་ལས་བྱེད་དང་འགན་འཛིན། དེ་བཞིན་རྒྱ་རིགས་གཞོན་སྐྱེས་སོགས་ཁྱོན་མི་གྲངས་ ༤༠ ཕེབས་འདུག་པ་མ་ཟད། རྒྱལ་སའི་མངའ་ཁུལ་གྱི་བོད་རིགས་སྤྱི་མཐུན་ཚོགས་པ་དང་། ས་གནས་གཞོན་ནུ་ཚོགས་པ། གསར་འགྱུར་ཚན་པའི་ལས་བྱེད་སོགས་ཁྱོན་བོད་མི་ ༡༥ ལྷག་ཙམ་ནང་མཉམ་ཞུགས་གནང་འདུག

སྲིད་སྐྱོང་མཆོག་གིས་སྐབས་དེར་ཉེ་ལམ་སུད་སི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྷན་ཁང་ནང་དུ། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་དུས་བཀག་བསྐྱར་ཞིབ་ PRC ཐེངས་གསུམ་པ་དེ་འགོ་མ་ཚུགས་གོང་ཉིན་གསུམ་གྱི་སྔོན་ཏེ། ཕྱི་ཟླ་ ༡༡ ཚེས་ ༣ ཉིན་བོད་མིའི་སྒྲིག་འཛུགས་དང་། སུད་སི་སྐུ་ཚབ་དོན་ཁང་གཉིས་ཀྱི་གོ་སྒྲིག་འོག་གྲོང་ཁྱེར་ཇི་ནི་ཝའི་ནང་དུ། ཇི་ནི་ཝའི་གླེང་སྟེགས་ ༢༠༡༨ Geneva Forum 2018 ཞེས་པའི་ཐོག་བོད་དང་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་འགྲེལ་བརྗོད་གནང་བའི་སྐོར་ངོ་སྤྲོད་གནང་བ་དང་།

ལྷག་པར་ཆོལ་གསུམ་བོད་མིའི་ཞུམ་པ་མེད་པའི་སྙིང་སྟོབས་ལ་བསྔགས་བརྗོད་དང་སྦྲགས། འབྱུང་འགྱུར་བོད་དོན་བདེན་མཐའ་མ་གསལ་བར་བོད་མི་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་འོག་ཤར་བསྐྱོད་གནང་སྟེ། བོད་རྒྱ་གཉིས་སྨན་གྱི་དབུ་མའི་ལམ་གྱི་སྲིད་བྱུས་རྒྱུན་སྐྱོང་དགོས་པའི་སྐོར་དང་། རྒྱ་ནག་ནང་ལ་མཚོན་ནའང་དཀའ་སྡུག་མྱོང་བཞིན་པའི་རྒྱ་མི་རིགས་ཡོངས་ནས་ཀྱང་། རྒྱ་ནག་ནང་དུ་མང་གཙོ་དང་འགྲོ་བ་མིའི་ཐོབ་ཐང་སྲུང་སྐྱོབ་ཐུབ་པའི་ཐུན་མོང་གི་དམིགས་ཡུལ་དེ་དག་བསྒྲུབ་ཆེད་མཉམ་རུབ་དགོས་གལ་དང་། སེམས་ཤུགས་མ་ཆག་པར་འབད་བརྩོན་མུ་མཐུད་ཐུབ་པ་ཡིན་ན་བོད་ནང་དུ་བོད་མིའི་རང་དབང་བསྐྱར་གསོ་ཐུབ་རྒྱུ་མ་ཟད། རྒྱ་ནག་ནང་དུའང་མང་གཙོ་དང་རང་དབང་། འགྲོ་བ་མིའི་ཐོབ་ཐང་བསྐྱར་གསོ་ཐུབ་རྒྱུ་ཡིན་སྐོར་སོགས་གསུངས།

སྐབས་དེར་རྒྱ་རིགས་གཏམ་བཤད་གནང་མཁན་ཁྲོད་རྒྱ་རིགས་མང་གཙོ་དོན་གཉེར་བའི་འགོ་ཁྲིད་འབུམ་རམས་པ་ཡང་ཅན་ལི་(Yang Jianli)དང་། ཨེ་ཤེ་ཡ་རང་དབང་རླུང་འཕྲིན་ཁང་གི་འགན་འཛིན་མིན་མི་ཤལ་(Min Michele) ཡིན་འདུག ཁོང་གཉིས་ནས་བོད་ཐོག་རྒྱུད་མངའ་ཡོད་པའི་ལོ་རྒྱུས་དང་། ད་ལྟའི་བོད་ནང་དུ་བོད་མི་ཚོར་དམ་བསྒྲགས་སུན་གཙེར་ལ་བརྟེན་དཀའ་སྡུག་ཧ་ཅང་མྱོང་བཞིན་པའི་གནས་སྟངས་སྐོར་གསུངས།

ད་དུང་། བོད་དོན་ཐོག་མུ་མཐུད་ཆོད་སེམས་བརྟན་པོས་རྒྱབ་སྐྱོར་གནང་རྒྱུ་ཡིན་སྐོར་སོགས་གསུངས་ཤིང་། སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་གསར་དུ་བསྐོ་གཞག་གནང་བའི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ངོ་སྤྲོད་གནང་བ་དང་སྦྲགས། རྒྱ་ནག་མི་མང་དང་འབྲེལ་བ་བྱ་རྒྱུ་དེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་དགོངས་བཞེད་ལྟར་བོད་དོན་བདེན་མཐའ་གསལ་ཆེད་ཧ་ཅང་གལ་གནད་ཆེ་བའི་ལས་དོན་ཞིག་ཡིན་སྐོར་སོགས་གསུང་པ་མ་ཟད། རྒྱ་རིགས་འབྲེལ་མཐུད་པ་གསར་པ་ཚུལ་ཁྲིམས་རྒྱ་མཚོ་ལགས་ནས་ཀྱང་རྒྱ་རིགས་དང་འབྲེལ་ལམ་དམ་ཟབ་རྒྱུན་སྐྱོང་སླད་རང་ནུས་གང་ཡོད་གནང་རྒྱུ་ཡིན་སྐོར་གསུང་འདུག