ཕྱི་ལོ་༢༠༢༢་ཟླ་༡༢་ཟླ་༡༠་ཉིན། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ། སྤྱི་ནོར་༸གོང་ས་༸སྐྱབས་མགོན་༸རྒྱལ་བའི་དབང་པོ་སྐུ་ཕྲེང་བཅུ་བཞི་པ་ཆེན་པོ་མཆོག་ལ་ནོ་བྷེལ་ཞི་བདེའི་གཟེངས་རྟགས་ཕུལ་ནས་ལོ་ངོ་༣༣ འཁོར་བའི་དུས་དྲན་མཛད་སྒོ་ཚོགས་གནང་སོང་། སྐབས་དེར། བཀའ་ཤག་གིས་བོད་དོན་བདེན་མཐའ་གསལ་བར་འབད་པ་བསྟེན་མཁན་གྱི་བོད་མི་རིགས་ལ་མཚོན་ནའང་། ༸མགོན་པོ་མཆོག་གི་གདམས་ངག་འདི་དག་ནི་ང་ཚོར་སྙིང་སྟོབས་དང་བློ་སྤོབས་འཕེལ་སྐྱེད་ཀྱི་སྨན་མཆོག་ཏུ་འཛིན་དགོས་ཤིང་། ང་ཚོས་དུས་ཆེན་སྲུང་བརྩིའི་དགོས་དོན་ངོ་མའང་འདི་ཡིན། ཞེས་གསུངས་སོང་།
དེ་ཡང་། གོང་ཚེས་ཉིན་གྱི་ཞོགས་པ་ཆུ་ཚོད་༡༠་པའི་ཐོག བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ། ༸གོང་ས་མཆོག་ལ་ནོ་བྷེལ་ཞི་བདེའི་གཟེངས་རྟགས་ཕུལ་ནས་ལོ་ངོ་༣༣ འཁོར་བའི་དུས་དྲན་མཛད་སྒོ་ཚོགས་གནང་སོང་། མཛད་སྒོའི་སྐུ་མགྲོན་གཙོ་བོར་རྒྱ་གར་གྲོས་ཚོགས་འོག་མིའི་འཐུས་མི་འཇམ་དབྱངས་ཚེ་རིང་རྣམ་རྒྱལ་མཆོག དམིགས་བསལ་སྐུ་མགྲོན་རྒྱ་གར་གྲོས་ཚོགས་གོང་མའི་འཐུས་མི་Shri Sujeet kumar མཆོག་དང་། ལ་དྭགས་རི་ལྗོངས་ཡར་རྒྱས་ལྷན་ཚོགས་སྡེ་དཔོན་ཁྲིམས་རྩོད་པ་སྐུ་ཞབས་བཀྲ་ཤིས་རྒྱལ་མཚན་མཆོག བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། རྡ་ས་ཁུལ་གྱི་སློབ་ཕྲུག་དང་མི་མང་ཕེབས་གནང་འདུག
དེ་བཞིན་དུས་དྲན་མཛད་སྒོའི་ཐོག བོད་ཀྱི་ཟློས་གར་ཚོགས་པ་གཙོས་པའི་བོད་ཕྲུག་དང་དགེ་རྒན་རྣམས་ཀྱི་གཞས་སྣ་འདྲ་མིན་འཁྲབ་སྟོན་གནང་སོང་ལ། སྐུ་མགྲོན་གཙོ་བ་དང་དམིགས་བསལ་སྐུ་མགྲོན། དེ་བཞིན་བཀའ་ཤག་དང་སྤྱི་འཐུས་ཀྱི་གསུང་བཤད་གནང་སོང་། ཐོག་མར་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་གི་གསུང་འཕྲིན་སྒྲོག་སྦྱང་གནང་དོན། འཛམ་གླིང་དུ་སྙན་གྲགས་ཆེ་བའི་གཟེངས་རྟགས་འདི་༸གོང་ས་༸སྐྱབས་མགོན་ཆེན་པོ་མཆོག་ལ་འབུལ་བཞེས་མཛད་པ་ནི། ༸མགོན་པོ་གང་ཉིད་ཀྱིས་བོད་དོན་བདེན་མཐའ་གསལ་ཐབས་ཆེད་ཐོག་མཐའ་བར་གསུམ་དུ་འཚེ་མེད་ཞི་བའི་ཐབས་ལམ་རྒྱུན་འཁྱོངས་གནང་བ་དང་། རྒྱལ་སྤྱིའི་རྩོད་རྙོག་འདུམ་འགྲིག་དང་། འགྲོ་བ་མིའི་ཐོབ་ཐང་གི་གནད་དོན། གོ་ལའི་ཁོར་ཡུག་གི་གནད་དོན་ཐད་དགེ་མཚན་ལྡན་ཞིང་གཟིགས་རྒྱང་ཡངས་པའི་དགོངས་ཚུལ་འདོན་གནང་མཛད་པ་ལ་ནོ་བྷེལ་ཞི་བདེའི་གཟེངས་རྟགས་ཚོགས་ཆུང་གིས་ངོས་འཛིན་ཆེ་བསྟོད་ཞུས་པའི་མཚོན་བྱེད་ཅིག་ཡིན།
ང་ཚོ་མི་རེ་ངོ་རེ་ནས་འགོ་བཙུགས་ཏེ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འཇིག་རྟེན་ཀུན་ཕན་གྱི་བསླབ་བྱར་གཙིགས་འཛིན་དང་། ཉམས་ལེན་བྱེད་ཐུབ་པ་ཡིན་ན། ཁྱིམ་ཚང་དང་། མི་སྡེ། སྤྱི་ཚོགས། འགྲོ་བ་མིའི་གཞིས་ཁྱིམ་གོ་ལ་འདི་བཅས་སུ་ཞི་བདེའི་འགལ་རྐྱེན་དུ་འགྲོ་གཞིའི་གཡུལ་འཁྲུག་དང་། བཤུ་གཞོག བཙན་གནོན། མནར་གཅོད་ཀྱི་རྒུད་ཚོགས་གཞིལ་བར་ཕན་ནུས་རྨད་དུ་བྱུང་བ་འདོན་ཐུབ་རྒྱུར་ཐེ་ཚོམ་མེད་ལ། བོད་དོན་བདེན་མཐའ་གསལ་བར་འབད་པ་བསྟེན་མཁན་གྱི་བོད་མི་རིགས་ལ་མཚོན་ནའང་། ༸མགོན་པོ་མཆོག་གི་གདམས་ངག་འདི་དག་ནི་ང་ཚོར་སྙིང་སྟོབས་དང་བློ་སྤོབས་འཕེལ་སྐྱེད་ཀྱི་སྨན་མཆོག་ཏུ་འཛིན་དགོས་ཤིང་། ང་ཚོས་དུས་ཆེན་སྲུང་བརྩིའི་དགོས་དོན་ངོ་མའང་འདི་ཡིན། ཞེས་གསུངས་སོང་།
དེའི་རྗེས། ཚོགས་གཞོན་སྒྲོལ་མ་ཚེ་རིང་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོག་སྦྱང་གནང་དོན། ༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ནི་སྟོན་མཆོག་རྣམ་འདྲེན་བཞི་པས་ཉེ་བར་བསྟན་པའི་ལྟ་བ་རྟེན་འབྱུང་དང་། སྤྱོད་པ་འཚེ་བ་མེད་པའི་ལམ་ལུགས་ཉམས་སུ་བཞེས་ཏེ་འཇིག་རྟེན་ཁྱོན་ཡོངས་སུ་འཚེ་མེད་ཞི་བའི་ལམ་སྟོན་མཛད་པོའི་འདྲེན་པ་བླ་ན་མེད་པ་ཞིག་ཡིན་པ་མ་ཟད། བོད་མིའི་རྩ་དོན་སྒྲུབ་ཕྱོགས་ཀྱི་ལས་འགུལ་མཐའ་དག་འཚེ་མེད་ཞི་བའི་ལམ་འབའ་ཞིག་ཏུ་བསྒྱུར་གནང་མཛད་དེ་འཛམ་གླིང་སྟེང་གི་རྙོག་འཛིང་མཐའ་དག་འཚེ་མེད་ཞི་བའི་ལམ་ནས་སེལ་ཐབས་བྱེད་དགོས་པའི་ལམ་སྟོན་དང་ཉམས་བཞེས་གནང་མཁན་ཞིག་ཡིན་པས། ཕྱི་ལོ་ ༡༩༨༩ ལོར་ནོ་སྦེལ་ཞི་བདེའི་གཟེངས་རྟགས་༸གོང་ས་མཆོག་ལ་འབུལ་བཞེས་ཀྱིས་འཇིག་རྟེན་ཞི་བདེའི་དེད་དཔོན་ཆེན་པོར་མངའ་གསོལ་བ་དང་ཆབས་ཅིག བོད་དོན་ལ་རྒྱལ་སྤྱིའི་ནང་གོ་རྟོགས་དང་དོ་སྣང་ཇེ་ཆེར་འགྲོ་རྒྱུར་རླབས་ཆེན་གྱི་ཕན་ཐོགས་བྱུང་ཡོད། དེ་ནི་འཚེ་བ་མེད་པའི་ཐབས་བྱུས་ལ་ཡིད་ཆེས་སླེབས་པའི་སྐུལ་འདེད་དང་བོད་མིའི་བདེན་དོན་ངོས་འཛིན་གྱི་མཚོན་རྟགས་རྨད་དུ་བྱུང་བ་ཞིག་ཏུ་གྱུར་སྟབས། གཞིས་བྱེས་བོད་མི་ཚང་མས་སོ་སོའི་སྒོ་གསུམ་གྱི་སྤྱོད་པ་འཚེ་མེད་ཞི་བའི་ལམ་ལ་ངེས་ཤེས་རྙེད་པའི་སྒོ་ནས་ཡིད་ཆེས་དང་དམ་བཅའ་བསྐྱར་ནན་ཞིག་འཇོག་ཐུབ་ཚེ་དུས་དྲན་འདི་སྲུང་བརྩི་ཞུ་གོ་ཆོད་ངེས་ཡིན།
འགྲོ་བ་མི་རྣམས་དཔལ་འབྱོར་མཁོ་སྒྲུབ་དང་། འཛུགས་སྐྲུན་སོགས་ཕྱིའི་དངོས་པོ་ཡར་རྒྱས་ཐད་འགྲན་སེམས་ཀྱིས་ཁེངས་ཤིང་། གཅིག་གིས་གཅིག་ལ་ཕམ་ཉེས་གཏོང་བཞིན་པའི་ཆེས་སྙིགས་དུས་ཀྱི་སྐབས་འདིར། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་གིས་འགྲོ་བ་མིའི་ཁྱིམ་ཚང་ཆེན་པོ་འདིའི་ནང་ཞི་བདེ་བསྐྲུན་ཕྱིར། འཛམ་གླིང་ནང་གི་མི་ཡོད་དོ་ཅོག་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་པ་དང་། དེའང་འཆམ་མཐུན་དང་ཞི་བདེར་གནས་པར་ཐོག་མར་རང་ཁྱིམ་དང་། རིམ་པས་སྤྱི་ཚོགས་དང་། རྒྱལ་ཁབ། འཛམ་གླིང་བཅས་སུ་ཁྱབ་སྤེལ་བྱ་དགོས་པའི་བཀའ་སློབ་ལུ་གུ་རྒྱུད་གནང་བཞིན་པར་འཛམ་གླིང་རྒྱལ་ཁབ་མང་པོས་༸གོང་ས་མཆོག་ལ་མི་སེར་གྱི་ཆེ་བསྟོད་དང་། གཟེངས་རྟགས། བྱ་དགའ་སོགས་བརྗོད་ཀྱིས་མི་ལང་བ་འབུལ་བཞེས་མཛད་གནང་ཡོད་པའི་ཐོག འདི་ལོའི་ཕྱི་ཟླ་ ༡༡ ཚེས་ ༡༩ ཉིན་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་གྷན་དྷི་མན་ཌ་ལ་ཐེབས་རྩས་༸གོང་ས་མཆོག་གིས་འཛམ་གླིང་ནང་ཞི་བདེ་དང་། བྱམས་སྙིང་རྗེ་སོགས་ཀྱི་ཐོག་ལ་རླབས་ཆེན་གྱི་མཛད་འཕྲིན་བསྐྱངས་གནང་བའི་ངོས་འཛིན་འོག་ཐེབས་རྩའི་འབྲེལ་ཡོད་རྣམས་དང་ཧི་མ་ཅལ་མངའ་སྡེའི་སྲིད་སྐྱོང་ (Governor) སྐུ་ཞབས་རཱ་ཇེན་ཌཱ་ཨར་ལེ་ཀར་ (Rajendra Arlekar) མཆོག་བཅས་རྡ་ས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཆེད་ཕེབས་ཀྱིས་ཕྱི་ལོ་ ༢༠༡༩ ལོའི་རྒྱལ་སྤྱིའི་གྷན་དྷི་མན་ཌ་ལ་གསེར་གྱི་གཟེངས་རྟགས་ཐོག་མ་དེ་༸གོང་ས་༸སྐྱབས་མགོན་ཆེན་པོ་མཆོག་ལ་འབུལ་བཞེས་མཛད་ཡོད། སྐབས་དེར་༸གོང་ས་མཆོག་གིས་འཚེ་མེད་ཞི་བ་དང་སྙིང་རྗེའི་དགེ་ཕན་སྐོར་འཛམ་གླིང་མི་མང་སྤྱི་དང་ལྷག་པར་དུ་དེར་འདུས་མང་ཚོགས་རྣམས་ལ་བཀའ་སློབ་གསུང་གི་བདུད་རྩི་སྤྱིར་སྩལ་གནང་བ་མ་ཟད། དུས་རྒྱུན་ནས་སྐྱེ་འགྲོ་ཀུན་གྱི་བདེ་རྩར་དགོངས་ཏེ་རླབས་ཆེན་གྱི་མཛད་འཕྲིན་མུ་མཐུད་བསྐྱངས་དང་སྐྱོང་བཞིན་པར་བཀའ་དྲིན་བླ་མེད་དུ་ཆེ་ཞེས་ཞུ་རྒྱུ། ཞེས་གསུངས་སོང་།
