ཕྱི་ལོ་༢༠༢༢ ཕྱི་ཟླ་༧ ཚེས་༡༠་ཉིན་སྤེལ། ༧གོང་ས་མཆོག་གིས་བྱང་ཆུབ་ཀྱི་སེམས་ནི་ཀུན་བདེའི་ནོར་བུ་ལྟ་བུ་ཆགས་འདུག ཧ་ཅང་རྩ་ཆེན་པོ་རེད། དེ་བཞིན་སྙིང་སྟོབས་བསྐྱེད་པ་དང་སེམས་ལ་ཞི་བདེ་སླེབས་པ་ཚང་མ་བྱང་ཆུབ་ཀྱི་སེམས་ཀྱིས་བྱེད་ཡོང་གི་འདུག རང་གཅེས་འཛིན་གྱི་བློ་ཡོད་པ་ཡིན་ན་ཞེད་སྣང་དང་ང་རྒྱལ། ཕྲག་དོག་བཅས་དེས་ཡོང་གི་ཡོད། གཞན་གཅེས་འཛིན་གྱི་བློ་ཤུགས་ཆེན་པོ་ཡོད་པ་ཡིན་ན་ཉོན་མོངས་ཀྱི་བློ་མང་པོ་ཞིག་རང་བཞིན་གྱིས་ཤུགས་ཆུང་དུ་འགྲོ་བ་ཞིག་རེད། ཅེས་བཀའ་སྩལ་སོང་།
དེ་ཡང་། ཟླ་འདིའི་ཚེས་༨་ནས་༩་བར། བཞུགས་སྒར་རྡ་སའི་ཐེག་ཆེན་ཆོས་གླིང་གཙུག་ལག་ཁང་དུ། དཔལ་ལྡན་རྒྱུད་སྨད་གྲྭ་ཚང་དང་སྟོད་རྒྱུད་གྲྭ་ཚང་གཉིས་ནས་ཇི་ལྟར་གསོལ་བ་བཏབ་པ་བཞིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགོན་སྡེ་ཁག་གི་བླ་ཆེན་དང་དགེ་བཤེས་གྲྭ་པ་སྟོང་ཕྲག་འགའ་དང་མི་མང་ལ་བདེ་མཆོག་ལཱུ་ཨི་པའི་བཀའ་དབང་སྩལ་གནང་མཛད་སོང་། ཚེས་༡༠ཉིན། དཔལ་ལྡན་རྒྱུད་གྲྭ་སྟོད་སྨད་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས་སོང་།
༧གོང་ས་མཆོག་གིས་བཀའ་སློབ་སྩལ་དོན། ཁྱོད་རང་ཚོས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་དགོས་པ་རེད། འདུན་པ་གཉིས་ལྡན་གྱི་བྱང་ཆུབ་ཀྱི་སེམས། རང་བདེ་བ་ཡོང་བ་ལ་བྱང་ཆུབ་ཀྱི་སེམས། གཞན་བདེ་བ་ཡོང་བ་ལ་བྱང་ཆུབ་ཀྱི་སེམས། སྡིག་སྒྲིབ་སྦྱོང་བ་དེའང་བྱང་ཆུབ་ཀྱི་སེམས། དངོས་གནས་ཚོགས་བསགས་པ་ལའང་བྱང་ཆུབ་ཀྱི་སེམས་རེད། བྱང་ཆུབ་ཀྱི་སེམས་ནི་ཀུན་བདེའི་ནོར་བུ་ལྟ་བུ་ཆགས་འདུག ཧ་ཅང་རྩ་ཆེན་པོ་རེད། དེ་བཞིན་སྙིང་སྟོབས་བསྐྱེད་པ་དང་སེམས་ལ་ཞི་བདེ་སླེབས་པ་ཚང་མ་བྱང་ཆུབ་ཀྱི་སེམས་ཀྱིས་བྱེད་ཡོང་གི་འདུག རང་གཅེས་འཛིན་གྱི་བློ་ཡོད་པ་ཡིན་ན་ཞེད་སྣང་དང་ང་རྒྱལ། ཕྲག་དོག་བཅས་དེས་ཡོང་གི་ཡོད། གཞན་གཅེས་འཛིན་གྱི་བློ་ཤུགས་ཆེན་པོ་ཡོད་པ་ཡིན་ན་ཉོན་མོངས་ཀྱི་བློ་མང་པོ་ཞིག་རང་བཞིན་གྱིས་ཤུགས་ཆུང་དུ་འགྲོ་བ་ཞིག་རེད། དེར་བརྟེན། གནས་སྐབས་མཐར་ཐུག་རྣམ་པ་ཀུན་ཏུ་ཕན་པ་འབའ་ཞིག་སྟེར་བར་བྱེད་པའི་བྱང་ཆུབ་ཀྱི་སེམས་དེ་ཨུ་ཚུགས་བརྒྱབ་ནས་སྒོམ་གྱི་ཡིན་བསམ་པ་ཞིག་དང་། ཉིན་རེ་བཞིན་དུ་བྱང་ཆུབ་ཀྱི་སེམས་སྒོམ་དགོས། སྤྱོད་འཇུག་ལས། འཇིག་རྟེན་བདེ་བ་ཇི་སྙེད་པ།། དེ་ཀུན་གཞན་བདེ་འདོད་ལས་བྱུང༌།། འཇིག་རྟེན་སྡུག་བསྔལ་ཇི་སྙེད་པ།། དེ་ཀུན་རང་བདེ་འདོད་ལས་བྱུང༌།། མང་དུ་བཤད་ལྟ་ཅི་ཞིག་དགོས།། བྱིས་པ་རང་གི་དོན་བྱེད་དང༌།། ཐུབ་པ་གཞན་གྱི་དོན་མཛད་པ།། འདི་གཉིས་ཀྱི་ནི་ཁྱད་པར་ལྟོས།། ཞེས་དང་། དེ་བས་སྐྱོ་ངལ་ཀུན་སེལ་བའི།། བྱང་ཆུབ་སེམས་ཀྱི་རྟར་ཞོན་ནས།། བདེ་ནས་བདེ་བར་འགྲོ་བ་ལ།། སེམས་ཤེས་སུ་ཞིག་སྒྱིད་ལུག་འགྱུར།། ཞེས་གསུངས་པ་ཧ་ཅང་ཤུགས་ཆེན་པོ་འདུག ངོས་ཀྱིས་ཀྱང་འདི་ལ་ཉིན་བཞིན་བསམ་བློ་གཏོང་བཞིན་ཡོད། ཅེས་གསུངས་སོང་།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། རྒྱུད་གྲྭ་སྨད་སྟོད་གཉིས་ཀྱིས་བརྟན་བཞུགས་གནང་བ་རེད། རྒྱུད་གྲྭ་སྨད་སྟོད་གཉིས་བསམ་གྱིས་མི་ཁྱབ་པ་རེད། ནོར་བུ་གླིང་གར་རྒྱུད་སྟོད་དང་རྒྱུད་སྨད་ཀྱི་དགེ་འདུན་པ་ཕལ་ཆེར་བཅུ་བཅོ་ལྔ་རེས་མོས་ཀྱིས་ཡོང་གི་ཡོད་པས་དགོང་མོ་རྒྱུད་གཞུང་འདོན་པ་ངོས་ཀྱིས་འཆར་ཅན་གོ་བཞིན་ཡོད། དེར་བརྟེན། རྒྱུད་གྲྭ་སྨད་སྟོད་གཉིས་ལ་སེམས་ཐག་ཉེ་བོ་ཆགས་ཡོད། དེ་རིང་འདིར་རྒྱུད་གྲྭ་སྨད་སྟོད་ཐུན་མོང་གི་ཐོག་ནས་བརྟན་བཞུགས་གནང་བ་རེད། གང་ལྟར་སྲུང་མ་ཚོ་ཡང་ཏན་ཏན་མཉམ་དུ་འཚོགས་ཡོད་པ་རེད། གང་ཚེ་ཤིན་ཏུ་ཟབ་པའི་ཆོས་ཚུལ་ལ།། བསམ་བྱུང་བློ་ཡིས་ངེས་ཤེས་རྙེད་པའི་ཚེ།། ཚེ་འདིའི་འཁྲི་བ་ཆོད་པའི་བརྩོན་འགྲུས་ཀྱིས།། དབེན་པ་བསྟེན་ནས་ཚུལ་བཞིན་བསྒྲུབ་པར་ཤོག། ཅེས་སོགས་གསུངས་པ་ལྟར། གང་ལྟར་ཆོས་སྐྱོང་སྲུང་མ་ཚོས་ཀྱང་ལུས་དང་དྲི་མ་བཞིན་འགྲོགས་པའི་ཐོག་ནས་འཕྲིན་ལས་སྒྲུབ་པ་ངོས་ཀྱི་རྨི་ལམ་ལ་ཐེངས་མང་པོར་བཏང་མྱོང་། དེ་རིང་འདིར་རྒྱུད་གྲྭ་སྨད་སྟོད་གཉིས་ཀྱིས་བརྟན་བཞུགས་ཕུལ་བའི་སྐབས་སུ་དཀར་ཕྱོགས་སྐྱོང་བའི་སྲུང་མ་ཚོ་ཏན་ཏན་འདིར་འདུས་བསྡད་ཡོད་པ་རེད། མཐོང་ཆོས་ཀྱི་རྒྱུད་གྲྭ་སྨད་སྟོད་ཀྱི་མཁན་བླ་དགེ་འདུན་དམངས་དང་བཅས་པར་ཐུགས་རྗེ་ཆེ་ཞུ་རྒྱུ་དང་། མཐོང་ཆོས་སུ་མེད་པའི་དཔལ་ལྡན་ལྷ་མོ་དང་མགོན་པོ་ཕྱག་དྲུག་པ། དེ་ཡིས་མཚོན་པའི་དཀར་ཕྱོགས་སྐྱོང་བའི་སྲུང་མ་ངོས་རང་ཆུང་དུས་ནས་འདྲིས་པ་རྣམས་དེ་རིང་འདིར་འཚོགས་ནས་སེམས་ཁུར་ལྟ་བུ་བླངས་ནས་བསྡད་ཡོད་པ་རེད། དེར་བརྟེན། འདིར་བརྟན་བཞུགས་ཕུལ་མཁན་ཚང་མ་ལ་ཐུགས་རྗེ་ཆེ་ཞུ་རྒྱུ་ཡིན། འབྱུང་འགྱུར་མ་འོངས་པར་ལོ་བཅུ་ཕྲག་གཅིག་གཉིས་རིང་ཏན་ཏན་བསྡད་ཀྱི་རེད། ཁྱེད་རང་ཚོ་མང་པོ་ཞིག་མགོ་ལ་སྐྲ་དཀར་དང་མགོ་དམར་པོ་རེད་འདུག ངོས་རང་འདིར་ལོ་བརྒྱད་ཅུ་གྱ་བདུན་གྱ་བརྒྱད་ལ་སླེབས་ཡོད་ཀྱང་། མགོ་དམར་པོ་ཕལ་ཆེར་ཆགས་མེད། སྐྲ་དཀར་མང་པོ་ཡོད་པ་མ་རེད། དེར་བརྟེན། ངོས་རང་མུ་མཐུད་ནས་བོད་ཀྱི་བསྟན་སྲིད་ཀྱི་དོན་དང་། འཛམ་གླིང་སྤྱི་ལ་གང་ལ་གང་འཚམ་ཕན་ཐོགས་ཡོང་གི་ཡོད་པས་ངོས་རང་སེམས་ཐག་བཅད་ནས་ཡོད། ཁྱོད་རང་ཚོ་ཚང་མ་བློ་བདེ་བོ་བྱོས།
གཞན་ཡང་། མགོན་པོ་གང་ཉིད་མཆོག་གི་སྐུའི་འཁྲུངས་སྐར་ལ་བཀྲ་ཤིས་བདེ་ལེགས་ཀྱི་ཞུ་འཕྲིན་འབྱོར་བ་ལ་གསུང་འཕྲིན་སྩལ་དོན། དེ་རིང་གོ་སྐབས་འདི་བཟུང་ནས་ངོས་ཀྱི་སྐྱེས་སྐར་གྱི་དུས་ཆེན་ལ་ཡུལ་ལུང་ཧ་ཅང་མང་པོ་ནས་ངོ་ཤེས་པ་དང་། མི་ཤེས་པ་མང་པོས་སྐྱེས་སྐར་ལ་བཀྲ་ཤིས་བདེ་ལེགས་ཞེས་ཡི་གེ་མང་པོ་འབྱོར་སོང་། དེ་གཏོང་མཁན་ཁྱོད་ཚོ་ཚང་མ་ལྷག་བསམ་གཅིག་ཏུ་དཀར་བ་རེད། གལ་ཆེ་ཤོས་ངོས་ཀྱིས་ད་ལྟའི་བར་དུ་ཧུར་ཐག་བྱས་པ་ལ་ངོས་ལེན་ཡོད་པའི་ཐོག་ནས་རྒྱབ་སྐྱོར་བྱེད་ཀྱི་ཡོད་པ་རེད། དེར་བརྟེན། ད་ལྟ་གོ་སྐབས་འདི་བཟུང་ནས་བཀྲ་ཤིས་བདེ་ལེགས་ཞུ་མཁན་ཚང་མར་ཐུགས་རྗེ་ཆེ་ཞུ་རྒྱུ་ཡིན། ཁྱོད་རང་ཚོས་རེ་བ་དང་སྨོན་ལམ་བརྒྱབ་པ་ལྟར་ངོས་ཀྱིས་ཀྱང་མུ་མཐུད་ནས་འཛམ་གླིང་གི་མི་དུང་ཕྱུར་བདུན་ཅུ་ལ་དངོས་དང་བརྒྱུད་པའི་ཐོག་ནས་ཕན་ཐོགས་གང་འཚམ་བྱེད་ཐུབ་པ་དང་། བྱེ་བྲག་ཏུ་སངས་རྒྱས་པའི་ཆོས་འདི་རིག་པ་དང་ལྡན་པ་ཞིག་ཡིན་པ་ངོས་ཀྱིས་ངོ་སྤྲོད་བྱེད་བཞིན་ཡོད། དེ་ལ་ནང་པ་བྱེད་དགོས་པ་རེད་ཟེར་གྱི་མེད། ཆོས་བྱེད་དགོས་པ་རེད་ཅེས་བཤད་ཀྱི་མེད། སེམས་པ་བཟང་པོ་བྱོས། ཆོས་ནས་བཤད་པའི་བསླབ་བྱ་གཙོ་བོ་ནི་སེམས་པ་བཟང་པོ་བྱ་རྒྱུ་དེ་རེད། སྐྱེ་བ་སྔ་ཕྱི་ཁས་བླངས་ཀྱང་མ་བླངས་ཀྱང་མི་ཚེ་འདི་ལ་སེམས་པ་བཟང་པོ་བྱོས། ཆུང་ཆུང་སྐབས་སུ་ཨ་མའི་བྱམས་བརྩེས་བསྐྱངས་པ་དང་། ཨ་མས་རླུང་བསྟན་ནས་འགྲོ་གི་མེད་པར་བྱམས་བརྩེ་སྟོན་གྱི་ཡོད་པས་ང་ཚོའི་མི་ཚེའི་མགོ་དེ་ལྟར་བཙུགས་པ་རེད། མི་ཚེའི་འཕྲོ་བྱམས་བརྩེ་ལྡན་པ་ཞིག་གིས་བསྐྱལ་བ་ཡིན་ན་སོ་སོའི་སེམས་སྐྱིད་པ་དང་། རོགས་པ་ཚོའང་སེམས་སྐྱིད་པ། དེ་བསྡོམས་ཡོང་སྐབས་འཛམ་གླིང་སྤྱི་ལ་དངོས་གནས་དྲང་གནས་སེམས་ཀྱི་ཞི་བདེ་ཡོད་པ་དང་ཞི་བདེ་ཡོང་བའི་གོ་སྐབས་ཡོད་པ་རེད། དེ་རིང་གོ་སྐབས་འདིར་ངོས་ཀྱི་གྲོགས་པོ་ཚང་མར་དུས་རྒྱུན་དུ་ཆོས་ཁས་བླངས་ཀྱང་མ་བླངས་ཀྱང་སེམས་པ་བཟང་པོ་བྱེད་པ་དང་། སུ་ལ་ཡིན་ནའང་ཕན་ཐོགས་བྱེད་པའི་བསམ་བློ་ཐོངས། ཞེས་ཞུ་འདོད་བྱུང་། བཀྲ་ཤིས་བདེ་ལེགས། ཞེས་གསུངས་སོང་།
