བཀའ་ཤག་གིས་རྒྱ་ནག་ལ་པཎ་ཆེན་རིན་པོ་ཆེ་མཆོག་མྱུར་དུ་གློད་གྲོལ་ཡོང་བའི་འབོད་སྐུལ་ཞུས་འདུག

༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་ལོ་དྲུག་ནས་རྒྱ་གཞུང་གིས་བཙན་ཁྲིད་བྱས་ནས་ད་བར་མི་ལོ་ ༢༦ རིང་གར་སོང་ཆ་མེད་དུ་གྱུར་ནས། ཁོང་ད་ལྟར་གང་དུ་གནས་ཡོད་མེད་སོགས་ཀྱི་གནས་སྟངས་སྐོར་གང་ཡང་ཤེས་རྟོགས་མེད་པར་བརྟེན། བོད་མིའི་སྒྲིག་འཛུགས་ཀྱི་བཀའ་ཤག་གིས་རྒྱ་ནག་གཞུང་ལ་༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་། ཡབ་ཡུམ་ནང་མི། བཀྲས་ལྷུན་བྱ་བྲལ་རིན་པོ་ཆེ། ཁོང་དང་འབྲེལ་ཡོད་མི་སྣ་གཞན་བཅས་པ་ཆ་རྐྱེན་གང་ཡང་མེད་པའི་ཐོག་ནས་འཕྲལ་དུ་གློད་བཀྲོལ་གཏོང་དགོས་པའི་རེ་སྐུལ་ནན་པོ་ཞུས་འདུག དེ་བཞིན་རྒྱལ་སྤྱིའི་ཚོགས་སྡེ་ཁག་ལ་པཎ་ཆེན་ཆུང་སྲིད་རིན་པོ་ཆེ་མཆོག་གློད་གྲོལ་ཡོང་བར་རྒྱབ་སྐྱོར་དང་འབད་བརྩོན་གནང་བའི་འབོད་སྐུལ་ཡང་ཞུས་འདུག

དེ་ཡང་། བཀའ་ཤག་གི་བསྒྲགས་གཏམ་ནང་དུ་འཁོད་དོན། དེ་རིང་གི་དུས་ཚིགས་འདིའི་སར། ༸ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆོས་ཀྱི་རྒྱལ་མཚན་མཆོག་གི་མཛད་པ་རྣམ་ཐར་ལའང་རྗེས་དྲན་ཞུ་དགོས་པ་ཞིག་ཆགས་ཡོད་པས། གནད་བསྡུས་ཙམ་ཞིག་ཞུས་ན། ཕྱི་ལོ་ ༡༩༥༩ ལོར་བོད་ས་ཡོངས་རྫོགས་རྒྱ་དམར་གཞུང་གིས་བཙན་བཟུང་གིས་བོོད་མི་རྣམས་གཞིས་བྱེས་གཉིས་སུ་ཁ་གྱེས་དགོས་པའི་དུས་ངན་ཤར་སྐབས། ༸ཀུན་གཟིགས་པཎ་ཆེན་གོང་མ་མཆོག་ནས་བོད་མི་རིགས་ཀྱི་བདེ་ཐབས་དང་བོད་ཀྱི་ཆོས་དང་རིག་གཞུང་སྲུང་སྐྱོབ་སླད་དུ། ཐོག་མར་རྒྱའི་སྤྱི་ཁྱབ་འགོ་འཁྲིད་རྣམས་ལ་ཞི་འཇམ་ཐབས་མཁས་ཀྱིས་བློ་འགུག་གནང་ཐབས་དང་། བར་དུ་ཡིག་འབྲུ་ཁྲི་བདུན་གྱི་སྙན་ཞུ་ཕུལ་ནས་བོད་མིའི་བདེན་དོན་ཞུ་གཏུག་གནང་ཡོད་པ། བདེན་པའི་སྙན་ཞུ་དེར་ངོས་ལེན་བདག་སྤྲོད་བྱ་རྒྱུའི་ཚབ་ཏུ་མི་ལོ་ ༡༤ རིང་བཙོན་ཁང་དུ་ཚུད་པ། མཐར་བཙོན་གྲོལ་ཐོབ་རྗེས་བོད་ཀྱི་སྐད་ཡིག་དང་རིག་གཞུང་སླར་གསོའི་མཛད་རྗེས་རླབས་པོ་ཆེ་འཇོག་གནང་མཛད་པ་མ་ཟད། བོད་ཀྱི་བསྟན་སྲིད་རྩ་དོན་ཐོག་འཇིགས་ཞུམ་བག་ཚ་ཡེ་ནས་མེད་པའི་སེངྒེའི་ང་རོ་བསྒྲགས་དང་སྒྲོག་བཞིན་པར་སྐུ་སྲོག་བློས་བཏང་མཛད་པའི་དཔའ་བོ་ཆེན་པོ་ཞིག་ཏུ་གྱུར་ཡོད་པས། དེ་རིང་གི་དུས་ཚིགས་འདིའི་ཐོག་ཕྲན་ནས་བོད་མིའི་སྒྲིག་འཛུགས་དང་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ། ༸ཀུན་གཟིགས་པཎ་ཆེན་གོང་མ་མཆོག་གི་མཛད་པ་རྣམ་ཐར་ལ་ཚད་མཐོའི་གུས་འདུད་དང་། སྙིང་ཐག་པ་ནས་བཀའ་དྲིན་རྗེས་དྲན་ཞུ་ཡི་ཡོད། 

༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་ལོ་ཤིན་ཏུ་ཕྲ་སྐབས་ནས་བཙན་ཁྲིད་བྱས་ཏེ། ད་བར་མི་ལོ་ ༢༦ རིང་གར་སོང་ཆ་མེད་དུ་གྱུར་ནས་གནས་སྟངས་ངོ་མ་རྩ་བ་ནས་ཤེས་རྟོགས་མ་ཐུབ་པར་བརྟེན། ང་ཚོའི་ངོས་ནས་རྒྱ་ནག་གཞུང་ལ་༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་། ཡབ་ཡུམ་ནང་མི། བཀྲས་ལྷུན་བྱ་བྲལ་རིན་པོ་ཆེ། ཁོང་དང་འབྲེལ་ཡོད་མི་སྣ་གཞན་བཅས་པ་ཆ་རྐྱེན་གང་ཡང་མེད་པའི་ཐོག་ནས་འཕྲལ་དུ་གློད་བཀྲོལ་གཏོང་དགོས་པའི་རེ་སྐུལ་ནན་པོ་བྱ་རྒྱུ་ཡིན། ཉེ་ཆར་ཨ་རིའི་ཕྱི་སྲིད་མགྲིན་ཚབ་པས་གསུངས་དོན་ལྟར། རྒྱ་ནག་གཞུང་ནས་༸ཀུན་གཟིགས་པཎ་ཆེན་རིན་པོ་ཆེ་གང་དུ་ཡོད་མེད་ཚང་མས་ཤེས་པ་བཟོ་དགོས་པ་དང་། པཎ་ཆེན་རིན་པོ་ཆེ་ང་ཚོ་ཚང་མས་དངོས་སུ་མཇལ་རྒྱུའི་གོ་སྐབས་ངེས་པར་བསྐྲུན་དགོས།

དེ་རིང་གི་དུས་དྲན་འདིའི་སར། བོད་མིའི་སྒྲིག་འཛུགས་ནས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་རྗེས་དྲན་ལོ་རྒྱུས། (Tibet’s Stolen Child: Remembering the Story of the 11th Panchen Lama-Gedhun Choekyi Nyima) ཞེས་པའི་དཔེ་དེབ་དེ་སྒོ་འབྱེད་བྱེད་ཀྱི་ཡོད། དཔེ་དེབ་དེའི་ཐོག་ནས་པཎ་ཆེན་སྐུ་ཕྲེང་བཅུ་པ་ཆོས་ཀྱི་རྒྱལ་མཚན་མཆོག་གིས་བོད་ཀྱི་སྐད་ཡིག་དང་རིག་གཞུང་མི་རིགས་བཅས་པ་སྲུང་སྐྱོབ་ཆེད་དཀའ་སྡུག་ཚད་མེད་བཞེས་པའི་ལོ་རྒྱུས་ལ་རྗེས་དྲན་དང་། པཎ་ཆེན་དགེ་འདུན་ཆོས་ཀྱི་ཉི་མ་མཆོག་གློད་བཀྲོལ་འཐོབ་ཐབས་ཀྱི་ལས་འགུལ་འགྲོ་མུས་ཁག་གཞི་རྒྱ་ཆེ་རུ་གཏོང་རྒྱུ། རྒྱལ་སྤྱིའི་ཚོགས་པ་ཁག་གིས་རྒྱ་ནག་གཞུང་ལ་པཎ་ཆེན་དགེ་འདུན་ཆོས་ཀྱི་ཉི་མ་སྐུ་འཁོར་བཅས་པའི་གནས་སྟངས་རྟོག་ཞིབ་བྱེད་མཁན་རང་དབང་ལྡན་པའི་ཚོགས་ཆུང་ཞིག་འཛུགས་གཏོང་དགོས་པའི་འབོད་སྐུལ་གནང་རྒྱུ་བཅས་ཀྱི་ལས་འགུལ་ཁག་སྔར་ལས་ལྷག་པ་སྤེལ་ཐབས་སུ་དམིགས་ཏེ་པར་སྐྲུན་བྱས་པ་ཞིག་ཡིན།

མཐའ་དོན། ༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་ད་ལྟ་གང་དུ་བཞུགས་ཡོད་རུང་། བསྟན་འགྲོའི་མགོན་དཔུང་དམ་པར་སྐུ་ཚེ་༸ཞབས་པད་ཡུན་དུ་བརྟན་པ་དང་། མི་རིང་བར་རང་གི་གདན་སར་འཁོད་ནས་༸ཀུན་གཟིགས་པཎ་ཆེན་སྐུ་ཕྲེང་གོང་མ་རིམ་བྱོན་གྱི་མཛད་པ་རྣམ་པར་ཐར་པ་བདག་གིར་བཞེས་ཐུབ་པ། བདག་ཅག་ཡོངས་ནས་གང་གི་གསེར་ཞལ་རིན་པོ་ཆེ་མགྱོགས་ནས་མྱུར་དུ་མཇལ་ཐུབ་པའི་སྨོན་འདུན་ཤུགས་དྲག་ཞུ་རྒྱུ་ཡིན། ཞེས་གསུངས་འདུག