24
Sat, Oct

༢༠༢༠་ལོའི་ཟླ་༩་ཚེས་༢་ཉིན། བཙན་བྱོལ་བོད་མིས་མང་གཙོ་དུས་དྲན་ཐེངས་༦༠་སྲུང་བརྩི་ཞུ་སྐབས།

བཙན་བྱོལ་གྱི་གསར་འགྱུར།
ཡིག་གཟུགས་སྒྲིག་ཆས།

༢༠༢༠་ལོའི་ཟླ་༩་ཚེས་༢ཉིན། བཞུགས་སྒར་རྡ་སར་བཙན་བྱོལ་བོད་མིའི་མང་གཙོ་ཉིན་མོ་སྲུང་བརྩི་ཞུ་སྐབས། མང་གཙོའི་ལམ་ལུགས་དངོས་སུ་ལག་ལེན་དུ་བསྟར་སྐབས་རང་རྒྱལ་གཞན་ཕམ་གྱི་བསམ་བློ་དེ་ངེས་པར་དོར་དགོས་པ་ཡིན། ཞེས་སྤྱི་འཐུས་ཚོགས་གཙོ་མཆོག་གིས་གསུངས་སོང་།

དེ་ཡང་། བཞུགས་སྒར་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ། བཙན་བྱོལ་བོད་མིའི་མང་གཙོ་དབུ་བརྙེས་ནས་ལོ་ངོ་ཧྲིལ་པོ་༦༠་འཁོར་བའི་ཉིན་མོ་སྲུང་བརྩི་གནང་བའི་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་། བོད་མི་མང་སྤྱི་འཐུས་ཚོགས་གཙོ་མཆོག ཆེས་མཐོ་ཁྲིམས་ཞིབ་ཁང་གི་ཁྲིམས་དཔོན། ལྷན་ཁང་ཁག་གི་དྲུང་ཆེ་སོགས་ཕེབས་གནང་འདུག དང་ཐོག ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་དང་། རྒྱ་གར་རྒྱལ་གླུ་དབྱངས་སུ་གྱེར། དེ་ནས་རྒྱ་གར་གྱི་སྲིད་འཛིན་ཟུར་པ་སྐུ་ཞབས་པར་ནམ་མུ་ཁར་ཇི་མཆོག་སྐུ་ཚེའི་འཕེན་པར་རྫོགས་པར་མྱ་ངན་གུད་འདུད་ཆེད་མྱ་ངན་ངག་གཅད་སྐར་གཅིག་རིང་ཞུས་གྲུབ་མཚམས་བོད་ཀྱི་ཟློས་གར་ཚོགས་པས་མང་གཙོ་གསར་གཞས་འབུལ་ལམ་ཞུས་སོང་།

དེ་ནས་སྲིད་སྐྱོང་བློ་བཟང་སེངྒ་མཆོག་གིས་འདི་ལོ་སྲིད་སྐྱོང་སློབ་ཡོན་བཞེས་མཁན་སློབ་ཕྲུག་རྣམས་ལ་གཟེངས་རྟགས་གནང་རྗེས། བོད་ཀྱི་ཟློས་གར་ཚོགས་པའི་དབྱར་སྐྱིད་ ༢༠༢༠ ལོའི་བརྙན་འཕྲིན་མཐེབ་སྡེར་དབུ་འབྱེད་གནང་སོང་།

དེའི་རྗེས། བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་ཕྱི་ལོ་ ༢༠༢༠ ལོའི་འཛིན་རིམ་བཅུ་གཉིས་ཀྱི་འབྱུང་རིག་དང་། ཚན་རིག ཚོང་ལས་སྡེ་ཚན་གསུམ་གྱི་རྩེ་ཕུད་ཨང་རིམ་དང་པོ་དང་། གཉིས་པ། གསུམ་པར་སོན་པའི་སློབ་ཕྲུག་རྣམས་ལ་དགའ་ལྡན་ཕོ་བྲང་སློབ་ཕྲུག་གཟེངས་རྟགས་གནང་རྗེས། བོད་མིའི་སྒྲིག་འཛུགས་ཀྱི་ལས་བྱེད་ཞབས་ལོ་ ༢༥ ཡན་འཁོར་བ་རྣམས་ལ་ལེགས་གསོལ་ཕྱག་འཁྱེར་དང་། ན་གཞོན་ནུས་སྤེལ་ལས་གཞིའི་གཟེངས་བསྟོད་བཞེས་མཁན་ན་གཞོན་གཅིག་ལ་ལེགས་གསོལ་ལག་འཁྱེར་གནང་སོང་།

དེ་ནས། བོད་མི་མང་སྤྱི་འཐུས་ཚོགས་གཙོ་མཆོག་གིས་སྤྱི་འཐུས་ཀྱི་གསུང་འཕྲིན་སྒྲོག་སྦྱར་གནང་དོན། མང་གཙོའི་ལམ་ལུགས་ངོམས་སུ་ཆོག་པ་དེ་དངོས་སུ་ལག་ལེན་དུ་བསྟར་སྐབས་རང་རྒྱལ་གཞན་ཕམ་གྱི་བསམ་བློ་དེ་ངེས་པར་དོར་དགོས་པ་ཡིན། ལྷག་པར་དུ་ཕྱི་ལོ་ ༢༠༢༡ ལོའི་ནང་སྲིད་སྤྱི་གཉིས་ཀྱི་འོས་བསྡུའི་སྐབས་བཙན་བྱོལ་བོད་མིའི་བཅའ་ཁྲིམས་ནང་གསལ་བའི་བོད་ཀྱི་ཡུལ་མི་རྣམས་ཀྱིས་མང་གཙོའི་འགན་དབང་ལོངས་སྤྱོད་ཚད་ལྡན་ཡོང་ཐབས་སུ། ཆོལ་ཁ་ཆོས་བརྒྱུད་ནང་ཁུལ་མཐུན་སྒྲིལ་ལ་དོ་ཕོག་འགྲོ་གཞི་དང་། ༸གོང་ས་མཆོག་གི་ཐུགས་དགོངས་འཁྲུག་གཞི། དེ་བཞིན་གཞིས་བཞུགས་བོད་མི་རྣམས་ཀྱི་སྙིང་སྟོབས་ཉམས་དམས་སུ་འགྲོ་གཞི་བཅས་ཀྱི་བྱ་བ་བརྩམ་མི་རུང་བས་ཚང་མས་བླང་དོར་འགལ་འཛོལ་མེད་པ་དགོས་གལ། ལྷག་པར་དུ་༸རྒྱལ་བ་སྐུ་ཕྲེང་བཅུ་བཞི་པ་ཆེན་པོ་མཆོག་གི་དབུ་འཁྲིད་བཟང་པོའི་འོག་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་དང་། ཆོལ་གསུམ་ཡོངས་རྫོགས་སྐྱིད་ན་སྐྱིད་མཉམ་དང་། སྡུག་ན་སྡུག་མཉམ་གྱི་རྡོག་རྩ་གཅིག་ཏུ་བསྒྲིལ་བའི་གོང་བུའི་ནུས་པ་དེར་གཏོར་བཤིག་གཏོང་རྒྱུར་དམིགས་ཏེ་ཆེད་གཉེར་ལས་འགན་ཡོད་མཁན་ཉུང་ཤས་ཡོད་པ་དེ་དག་ལ་ཁ་གཏད་གཅོག་རྒྱུ་དང་། དེ་རིགས་ཀྱི་ལྷན་དུ་བསམ་མེད་བོད་མི་འགའ་ཤས་མགོ་སྐོར་བསླུ་བྲིད་འོག་སྐབས་རེར་ཚུད་ཉེན་ཆེ་བས་དོགས་ཟོན་ཆེར་བསྐྱེད་ཀྱིས་ཡིད་གཟབ་བྱ་རྒྱུ་ཚང་མར་འོས་འགན་ཡོད་པ་ལྟར་བསམ་ཤེས་ངེས་གནང་ཡོང་བའི་འབོད་སྐུལ་ཞུ་རྒྱུ་ཡིན།

ང་ཚོའི་ཆབ་སྲིད་མང་གཙོར་བསྒྱུར་རྒྱུར་གཙོ་ཆེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཚེ་ཧྲིལ་པོར་བོད་མི་རིགས་དང་རྒྱལ་ཁབ་ཀྱི་ཆེད་དུ་སྐུ་ལས་ཚད་མེད་བསྐྱོན་གནང་བའི་ཐུགས་རྗེ་བཀའ་དྲིན་ཉག་ཅིག་ལ་བརྟེན་ནས་བྱུང་བ་ཡིན་པ་སྨོས་མེད་ཐོག མི་ལོ་དྲུག་ཅུའི་རིང་གི་བཙན་བྱོལ་བའི་གནས་བབ་དང་། ཆབ་སྲིད། ཆོས་དང་རིག་གཞུང་སྐད་ཡིག་སྲུང་སྐྱོབ། རྩ་དོན་འཐབ་རྩོད་བཅས་ཀྱི་ཐོག་ལ་དུས་རྒྱུན་དུ་ནས་ལམ་སྟོན་མཐུན་འགྱུར་དང་ཕན་གྲོགས་གནང་མཁན་གནས་ཡུལ་རྒྱ་གར་གཞུང་མང་གཉིས་ཀྱིས་གཙོས་ཕྱིའི་རྒྱལ་ཁབ་ཁག་གི་གཞུང་དང་མི་མང་ཚང་མར་ཐུགས་རྗེ་བཀའ་དྲིན་བླ་མེད་དུ་ཆེ་ཞེས་ཞུ་རྒྱུ། ཞེས་གསུངས་སོང་།

དེའི་རྗེས། དཔལ་ལྡན་སྲིད་སྐྱོང་མཆོག་གིས་བཀའ་ཤག་གི་གསུང་འཕྲིན་སྒྲོག་སྦྱང་གནང་དོན། ང་ཚོ་བཙན་བྱོལ་དུ་ཡོད་ཀྱང་མང་གཙོའི་རང་དབང་ལོངས་སུ་སྤྱོད་རྒྱུའི་གོ་སྐབས་ཡོད་པ་དགའ་འོས་པའི་གནས་ཡིན། འོན་ཀྱང་གཞིས་བཞུགས་བོད་རིགས་སྤུན་ཟླ་ཡོངས་རྫོགས་རྒྱ་ནག་གཞུང་གི་གདུག་རྩུབ་འོག་ལ་མང་གཙོའི་ཁེ་དབང་ལོངས་སུ་སྤྱོད་རྒྱུ་ཕར་ཞོག འགྲོ་བ་མིའི་གཞི་རྩའི་ཐོབ་ཐང་ཙམ་ཡང་ལོངས་སུ་སྤྱོད་དབང་མེད་པར་མི་ལོ་དྲུག་ཅུ་ལྷག་རིང་སྡུག་སྦྱོང་མནར་གཅོད་ཚད་མེད་མྱངས་དང་མྱོང་བཞིན་ཡོད་པ་བློ་ཕམ་གྱི་གནས་ཡིན། ལྷག་པར་དུ་ཉེ་དུས་ནས་སྐད་ཡིག་དང་ཁོར་ཡུག་སྲུང་སྐྱོབ་བྱེད་པ་ལའང་དམ་བསྒྲགས་ཤུགས་ཆེར་བྱེད་བཞིན་ཡོད་པ་མ་ཟད། འདི་ལོའི་ཟླ་ ༡ ནས་མི་རིགས་མཐུན་སྒྲིལ་དང་འབྲེལ་བའི་སྲོལ་ཡིག་ཟེར་བ་བཏོན་ནས་བོད་མིར་སྔར་ལས་དམ་བསྒྲགས་བྱེད་ཤུགས་ཆེ་རུ་གཏོང་གི་ཡོད་པ་འཛམ་གླིང་མི་མང་ཀུན་གྱིས་མཁྱེན་གསལ་རེད།

ཡང་ཉེ་ཆར་ཟླ་ ༨ ཚེས་ ༢༨ དང་ ༢༩ ཉིན་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པ་རྒྱ་ནག་གི་རྒྱལ་ས་པེ་ཅིང་དུ་འཚོགས་པའི་ཐོག་རྒྱ་ནག་དབུས་དམར་ཤོག་དྲུང་ཆེ་ཞི་ཅིན་ཕིང་གིས་ངེས་པར་དུ་བྱེད་དགོས་པའི་དོན་ཚན་བཅུ་བཏོན་ཡོད་པ་མ་ཟད། བོད་བརྒྱུད་ནང་བསྟན་རྒྱ་ནག་ཅན་དུ་འགྱུར་བར་སྐུལ་འདེད་གཏོང་དགོས་པ་དང་། ཆབ་སྲིད་སློབ་གསོ་སློབ་གྲྭའི་ལོ་ཆུང་སློབ་ཕྲུག་ནས་སྤེལ་དགོས་པ། རྒྱལ་ཁབ་སྐྱོང་བར་མཐའ་མཚམས་སྐྱོང་དགོས་པ་དང་མཐའ་མཚམས་སྐྱོང་བར་སྔོན་ལ་བོད་བརྟན་ལྷིང་ཡོང་བ་བྱེད་དགོས་པ་སོགས་རྩལ་དུ་བཏོན་ནས་བཤད་དེ། དོན་དུ་རྒྱ་དམར་གཞུང་གི་དགོས་མཁོ་དང་བསྟུན་ནས་ཆོས་དད་རང་དབང་དང་བླ་སྤྲུལ་ངོས་འཛིན་ལ་དམ་བསྒྲགས་ཆེ་རུ་གཏོང་རྒྱུ་ངེས་པ་དང་། བོད་རིགས་གཞོན་སྐྱེས་རྣམས་ལ་ཆབ་སྲིད་སློབ་གསོའི་ཐོག་ནས་ཀླད་པ་འཁྲུད་ཐབས་ཀྱི་བྱ་སྤྱོད་ངན་པ་ཞིག་ཏུ་ངོས་འཛིན་ཞུ་ཡི་ཡོད། དེ་བཞིན་བོད་ལ་བརྟན་ལྷིང་མེད་པ་བཟོ་མཁན་རྒྱ་ནག་གཞུང་ཡིན་པ་ལས་བོད་རིགས་མི་མང་ལ་ཁག་དཀྲི་བྱེད་ཐབས་མེད། མདོར་ན། བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པ་འཚོགས་ནས་ངེས་པར་དུ་བྱེད་དགོས་པའི་དོན་ཚན་བཅུ་བཏོན་ནས་རྒྱ་ནག་གཞུང་གི་དགོས་མཁོ་སྒྲུབ་ཐབས་ཀྱི་འཆར་གཞི་ཁོ་ན་ཡིན་པ་ཟུར་བལྟས་ལེབ་མཐོང་ཡིན།

ལར་ནས་བོད་ལ་འཛིན་པའི་རྒྱ་ནག་གི་སྲིད་བྱུས་དེ་ཡང་དག་པ་ཡིན་ཚུལ་བཤད་ཀྱང་། བློ་གཟུ་བོར་གནས་པའི་རྒྱལ་སྤྱིའི་སྲིད་གཞུང་དང་། མི་མང་རྣམས་བཞད་གད་ཤོར་ངེས་ཡིན། གལ་ཏེ་བོད་ལ་འཛིན་པའི་སྲིད་བྱུས་དེ་ཡང་དག་པ་ཞིག་ཡིན་ན། ད་ཕན་ལ་གཞིས་བཞུགས་བོད་མི་ཚོས་ཞི་བའི་ངོ་རྒོལ་རབ་དང་རིམ་པ་གནང་ཡོད་པ་མ་ཟད། བོད་མི་ ༡༥༤ ཡིས་རང་གི་གཅེས་པའི་ལུས་སྲོག་མེར་སྲེག་གནང་དགོས་དོན་མེད། དེར་བརྟེན་རྒྱ་ནག་གཞུང་གིས་བོད་ལ་ཁ་ཞེ་གཉིས་མེད་ཀྱི་ལས་དོན་ཡག་པོ་སྒྲུབ་འདོད་ཡོད་ན། བོད་མི་རྣམས་ཉིན་མཚན་ལྟོས་མེད་ཞེད་སྣང་ངང་གནས་དགོས་པའི་ཐལ་ཆེ་བའི་གཅིག་སྡུད་རིང་ལུགས་ཀྱི་སྲིད་བྱུས་ལ་འགྱུར་བ་གཏོང་དགོས་པ་མ་ཟད། ཞི་ཅིན་ཕིང་གིས་བོད་མིར་གདུག་རྩུབ་མནར་གཅོད་གཏོང་རྒྱུའི་བསམ་བློ་དོར་དགོས་པ་དང་། གཞིས་བཞུགས་བོད་མི་མང་གི་བསམ་ཚུལ་ལ་ངེས་པར་དུ་དང་ལེན་བྱེད་དགོས་ཅིང་། ༸གོང་ས་མཆོག་གི་སྐུ་ཚབ་བརྒྱུད་རྒྱ་ནག་གཞུང་ལ་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཕུལ་བ་བཞིན་དབུ་མའི་ལམ་བརྒྱུད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་དུ་ཞི་བའི་གྲོས་མོལ་གང་མགྱོགས་འགོ་འཛུགས་གནང་དགོས་པའི་འབོད་སྐུལ་ནན་པོ་ཞུ་རྒྱུ་ཡིན། དེ་ལྟར་བྱས་ན་སྤྱི་ཚོགས་བརྟན་ལྷིང་བསམ་དོན་བཞིན་འགྲུབ་རྒྱུ་ཉག་གཅིག་ཡིན།

དེ་བཞིན་རྒྱ་དམར་གཞུང་གིས་བོད་མིའི་ཆོས་དད་རང་དབང་ཐོག་ལའང་དམ་བསྒྲགས་ཧ་ཅང་ཆེན་པོ་བྱེད་བཞིན་ཡོད་པ་རྒྱས་བཤད་མི་དགོས་པར་འདི་ལོའི་ཟླ་ ༦ ཚེས་ ༡༠ ཉིན་ཨ་རིའི་ཕྱི་སྲིད་ལས་ཁུངས་ཀྱི་ ༢༠༡༩ ལོའི་རྒྱལ་སྤྱིའི་ཆོས་དད་རང་དབང་གི་ལོ་འཁོར་སྙན་ཐོའི་ནང་འཛམ་གླིང་ཁྱོན་ཡོངས་ཀྱི་ནང་ནས་ཆོས་དད་རང་དབང་ཐོག་བརྡལ་བཤིག་དང་དམ་བསྒྲགས་ཤུགས་ཆེ་ཤོས་བྱེད་མཁན་གྲས་སུ་རྒྱ་ནག་འཁོད་ཡོད་པས་ཀྱང་ར་སྤྲོད་བྱེད་ཐུབ།

ད་རེས་གོ་སྐབས་འདི་བརྒྱུད་ཞུ་རྒྱུར། ཉེ་ལམ་དབུས་འོས་བསྡུ་ལས་ཁང་ནས་སྲིད་སྐྱོང་དང་། སྐབས་བཅུ་བདུན་པའི་སྤྱི་འཐུས་ཀྱི་འོས་བསྡུ་ཆེན་མོའི་ལས་དོན་འགོ་འཛུགས་གསལ་བསྒྲགས་གནང་ཟིན་པ་ལྟར། འཛམ་གླིང་གང་སར་གནས་པའི་བོད་རིགས་ཡོངས་ཀྱིས་སྔོན་འགྲོ་དང་དངོས་གཞིའི་འོས་བསྡུ་གཉིས་ཀར་ཆ་ཤས་ལེན་རྒྱུ་ཤིན་ཏུ་གལ་ཆེན་པོ་ཡིན་སྟབས། འོས་བསྡུ་དང་འབྲེལ་བའི་ལམ་སྟོན་གནང་བ་ཁག་ལ་ཐུགས་སྣང་དགོས་པ་མ་ཟད། འདས་པའི་ཉམས་མྱོང་གཞི་ལ་བཞག་ནས་སོ་སོའི་འོས་ཤོག་དེ་རྣམ་དཔྱོད་ལྡན་པའི་ངང་ནས་བོད་མིའི་འགོ་འཁྲིད་གནང་ཐུབ་པའི་སྲིད་སྐྱོང་དང་། བོད་མིའི་ངོ་ཚབ་མཚོན་པའི་སྤྱི་འཐུས་རྣམས་འཕྱུགས་པ་མེད་པར་བདམ་དགོས་པའི་འབོད་སྐུལ་ཞུ་རྒྱུ་ཡིན། དེ་དང་ཆབས་ཅིག་ཏུ་སྤྱི་ཚོགས་དྲྭ་ལམ་བེད་སྤྱོད་ལོག་པར་བཏང་ནས་འཆལ་གཏམ་དང་དཀྲུག་ཤིང་སོགས་བོད་མིའི་ཆིག་སྒྲིལ་ལ་གནོད་པའི་བྱེད་བབ་རིགས་ཀྱི་མགོ་སྐོར་འོག་ལ་མ་ཚུད་པར་ཡིད་གཟབ་གནང་རྒྱུ་གལ་ཆེན་པོ་ཡིན། ཞེས་གསུངས་སོང་།

མཐའ་མར། སྦར་སིལ་དོན་གཅོད་ཁང་གིས་བཟོ་བསྐྲུན་གནང་བའི་ངོས་ཀྱིས་ཡུ་རོབ་མཐུན་ཚོགས་ཀྱི་བསམ་བློར་བསྔགས་བརྗོད་བྱེད་ཀྱི་ཡོད་ཅེས་པའི་༸གོང་ས་མཆོག་གིས་ཡུ་རོབ་མཐུན་ཚོགས་ལ་མོས་པ་དང་བསྔགས་བརྗོད་མཛད་པའི་སྐོར་གྱི་བརྙན་ཐུང་ཞིག་དང་། ཨ་རི་ནས་བཟོ་བསྐྲུན་ཞུས་པའི་བོད་དོན་དང་འབྲེལ་བའི་དངོས་བྱུང་བརྙན་ཐུང་བསྟན་སོང་།

 

བོད་ཀྱི་ལོ་རྒྱུས་ཡིག་ཆ།