༸སྐུ་མདུན་ལ་ཞི་བདེའི་གཟེངས་རྟགས་ཕུལ་ནས་ལོ་༣༠་འཁོར་བའི་དུས་སྟོན།

དེ་ཡང་། གཞུང་འབྲེལ་མཛད་སྒོའི་ཐོག སྐུ་མགྲོན་གཙོ་བོ་ལ་དྭགས་རང་སྐྱོང་ཡར་རྒྱས་ལྷན་ཚོགས་ཀྱི་སྡེ་དཔོན་སྐུ་ཞབས་རྒྱལ་པི་དབང་རྒྱལ་མཆོག་དང་། བོད་མིའི་སྒྲིག་འཛུགས་ཀྱི་མང་གཙོ་ཀ་བ་གསུམ་གྱི་མཛད་གཙོ་རྣམ་པ། བོད་དོན་རྒྱབ་སྐྱོར་བ་ཁག་ཅིག ཚོགས་སྡེ་ཁག་གི་སྐུ་ཚབ། སེར་སྐྱ་མི་མང་དང་སློབ་ཕྲུག་བཅས་མི་གྲངས་བརྒྱ་ཕྲག་ཁ་ཤས་འཛོམས་ནས་༸གོང་ས་མཆོག་གིས་ཞི་བདེ་གཟེངས་རྟགས་བཞེས་ནས་མི་ལོ་༣༠་འཁོར་བའི་དུས་དྲན་ཉིན་མོ་སྲུང་རྩིས་ཞུས་སོང་།

དེ་ནས་བོད་ཀྱིས་ཟློས་གར་ཚོགས་པ་དང་རྡ་ས་གཡས་གཡོན་དུ་ཡོད་པའི་སློབ་གྲྭ་ཁག་གི་སློབ་ཕྲུག་ཚོས་གཞས་སྣ་འཁྲབ་སྟོན་གནང་སོང་། དེའི་རྗེས། འཕྲོད་བསྟེན་ལས་ཁུངས་ནས་བོད་མིའི་སྤྱི་ཚོགས་ནང་འཕྲོད་བསྟེན་དང་འབྲེལ་བའི་སྲི་ཞུ་གནང་མཁན་ལས་བྱེད་གྲངས་ལ་ཞབས་ལོ་༢༥་འཁོར་བའི་གཟེངས་བསྟོད་ལེགས་སྐྱེས་འབུལ་སོང་། བོད་མིའི་སྒྲིག་འཛུགས་ལས་བྱེད་འདེམས་བསྐོ་ལྷན་ཁང་ནས་བགྲེས་ཡོལ་སྲི་ཞུ་བ་སྔ་བསྣུར་བ་ཀརྨ་དར་རྒྱས་ལགས་ལེགས་སོའི་ཕྱག་འཁྱེར་དང་བོད་རྗེ་སྲོང་བཙན་སྒོམ་པོའི་སྐུ་བརྙན་ཕུལ་སོང་།

དེ་ནས་སྲིད་སྐྱོང་བློ་བཟང་སེང་གེ་མཆོག་གིས་བཀའ་ཤག་གི་གསུང་བཤད་གནང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཞི་བདེ་དང་སྐྱེ་འགྲོ་ཀུན་ལ་བདེ་སྐྱིད་བསྐྲུན་ཆེད་ཆོས་ཁས་ལེན་མིན་ཀུན་གྱིས་ངོས་ལེན་ཐུབ་པའི་བྱམས་པ་དང་། སྙིང་རྗེ། བཟོད་བསྲན། གཞན་ཕན་སོགས་རྒྱུད་ལ་འཇགས་ཐབས་ཀྱི་འགྲོ་བ་མིའི་བཟང་སྤྱོད་གོང་སྤེལ་མཛད་བཞིན་པ་དང་། འཛམ་གླིང་ནང་ཆོས་ལུགས་ཁག་གིས་འགྲོ་ཀུན་བདེ་སྐྱིད་ངང་གནས་ཐབས་ཀྱི་བྱམས་པ་དང་བརྩེ་བ་སོགས་གཅིག་གྱུར་དུ་གསུངས་པ་བཞིན། ཆོས་ལུགས་ནང་ཕན་ཚུན་མཐུན་སྒྲིལ་དག་སྣང་སྦྱོང་ཐབས་སུ་ཁ་ཞེ་གཉིས་མེད་ཀྱི་གུས་བརྩི་དང་ཡི་རང་བསྔགས་བརྗོད་ཞུ་དགོས་པའི་ལམ་སྟོན་དང་སྣེ་ཁྲིད་མཛད་ཅིང་། འཛམ་གླིང་ཞི་བདེ་དང་འགྲོ་བ་ཡོངས་ལ་བདེ་སྐྱིད་བསྐྲུན་རྒྱུར་ཆོས་ལུགས་ཁག་གིས་ཞབས་འདེགས་ཞུ་ཐུབ་པའི་ཐུགས་རེ་དང་ཡིད་ཆེས་གནང་གི་ཡོད།

དེ་བཞིན་༸མགོན་པོ་གང་གིས་རྒྱལ་སྤྱིའི་ནང་འགྲོ་བ་མིའི་ཐོབ་ཐང་དང་། ཁོར་ཡུག་གི་གནད་དོན་སོགས་རྩོད་རྙོག་ཇི་ཡོད་རྣམས་གྲོས་མོལ་གྱི་ལམ་ནས་སེལ་དགོས་པ་དང་། རྡུལ་ཕྲན་མཚོན་ཆ་དང་དམག་འཁྲུག་མེད་པའི་འཛམ་གླིང་ཞི་བདེར་བསྒྱུར་རྒྱུ་དང་། ལྷག་པར་དུ་རྒྱ་ནག་གཞུང་གིས་བོད་སར་བཙན་འཛུལ་བྱས་པ་ནས་བཟུང་གནས་སྟངས་ཛ་དྲག་ཆེ་ཆུང་ཇི་ཡིན་ལ་མ་ལྟོས་པར་དུས་རྟག་ཏུ་ཕན་ཚུན་གཉིས་སྨན་དབུ་མའི་ལམ་གྱི་སྲིད་བྱུས་བརྒྱུད་ནས་འགྲིག་འཇགས་ཡོང་ཐབས་མཛད་ཅིང་། མཛད་འཕྲིན་དེ་དག་ལ་ངོས་འཛིན་དང་ཆེ་བསྟོད་ཞུ་ཆེད་ཕྱི་ལོ་ ༡༩༨༩ ལོར་འཛམ་གླིང་ནང་ཆེས་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ཡོད་ཅིང་། དེའང་ནོར་ཝེ་ནོ་སྦེལ་གཟེངས་རྟགས་ལྷན་ཚོགས་ཀྱི་ཆེ་བསྟོད་ཚིག་བརྗོད་ནང་། ལྷན་ཚོགས་ཀྱི་ངོས་ནས་༸གོང་ས་ཏཱ་ལའི་བླ་མ་མཆོག་གིས་བོད་མིའི་བདེན་དོན་འཐབ་རྩོད་འཚེ་མེད་ཞི་བའི་ལམ་དུ་འཁྲིད་གནང་མཛད་པ་མ་ཟད། བོད་མིའི་ཐུན་མོང་མ་ཡིན་པའི་ཆོས་དང་རིག་གཞུང་སྲུང་སྐྱོབ་ཆེད་དུ་གཉིས་མོས་གུས་བརྩི་དང་བཟོད་བསྲན་ཐོག་ནས་བོད་དོན་འགྲིག་འཇགས་ཡོང་ཐབས་གནང་བཞིན་པར་གཟེངས་བསྟོད་ཞུ་རྒྱུ་ཡིན།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཞི་བདེ་བསྐྲུན་རྒྱུར་ལྷག་བསམ་རྣམ་དག་གིས་ཐུགས་བརྩོན་མུ་མཐུད་གནང་དང་གནང་བཞིན་པར་བརྟེན། ནོ་སྦེལ་ཞི་བདེའི་གཟེངས་རྟགས་བཞེས་མཁན་གཞན་རྣམས་ཀྱིས་ཀྱང་༸མགོན་པོ་གང་ཉིད་ཆེས་གོང་དུ་བཀུར་བ་མ་ཟད། སྐྱེ་བོ་མང་པོས་ཞི་བདེ་དང་བྱམས་བརྩེའི་མཚོན་རྟགས་སུ་ངོས་འཛིན་ཞུ་ཞིང་། དེང་གི་ཆར་འཛམ་གླིང་ནང་གུས་བཀུར་དང་དགའ་མོས་ཆེ་ཤོས་ཞུ་ཡུལ་གྱི་དབུ་འཁྲིད་ཅིག་ཏུ་གྱུར་ཡོད། དེ་བཞིན་༸གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པ་དེས་བོད་ཀྱི་བདེན་དོན་ཐོག་ལའང་རྒྱལ་སྤྱིའི་ནང་གོ་རྟོགས་དང་། དོ་སྣང་། རྒྱབ་སྐྱོར་ཇེ་ཆེར་སོང་ཡོད། ཅེས་བརྗོད་སོང་།

བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་སྤྱི་འཐུས་ཀྱི་གསུང་བཤད་གནང་དོན། ལོ་ངོ་སུམ་ཅུའི་སྔ་རོལ་ཕྱི་ལོ་ ༡༩༨༩ ལོའི་ཟླ་ ༡༢ པའི་ཚེས་ ༡༠ རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཆེས་སྙན་གྲགས་ཅན་གྱི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པར་བོད་འབངས་སྤྱི་དང། ཁྱད་པར་མང་གཙོ་དང། རང་དབང། ཞི་བདེ། བྱམས་བརྩེ་བཅས་ལ་དགའ་བའི་འཛམ་གླིང་སྐྱེ་བོ་ཀུན་ཀྱིས་དགའ་དད་སྤྲོ་གསུམ་གྱི་སྒོ་ནས་མགོན་པོ་གང་གི་བླ་ན་མེད་པའི་མཛད་འཕྲིན་སྤྱི་བོར་བཀུར་ནས་དགེ་བཅུའི་དགའ་སྐྱིད་ཀྱི་དཔལ་ལ་རོལ་བའི་རྫོགས་ལྡན་གྱི་དུས་ཚིགས་ཁྱད་པར་ཅན་ཞིག་ཡིན།

དེ་ཡང་མཉམ་མེད་ཐུབ་པའི་དབང་པོའི་ལྟ་སྤྱོད་དྲི་མ་མེད་པའི་ཀློང་ནས་འཁྲུངས་པའི་རླབས་ཆེན་གྱི་ཐུགས་བསྐྱེད་བཟང་པོས་འགྲོ་བ་ཀུན་ལ་རང་ཆས་སུ་ཡོད་པ་བདེ་བ་འདོད་ཅིང་སྡུག་བསྔལ་མི་འདོད་པའི་མངོན་འདོད་ཀྱི་རྒྱུ་བྱམས་བརྩེའི་ནུས་སྟོབས་གཞི་རྩར་བཟུང་ནས། འགྲོ་བ་མིའི་ལྷན་སྐྱེས་བཟང་སྤྱོད་ཀྱི་ནུས་པ་གོང་སྤེལ་མཛད་ཐོག་ཁོར་ཡུག་སྲུང་སྐྱོབ་དང། ཆོས་ལུགས་མཐུན་སྒྲིལ། དམག་འཐབ་དང་འཁྲུག་རྩོད་ཞི་ཐབས་སོགས་འཛམ་གླིང་ཞི་བདེ་ལ་སྨན་པའི་ཀུན་ཁྱབ་འགན་འཁུར་གྱི་མཛད་འཕྲིན་བསམ་གྱིས་མི་ཁྱབ་པ་བསྐྱངས་དང་སྐྱོང་བཞིན་ཙམ་དུ་མ་ཟད། དུས་ཟིང་ཧ་ཅང་ཆེ་བའི་ཆེས་སྙིགས་དུས་ཀྱི་འཛམ་གླིང་ས་ཆེན་འདིར་བོད་ཆོས་ལྡན་ཞིང་གི་རིག་གཞུང་བཟང་པོ་རྣམས་མི་ཉམས་རྒྱུན་འཛིན་གྱིས་འཛམ་གླིང་ཡང་རྩེའི་བོད་གངས་ཅན་ལྗོངས་འདི་ཉིད་མ་འོངས་ཞི་བདེའི་བསྟི་གནས་ཤིག་ཏུ་བསྐྲུན་རྒྱུའི་བླ་ན་མེད་པའི་དགོངས་གཞི་ཟབ་མོས་བོད་འབངས་རྣམས་འཚེ་མེད་ཞི་བའི་ལམ་དུ་བཀྲི་བར་མཛད་གནང་།

ལྷག་པར་གཉིས་སྨན་དབུ་མའི་ལམ་གྱི་མཛད་བྱུས་བཟང་པོས་བོད་རྒྱའི་དཀའ་རྙོག་སེལ་ཐབས་མཛད་པའི་རླབས་ཆེན་གྱི་མཛད་བཟང་ལ་བློ་ལྡན་ཀུན་གྱིས་མངོན་པར་བསྟོད་དེ་ནོ་སྦེལ་ཞི་བདེའི་གཟེངས་རྟགས་དེ་བཞིན་འབུལ་ལམ་ཞུས་པ་བཞིན་སྐྱེ་འགྲོའི་ཕན་བདེའི་སླད་དུ་དགྱེས་བཞེས་མཛད་པ་སོགས་གསང་གསུམ་ཕན་བདེའི་མཛད་འཕྲིན་བསམ་གྱིས་མི་ཁྱབ་པ་བསྐྱངས་དང་སྐྱོང་བཞིན་པར་བཀའ་དྲིན་བླ་མེད་དུ་ཆེ་ཆེ་ཆེ་ཞེས་ལན་བརྒྱར་ཞུ་རྒྱུ་ཡིན། ཞེས་བརྗོད་སོང་།

དེ་ནས། འཕགས་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨ་ཇེ་སིང(Ajai Singh)་མཆོག་གིས་གསུང་བཤད་གནང་། སྐུ་མགྲོན་གཙོ་བོ་ལ་དྭགས་རང་སྐྱོང་ཡར་རྒྱས་ལྷན་ཚོགས་ཀྱི་དཔོན་སྐུ་ཞབས་རྒྱལ་པི་དབང་རྒྱལ་མཆོག་གིས་གསུང་བཤད་གནང་རྗེས་མཛད་སྒོ་དངོས་སུ་གྲོལ་སོང་།