༢༠༢༠་ལོའི་ཟླ་༡༢་ཚེས་༢༦་ཉིན་སྤེལ། བོད་མདོ་སྨད་རྨ་ཆེན་རྫོང་ནས་ཡིན་པའི་བོད་མི་ཞིག་གིས་དྲ་ལམ་ནས་༸གོང་ས་མཆོག་གི་བཀའ་སློབ་དང་། བོད་རང་བཙན་གྱི་པར་རིས་རྒྱུད་སྤེལ། བོད་མིའི་སྒྲིག་འཛུགས་ཀྱི་ལས་བྱེད་མི་སྣར་ལོ་གསར་འཚམས་འདྲི་བྱས་པ་བཅས་ལ་བརྟེན་ནས། རྒྱ་གཞུང་གིས་ཁོང་རྒྱལ་ཁབ་ཁ་བྲལ་གྱི་ཉེས་མིང་འོག་ལོ་གཅིག་གི་ཁྲིམས་ཐག་བཅད་འདུག

༢༠༢༠་ལོའི་ཟླ་༡༠་ཚེས་༢༩ཉིན་སྤེལ། ཉེ་ཆར་བོད་ཁམས༌འབྲི་རུ་རྫོང་ཆགས་རྩེ་ནས་སྐྱེས་པ་བསྟན་འཛིན་ཐར་པ་དང་བུད་མེད་ལྷ་མོ་གཉིས་རྒྱ་གཞུང་གིས་ཕྱི་ཕྱོགས་སུ་དངུལ་བཏང་བའི་ཉེས་མིང་འོག་ཏུ་འཛིན་བཟུང་བྱས་ཡོད་འདུག ལྷ་མོ་ལགས་རྒྱ་དམར་ཉེན་རྟོག་པས་མནར་གཅོད་ཚད་མེད་བཏང་བས་འདས་གྲོངས་སུ་ཕྱིན་འདུག

༢༠༢༠་ལོའི་ཟླ་༩་ཚེས་༢༢ཉིན། བོད་དབུས་གཙང་ཁུལ་དུ་རྒྱ་གཞུང་གིས་བོད་མི་འབུམ་ལྔ་བཙན་དབང་གིས་ངལ་རྩོལ་སྒྱུར་བཀོད་ཁང་ཞེས་པའི་ནང་དུ་བཏང་ནས། བསམ་བློ་དང་ཆབ་སྲིད་ཀྱི་སློབ་གསོ་སོགས་སྤྲད་ནས་བོད་དང་རྒྱ་ནག ཕྱི་རྒྱལ་ཁག་བཅས་ལ་ལས་ཀ་བྱེད་དུ་གཏོང་གི་ཡོད་པའི་གནས་ཚུལ་ཐོན་འདུག རྒྱལ་ཁབ་༡༦་གི་གྲོས་ཚོགས་འཐུས་མི་༦༠་ལྷག་གིས་གནད་དོན་དེའི་ཐད་ལ་ཛ་དྲག་གི་ལས་འགུལ་སྤེལ་དགོས་པའི་འབོད་སྐུལ་ཞུས་འདུག

༢༠༢༠་ལོའི་ཟླ་༡༡་ཚེས་༢༧ཉིན་སྤེལ། བོད་མདོ་སྨད་རྔ་བ་ནས་ཡིན་པའི་གྲྭ་རིན་ཆེན་ཚུལ་ཁྲིམས་ལགས་རྒྱ་གཞུང་གིས་ཕྱི་རྒྱལ་དུ་ཡོད་པའི་བོད་མི་དང་མཉམ་དུ་བོད་དོན་གླེང་སློང་བྱས་པ་དང་། ཕྱི་ལོག་ནས་དཔེ་ཆ་གལ་ཆེན་མངགས་ཉོ་བྱས་ནས་བོད་ནང་གི་ས་ཆ་མང་པོར་འགྲེམས་སྤེལ་བྱས་ཡོད་པ་སོགས་ཀྱིས་ཉེས་མིང་འོག་འཛིན་བཟུང་བྱས་ཡོད་འདུག

༢༠༢༠་ལོའི་ཟླ་༡༠་ཚེས་༡༧ཉིན། རྒྱལ་གཅེས་དཔའ་བོ་ཆབ་སྲིད་བཙོན་ཟུར་སྟག་སྣ་འཇིགས་མེད་བཟང་པོ་ལགས་སུད་སིའི་ས་གནས་ཊུར་བྷེན་ཐལ་ཞེས་པའི་རྒས་གསོ་ཁང་ཞིག་ཏུ་དགོངས་པ་རྫོགས་པའི་ཡིད་སྐྱོ་བའི་གནས་ཚུལ་ཐོན་ཡོད་པ་དང་། བོད་མི་ཚོས་ཁོང་ལ་མྱ་ངན་གུས་འདུད་དང་མཆོད་འབུལ་སྨོན་ལམ་གནང་སོང་།

༢༠༢༠་ལོའི་ཟླ་༧་ཚེས་༡༤ཉིན་སྤེལ། ཉེ་ཆར་བོད་རྨ་ལྷོ་ཁུལ་རྩེ་ཁོག་རྫོང་གི་བོད་མི་མཁའ་འགྲོ་ཚེ་བརྟན་དང་ཚེ་རྒོ་གཉིས་ཀྱིས་༸གོང་ས་མཆོག་ལ་བསྟོད་གླུ་ཕུལ་བར་བརྟེན། རྒྱ་གཞུང་གིས་ཁོང་གཉིས་ལ་རྒྱལ་ཁབ་ཁ་བྲལ་དང་རྒྱལ་ཁབ་ཀྱི་གསང་བ་ཕྱིར་བསྒྲགས་ཞེས་པའི་ཉེས་མིང་བཏགས་ནས་ལོ་གསུམ་དང་ལོ་བདུན་གྱི་ཁྲིམས་ཐག་བཅད་ཡོད་འདུག