24
Thu, Oct

༢༠༡༩་ལོའི་ཟླ་༡༠་ཚེས་༣་ཉིན། དམིགས་བསལ་ཚོགས་ཆེན་ཐེངས་གསུམ་པ་དབུ་འཛུགས་གནང་སོང་།

བོད་དོན་གསར་འགྱུར།
Typography

༢༠༡༩་ལོའི་ཟླ་༡༠་ཚེས་༣་ཉིན། བཞུགས་སྒར་རྡ་སའི་གངས་སྐྱིད་ཚོགས་ཁང་གསར་པའི་ནང་དུ། བོད་མི་མང་སྤྱི་འཐུས་ལྷན་ཚོགས་དང་། བཀའ་ཤག་ཐུན་མོང་ནས་བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༩ པའི་འོག འཛམ་གླིང་རྒྱལ་ཁབ་ཁག་ ༢༤ ནས་ཚོགས་བཅར་བ་མི་གྲངས་ ༣༤༠ མཉམ་འཛོམས་ཐོག དམིགས་བསལ་ཚོགས་ཆེན་ཐེངས་གསུམ་པ་དབུ་འཛུགས་གནང་སོང་།

དེ་ཡང་། དབུ་འབྱེད་ཀྱི་མཛད་སྒོའི་ཐོག་ཏུ། དཔལ་ལྡན་ཁྲིམས་ཞིབ་པ་ཆེ་བ་མཆོག་དང་། ཁྲིམས་ཞིབ་པ་གཞན་རྣམ་གཉིས་མཆོག བོད་མི་མང་སྤྱི་འཐུས་ཚོགས་གཙོ། སྤྱི་འཐུས། སྲིད་སྐྱོང་མཆོག བཀའ་བློན་རྣམ་པ། ཁྲི་ཟུར་དང་བཀའ་ཟུར་རྣམ་པ། ཆོས་བརྒྱུད་ཁག་གི་སྐུ་ཚབ་རྣམ་པ། རང་དབང་ཅན་གྱི་སྡེ་ཚན་འགན་འཛིན་རྣམ་པ། གཞུང་ཞབས་སྲི་ཞུ་བ། རྒྱ་བལ་འབྲུག་གསུམ་གྱི་ས་གནས་འཐུས་མི་ཚོགས་འདུའི་སྐུ་ཚབ་དང་། ས་གནས་འགོ་འཛིན་རྣམ་པ། ཕྱི་རྒྱལ་ཡུལ་གྲུ་ཁག་གི་བོད་རིགས་སྤྱི་མཐུན་ཚོགས་པ་དང་བོད་རིགས་ཚོགས་པའི་སྐུ་ཚབ་རྣམ་པ། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་རྣམ་པ་བཅས་འཛམ་གླིང་རྒྱལ་ཁབ་ཁག་ ༢༤ ནས་ཚོགས་བཅར་བ་མི་གྲངས་ ༣༤༠ འདུ་འཛོམས་བྱས་འདུག

མཛད་སྒོའི་ཐོག་མར། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་གིས་ཚོགས་ཆེན་དབུ་འབྱེད་ཀྱི་གསུང་བཤད་གནང་དོན། དམིགས་བསལ་ཚོགས་ཆེན་ཐེངས་ ༣ པ་འདི་བསྡུ་བསྐོང་དགོས་དོན་གཙོ་བོ་ནི་བརྗོད་གཞི་དོན་ཚན་གཉིས་ཏེ། ༡༽ བོད་མིའི་སྒྲིགས་འཛུགས་ཀྱི་ལྔ་དང་ལྔ་བཅུའི་ལས་འཆར་དང། ༢། ༸རྒྱལ་དབང་སྐུ་ཕྲེང་ན་རིམ་དང་བོད་མི་མང་དབར་གྱི་འབྲེལ་ལམ་སྐོར་བཅས་གཉིས་ཀྱི་ཐོག་བཀའ་བསྡུར་གནང་རྒྱུའི་ཆེད་བསྡུ་བསྐོང་གནང་བ་ཞིག་རེད། བོད་མིའི་སྒྲིགས་འཛུགས་འཛིན་སྐྱོང་བཀའ་ཤག་ནས་ཐུགས་འགན་བཞེས་ཏེ་ལྔ་དང་ལྔ་བཅུའི་འཆར་སྣང་ཞེས་པའི་ལས་འཆར་འོག་ཕྱི་ལོ་ ༢༠༡༧ ཟླ་ ༡༠ པའི་ནང་འབྱུང་འགྱུར་བོད་ཀྱི་ཆབ་སྲིད་མདུན་ལམ་གཏན་འབེབས་གནང་ཕྱོགས་ཀྱི་གླེང་སྟེགས་ཞེས་པའི་རྒྱལ་སྤྱིའི་ཚོགས་འདུ་ཞིག་རྡ་ས་ཁུལ་དུ་བསྐོང་ཚོགས་གནང་ཡོད་པ་དང། དེའི་རྗེས་ཕྱི་ལོ་ ༢༠༡༨ ཕྱི་ཟླ་ ༨ པའི་ནང་ལྔ་དང་ལྔ་བཅུའི་ན་གཞོན་ཚོགས་འདུ། འབྱུང་འགྱུར་མདུན་ལམ་བྱུས་འགོད་ཞེས་པ་ཞིག་འཚོགས་གནང་ཡོད། དེ་མཚུངས་ཕྱི་ལོ་ ༢༠༡༨ ཕྱི་ཟླ་༩ པའི་ནང་བོད་མིའི་སྤྱི་ཚོགས་སྲ་བརྟན་ཡོང་ཐབས་སུ་ཕྱི་ནང་གི་མཁས་དབང་དང་ཁྱད་མཁས་མི་སྣ། སློབ་སྟོན་པ། རོགས་ཚོགས་ཀྱི་སྐུ་ཚབ། སྤྱི་ཚོགས་ཀྱི་འཐུས་མི། བོད་ཀྱི་གྲོགས་པོ་སོགས་དོན་གཉེར་ཅན་ཀྱི་མི་སྣ་ཁག་གང་མང་ལས་གྲུབ་པའི་གལ་ཆེའི་ཚོགས་འདུ་བསྐོང་ཚོགས་གནང་ཡོད། ཚོགས་འདུ་དེའི་བརྗོད་གཞིར་ཆོས་རིགས་སྲ་བརྟན། བོད་མིའི་སྤྱི་ཚོགས་ཀྱི་འཚོ་རྟེན་སྲ་བརྟན། བོད་མིའི་ཤེས་ཡོན་གོང་སྤེལ། བོད་མིའི་སྤྱི་ཚོགས་ཀྱི་འཕྲོད་བསྟེན་སྲ་བརྟན་བཅས་ཡིན། ཉེ་ཆར་ཕྱི་ལོ་ ༢༠༡༩ ཟླ་ ༨ པའི་ཚེས་ ༡༦༌༌༡༩ བར་སླར་ཡང་ལྔ་དང་ལྔ་བཅུའི་ན་གཞོན་ཚོགས་འདུ། འབྱུང་འགྱུར་བོད་ཀྱི་མདུན་ལམ་བྱུས་འགོད་ཞེས་པའི་ཚོགས་འདུ་གཉིས་པ་ཞིག་འཚོགས་གནང་ཡོད། མདོ་དོན་བཀའ་ཤག་ནས་ད་བར་བོད་མིའི་ལྔ་དང་ལྔ་བཅུའི་འཆར་སྣང་ལས་འཆར་དང་འབྲེལ་བར་ཚོགས་འདུ་སྔ་རྗེས་ཐེངས་བཞི་བསྡུ་བསྐོང་གནང་ཡོད། འཛིན་སྐྱོང་བཀའ་ཤག་ནས་ཚོགས་འདུ་སོ་སོར་བརྗོད་གཞི་གཏན་འབེབས་ཡོད་པ་སོ་སོའི་ཐོག་ཚོགས་བཅར་བ་རྣམ་པའི་རྒྱབ་གཉེར་བསམ་འཆར་གང་བྱུང་བ་རྣམས་ཕྱོགས་བསྒྲིགས་གནང་ཡོད་པ་དེ་ཚོ་ཁོང་རྣམ་པའི་དགོངས་ཚུལ་ཁག་ཅིག་རེད། ད་དུང་དེའི་ཐོག་ཚོགས་ཆེན་འདིའི་ཐོག་ས་གནས་སོ་སོ་ནས་ཕེབས་པའི་སྐུ་ཚབ་རྣམ་པ་བརྒྱུད་ཁྱབ་ཁོངས་རྒྱ་ཆེའི་བོད་མི་གཞི་རིམ་མང་ཚོགས་ཀྱི་དགོངས་འཆར་སླེབས་ཐུབ་དགོས་པ་དང་སྤུངས་དགོས་པ་ནི་གལ་ཆེའི་ནང་ནས་གལ་ཆེན་ཞིག་ཡིན། ས་གནས་ས་ཐོག་ཏུ་དངོས་སུ་ལག་བསྟར་བྱེད་མཁན་གཞི་རིམ་མང་ཚོགས་རྣམས་ཆགས་ཀྱི་ཡོད་སྟབས་བསམ་འཆར་ག་ཚོད་མང་བ་བྱུང་ཡང་ལེགས་པའི་རང་བཞིན་ཡིན་ཞེས་སོགས་ངོ་སྤྲོད་གནང་སོང་།

དེའི་རྗེས། སྲིད་སྐྱོང་མཆོག་གིས་གསུང་བཤད་གནང་དོན། བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་འཆར་སྣང་གི་བྱུང་རིམ་ལྟར་ན། ཕྲན་རང་བཀའ་བློན་ཁྲི་པའི་དམ་འབུལ་རྗེས་༸རྒྱལ་བའི་གཟིམ་ཆུང་མཇལ་ཁ་ཡང་ཡང་བཅར་རྒྱུའི་སྐབས་ཐོབ་ཀྱི་ཡོད། སྐབས་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ “ད་ཁྱེད་རང་གིས་ཆབ་སྲིད་ཀྱི་འགན་འཁྱེར་དགོས་པ་རེད། འཆར་གཞི་གང་གདིང་བ་ཡིན་ནའང་ངོས་རང་མེད་པ་ནང་བཞིན་བྱས་ནས་འཆར་གཞི་སྒྲིགས་ཤོག་ཨང་ ” ཞེས་བཀའ་སློབ་ཕེབས་ཡོད། ཕྲན་རང་བོད་མི་ཞིག་ཡིན་པ་དང་། གཉིས་ནས་ནང་པ་ཞིག་ཡིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་གུས་དང་བརྩི་བཀུར་ཞུ་མཁན་ཞིག་ཡིན་པའི་ཆ་ནས་སོ་སོའི་བློ་ཡུལ་ལ་མ་ཤོང་བ་ལྟ་བུ་ཞིག་བྱུང་། སེམས་པ་ཧ་ཅང་ལྗིད་པོ་ཆགས་པའི་བཀའ་སློབ་དེ་འདྲ་ཞིག་ཕེབས་པར་བརྟེན། བཀའ་ཤག་ཏུ་ཡིན་ནའང་བཀའ་བློན་གཞན་སུ་ལའང་དེའི་སྐོར་གང་ཡང་ཞུས་མེད། གཟིམ་ཆུང་མཇལ་ཁ་རིམ་པར་བཅར་བའི་སྐབས་སུ་མགོན་པོ་གང་ཉིད་མཆོག་གིས་བཀའ་སློབ་ཐེངས་མང་པོ་ཕེབས་སྟབས། ༸གོང་ས་མཆོག་གིས་བཀའ་སྒྲུབ་དགོས་པ་ནི་ངའི་འགན་རྩ་ཆེ་ཤོས་དེ་ཡིན་པར་བརྟེན། བསམ་བློ་མང་པོ་བཏང་མཐར་ལྔ་དང་ལྔ་བཅུ་འདི་བསམ་བློར་འཁོར་བྱུང་། མགོན་པོ་གང་ཉིད་མཆོག་ལ་མཚོན་ན། བོད་ཀྱི་རྩ་དོན་དང་། གཞིས་བྱེས་བོད་མིའི་གནད་སྟངས། བོད་མིའི་སྒྲིག་འཛུགས་བཅས་ཧ་ཅང་གལ་ཆེན་པོར་བརྩི་བཞིན་ཡོད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་རྟག་ཏུ་། རེ་བ་བཟང་ས་ནས་རྒྱག་དགོས། གྲ་སྒྲིག་སྡུག་ས་ནས་བྱེད་དགོས་པའི་བཀའ་སློབ་ལམ་སྟོན་ལྟར། བོད་མིའི་སྒྲིག་འཛུགས་ནས་བོད་ཀྱི་རྩ་དོན་ཆེད་འབྱུང་འགྱུར་ལོ་ལྔའི་ནང་དབུ་མའི་ལམ་གྱི་སྲིད་བྱུས་གཞི་རྩར་བཟུང་བའི་ཐོག་ནས་མིང་དོན་མཚུངས་པའི་རང་སྐྱོང་ཡོང་ཐབས་བྱ་རྒྱུ་དང་། དེ་བཞིན་ལོ་ལྔ་བཅུའི་ནང་བོད་ཀྱི་རྩ་དོན་དང་། བོད་མིའི་སྒྲིག་འཛུགས། བོད་ཀྱི་ཐུན་མིན་སྐད་ཡིག་དང་། ཆོས། རིག་གཞུང་མི་ཉམས་རྒྱུན་འཛིན་ཐུབ་ཐབས་བྱ་རྒྱུ་རེད།

ད་ལྟར། ༸གོང་ས་༸སྐྱབས་མགོན་ཆེན་པོ་མཆོག་ཕྱི་རྒྱལ་ཡུལ་གྲུ་ཁག་ཏུ་ཆིབས་སྒྱུར་བསྐྱང་གནང་མཛད་རྒྱུའི་མཛད་འཆར་ཇེ་ཉུང་དུ་འགྲོ་བཞིན་ཡོད་པར་བརྟེན། ༸གོང་ས་༸སྐྱབས་མགོན་ཆེན་པོ་མཆོག་གིས་ད་བར་མཛད་འཕྲིན་བསྐྱངས་པ་དེ་དག་མི་ཉམས་གོང་འཕེལ་གཏོང་རྒྱུའི་འགན་བོད་མི་མང་ཚོགས་ལ་བབ་ཡོད། ཕྱོགས་མཚུངས་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་དགོངས་སྒྲུབ་རྒྱུ་ནི་ང་ཚོའི་ལས་འགན་ཞིག་ཡིན། ༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་བཞིན་ང་ཚོས་བྱེད་ཐུབ་པ་གང་ཡོད་པ་དེའི་ཐོག་དགོངས་པ་བཞེས་ནས་བཀའ་ཤག་གིས་འཆར་གཞི་བཏིང་བ་ཞིག་རེད། གཞན་ཡང་། རྒྱ་ནག་གཞུང་གིས་༸གོང་ས་ཏཱ་ལའི་བླ་མ་མཆོག་གི་༸སྐུའི་ཡང་སྲིད་ཐག་གཅོད་ཞུ་རྒྱུའི་ཐད་ཐེ་བྱུས་བྱ་རྒྱུའི་ཆབ་སྲིད་ཀྱི་རེ་སྟོང་བཅང་བཞིན་ཡོད་པ་དེ་དག་ལམ་ལྷོངས་ནམ་ཡང་ཡོང་རྒྱུ་མིན་སྐོར་སོགས་གསུང་བཤད་གནང་སོང་། དེའི་རྗེས། ཚོགས་མི་རྣམས་སྡེ་ཚན་ཆ་བགོས་ལྟར་ཚོགས་ཆུང་ཚུགས་ཡུལ་སོ་སོར་ཕེབས་ནས་བསམ་འཆར་ཐོག་བགྲོ་གླེང་གནང་རྒྱུ་ཡིན་འདུག

 

 

བོད་ཀྱི་ལོ་རྒྱུས་ཡིག་ཆ།