མཁན་རིན་པོ་ཆེ་བཀྲ་ཤིས་ཚེ་རིང་མཆོག་ལ་དབྱིན་ཇི་གོང་མའི་གཟེངས་རྟགས་གནང་རྒྱུ་ཡིན་འདུག

དེ་ཡང་། ༢༠༡༩ལོའི་ཟླ་༦་ཚེས་༡༤་ཉིན་རྒྱབ་ཚོུད་ ༢༌༣༠ ཐོག སེར་སྨད་གྲྭ་ཚང་གི་ཕྱག་མཛོད་ཁང་དང་དབུ་མཛད་དགེ་བསྐོས་བཅས་ཀྱིས་གྲྭ་ཚང་གི་ཐོག་ཁར་མཁན་རིན་པོར་ཆེར་མཎྜལ་རྟེན་གསུམ་འདེགས་འབུལ་དང་རྟེན་འབྲེལ་མཇལ་དར་ཕུལ་བའི་ཐོག་ནས་རྟེན་འབྲེལ་གྱི་མཛད་སྒོ་སྟབསས་བདེ་ཞིག་ཚོགས་གནང་སོང་། མཛད་སྒོའི་ཐོག་མཁན་རིན་པོ་ཆེ་མཆོག་གིས་གསར་འགོད་པ་ཞིག་ལ་གསུང་དོན། གཟེངས་རྟགས་གནང་རྒྱུའི་གཏན་འཁེལ་བྱུང་བས་གནས་ཚུལ་མཁྱེན་རྟོགས་བྱུང་སྐབས་གཙོ་བོ་སྤྱི་ནོར་གོང་ས་སྐྱབས་མགོན་ཆེན་པོ་མཆོག་གི་དབུས་པས་དགེ་བའི་བཤེས་གཉེན་རྣམ་པ་དང་གདན་ས་ཚོའི་བཀྲིན་ལ་བརྟེན་ནས་ཁོང་གི་འདས་པས་ལོ་ངོ་༢༠་རྩ་གྲངས་རིང་དབྱིན་ཡུལ་གྱི་ནང་ནང་ཆོས་ཀྱི་ཐོག་ཞབས་ཞུ་སྒྲུབ་ཐུབ་པ་ཙམ་ལས་གཞན་གཟེངས་རྟགས་ཐོབ་པ་དེས་ཁོང་ལ་དམིགས་བསལ་ཐུགས་ཚོར་གང་ཡང་བྱུང་མེད་སྐོར་གསུངས་པ་མ་ཟད།

ཡང་འདི་ལྟར་གསུང་དོན་ལ་སྤྱིར་བཏང་གཟེངས་རྟགས་གོ་སྒྲིག་ཚོགས་ཆུང་ནས་འདི་ལོ་ཕྱི་ཟླ་༤་པའི་ནང་སེར་སྨད་མཁན་རིན་པོ་ཆེ་མཆོག་ལ་ཡིག་ངག་གཉིས་ཐོག་ནས་གཟེངས་རྟགས་དེ་ངོས་བཞེས་གནང་མིན་སོགས་དང་འབྲེལ་བས་བཀའ་འདྲི་དགོངས་སྐོར་ཞུས་གནང་ཡོད་ཅིང་། སྐབས་དེར་མཁན་རིན་པོ་ཆེ་མཆོག་ལ་གཟེངས་རྟགས་དེ་ངོས་བཞེས་གནང་རྒྱུའི་ཐུགས་འདོད་དེ་ཙམ་མེད་ཀྱང་མཁན་རིན་པོ་ཆེ་མཆོག་གི་ཐུགས་ངོ་མཁྱེན་པས་དབྱིན་གཞུང་ནང་གི་ལས་བྱེད་མི་སྣ་ཚོས་གཟེངས་རྟགས་དེ་ངོས་བཞེས་གནང་བ་ཡིན་ན་བོད་མིའི་མཚན་མཐོང་ལ་ཕན་ཐོག་ཡོད་པས་དགོངས་ཚུལ་བཏོན་པ་ལྟར། ཁོང་ནས་ཀྱང་དེ་མཚུངས་ངོ་བཞེས་གནང་པ་ཞིག་ཡིན་པ་གསུང་གནང་འདུག

མཁན་རིན་པོ་ཆེ་བཀྲ་ཤིས་ཚེ་རིང་མཆོག་ནི་ཕྱི་ལོ་ ༡༩༥༨ ལོར་བོད་ཀྱི་ནུབ་ཕྱོགས་སུ་ཆགས་པའི་པུ་རང་ཁུལ་དུ་འཁྲུངས་ཤིང་། བོད་ནས་བྲོས་བྱོལ་དུ་རྒྱ་གར་ལ་ཕེབས་རྗེས་ནང་མི་དང་ལྷན་དུ་ལྷོ་ཕྱོགས་བོད་མིའི་གཞིས་ཆགས་སུ་སེར་སྨད་གྲྭ་ཚང་ཀོང་པོ་ཁང་ཚན་དུ་ཆོས་ཞུགས་དང་འབྲེལ་གཞུང་ཆེན་ཀ་པོད་ལྔར་གསན་བསམ་སློབ་གཉེར་མཐར་ཕྱིན་གནང་སྟེ། ཕྱི་ ལོ་ ༡༩༩༠ ལོར་དགེ་བཤེས་ལྷ་རམས་པའི་མཚན་གནས་བཞེས་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་དགོངས་ལམ་སྟོན་དང་འབྲེལ་ནས་ཕྱི་ལོ་ ༡༩༩༡ ལོ་ནས་བཟུང་ཡོ་རོབ་དང་། བྱང་ཨ་མི་རི་ཀ། དེ་བཞིན་ཨེ་ཤ་ཡ་རྒྱལ་ཁབ་སོགས་ནང་བོད་བརྒྱུད་ནང་བསྟན་ཐད་སློབ་ཁྲིད་གནང་གི་ཡོད་པ་རེད་འདུག

དགེ་བཤེས་བཀྲ་ཤིས་ཚེ་རིང་ལགས་ནས་ཕྱི་ལོ་ ༢༠༡༧ ལོར་ཨེ་ཤ་ཡ་དང་ཨ་ཕི་རི་ཀའི་ཐོག་གི་ལོན་ཌོན་གཙུག་ལག་སློབ་གཉེར་ཁང་ནས་མི་རྒྱུད་དཔྱད་རིག་ཐད་གཙུག་ལག་རབ་འབྱམས་ཀྱི་སློབ་མཐར་སོན་པ་དང་། ཁོང་ནས་དབྱིན་ཡིག་ཐོག་ The Foundation of Buddhist Thought འམ་ནང་པའི་ལྟ་གྲུབ་ཀྱི་རྨང་གཞི་ཞེས་པའི་ཕྱག་དེབ་པོད་ ༧ ཙམ་བརྩམས་ཡོད་པ་མ་ཟད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁོང་སེར་སྨད་ཐོས་བསམ་ནོར་གླིང་གྲྭ་ཚང་གི་མཁན་ཐོག་ ༩༡ པར་བསྐོ་གཞག་གི་བཀའ་ཡིག་ཕེབས་ཏེ་ཕྱི་ལོ་ ༢༠༡༨ ཟླ་ ༦ ཚེས་ ༡༧ ཉིན་སེར་སྨད་ཐོས་བསམ་ནོར་གླིང་གྲྭ་ཚང་དུ་དངོས་སུ་མཁན་པོའི་ཁྲི་འདོན་མཛད་སྒོ་གཟབ་རྒྱས་གནང་ཡོད་པ་དང་ད་ལྟ་མཁན་པོའི་མཛད་འགན་བཞེས་མུས་ཡིན་པ་རེད།

ལྷོ་ཕྱོགས་ནས་བྱམས་པས།