རང་དབང་ལུང་པའི་བཟོ་གྲྭ་ཞིག་རྒྱ་ནག་གི་གནོན་ཤུགས་འོག་ལྷུང་བ།

དེ་ཡང་། ཟླ་འདིའི་ཕྱི་ཚེས་ ༤ ཉིན། ༧གོང་ས་མཆོག་གི་ལེགས་བཤད་ཅིག་དང་མཉམ་དུ་རླངས་འཁོར་བཟོ་གྲྭ་མཱེར་སེ་ཌིའི་རླངས་འཁོར་ཞིག་དང་མཉམ་དུ་ཁྱབ་བསྒྲགས་སྤེལ་ཞིང་། ཕྱི་ཚེས་ ༦ ཉིན་རྒྱ་ནག་གི་གནོན་ཤུགས་འོག་བཟོ་གྲྭ་དེའི་ངོས་ནས་རྒྱ་ནག་གིས་བཟོས་པའི་བརྒྱུད་ལམ་Weiboནང་དུ་བཟོད་གསོལ་ཞུས་ཡོད་པ་མ་ཟད། ཞབས་མཆན་རྒྱག་ས་བཀག་ཡོད་འདུག

གཞན་ཡང་། བཟོ་གྲྭ་འདིའི་བཟོད་གསོལ་དང་མཉམ་དུ། རྒྱལ་སྤྱིའི་དྲང་བདེན་ཅན་གྱི་བརྒྱུད་ལམ་ཁག་ནས་"བཟོད་གསོལ་དེ་ནི་རྒྱ་ནག་གི་སྤྱི་ཚོགས་དྲ་རྒྱ་གཅིག་པུའི་ཐོག་ནས་ཁྱབ་བསྒྲགས་བྱེད་དགོས་དོན་ཅི་ཡིན་ནམ། རྒྱལ་སྤྱིའི་རང་བཞིན་ཅན་གྱི་སྤྱི་ཚོགས་དྲ་རྒྱའི་ཐོག་ནས་བཟོད་གསོལ་ཞུ་རྒྱུའི་དགོས་འདུན་བཏོན་པ། དེ་བཞིན་“གལ་ཏེ་ཁྱེད་རང་ལ་རྒྱ་ནག་གི་ཁྲོམ་ར་དགོས་ན་བཟོད་གསོལ་ཞུ་རོགས། ཏཱ་ལའི་བླ་མའི་ཚིག་སྤྱོད་རྒྱུ་དེ་གདམ་ག་ཡག་པོ་ཞིག་མ་རེད། གལ་སྲིད་ང་ཚོའི་ཁྱབ་བསྒྲགས་ནང་ཧི་ཏྲི་ལེར་གྱི་ཚིག་སྤྱད་ན་ཁྱོད་རང་ཚོས་ག་རེ་བསམ་ས་རེད།”"ཞེས་འཁོད་ཡོད་འདུག

དེ་ལྟར། ཚོང་ལས་ཁང་དེས་སྤེལ་བའི་བཟོད་གསོལ་གྱི་ཡི་གེའི་ནང་། “ང་ཚོའི་ཚོང་ལས་ཁང་གིས་རྒྱལ་སྤྱིའི་རང་བཞིན་ཐོག་བཀོལ་སྤྱོད་བྱེད་བཞིན་པའི་སྤྱི་ཚོགས་དྲ་རྒྱའི་ནང་། ཤིན་ཏུ་ནོར་འཁྲུལ་ཅན་གྱི་ཡི་གེ་ཞིག་ཁྱབ་བསྒྲགས་བྱས་ཡོད་པ་ད་ནང་ང་ཚོས་ཤེས་རྟོགས་བྱུང་། དེར་ང་ཚོས་ཁ་ཞེ་གཉིས་མེད་ངང་ནས་དགོངས་དག་ཞུ་བཞིན་ཡོད།”ཅེས་དང་། “ང་ཚོས་གང་མགྱོགས་ཅི་མགྱོགས་ངང་ཁྱབ་བསྒྲགས་དེ་བསུབ་ཟིན་ཡང་། དེས་ང་ཚོའི་ལས་རོགས་རྣམས་ཐེ་བའི་རྒྱ་ནག་ནང་གི་མི་མང་ཚོའི་སེམས་ཁམས་ལ་གནོད་སྐྱོན་ག་ཚོད་བཟོས་ཡོད་མེད་ང་ཚོས་གསལ་པོ་ཤེས་སོང་། དེ་ལ་ང་ཚོས་ཁ་ཞེ་གཉིས་མེད་ངང་ནས་བཟོད་གསོལ་ཞུ་བཞིན་ཡོད་”ཅེས་འཁོད་འདུག་པ་དང་།

དེ་བཞིན་གནད་དོན་དེ་དང་འབྲེལ་བའི་ཐོག་ནས་སྐྱོན་བརྗོད་དང་མཆན་འདེབས་བྱུང་བ་ཚང་མ་ངོས་ལེན་ཡོད་པ་དང་། རྒྱ་ནག་གི་རིག་གནས་དང་རིན་ཐང་ལྟ་ཚུལ་ཐད་ཀྱི་ཆུ་ཚད་མཐོ་རུ་གཏོང་རྒྱུར་འབད་བརྩོན་བྱེད་རྒྱུ་ཡིན་པ། གནད་དོན་དེ་འདྲའི་རིགས་ཡང་བསྐྱར་མི་ཡོང་རྒྱུའི་ཐོག་འབད་རྒྱུ་ཡིན་པ་བཅས་འཁོད་འདུག་པ་བཅས།།