20
Fri, Sep

༢༠༡༩ལོའི་ཟླ་༥པའི་ཚེས་༢༠ཉིན། ༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་རྡ་ནས་ཝི་ཏི་ནམ་གྱི་དད་ལྡན་པ་ཁག་ཅིག་ལ་མཇལ་ཁ་གནང་ཞིང་། སྐབས་དེར། མགོན་པོ་གང་ཉིད་ཀྱིས་གསུང་དོན། ང་ཚོས་རྒྱུན་ལྡན་ནང་ཆོས་ལ་སློབ་གཉེར་བྱ་རྒྱུའི་ཐད་དེ་ཙམ་དོ་སྣང་བྱེད་ཀྱི་མི་འདུག མཁན་ཆེན་ཞི་བ་འཚོས་བོད་མི་ཚོ་ལ། དད་པ་ཙམ་གྱིས་མི་ཆོག་པར་ནང་ཆོས་ལ་སློབ་གཉེར་བྱེད་དགོས་པའི་བཀའ་སློབ་དེ་ཧ་ཅང་གནད་འགག་ཆེན་པོ་མཐོང་གི་འདུག ང་ཚོ་བོད་མི་ཚོས་ཁོང་གི་བཀའ་སློབ་དེ་དག་ལྷག་བསམ་རྣམ་དག་ཐོག་ནས་ལག་བསྟར་བྱེད་བཞིན་ཡོད། ཅེས་དང་། དེང་སྐབས་ཚན་རིག་པ་མང་པོས་བརྟག་དཔྱད་བྱས་པ་བརྒྱུད། མིའི་གཞི་རྩའི་ལྷན་སྐྱེས་རང་བཞིན་དེ་བྱམས་བརྩེ་ལྡན་པ་ཡིན་སྐོར་བརྗོད་ཀྱི་འདུག དེར་རྒྱུ་མཚན་ཡོད། ང་ཚོ་སྤྱི་ཚོགས་ལ་བརྟེན་པའི་སྲོག་ཆགས་ཡིན། ང་ཚོ་སྐྱེ་ཙམ་ཉིད་ནས་མའི་བྱམས་བརྩེས་བསྐྱངས་པ་རེད། ཅེས་གསུངས་སོང་།

༢༠༡༩ལོའི་ཟླ་༥ཚེས་༡༨ཉིན། རྡ་སའི་གཙུག་ལག་ཁང་གི་ཉེ་འགྲམ་དུ་ཡོད་པའི་བོད་ཀྱི་འགྲེམས་སྟོན་ཁང་གིས་རྒྱལ་སྤྱིའི་འགྲེམས་སྟོན་ཉིན་མོ་བསྟུན་བོད་ཀྱི་འགྲེམས་སྟོན་ཁང་དབུ་བརྙེས་ནས་ལོ་ངོ་༤འཁོར་བའི་ཉིན་མོ་སྲུང་བརྩི་ཞུས་སོང་།

༢༠༡༩ལོའི ཟླ་༥ ཚེས་༡༧ ཉིན། རྒྱ་གར་ལྷོ་ཕྱོགས་སུ་བྱེས་ཀྱི་གདན་ས་བཀྲ་ཤིས་ལྷུན་པོས་རྒྱབ་སྐྱོར་དང་བོད་ཀྱི་དགུ་བཅུ་གསུམ་ལས་འགུལ་ཚོགས་པས་གོ་སྒྲིག་འོག་པཎ་ཆེན་སྐུ་ཕྲེང་བཅུ་གཅིག་པ་མཆོག་དང་ཉེ་ཆར་ཁོང་གི་ཆེད་དུ་བཙོན་འཇུག་བྱས་པའི་བོད་ནང་ཆབ་སྲིད་བཙོན་པ་རྣམས་མྱུར་དུ་གློད་གྲོལ་ཡོང་ཆེད་དུ་སྦག་སྦག་བསྐོར་བསྐྱོད་ཀྱི་ལས་འགུལ་གཞི་རྒྱ་ཆེན་པོ་ཞིག་དང་མར་མེ་ཁྲོམ་སྐོར་གྱི་ལས་འགུལ་ཞིག་ཀྱང་སྤེལ་སོང་།

༢༠༡༩ལོའི་ཟླ་༥་ཚེས་༡༣ཉིན་སྤེལ། ཚེས་༡༠ནས་བཟུང་ནས་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཨུ་རུ་སུའི་དད་ལྡན་ཆོས་ཞུ་བ་གཙོ་བོ་གྱུར་བའི་ཕྱི་ནང་གི་དད་ལྡན་མི་མང་རྣམས་ལ་བསྩལ་བའི་རྒྱུད་བླ་མ་དང་ལམ་གཙོ་རྣམ་གསུམ་གྱི་བཀའ་ཆོས་ཚེས་༡༢ ཉིན་མཇུག་སྒྲིལ་མཛད། སྐབས་དེར། མགོན་པོ་གང་ཉིད་ཀྱིས་སེམས་བསྐྱེད་ཞེས་པ་ང་རང་ཚོའི་རྣམ་པར་ཤེས་པའི་རྒྱུན་འདིའི་སྟེང་ནས་སྐྱོན་གྱི་རིགས་མཐའ་དག་ཟད། རྟོགས་པའི་རིགས་མཐའ་དག་མཐར་ཕྱིན་པ་བླ་མེད་བྱང་ཆུབ་ཅེས་པ་ང་ཚོར་རྣམ་པར་ཤེས་པ་ཡོད་པ་འདིའི་བསྒྲུབ་བྱ་མཐར་ཐུག་ཆགས་ཡོད་ཅེས་དང་། སྔོན་གྱི་ལོ་ཙྭ་བ་ཚོས་མཁན་ཆེན་ཞི་བ་འཚོའི་བཀའ་སློབ་གཞིར་བཟུང་བཀའ་འགྱུར་བསྟན་འགྱུར་བོད་སྐད་ནང་སྒྱུར་ཞེས་པ་ལྟར་བོད་སྐད་དུ་བསྒྱུར་བའི་བཀའ་འགྱུར་བསྟན་འགྱུར་པོ་ཏི་གསུམ་བརྒྱ་ལྷག་ཡོད་པ་དེ་དག་ཧ་ཅང་གལ་ཆེན་པོ་རེད། ང་ཚོའི་སློབ་དེབ་རེད། ཅེས་གསུང་གི་བདུད་རྩི་བསྩལ་སོང་།

༢༠༡༩ལོའི་ཟླ་༥་ཚེས་༡༧ཉིན། བཞུགས་སྒར་རྡ་སར་བོད་ཀྱི་བུད་མེད་ལྷན་ཚོགས་ཀྱིས་གོ་སྒྲིག་འོག་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་མཆོག་གི་གློད་གྲོལ་ནི་ད་ལྟའི་བོད་པའི་སྤྱི་ཚོགས་དང་། ཆབ་སྲིད། ཆོས་ལུགས་བཅས་ཀྱི་གནས་བབ་ལ་གལ་འགངས་ཆེ་ཞེས་པའི་བརྗོད་གཞིའི་ཐོག་བགྲོ་གླེང་ཞིག་ཚོགས་སོང་།

༢༠༡༩ལོའི་ཟླ་༥་ཚེས་༡༤ཉིན། བཞུགས་སྒར་རྡ་ས་བཀའ་ཤག་གི་ཚོགས་ཁང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་དབུ་བཞུགས་ཐོག་བོད་ཀྱི་ཟློས་གར་ཚོགས་པ་བཙུགས་ནས་མི་ལོ་ཧྲིལ་པོ་ ༦༠ འཁོར་བའི་དུས་དྲན་སྲུང་བརྩི་བྱ་འཆར་ཡོད་པའི་སྐོར་གསར་འགོད་གསལ་བསྒྲགས་ཤིག་སྤེལ་གནང་སོང་།

༢༠༡༩ལོའི་ཟླ་༥་ཚེས་༡༠ཉིན། ཨུ་རུ་སུའི་དད་ལྡན་སེར་སྐྱ་མི་མང་ཁག་གཅིག་གིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར། ༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཨུ་རུ་སུའི་དད་ལྡན་ཆོས་ཞུ་བ་གཙོ་བོ་གྱུར་བའི་ཕྱི་ནང་གི་དད་ལྡན་མི་མང་རྣམས་ལ་དེ་རིང་ནས་བཟུང་སྟེ་ཉིན་གསུམ་རིང་གི་རྒྱུད་བླ་མ་དང་ལམ་གཙོ་རྣམ་གསུམ་གྱི་བཀའ་ཆོས་དབུ་འཛུགས་གནང་སོང་། དེ་ཡང་ཨུ་རུ་སུའི་དད་ལྡན་ཆོས་ཞུ་བ་ ༡༡༠༠ ཐམ་པ་གཙོ་བོར་གྱུར་པའི་འཛམ་གླིང་ཡུལ་གྲུ་ཁག་ ༧༠ ནས་མི་གྲངས་ ༥༡༩༥ ཐམ་པ། དེ་བཞིན་རང་རིགས་ཆོས་ཞུ་བ་བཅས་ཁྱོན་ཆོས་ཞུ་བ་མི་གྲངས་ཁྲི་གཅིག་ལྷག་འཛོམས་ཡོད་འདུག

More Articles ...

བོད་ཀྱི་ལོ་རྒྱུས་ཡིག་ཆ།