03
Wed, Jun

༢༠༡༩་ལོའི་ཟླ་༡༢་ཚེས་༢༡ཉིན། རྒྱ་གར་ལྷོ་ཕྱོགས་མོན་གྷོ་ཊིར་དཔལ་ལྡན་དགའ་ལྡན་དགོན་དུ། ༸གོང་ས་མཆོག་དབུ་བཞུགས་ཐོག བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། བོད་ཀྱི་ཆོས་བརྒྱུད་ཁག་གི་བླ་ཆེན་དང་མཁན་པོ། གྲྭ་བཙུན། རྒྱལ་སྤྱིའི་མཁས་པའི་བགྲོ་གླེང་ཆེན་མོའི་ཐོག་ཕེབས་པའི་མཁས་པ་རྣམ་པ། ཕྱི་རྒྱལ་ཡུལ་གྲུལ་ཁག་ནས་ཕེབས་པའི་སེར་སྐྱ་མི་མང་བཅས་མི་གྲངས་སྟོང་ཕྲག་ཁ་ཤས་ཀྱིས་རྗེ་ཙོང་ཁ་པ་སྐུ་མྱ་ངན་ལས་འདས་ནས་ལོ་ངོ་༦༠༠་འཁོར་བའི་རྗེས་དྲན་ཉིན་སྲུང་བརྩི་གནང་འདུག

༢༠༡༩་ལོའི་ཟླ་༡༢་ཚེས་༡༦་ཉིན་སྤེལ། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་མོན་གྷོ་རྟེན་གཞི་བྱས་པའི་དཔལ་ལྡན་འབྲས་སྤུངས་སུ་ཕེབས་སྐབས། ཚན་རིག་པས་དངོས་ཁམས་རིག་པ་གཙོ་བོར་བཤད་ཀྱི་ཡོད་པ་དང་། སངས་རྒྱས་པའི་གཞུང་ནས་སེམས་ཁམས་རིག་པ་གཙོ་བོ་བྱས་ནས་གསུང་པ་དེ་གཉིས་ཟུང་དུ་སྦྲེལ་ཐུབ་ན་གཉིས་ཕན་རེད། ཚན་རིག་ཐོག་ལ་ཡིན་ནའང་ཕན་པ་དང་། ང་ཚོར་ཡིན་ནའང་ཤེས་ཡོན་གྱི་སྡེ་ཚན་ཆ་ཚང་བ་ཞིག་ཡོང་བཞིན་ཡོད། ཅེས་བཀའ་སྩལ་འདུག

༢༠༡༩་ལོའི་ཟླ་༡༢་ཚེས་༡༠ཉིན། བཞུགས་སྒར་རྡ་ས་ཐེག་ཆེན་གཙུག་ལག་ཁང་དུ། བོད་མིའི་སྒྲིག་འཛུགས་ཀྱིས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་རྒྱ་གཞུང་གིས་བོད་ནང་དུ་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པ་དང་། བོད་མི་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་མི་རིགས་ས་གནས་རང་སྐྱོང་གི་བཅའ་ཁྲིམས་གཉིས་ཀྱི་འབྲུ་དོན་བཞིན་བོད་ཀྱི་ཆོས་དང་རིག་གཞུང་། སྐད་ཡིག ཁོར་ཡུག་བཅས་ཉམས་པ་སླར་གསོ་མི་ཉམས་གོང་སྤེལ་གྱི་མངོན་འདོད་བཏོན་པ་ཙམ་གྱིས་འཛིན་བཟུང་དང་བཙོན་འཇུག་སོགས་བྱེད་པའི་ཛ་དྲག་གི་གནས་སྟངས་འོག་གནས་ཡོད་པར་འགྲེལ་བརྗོད་གནང་སོང་།

༢༠༡༩ལོའི་ཟླ་༡༢་ཚེས་༧་ཉིན། བཞུགས་སྒར་རྡ་སའི་ཀིརྟིའི་བྱེས་པ་གྲྭ་ཚང་དུ། ༸གོང་ས་མཆོག་དང་མང་གཙོ་ཀ་བ་གསུམ་གྱི་མཛད་གཙོ་རྣམ་པ། བླ་ཆེན་དང་མཁས་དབང་བཅས་དབུ་བཞུགས་ཐོག་དུས་དྲན་སྲུང་བརྩི་ཞུས་པ་དང་སྦྲགས། མ་འོངས་པའི་བསྟན་འཛིན་ཀྱི་སྐྱེས་བུ་རབ་བྱུང་ཕོ་མོ་ན་གཞོན་རྣམས་སྐྱེད་སྲིང་མཛད་སྟངས་ཀྱི་མཁས་པའི་བགྲོ་གླེང་ཆེན་མོ་ཐེངས་དང་པོ་འགོ་འཛུགས་གནང་སོང་།

༢༠༡༩་ལོའི་ཟླ་༡༢་ཚེས་༡༠་ཉིན། བཞུགས་སྒར་རྡ་ས་ཐེག་ཆེན་གཙུག་ལག་ཁང་དུ་། གཞུང་འབྲེལ་ངོས་ནས་༸གོང་ས་སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་ཀྱི་རྗེས་དྲན་དགའ་སྟོན་མཛད་སྒོ་ཐེངས་༣༠་པ་ཚོགས་སོང་། བོད་མིའི་སྒྲིག་འཛུགས་ཀྱིས་༸གོང་ས་མཆོག་ལ་འཛམ་གླིང་ཞི་བདེ་དང་ཆོས་ལུགས་མཐུན་སྒྲིལ། ཁོར་ཡུག་སྲུང་སྐྱོབ་སོགས་ཀྱི་ཐོག་སྐུ་ངལ་འཛད་མེད་གནང་བར་བཀའ་དྲིན་རྗེས་དྲན་གནང་སོང་།

༢༠༡༩་ལོའི་ཟླ་༡༢་ཚེས་༩ ཉིན། བཞུགས་སྒར་རྡ་ས་བོད་མའི་ས་གནས་འགོ་འཛིན་ལས་ཁུངས་སུ། འཕགས་བོད་མཛའ་འབྲེལ་ཚོགས་པས་གོ་སྒྲིག་འོག ཉིན་གསུམ་གྱི་རིང་ལ། ཧི་མ་ལ་ཡའི་རི་བརྒྱུད་ཁག་གི་མི་རིགས་ཀྱི་འཁྲབ་སྟོན་སྡེ་ཚན་ཁག་༣༠་ཞིག་གིས་འཁྲབ་སྟོན་བྱས་ཏེ། ཧི་མ་ལ་ཡའི་དུས་སྟོན་སྲུང་བརྩི་གནང་རྒྱུ་དང་འབྲེལ་བའི་ཐོག་གསར་འགོད་གསལ་བསྒྲགས་ཤིག་སྤེལ་སོང་།

༢༠༡༩་ལོའི་ཟླ་༡༢་ཚེས་༢་ཉིན། བཞུགས་སྒར་རྡ་ས་ཐེག་ཆེན་གཙུག་ལག་ཁང་རྒྱལ་བའི་ཕོ་བྲང་གི་མཇལ་ཁ་ཚོགས་ཁང་ནང་དུ། ༸གོང་ས་མཆོག་གིས་ཕྱི་རྒྱལ་མཐོ་སློབ་སློབ་མ་དང་དགེ་ལས་་ཁག་ཅིག་ལ་ཁོང་གི་ཐུགས་ཀྱི་དམ་བཅའ་བཞི་དང་། དེ་ནས་སློབ་གཉེར་ཇི་ལྟར་བྱེད་དགོས་མིན་ཐོག་བཀའ་སློབ་གནང་དོན། དང་པོ་ཁྱོད་ཀྱིས་དེབ་དེ་ཚོའི་ནང་གི་ཤེས་བྱ་བཀླགས་པ་ཡང་ན་ཐོས་དགོས། དེ་ནས་གང་བཀླགས་པ་དང་ཐོས་པའི་ཤེས་བྱའི་ཐོག་ལ་བསམ་བློ་གཏོང་དགོས། དེའི་རྗེས་གང་ཤེས་པ་དེ་སྒོམ་དགོས། དེས་ཁྱོད་ལ་ཉམས་མྱོང་ངོ་མ་སྟེར་ངེས་ཡིན། ཞེས་བཀའ་སློབ་ལམ་སྟོན་གནང་འདུག

More Articles ...

བོད་ཀྱི་ལོ་རྒྱུས་ཡིག་ཆ།