༢༠༡༩་ལོའི་ཟླ་༡༢་ཚེས་༢༢་ཉིན། རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་རྟེན་གཞི་བྱས་པའི་དགའ་ལྡན་བྱང་རྩེ་གྲྭ་ཚང་གི་གཙུག་ལག་ཁང་དུ། ༸གོང་ས་མཆོག་ལ་རྒྱལ་སྤྱིའི་དགེ་ལྡན་ལྷན་ཚོགས་དང་། གདན་ས་ཆེན་པོ་དགའ་ལྡན། འབྲས་སྤུངས་བཅས་ནས་བརྟན་བཞུགས་བསྟར་འབུལ་ཞུས་འདུག དེའི་སྐབས་སུ། ༸གོང་ས་མཆོག་གིས་ལོ་བརྒྱ་དང་བཅུ་གསུམ་མམ་བརྒྱ་དང་བཅུ། གཅིག་བྱས་ན་ཐང་སྟོང་རྒྱལ་པོའི་སྐུ་ཚེ་དང་མཉམ་པ་དགུང་ལོ་བརྒྱ་དང་ཉི་ཤུ་རྩ་ལྔར་བཞུགས་སྲིད་པ་རེད། དེང་སྐབས་འཛམ་གླིང་འདིའི་སྟེང་སྨན་བཅོས་མཐུན་རྐྱེན་དང་འཕྲོད་བསྟེན་སོགས་མང་པོ་ཞིག་གི་ཐོག་ནས་ཚེ་རིང་དུ་གནས་པའི་ཆ་རྐྱེན་མང་པོ་འདུག ཅེས་གསུངས་འདུག
དེ་ཡང་། གོང་ཚེས་ཉིན། རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་རྟེན་གཞི་བྱས་པའི་དགའ་ལྡན་བྱང་རྩེ་གྲྭ་ཚང་གི་གཙུག་ལག་ཁང་དུ། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་རྒྱལ་སྤྱིའི་དགེ་ལྡན་ལྷན་ཚོགས་དང་། གདན་ས་ཆེན་པོ་དགའ་ལྡན། འབྲས་སྤུངས་བཅས་ནས་བརྟན་བཞུགས་བསྟར་འབུལ་ཞུས་འདུག དེར་གདན་ས་གསུམ་གྱི་བླ་མ་དང་མཁན་པོ། གྲྭ་བཙོན། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་མི་མང་སོགས་མི་གྲངས་སྟོང་ཕྲག་འགའ་འཛོམས་ཡོད་པ་རེད།
དེའི་ཐོག་༸གོང་ས་མཆོག་གིས་གསུང་དོན། དེ་རིང་འདིར་དགའ་ལྡན་དང་འབྲས་སྤུངས། སེ་རའི་བླ་མ་དགེ་འདུན་མང་པོ་ཞིག་ཕེབས་ཡོད། གང་ལྟར་གཙོ་ཆེ་བ་གདན་ས་གསུམ་གྱི་དགེ་འདུན་འདུས་པ་ཆགས་པའི་ཐོག་ནས་བརྟན་བཞུགས་གནང་རྒྱུ་རེད། ཁ་སང་ལྔ་མཆོད་ཉིན་ཞུས་པ་ནང་བཞིན། མགོན་ཁྱེད་ཀྱི་བསྟན་པ་འཛིན་པ་ལ། །དུས་ནམ་ཡང་བརྩོན་པ་བགྱིད་པར་སྨོན། །ཞེས་གསུང་པ་ནང་བཞིན་ཐམས་ཅད་མཁྱེན་པ་གོང་མ་རིམ་བྱོན་གྱིས་སྤྱིར་སངས་རྒྱས་པའི་བསྟན་པ། ཡང་སྒོས་འཇམ་མགོན་བླ་མའི་བསྟན་པའི་ཐོག་ལ་ཐུགས་ཁུར་ཆེན་པོ་སྐྱེས་པ་དེ་ལྟར་ཡིན་པ་རེད། དེ་རིང་འདིར་གདན་ས་གསུམ་དང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་འཛོམས་ཡོད་སྟབས། ངོས་ཀྱིས་རྟེན་འབྲེལ་བཟང་པོ་ཞིག་མཐོང་བྱུང་། རྟེན་འབྲེལ་བརྩིས་ནས་དེ་རིང་ངོས་ཀྱིས་བྱིན་རླབས་ཡོད་པའི་ཆོས་གོས་རྣམ་གསུམ་འདི་གྱོན་ནས་ཡོང་བ་ཡིན། མཁྱེན་སོང་ངམ།
གང་ལྟར་ཚེ་རིང་པོ་ཡོང་བ་དང་ཚེ་སྒྲུབ་ཟེར་རྒྱུ་འདི་གལ་ཆེན་པོ་རེད། འོན་ཀྱང་གཙོ་བོ་བྱང་ཆུབ་ཀྱི་སེམས་ལ་བསམ་བློ་གཏོང་བཞིན་ཡོད། བྱང་ཆུབ་ཀྱི་སེམས་ལ་བསམ་བློ་བཏང་ནས། ཇི་སྲིད་ནམ་མཁའ་གནས་པ་དང་། །འགྲོ་བ་ཇི་སྲིད་གནས་གྱུར་པ། །དེ་སྲིད་ཁྱེད་ནི་གནས་གྱུར་ནས། །འགྲོ་བའི་སྡུག་བསྔལ་སེལ་བར་ཤོག ཅེས་ནམ་མཁའ་མ་ཟད་ཀྱི་བར་དང་། བྱེ་བྲག་ཏུ་ཚེ་འདི་ལ། ས་སོགས་འབྱུང་བ་ཆེན་པོ་དང་། །ནམ་མཁའ་བཞིན་དུ་རྟག་པར་ཡང་། །སེམས་ཅན་དཔག་ཏུ་མེད་པ་ཡི། །རྣམ་མང་ཉེར་འཚོའི་གཞིར་ཡང་ཤོག ཅེས་པ་འདི་ངོས་ཀྱིས་རྟག་པར་སྨོན་ལམ་རྒྱག་བཞིན་ཡོད། སེམས་ཤུགས་སྐྱེ་བཞིན་ཡོད་པ་རེད། ད་ལྟ་འཛམ་གླིང་འདིའི་སྟེང་ངོས་ལ་དགའ་པོ་དང་ཡིད་ཆེས་བློ་འགེལ་བྱེད་མཁན་བོད་རིགས་གཙོ་གྱུར་ཧ་ཅང་མང་པོ་ཡོད། དེར་བརྟེན། ས་སོགས་འབྱུང་བ་ཆེན་པོ་དང་། །ནམ་མཁའ་བཞིན་དུ་རྟག་པར་ཡང་། །སེམས་ཅན་དཔག་ཏུ་མེད་པ་ཡི། །རྣམ་མང་ཉེར་འཚོའི་གཞིར་ཡང་ཤོག ། ཅེས་སྨོན་ལམ་བརྒྱབ་པ་ནང་བཞིན་དངོས་ཡོད་གནས་ཚུལ་ལའང་འདི་ལྟར་ཡོང་གི་ཡོད་སྟབས། ཁ་ཡོད་ལག་ཡོད་ཀྱི་ཕན་ཐོགས་ཡོད་ས་དེ་ལ་ཚེ་ཇི་ཙམ་རིང་བ་བྱུང་བ་ཡིན་ན། དེས་ཕན་གྱི་རེད། དེར་བརྟེན་ཚེ་འདི་ཁ་ཡོད་ལག་ཡོད་ཀྱི་གནས་ཚུལ་གང་ཡང་མིན་པར་བསྐལ་བ་ནས་བསྐལ་བ་ཞེས་བརྗོད་པ་ཡིན་ན་ཕན་ཐོགས་གང་ཡང་མི་འདུག འཛམ་གླིང་འདིའི་སྟེང་ངོས་ཀྱིས་ཁ་ཡོད་ལག་ཡོད་ཀྱིས་མིའི་སེམས་ནང་སྤྲོ་སྣང་སླེབ་རྒྱུ་དང་། སེམས་ནང་བྱམས་བརྩེ་ཡོང་བར་གང་ཙམ་ཞབས་འདེགས་སྒྲུབ་ཐུབ་ཀྱི་ཡོད་པ་རེད། དེར་བརྟེན་ཇི་ཙམ་རིང་དུ་འཚོ་བ་དེ་ཙམ་གྱིས་མི་ཚེ་དོན་ལྡན་ཡོང་རྒྱུ་ཞིག་ཡིན།
རང་དོན་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། ཞེས་པ་ལྟར་རང་དོན་བསྒྲུབ་རྒྱུ་ཡང་དེའི་ཐོག་ནས་ཡོང་རྒྱུ་རེད། དེ་བཞིན་གཞན་དོན་བསྒྲུབ་རྒྱུའང་དེའི་ཐོག་ནས་ཡོང་རྒྱུ་རེད། དེར་བརྟེན་དུས་རྟག་ཏུ་བྱང་ཆུབ་སེམས་སྨོན་ལམ་རྒྱག་བཞིན་ཡོད། གང་ལྟར་ཚེ་སྒྲུབ་མཆོག་ཏུ་གྱུར་པ་ནི་བྱང་ཆུབ་ཀྱི་སེམས་བསྒོམ་རྒྱུ་རེད། རང་དོན་ཡིད་བྱེད་ཀྱི་བསམ་བློ་བཏང་ནས་ཚེ་གཟུངས་ཧ་ཅང་བསགས་པ་ཡིན་ནའང་ཧ་ཅང་ངོ་མཚར་སྐྱེ་རྒྱུ་མི་འདུག
གང་ལྟར་འཛམ་གླིང་འདིའི་སྟེང་ཡོད་པའི་སྨྲ་ཤེས་ཤིང་དོན་གོ་བའི་མི་ཚང་མར་ངོས་ཀྱིས་ཕན་ཐོགས་བྱེད་ཐུབ་པའི་སེམས་ཤུགས་སྐྱེས་ནས་མཐར་ཐུག་རྣམ་མཁྱེན་གྱི་ས་ལ་དགོས་འདོད་དང་། འཕྲལ་དུ་ཡིན་ནའང་སེམས་ཞི་བདེ་ཡོང་བ་དེ་འདྲའི་ཁ་ཡོད་ལག་ཡོད་ཀྱིས་གཞན་ཕན་བསྒྲུབ་རྒྱུའི་སེམས་ཤུགས་དེས་སྐྱེ་ཡི་ཡོད་པ་མ་ཟད། སེམས་ཤུགས་སྐྱེས་པ་ནང་བཞིན་གང་ཙམ་ཕན་ཐོགས་ཡོང་བཞིན་པ་མཐོང་ཆོས་སུ་ཡོད་པ་དེ་རེད། དེར་བརྟེན་ངོས་ནས་ཀྱང་སེམས་ཤུགས་སྐྱེད་བཞིན་ཡོད།
དེ་རིང་འདིར་དད་དམ་གཙང་མའི་དགེ་འདུན་འདུས་པ་རྒྱ་མཚོ་དང་། དེ་བཞིན་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། གཞན་ཡང་དད་ལྡན་སྦྱིན་བདག་ཁག རྒྱ་རིགས་གཙོ་བོར་གྱུར་པའི་མི་སྣ་མང་དག་ཅིག་དེ་རིང་འདིར་སླེབས་ཡོད། ངོས་ཀྱིས་སེམས་བསྐྱེད་བསམ་བློ་བཏང་བ་ནང་བཞིན། ཚེ་རིང་དུ་གནས་པའི་ཕན་ཐོགས་ཡོད། སྔོན་མ་ངོས་ཀྱི་རྨི་ལམ་དུ་སྐས་འཛེགས་ ༡༣ ཡོད་པ་ཞིག་ཡར་འཛེགས་པ་རྨིས་བྱུང་། དེར་བརྟེན་ ༡༡༣ ཞེས་པའི་གོ་བ་འདིས་མཚོན་གྱི་ཡོད། དགེ་འདུན་གྲུབ་པ་ནས་ཐུན་མོང་མིན་པའི་འབྲེལ་བ་ཡོད་པ་ནི་དཔལ་ལྡན་ལྷ་མོ་རེད། དཔལ་ལྡན་ལྷ་མོས་ལོ་ ༡༡༠ བསྡད་པར་ཐེ་ཚོམ་མེད་ཅེས་གསུངས་པའི་རྨི་ལམ་ཧ་ཅང་གསལ་པོ་བྱུང་། དེར་བརྟེན་ལོ་བརྒྱ་དང་བཅུ་གསུམ་མམ་བརྒྱ་དང་བཅུ། གཅིག་བྱས་ན་དེ་ལས་རིང་ཙམ་འཁྲུལ་ཞིག་རིན་པོ་ཆེས་ངོས་ལ་ཐང་སྟོང་རྒྱལ་པོའི་སྐུ་ཚེ་དང་མཉམ་པ་བཞུགས་དགོས་པ་རེད་ཅེས་རྟག་པར་གསུང་གི་ཡོད། ཐང་སྟོང་རྒྱལ་པོ་དགུང་ལོ་བརྒྱ་དང་ཉི་ཤུ་རྩ་ལྔར་བཞུགས་པ་རེད། དེང་སྐབས་འཛམ་གླིང་འདིའི་སྟེང་སྨན་བཅོས་མཐུན་རྐྱེན་དང་འཕྲོད་བསྟེན་སོགས་མང་པོ་ཞིག་གི་ཐོག་ནས་ཚེ་རིང་དུ་གནས་པའི་ཆ་རྐྱེན་མང་པོ་འདུག
ངོས་ཀྱི་ངོས་ནས་ཕན་པ་འདི་སྤྱིར་ནམ་མཁའ་མ་ཟད་བར་དང་། སྒོས་སུ་ད་ལྟ་ཁ་ཡོད་ལག་ཡོད་ཀྱིས་མི་ལ་ཕན་ཐོགས་གང་ཙམ་བྱེད་ཐུབ་ཀྱི་ཡོད་སྟབས། ལོ་བརྒྱ་དང་བཅུའམ་བཅོ་ལྔ་གནས་ཐུབ་པའི་སྨོན་ལམ་རྒྱག་བཞིན་ཡོད། ཁྱེད་རང་ཚོ་ཡིན་ནའང་སྨོན་ལམ་རྒྱོབ། ངོས་ཀྱིས་བརྟན་བཞུགས་མ་འབུལ་གོང་ནས་ཚེ་རིང་པོ་གནས་རྒྱུའི་ཁ་ལེན་བྱས་ཟིན་པ་རེད། བརྟན་བཞུགས་འབུལ་རྒྱུ་གང་འདུག་གམ། དེ་ནས་གནས་ཆུང་ཆོས་སྐྱོང་སྐུ་ཕེབས་རྒྱུ་ཞིག་ཡོད་པ་རེད། བོད་གངས་ཅན་ལྗོངས་སུ་མཁན་སློབ་ཆོས་གསུམ་གདན་འཛོམས་པའི་སྐབས་ནས་བོད་ཀྱི་བསྟན་སྲིད་ནི་འགྲོ་བ་མིས་ཤུགས་རྒྱག་གི་ཡོད། དེ་བཞིན་དཀར་ཕྱོགས་སྐྱོང་བའི་དྲེགས་པ་གནོད་སྦྱིན་དེ་དག་གིས་ཁུར་མཉམ་ལེན་བྱེད་རྒྱུ་ཞིག་དང་། རྐང་གནས་ཆུང་ཆོས་རྒྱལ་ཆེན་པོ་རྡོ་རྗེ་གྲགས་ལྡན་གཙོ་བོར་གྱུར་པའི་ཁ་ཤས་རྒྱ་གར་ནས་ཚུར་ཕེབས་པ་རེད། གཉན་ཆེན་ཐང་ལྷ་ལ་སོགས་པ་དེ་ཚོའི་གྲས་ནི་བོད་རང་གི་ས་སྐྱེས་རྡོ་སྐྱེས་ཀྱི་དཀར་ཕྱོགས་སྐྱོང་བའི་ལྷ་རེད། དེ་དག་ཚང་མས་ངོས་ལ་རེ་བ་བཅོལ་བཞིན་འདུག ནམ་རྒྱུན་ང་ཚོས་བཤད་པ་ལྟར་གཟུགས་མེད་རེད། གཟུགས་མེད་ཀྱིས་ཧ་ཅང་བྱ་རྒྱུ་མི་འདུག གཟུགས་མེད་ལ་ནུས་པ་ཧ་ཅང་ཡོད་ཟེར་གྱི་ཡོད་ཀྱང་གཟུགས་མེད་པ་ཡིན་སྟབས་ཧ་ཅང་བྱ་རྒྱུ་མི་འདུག
ངོས་རང་གཟུགས་ཅན་ཡིན་པར་བརྟེན་སྐད་ཆ་བཤད་རྒྱུ་ཡོད་པ་རེད། གཟུགས་མེད་བརྒྱ་ལས་གཟུགས་ཅན་གཅིག་དེ་མི་ལ་ཕན་ཐོགས་ཆེ་བ་འདུག གང་ལྟར་བོད་ལྗོངས་ལྷ་མི་ཡོངས་རྫོགས་ངོས་ལ་བློ་གཏད་བཅོལ་བཞིན་ཡོད། ད་ཆ་ཆོས་སྐྱོང་གི་སྐུ་ཕེབས་ཀྱི་རེད། དེ་རིང་འདིར་གནས་དང་དུས། གཙོ་བོ་དད་པ་དང་དམ་ཚིག་གཡོ་བ་མེད་པའི་དགེ་འདུན་རྣམ་པ་འདིར་འཛོམས་ཡོད་སྟབས། ཁྱེད་རང་ཚོ་ཚང་མ་ཐུག་བློ་བདེ་པོ་བྱས་ནས་བཞུགས་ཨང་། ཞེས་བཀའ་སློབ་སྩལ་འདུག
བོད་མིའི་སྒྲིག་འཛུགས་ཀྱི་དྲ་རྒྱ་ལས་བླངས།
