15
Sun, Sep

༢༠༡༩ལོའི་ཟླ་༩་ཚེས་༢་ཉིན། མཛད་སྒོའི་ཐོག་སྐུ་མགྲོན་གཙོ་བོ་ལྕམ་སྐུ་སར་ཝེན་ཆོ་ཌི་རུ(Smt. Sarveen Chaudhary)་ལགས་དང་། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ།

བཙན་བྱོལ་གྱི་གསར་འགྱུར།
Typography

༢༠༡༩ལོའི་ཟླ་༩་ཚེས་༢་ཉིན། བཞུགས་སྒར་རྡ་སའི་གཙུག་ལག་ཁང་དུ། བོད་མིའི་མང་གཙོ་དབུ་བརྙེས་ནས་ལོ་ངོ་༥༩་འཁོར་བའི་ཉིན་མོ་ཐོག་བཀའ་ཤག་དང་སྤྱི་འཐུས་ཀྱིས་གསུང་འཕྲིན་སྒྲོག་སྦྱང་གནང་སྟེ། ༸གོང་ས་མཆོག་ལ་བཀའ་དྲིན་རྗེས་དྲན་ཞུ་བ་དང་། བོད་མི་ཚོས་ནང་ཁུལ་མཐུན་སྒྲིལ་བྱེད་དགོས་པའི་སྐོར་སོགས་གསུངས་སོང་། དེ་ནས་བོད་ཕྲུག་ཁག་གིས་གཞས་སྣ་འཁྲབ་སྟོན་བྱས་ནས་ཉིན་མོ་འདི་སྲུང་བརྩི་གཟབ་རྒྱས་ངང་ཞུས་སོང་།

དེ་ཡང་། མཛད་སྒོའི་ཐོག་སྐུ་མགྲོན་གཙོ་བོ་ཧི་མཱ་ཅལ་མངའ་སྡེའི་གྲོང་ཁྱེར་འཛུགས་སྐྲུན་ཡར་རྒྱས་བློན་ཆེན་ལྕམ་སྐུ་སར་ཝེན་ཆོ་ཌི་རུ(Smt. Sarveen Chaudhary)་ལགས་དང་། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། སྲི་ཞུ་བ། གཞུང་འབྲེལ་མིན་པའི་ཚོགས་པ་ཁག་གི་འཐུས་ཚབ་རྣམ་པ། སློབ་གྲྭ་ཁག་གི་སློབ་མ། སེར་སྐྱ་ཕོ་མོ། བཅས་ཚང་འཛོམས་གནང་འདུག

དེ་ནས་མཛད་སྒོའི་ཐོག་མར། བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་བ་དང་། བོད་ཀྱི་ཟློས་གར་ཚོགས་པ་ནས་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་དང་། རྒྱ་གར་རྒྱལ་གླུ་དབྱངས་སུ་གྱེར་རྗེས། བོད་ཀྱི་ཟློས་གར་ཚོགས་པ་ནས་ཆོལ་གསུམ་འཆམ་མཐུན་ཞེས་པའི་འཁྲབ་སྟོན་བྱས་སོང་། དེ་ནས་སྐུ་མགྲོན་གཙོ་བོ་ལྕམ་སྐུ་སར་ཝེན་ཆོ་ཌི་རུ་ལགས་ཀྱིས་སྲིད་སྐྱོང་གཟེངས་རྟགས་བཞེས་མཁན་ ༤ ལ་གཟེངས་རྟགས་གནང་བ་དང་། སྲིད་ཚབ་མཆོག་ནས་བོད་མིའི་སྒྲིག་འཛུགས་ལ་ཞབས་ཞུ་ཞུས་ནས་ལོ་ངོ་༢༥ ཡན་རྣམས་ལ་ལེགས་གསོའི་ལག་འཁྱེར་གནང་སོང་།

དེའི་རྗེས། ཡོངས་གླིང་སློབ་གྲྭ་ནས་མཉམ་གཞས་རྟེན་འབྲེལ་བཟང་པོ་ཞེས་པ་འཁྲབ་སྟོན་བྱས་རྗེས། སྲིད་ཚབ་མཆོག་ནས་ཕྱི་ལོ་ ༢༠༡༩ ལོའི་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ན་གཞོན་ནུས་སྤེལ་ལས་གཞིའི་གཟེངས་བསྟོད་ལག་འཁྱེར་བཞེས་མཁན་གཉིས་ལ་གཟེངས་རྟགས་གནང་བ་དང་། དཔལ་ལྡན་ཁྲིམས་ཞིབ་པ་ཆེ་བ་མཆོག་ནས་ ༢༠༡༩ ལོའི་ཡར་ལུང་ཟོ་ཐང་གཟེངས་བསྟོད་བཞེས་མཁན་ཁོངས་སོ་ནམ་པ་རྩེད་ཕུད་གཉིས་དང་། ན་གཞོན་སོ་ནམ་པ་རྩེ་ཕུད་གཅིག་བཅས་ལ་ལག་འཁྱེར་གཟེངས་རྟགས་གནང་སོང་།

དེ་ནས་རྡ་ས་གངས་སྐྱིད་དཔེ་སྟོན་སློབ་གྲྭ་ནས་གཙང་འགྲིག་པའི་གཞས་ཆེན་ཞེས་པ་འཁྲབ་སྟོན་བྱས་སོང་བ་དང་། དེའི་རྗེས་བོད་མི་མང་སྤྱི་འཐུས་ཚོགས་གཙོ་མཆོག་ནས་ ༢༠༡༩ ལོའི་འཛིན་རིམ་བཅུ་གཉིས་ཀྱི་སྡེ་ཚན་གསུམ་གྱི་རྩེ་ཕུད་ཨང་རིམ་དང་པོ་སོན་པ་སློབ་ཕྲུག་ ༣ དང་། ཨང་རིམ་གཉིས་པ་སོན་པ་སློབ་ཕྲུག་༣ ། ཨང་རིམ་གསུམ་པ་སོན་པ་སློབ་ཕྲུག་ ༤ ལ་བཅས་ལ་དགའ་ལྡན་ཕོ་བྲང་སློབ་ཕྲུག་གཟེངས་རྟགས་གནང་སོང་།

དེའི་རྗེས། བོད་ཁྱིམ་ཉིན་སློབ་ནས་མདོ་སྨད་དཔྱིད་ཀྱི་སྦྲང་འཆར་ཞེས་པ་འཁྲབ་གཞས་བྱས་ནས། སྤྱི་འཐུས་ཚོགས་གཙོ་མཆོག་ནས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་གནང་སོང་། ཐོག་མར་ཁོང་གིས་ཕྱི་ལོ་༡༩༦༠་ལོ་ནས་༢༠༡༡་ལོའི་བར་གྱི་མང་གཙོ་ཕར་རིམ་ལོ་རྒྱུས་མདོ་བསྡུར་ཞིག་དང་། དེ་ནས་ ༸གོང་ས་༸སྐྱབས་མགོན་ཆེན་པོ་མཆོག་གིས་གསོལ་རས་གནང་བའི་བྱིན་རླབས་དང་རིན་ཐང་ཅན་གྱི་མང་གཙོའི་འགྲོ་ལུགས་དེ་བོད་མི་རྩམ་ཟན་ཡོངས་ཀྱིས་སྣང་མེད་དུ་མ་བཞག་པར་འགན་འཁུར་བའི་ཐོག་ནས་ཡར་རྒྱས་གོང་སྤེལ་དང་ཚགས་ཚུད་ཡོང་ཕྱིར་ཚང་མས་ཐུགས་བསམ་བཞེས་གལ་ཆེ། མང་གཙོ་ཁ་ལ་འཁྱེར་ནས་ཕྱོགས་རིས་འཐེན་འཁྱེར་གྱིས་སྤྱི་ཚོགས་གཡས་དཀྲུག་གཡོན་དཀྲུག་དང་༸གོང་ས་མཆོག་ལ་མཚན་སྨད་ཞུ་རྒྱུ་ལ་སོགས་པའི་ཐལ་ཆ་ཆེ་བའི་བྱ་ངན་རིགས་བྱེད་གྱིན་བསྡད་པ་ཡིན་ན། ཕན་ཐོགས་སུ་གང་ལ་ཡང་ཡོང་རྒྱུ་མེད་པ་གང་ཞིག་བོད་སྤྱི་བའི་རྩ་དོན་ལ་དོ་ཕོགས་འགྲོ་ཉེན་ཆེ་བས་དེ་རིགས་ལ་མང་གཙོའི་ཁེ་ཕན་ལོངས་སྤྱོད་བྱས་པར་ངོས་འཛིན་ཐུབ་ཐབས་མེད། བཙན་བྱོལ་བོད་མིའི་བཅའ་ཁྲིམས་ནང་བོད་མི་ཚང་མར་མང་གཙོའི་ཁེ་དབང་ལོངས་སུ་སྤྱོད་ཆོག་པའི་ཆ་རྐྱེན་བསྐྲུན་ཡོད་པ་ནང་བཞིན་སྤྱི་ཚོགས་ཀྱི་བདེ་སྐྱིད་དང་ལྷིང་འཇགས་བསྲུང་རྒྱུའི་འགན་དབང་ཡང་ང་ཚོ་ཚང་མར་ཡོད་པ་མཁྱེན་དགོས།

ང་ཚོ་མི་རེ་ངོ་རེ་ནས་ཉིན་མཚན་དུས་དྲུག་ཏུ་བཙན་བྱོལ་སྤྱི་ཚོགས་དང་བོད་ཀྱི་རྩ་དོན་ལ་འགན་འཁུར་བའི་ཐོག་ནས་སོ་སོའི་སྤྱོད་པ་སྲུང་ཐུབ་པ་ཡིན་ན་བཙན་བྱོལ་སྤྱི་ཚོགས་ནང་ཆིག་བསྒྲིལ་ཡོང་རྒྱུ་གདོན་མི་ཟ་ཞིང་། མ་འོངས་པར་བོད་གཞིས་བྱེས་མཉམ་འཛོམས་ཀྱི་སྐྱིད་པའི་ཉི་མ་ཤར་དུས་རང་རེ་བཙན་བྱོལ་བ་རྣམས་རང་དབང་བོད་ལ་ཕྱིར་ལོག་བྱེད་སྐབས་མང་གཙོའི་ལམ་བཟང་དེ་གཞིས་ལུས་སྤུན་ཟླ་རྣམས་ལ་འབུལ་རྒྱུའི་ཕྱག་རྟགས་ལེགས་ཤོས་དེ་ཆགས་རྒྱུ་ཡིན། དེར་བརྟེན་བོད་མི་ནང་ཁུལ་དམ་ཚིག་དར་གྱི་མདུད་པ་མ་ལྷོད་པའི་ཐོག་ནས་བོད་རང་དབང་སླར་གསོའི་གོམ་སྟབས་མདུན་ནས་མདུན་དུ་བསྐྱོད་ཐུབ་པར་བྱེད་པ་ལ་གོ་སྐབས་འདི་བརྒྱུད་ནས་ཚང་མར་ཐུགས་བསམ་བཞེས་རོགས་གནང་ཞེས་སྙིང་དབུས་ནས་འབོད་བསྐུལ་ཞུ་བ་དང་སྦྲགས།

དེ་རིང་གི་ཉིན་མོར་མང་གཙོ་དབུ་བརྙེས་ཏེ་ལོ་ངོ་ ༥༩ ཧྲིལ་པོ་འཁོར་བའི་དུས་དྲན་སྲུང་བརྩི་ཞུ་བ་དང་ཆབས་ཅིག བོད་ས་རྒྱ་ལག་ཏུ་ཤོར་ནས་གཞིས་ལུས་བོད་མི་རྣམས་ལ་མང་གཙོའི་ཁེ་དབང་ལྟ་ཞོག་འགྲོ་བ་མིའི་རང་ཆས་སུ་ཡོད་པའི་སྨྲ་བརྗོད་ཀྱི་རང་དབང་དང་། འགྲོ་འོང་གི་རང་དབང་། ཆོས་དད་ཀྱི་རང་དབང་སོགས་གཞི་རྩའི་རང་དབང་ཡེ་ནས་མེད་པར་རྒྱ་ནག་དམར་གཞུང་གི་བཙན་གནོན་དྲག་པོའི་འོག་སྡུག་སྦྱོང་མནར་གཅོད་ཚད་མེད་མྱངས་དང་མྱོང་བཞིན་པའི་ངང་ལོ་ངོ་ ༦༠ ལྷག་འཁོར་བཞིན་པར་བྱེས་སུ་གནས་པའི་བོད་མི་སྤྱི་བོ་གནམ་བསྟན་ཡོངས་ནས་གདུང་སེམས་མཉམ་བསྐྱེད་ཞུ་བཞིན་ཡོད། འདས་པའི་ལོ་ངོ་དྲུག་ཅུའི་རིང་བོད་མི་རིགས་ཀྱི་ངོ་བོ་སྲུང་སྐྱོབ་དང་། ཆོས་དང་རིག་གཞུང་། སྐད་ཡིག་སོགས་མི་ཉམས་གོང་སྤེལ་དང་། བོད་ཀྱི་རྩ་དོན་རྩོད་རྒྱུ་བཅས་ཀྱི་ཐོག་ལ་ཕྱར་བ་གྲུ་འདེགས་ཀྱི་རྒྱབ་སྐྱོར་གནང་མཁན་རྒྱ་བལ་འབྲུག་གསུམ་གྱིས་གཙོས་ཕྱིའི་རྒྱལ་ཁབ་ཀྱི་རོགས་ཚོགས་ཁག་དང་། བོད་དོན་རྒྱབ་སྐྱོར་བ་ཚང་མར་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་སྙིང་ཐག་པ་ནས་ཐུགས་རྗེ་ཆེ་ཞེས་ཞུ་རྒྱུ་ཡིན་ཞེས་དང་།

གཞན་ཡང་འདས་པའི་ཟླ་ཤས་རིང་ནས་བཟུང་ཧོང་ཀོང་མི་མང་ས་ཡ་མང་པོས་མང་གཙོ་དང་རང་དབང་སྲུང་སྐྱོབ་ཀྱི་ཆེད་དུ་གཞི་རྒྱ་ཆེ་བའི་ཞི་བའི་ངོ་རྒོལ་རྔམ་སྟོན་ཁྲོམ་སྐོར་གྱི་ལས་འགུལ་སྤེལ་བཞིན་པར་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་གདུང་སེམས་མཉམ་བསྐྱེད་ཞུ་རྒྱུ་ཡིན་ཞེས་གསུངས་སོང་།

དེ་ནས་སླར་ཡང་དྷ་སྟེང་བོད་ཁྱིམ་ནས་གཉའ་ནང་འཁྲབ་གཞས་ཨ་རི་ཞེས་པ་འཁྲབ་སྟོན་བྱས་སོང་།

དེའི་རྗེས། སྲིད་ཚབ་མཆོག་ནས་བཀའ་ཤག་གི་གསུང་བཤད་གནང་དོན། དེ་རིང་ནི་བོད་མིའི་མང་གཙོ་དབུ་བརྙེས་ཏེ་མི་ལོ་ ༥༩ འཁོར་བའི་དུས་ཆེན་གྱི་ཉིན་མོ་གལ་ཆེན་ཞིག་ཡིན། དེ་ཡང་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གིས་སྐུ་ན་ཕྲ་དུས་ནས་བོད་ཀྱི་སྤྱི་ཚོགས་ལམ་སྲོལ་ལ་དུས་དང་འཚམས་པའི་བསྒྱུར་བཅོས་དགོས་གལ་གཟིགས་པ་ལྟར། ཕྱི་ལོ་ ༡༩༥༠ ལོར་དགུང་ལོ་བཅུ་དྲུག་ཐོག་བོད་རྒྱལ་ཁབ་ཀྱི་ལུགས་གཉིས་ཐུགས་འགན་བཞེས་པ་དང་། ཕྱི་ལོ་ ༡༩༥༡ ལོར་ལེགས་བཅོས་ལས་ཁུངས་ཟུར་འཛུགས་གནང་རྒྱུས་མཚོན་གྱོད་ཞིབ་ལས་ཁུངས་འཛུགས་རྒྱུ་དང་། ཁྲལ་དང་བུ་ལོན་ཆག་ཡང་། བཙོན་པ་གློད་དཀྲོལ་གཏོང་རྒྱུ་སོགས་བོད་ཀྱི་སྤྱི་ཚོགས་ནང་བསྒྱུར་བཅོས་མང་པོ་མཛད་ཡོད་རུང་། རྒྱ་དམར་གྱི་དབང་ཤུགས་དང་དྲག་གནོན་སོགས་ཕྱི་ནང་འགལ་རྐྱེན་དུ་མའི་དབང་གིས་ཐུགས་བཞེད་ཇི་བཞིན་མ་འགྲུབ་ཁར། རིམ་པས་གནས་སྟངས་ཇེ་ཞན་དུ་སོང་སྟེ་མཐར་ཕྱི་ལོ་ ༡༩༥༩ ལོར་བོད་བསྟན་སྲིད་མི་རིགས་བཅས་པའི་བདེ་ཐབས་སླད་བཙན་བྱོལ་དུ་ཕེབས་དགོས་གྱུར་ཡོད།

དེས་ན་སྔ་མོ་ནས་དགོངས་བཞེད་ཡོད་པ་བཞིན་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ནང་བཙན་བྱོལ་དུ་ཕེབས་ནས་རིང་པོར་མ་ཐོགས་པར་བོད་ཆོལ་ཁ་གསུམ་དང་ཆོས་ལུགས་ཆོས་བརྒྱུད་དང་བཅས་པའི་ངོ་ཚབ་མཚོན་པའི་འཐུས་མི་བསྐོ་འདེམས་བྱེད་པའི་ལམ་སྲོལ་གཏོད་པའི་སྒོ་ནས་ཕྱི་ལོ་ ༡༩༦༠ ཟླ་ ༩ ཚེས་ ༢ ཉིན་བོད་མིའི་མང་གཙོ་ཐོག་མར་དབུ་བརྙེས་ཤིང་། ཕྱི་ལོ་ ༡༩༦༡ ལོར་མ་འོངས་བོད་ཀྱི་རྩ་ཁྲིམས་སྙིང་དོན་དང་། ཕྱི་ལོ་ ༡༩༦༣ ལོར་བོད་ཀྱི་རྩ་ཁྲིམས་ཡོངས་ཁྱབ་གསལ་བསྒྲགས་བསྐྱངས་པའི་ནང་། མང་གཙོའི་ལྟ་གྲུབ་དང་མཐུན་པ་ཡོང་ཆེད་༸གོང་ས་མཆོག་རང་ཉིད་ཀྱི་སྐུ་དབང་ཕྱིར་བསྡུ་གནང་རྒྱུའི་ཆ་རྐྱེན་ཚུན་འཇོག་གནང་མཛད་ཡོད་ཅེས་དང་།

དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་སྒྲོམ་གཞི་དང་ལས་དོན་གནང་ཕྱོགས་ལ་ཡང་དུས་ནས་དུས་སུ་ལེགས་བཅོས་ཇི་དགོས་མཛད་པ་དང་། ལྷག་པར་ཕྱི་ལོ་ ༡༩༩༡ ལོར་༸གོང་ས་༸སྐྱབས་མགོན་ཆེན་པོ་མཆོག་ནས་བཙན་བྱོལ་བོད་མིའི་བཅའ་ཁྲིམས་ལ་བཀའ་འཁྲོལ་གཏན་འབེབས་བསྩལ་ཉིན་ནས་བཟུང་བོད་མི་མང་སྤྱི་འཐུས་ལྷན་ཚོགས་དེ་བཞིན་མིང་དོན་མཚུངས་པའི་ཁྲིམས་བཟོ་ལྷན་ཚོགས་ཤིག་ཏུ་བསྒྱུར་གནང་མཛད་ཅིང་། ཕོ་མོ་འདྲ་མཉམ་གྱི་ལྟ་བ་ལག་ལེན་དོན་ཁེལ་དང་བུད་མེད་ཀྱི་འགོ་འཁྲིད་སྐྱེད་སྲིང་གནང་ཆེད་བུད་མེད་ལ་དམིགས་བསལ་སྤྱི་འཐུས་ཞབས་སྟེགས་ཟུར་བཅད་ཆ་རྐྱེན་བསྐྲུན་པ་དང་། ཕྱི་རྒྱལ་ཡུལ་གྲུ་ཁག་ཏུ་གནས་སྡོད་བོད་མི་ཚོའི་ཆེད་དུ་སྤྱི་འཐུས་ཞབས་སྟེགས་ཁ་སྣོན་དགོས་རྒྱུ་སོགས་དུས་དང་མཐུན་པའི་ལེགས་བཅོས་ཇི་དགོས་ལམ་སྟོན་མཛད་དེ་ད་ཆ་སྤྱི་འཐུས་ཀྱི་གྲངས་ཚད་དང་སྤྱི་འཐུས་ལྷན་ཚོགས་ཀྱི་གྲུབ་ཆ་སོགས་གང་ཐད་ནས་སྲ་བརྟན་སྲ་ཚུགས་བྱུང་ཐོག མང་གཙོའི་རིང་ལུགས་ཀྱི་རྨང་གཞིའི་ཁྲིམས་སྒྲིག་ཁག་གཏན་འབེབས་དང། དེ་བཞིན་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་དང་། བོད་མི་མང་སྤྱི་འཐུས་ལྷན་ཚོགས། འཛིན་སྐྱོང་བཀའ་ཤག་བཅས་མང་གཙོའི་ཀ་བ་གསུམ་སོ་སོའི་འགན་དབང་ཆ་བགོས་ཀྱི་ལམ་སྲོལ་ཕྲ་ཚུགས་ཐུབ་པ་བྱུང་ཡོད།

དེ་མཚུངས་འཛིན་སྐྱོང་བཀའ་ཤག་གི་སྒྲོམ་གཞིར་ཡང་དུས་བསྟུན་ཡར་རྒྱས་ཇི་དགོས་གཏོང་གནང་གིས། བཀའ་ཤག་གི་གྲུབ་ཆ་དང་བཀའ་བློན་བསྐོ་གཞག་གནང་ཕྱོགས་ལའང་དུས་ནས་དུས་སུ་ལེགས་བཅོས་མཛད་ཅིང་། ལྷག་པར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་རིགས་ཀྱི་ཕུགས་རྒྱང་རིང་པོའི་ཁེ་ཕན་ལ་དགོངས་བཞེས་ཀྱིས་ཕྱི་ལོ་ ༢༠༠༡ ལོར་བཀའ་བློན་ཁྲི་པ་མི་མང་གིས་ཐད་ཀར་འོས་འདེམས་བྱེད་རྒྱུའི་ལམ་ལུགས་གཏོད་གནང་མཛད་པ་མ་ཟད། ཕྱི་ལོ་ ༢༠༡༡ ལོར་ཆབ་སྲིད་དང་འཛིན་སྐྱོང་གི་འགན་དབང་ཡོངས་རྫོགས་མི་མང་གིས་ཐད་ཀར་འོས་འདེམས་བྱས་པའི་འགོ་འཁྲིད་ལ་རྩིས་སྤྲོད་མཛད་ཡོད། མདོར་ན། མི་ལོ་དྲུག་ཅུ་ཙམ་ནང་གཞན་ཡུལ་དུ་ཁ་འཐོར་གནས་དགོས་ཀྱི་གནས་སྟངས་འོག་བཙན་བྱོལ་བའི་སྤྱི་ཚོགས་མང་གཙོའི་མཚན་ཉིད་དང་ཆ་ལག་ཡོངས་སུ་ཚང་བ་ཀུན་གྱིས་བསྟོད་བསྔགས་བྱ་ཡུལ་ཞིག་ཏུ་གྱུར་ཐུབ་ཡོད་པ་ནི། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སྐུ་ངལ་བརྒྱ་ཕྲག་ལྷུར་བཞེས་དང་དབུ་འཁྲིད་ལམ་སྟོན་ཡང་དག་མཛད་པ་ཁོ་ན་ལ་བརྟེན་ནས་བྱུང་བ་ཞིག་ཡིན་པས། དེ་རིང་གི་དུས་ཚེས་འདི་བརྒྱུད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་ཞུ་བ་དང་ཆབས་ཅིག་སྙིང་ཐག་པ་ནས་ཐུགས་རྗེ་བཀའ་དྲིན་ལན་བརྒྱར་ཆེ་ཆེ་ཞེས་ཞུ་རྒྱུ་ཡིན་ཞེས་དང་།

དེ་ནས་མང་གཙོའི་སྤྱི་ཚོགས་ནང་རྒྱལ་ཁབ་དང་མི་རིགས་ཀྱི་ཁེ་ཕན་དོན་དུ་ཆབ་སྲིད་ཀྱི་ལྟ་བ་དང་ལངས་ཕྱོགས་མི་འདྲ་བ་མང་པོ་ཡོང་ཆོག་པ་ཡིན། དེ་བཞིན་མང་གཙོའི་ལམ་ལུགས་ནང་ཐོབ་ཐང་དང་ལས་འགན་གཉིས་ནི་ཕན་ཚུན་ཡ་མ་བྲལ་བར་འགྲོ་དགོས་པ་ལས། ལས་འགན་ལ་བརྩི་མེད་ཀྱིས་སྨྲ་བརྗོད་རང་དབང་སོགས་ཀྱི་ཐོབ་ཐང་ལོངས་སྤྱོད་བྱེད་རློམ་གྱིས་འགན་འཁུར་རྩ་བ་ནས་མི་དགོས་པའི་ནང་ཁུལ་འཁྲུག་རྐྱེན་བཟོ་བའི་བྱེད་བབ་སོགས་ནི་ཁྲིམས་ལུགས་དང་བཟང་སྤྱོད་གཉིས་ཀ་དང་ཡོངས་སུ་འགལ་བ་མ་ཟད། དགྲ་དགའ་གཉེན་སྡུག་གི་ལག་ཆར་ཡང་འགྱུར་ངེས་ཡིན་པས་རང་རིགས་རྒན་གཞོན་ཚང་མས་བྱ་སྤྱོད་དེ་རིགས་ལ་ཡིད་གཟབ་དགོས་པའི་སྐུལ་འདེབས་ནན་པོ་བྱ་རྒྱུ་ཡིན་ཞེས་གསུངས་རྗེས།

ཁོང་གིས་མཐུད་ནས་གསུང་དོན། བོད་ནང་གི་བོད་མི་ཚོའི་གནས་སྟངས་ནི་མུ་མཐུད་སེམས་འཚབ་བྱེད་དགོས་ཀྱི་འོག་གནས་ཡོད། དེ་ཡང་ཕྱི་ལོ་ ༡༩༥༡ ལོར་བོད་ས་བཙན་བཟུང་བྱས་པ་ནས་བཟུང་བོད་མིའི་ཐོག་མི་སྤྱོད་ལས་འདས་པའི་སྡུག་གཅོང་མནར་གཅོད་སོགས་རྒྱུན་མི་ཆད་པར་བཏང་དང་གཏོང་བཞིན་ཡོད། བོད་མིའི་ཐོག་དམ་བསྒྲགས་ཇེ་ཆེར་གཏོང་ཆེད་སྔ་ལོའི་ལོ་འགོ་ཙམ་ནས་ནག་འཇོམས་ངན་སེལ་ལམ་ནག་གཤེད་ཕྱོགས་གཏོགས་ཀྱི་ཁྲིམས་འགལ་ཉེས་གསོག་ཐེར་འདོན་བྱ་རྒྱུའི་བརྡ་ཁྱབ་ཟེར་བ་ཞིག་བཏང་བ་དེའི་ནང་ཕ་སྐད་དང་ཁོར་ཡུག་སྲུང་སྐྱོབ་བྱེད་པ། དེ་བཞིན་དབུ་མའི་ལམ་སྐོར་དྲིལ་བསྒྲགས་བཅས་བྱས་པ་ཡིན་ན་ལོག་སྤྱོད་ཀྱི་བསམ་བློ་དང་གུ་དོག་གི་མི་རིགས་རིང་ལུགས་ཀྱི་བསམ་བློ་དྲིལ་བསྒྲགས་བྱེད་མཁན་གྱི་ཁ་བྲལ་བ་ཡིན་པའི་ཉེས་འཛུགས་བྱས་ཏེ་ཐེར་འདོན་གྱིས་རྡུང་རྡེག་གཏོང་དགོས་སྐོར་བརྗོད་ནས་ད་ལྟའི་བར་བོད་མི་མི་ཉུང་བ་ཞིག་དངོས་སུ་འཛིན་བཟུང་བཙོན་འཇུག་བྱས་དང་བྱེད་བཞིན་ཡོད་པ་ནི་དངོས་དོན་དང་མི་མཐུན་པ་ཞིག་ཡིན། དེ་ཙམ་མ་ཟད་ནག་ཚོགས་ཐེར་འདོན་དང་སྲིད་གཞུང་གི་འབྲེལ་ཡོད་ཚོར་མི་སྣ་རྩིས་སྤྲོད་བྱེད་མཁན་ཚོར་རྒྱ་སྒོར་ཁྲི་ལྔ་ནས་འབུམ་གཅིག་བར་བྱ་དགའ་སྤྲོད་རྒྱུ་ཡིན་པའི་གསལ་བསྒྲགས་སོགས་ཀྱང་སྤེལ་ཡོད། དེ་རིགས་དེ་ནི་མི་རིགས་རང་ཉིད་ཀྱི་སྐད་ཡིག་སྲུང་སྐྱོབ་དར་སྤེལ་དང་ཁོར་ཡུག་སྲུང་སྐྱོབ་བྱེད་པ་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་ནང་འགན་སྲུང་བྱས་ཡོད་པ་དང་ཡོངས་སུ་འགལ་ཡོད། དེ་བཞིན་རྒྱ་གཞུང་གི་འགོ་འཁྲིད་ཚོས་བོད་ཀྱི་གནད་དོན་ཐོག་༸གོང་ས་མཆོག་དང་འབྲེལ་མོལ་བྱེད་རྒྱུའི་སྒོ་ཕྱེ་ནས་ཡོད་སྐོར་བསྒྲགས་བཞིན་ཡོད་ནའང། ༸གོང་ས་མཆོག་གི་ངོས་ནས་བོད་ཀྱི་གནད་དོན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་ནང་སེལ་རྒྱུ་དང་། དེ་ཡང་དབུ་མའི་ལམ་ནི་ཕན་ཚུན་དབར་གྱི་འབྲེལ་མོལ་གྱི་གཞི་རྩ་ཡང་ཡིན་པ་དེར་རྒྱབ་སྐྱོར་བྱེད་ན་ཁ་བྲལ་དང་ནག་གཤེད་ཕྱོགས་གཏོགས་ཀྱི་ཞྭ་མོ་གཡོགས་པའི་བྱེད་བབ་དེ་དག་ལ་བལྟས་ན་ཁ་བྲལ་བྱེད་མཁན་ངོ་མ་ནི་ས་གནས་ཀྱི་དབང་འཛིན་པ་ཚོ་རེད་ཅེས་ཚོར་ཤུགས་ཆེན་པོས་བརྗོད་འདོད་བྱུང་ཞེས་དང་།

དེ་རིང་གི་གོ་སྐབས་འདི་བརྒྱུད་འདས་པའི་མི་ལོ་ ༦༠ ཙམ་གྱི་རིང་རྒྱ་གར་དབུས་སའི་གཞུང་དང་མི་མང་གིས་གཙོས་པའི་བོད་མིའི་རྩ་དོན་དང་ཆོས་རིག་རྒྱུན་འཛིན་ཐོག་དངོས་ཤུགས་བརྒྱུད་གསུམ་ནས་རོགས་སྐྱོར་གནང་མཁན་རྒྱལ་སྤྱིའི་གཞུང་མང་ཚོགས་སྒེར་ཡོངས་ལ་གོ་སྐབས་འདི་བརྒྱུད་ཐུགས་རྗེ་ཆེ་ཞུ་རྒྱུ་དང་། བོད་དོན་བདེན་མཐའ་མ་གསལ་བར་དུ་རྒྱབ་སྐྱོར་མུ་མཐུད་ཡོང་བའི་རེ་བ་དང་ཡིད་ཆེས་ཡོད།

དེ་བཞིན་གོ་སྐབས་འདི་བརྒྱུད་ཞུ་རྒྱུར། བཀའ་སྤྱི་གཉིས་ནས་གསལ་བསྒྲགས་སྔོན་སོང་ལྟར་བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༩ པའི་དགོངས་དོན་འོག་འདི་ལོའི་ཕྱི་ཟླ་ ༡༠ ཚེས་ ༣ ནས་ ༥ བར་ཉིན་གྲངས་གསུམ་རིང་དམིགས་བསལ་ཚོགས་ཆེན་ཞིག་བསྐོང་འཚོགས་གནང་རྒྱུ་དང་། ཚོགས་ཆེན་གྱི་བརྗོད་གཞི། “བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་ལས་འཆར་ཁོངས་མང་ཚོགས་ཀྱི་དགོངས་འཆར་བསྡུ་རུབ་དང་། ༸རྒྱལ་དབང་༸སྐུ་ཕྲེང་ན་རིམ་དང་བོད་མི་མང་དབར་གྱི་འབྲེལ་ལམ་”སྐོར་ཡིན་པས། ཚོགས་ཆེན་དང་ལྷག་པར་བརྗོད་གཞི་གཉིས་ཀྱི་གལ་ཆེའི་རང་བཞིན་ལ་བརྟེན་ནས་རྒྱ་ཆེ་མང་ཚོགས་ནས་གོང་ཞུས་བརྗོད་གཞི་སོ་སོའི་ཐོག་དགོངས་ཚུལ་ཇི་ཡོད་རྣམས་ཕྱོགས་གཅིག་ཏུ་སྤུངས་ཐབས་ཡོང་རྒྱུར་འབོད་སྐུལ་ཞུ་རྒྱུ་ཡིན་ཞེས་གསུངས་སོང་།

དེའི་རྗེས་སྐུ་མགྲོན་གཙོ་བོ་ལྕམ་སྐུ་སར་ཝེན་ཆོ་ཌི་རུ་ལགས་ནས་གསུང་བཤད་གནང་སོང་། མཐའ་མ་དེར། དྷ་ཤོད་བོད་ཁྱིམ་སློབ་གྲྭ་ནས་ནང་མ་འཛོམས་པ་རྣམ་གསུམ་ཞེས་པ་འཁྲབ་སྟོན་བྱས་ནས་མཛད་སྒོ་ཡོངས་སུ་གྲོལ་སོང་།

བོད་ཀྱི་ལོ་རྒྱུས་ཡིག་ཆ།