རྒྱ་གཞུང་གི་ཡིག་ཆ་དཀར་པོར་བོད་མིའི་སྒྲིག་འཛུགས་ཀྱིས་ལན་འདེབས་གནང་།

དེ་ཡང་དབྱིན་ཡོག་ཏུ་བྲིས་ཡོད་པའི་ལན་འདེབས་དེབ་ཆུང་དེའི་འགྲེམས་སྤེལ་མཛད་སྒོའི་ཐོག བོད་མིའི་སྒྲིག་འཛུགས་ཀྱི་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་དང་། དྲིལ་བསྒྲགས་དྲུང་ཆེའི་གནས་རིམ་ཚད་མཉམ་ཤར་གླིང་བསྟན་འཛིན་ཟླ་སྒྲོན་ལགས། ཕྱི་དྲིལ་དྲུང་འཕར་ཚེ་དབང་རྒྱལ་པོ་ཨརྱ་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཉམས་ཞིབ་པ་འཛམ་ལྷ་བསྟན་པ་རྒྱལ་མཚན་ལགས། ཕྱི་དྲིལ་ཕབ་སྒྱུར་ཚན་པའི་འགན་འཛིན་དོན་གྲུབ་རྒྱལ་པོ་ལགས་བཅས་ཁྱོན་མི་གྲངས་༢༠ཕེབས་ཡོད་འདུག

དེ་ནས་ཐོག་མར་ཤར་གླིང་བསྟན་འཛིན་ཟླ་སྒྲོན་ལགས་ཀྱིས་གསུང་བཤད་གནང་དོན། ༢༠༡༨ལོའིཟླ་༧ཚེས་༡༨ཉིན་ལ་རྒྱ་ནག་གཞུང་གིས་བོད་ཀྱི་ཁོར་ཡུག་ཐོག་ཡིག་ཆ་དཀར་པོ་བཏོན་ཡོད། སྐབས་དེར་བོད་ཀྱི་སྲིད་བྱུས་ཉམས་ཞིབ་ཚན་པའི་ཁོར་ཡུག་ཉམས་ཞིབ་པ་བསྟན་པ་རྒྱལ་མཚན་ལགས་ཀྱིས་སྐབས་ཐོག་ལན་འདེབས་ཤིག་བཏོན་ཟིན། རྒྱ་ནག་གཞུང་གིས་བཏོན་པའི་ཡིག་ཆ་དེ་ལྟར་ན་རྒྱ་གཞུང་གིས་བོད་ཀྱི་ཁོར་ཡུག་ཐོག་ཡར་རྒྱས་ཇི་ལྟར་བཏང་ཡོད་པའི་སྐོར་རྫུན་སྒྲིག་བྱས་ནས་དངོས་ཡོད་དང་གཏན་ནས་མ་འཚམ་པའི་གནས་སྟངས་དེ་དག་གསལ་འདོན་གནང་ཡོད། གནས་ཚུལ་དེ་དག་བོད་མིའི་སྒྲིག་འཛུགས་ཀྱི་དྲ་རྒྱའི་ནང་ཞིབ་ཕྲ་བཀོད་ཟིན་པ་རེད། ཅེས་སོགས་ཀྱི་ངོ་སྤྲོད་གནང་།

དེའི་རྗེས་བོད་མིའི་སྒྲིག་འཛུགས་ཕྱི་འབྲེལ་དྲུང་ཆེ་དང་ལན་འདེབས་ཚོགས་ཆུང་གི་འགན་འཛིན་དྭགས་པོ་བསོད་ནམས་ནོར་བུ་ལགས་ཀྱིས་་གསུང་དོན། རྒྱ་གཞུང་གི་བོད་ཀྱི་ཁོར་ཡུག་ཐོག་ཡིག་ཆ་དཀར་པོ་ལ་བོད་ཀྱི་སྲིད་བྱུས་ཉམས་ཞིབ་ཚན་པའི་ཁོར་ཡུག་ཉམས་ཞིབ་པ་བསྟན་པ་རྒྱལ་མཚན་ལགས་ཀྱིས་དེ་འབྲེལ་ལན་འདེབས་སྙིང་བསྡུས་ཤིག་གནང་ཡོད། རྒྱ་ནག་གི་བོད་ཀྱི་ཁོར་ཡུག་ཐོག་ཡིག་ཆ་དཀར་པོ་འགྲེམས་སྤེལ་གནང་བ་དེར་གལ་ཆེན་པོ་རྩི་བཞིན་ཡོད་པའི་རྒྱུ་མཚན་ནི། རྒྱ་ནག་གཞུང་གིས་གཏན་འབེབ་བྱས་པའི་སྲིད་བྱུས་ཤིག་ཡིན། དེའི་ཐོག་ལ་བོད་མིའི་སྒྲིག་འཛུགས་ཀྱིས་དངོས་ཡོད་དང་མཐུན་པའི་ཐོག་ནས་ཉམས་ཞིབ་ཞིབ་ཚགས་བྱས་པའི་ཐོག་ལན་འདེབས་ཤིག་གནང་ཡོད་ཅེས་དང་།

ཁོང་གིས་བོད་ཀྱི་ཁོར་ཡུག་ནི་འཛམ་གླིང་ཡོངས་ལ་གལ་ཆེན་ཡིན་ཚུལ་གྱི་སྐོར་ནས་འདི་ལྟར་གསུང་དོན། ལས་གཞི་འདི་ནི་ཕྱི་ལོ་༢༠༡༨ལས་གཞི་ཞིག་ཆགས་བསྡད་ཡོད། ཕྱི་དྲིལ་ལས་ཁུངས་ཀྱིས་སྟངས་འཛིན་འོག་ལན་འདེབས་ཚོགས་ཆུང་ཞིག་ཡོད། རྒྱབ་ལྗོངས་ཀྱི་གནས་ཚུལ་ཞིག་ཞུས་པ་ཡིན་ན།ཁོར་ཡུག་ཅེས་པ་ནི་ཆབ་སྲིད་དང་འབྲེལ་བ་མེད། ཁོར་ཡུག་ནི།འཛམ་གླིང་འདིའི་སྟེང་གནས་པའི་མི་ཙམ་མ་ཟད།སྲོག་ཆགས་ཡོངས་རྫོགས་དང་འབྲེལ་བ་ཆེན་པོ་ཞིག་ཆགས་ཀྱི་ཡོད། བོད་ནི་འཛམ་གླིང་གི་མཐོ་སྒང་ཞིག་ཡིན། བོད་མཐོ་སྒང་གི་ཁོར་ཡུག་ཐོག་འགྱུར་ལྡོག་ཕྲན་བུ་ཞིག་བྱུང་ཡང་དེའི་ཤུགས་རྐྱེན་བོད་ཙམ་མ་ཟད། རྒྱ་ནག་དང་དེ་བཞིན་འཛམ་གླིང་ཁྱོན་ཡོངས་ལ་ཉེན་ཚབས་ཆེན་པོ་བཟོ་བཞིན་ཡོད།

དེ་ནས་ཕྱི་དྲིལ་དྲུང་ཆེ་དྭགས་པོ་བསོད་ནམས་ནོར་བུ་ལགས་དང་། དྲིལ་བསྒྲགས་དྲུང་ཆེའི་གནས་རིམ་ཚད་མཉམ་ཤར་གླིང་བསྟན་འཛིན་ཟླ་སྒྲོན་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཉམས་ཞིབ་པ་འཛམ་ལྷ་བསྟན་པ་རྒྱལ་མཚན་ལགས་བཅས་ཀྱིས་བོད་ཀྱི་ཁོར་ཡུག་ཐོག་རྒྱབ་ཤ་དཀར་པོའི་ལན་འདེབས་ཡིག་ཆ་དབུ་འབྱེད་གནང་།

དེ་རྗེས་ཁོར་ཡུག་ཉམས་ཞིབ་པ་བསྟན་པ་རྒྱལ་མཚན་ལགས་ཀྱིས་དཔེ་དེབ་ཀྱི་ནང་དོན་དང་འབྲེལ་བའི་སྐོར་སོགས་ཀྱི་གསུང་བཤད་གནང་དོན། ང་ཚོས་གཙོ་བོ་ས་གནས་ས་ཐོག་མི་མང་རང་གི་གནས་སྟངས་དང་ཁོར་ཡུག་རང་གི་གནས་སྟངས་གཞིར་བཞག་ནས་ཡིག་ཆ་དཀར་པོ་བསྒྱུར་བཞག་པ་ཡིན། ཡིག་ཆ་དཀར་པོའི་ནང་ལེའུ་བརྒྱད་ཡོད་པ་དང་། ལེའུ་བརྒྱད་ནང་ལེའུ་རེ་རེས་བོད་ཀྱི་ཁོར་ཡུག་གི་གནས་སྟངས་མ་འདྲ་བ་རེ་གཙོར་འདོན་བྱས། གཙོར་འདོན་བྱས་པ་དེ་ཡང་སྤྱིར་བཏང་བཤད་བཞག་པ་ཞིག་མ་ཡིན་པར། ས་གནས་ས་ཐོག་ཏུ་དངོས་གནས་བྱུང་བའི་གནས་དོན་དེའི་ནང་བྲིས་བཞག་ཡོད། ནམ་རྒྱུན་བཤད་པ་ལས་ལེའུ་འཐོལ་པ་གཉིས་ཡོད་པ་དེའི་ནང་དུ། བོད་ནང་དེང་སང་གད་སྙིགས་མང་དུ་འགྲོ་བའི་དཀའ་ངལ་ཡོད་པ་དེ་དང་། དེ་བཞིན་༢༠༡༦ནས་བོད་ནང་དུ་འབྱུང་བའི་གོད་ཆག་མང་དུ་འགྲོ་གི་ཡོད་པ། དེ་འགྲོ་བ་ནང་བཞིན་རྒྱ་ནག་གཞུང་གིས་གདོང་ལེན་བྱེད་ཀྱི་མེད་པ། མི་མང་གི་དཀའ་ངལ་སེལ་གྱི་མེད་པ་གསལ་པོ་བཏོན་བཞག་ཡོད་པ་རེད་བཅས་དང་།

ལན་འདེབས་དེབ་ཆུང་དེའི་ནང་དུ་ས་གནས་ས་ཐོག་ཏུ་བྱུང་བའི་གནས་ཚུལ་གཙོ་བོ་བཞིའི་སྐོར་ནས་འདི་ལྟར་གསུང་དོན། སྤྱིར་ཁོར་ཡུག་དང་འབྲེལ་བའི་གནད་དོན་མི་འདྲ་བ་སུམ་ཅུ་ཙམ་བྱུང་ཡང་དེའི་ནང་ནས་བཞི་འདེམས་དགོས་དོན་ནི།གནད་དོན་བཞི་དེས་བོད་ས་ཡོངས་རྫོགས་ལ་ཁྱབ་ཐུབ་པ། དེ་རྒྱ་ནག་གི་ཁྲིམས་དང་འགལ་བ་བཅས་ཡིན་པ་རེད།དཔེར་ན།ཁམས་རྫ་སྟོད་དུ་གཏེར་ཁ་སྔོག་འདོན་གྱི་ཆོག་མཆན་སྤྲད་ཡོད་པ་དེ་རྒྱ་ནག་གཞུང་གི་ཁྲིམས་དང་འགལ་ཡོད་པ། བོད་ཀྱི་རྒྱལ་ས་ལྷ་ས་དང་ཐག་ཉེ་སར་གཏེར་ཁ་སྔོག་འདོན་བྱེད་ས་ཞིག་ལ་མི་བརྒྱད་ཅུ་གྱ་གཉིས་ཀྱི་ཚེ་སྲོག་ཤོར་བ་དེས་གཏེར་ཁ་སྔོག་སྐབས་མི་མང་གི་ཚེ་སྲོག་འགན་འཁུར་མེད་པ། ཁམས་མི་ཉག་ལྷ་སྒང་དུ་གཏེར་ཁ་བསྔོགས་ནས་གཏེར་ཁ་སྔོག་པའི་རྫས་དེ་ཆུ་ལ་གློད་ནས་ཡུལ་མིའི་འཐུང་ཆུ་དཀའ་ངལ་འཕྲད་པ་དང་། ཉ་མང་པོ་ཤི་བ་དེས་ཁོར་ཡུག་སྲུང་སྐྱོབ་བྱས་ནས་འཐུང་ཆུ་གཙང་མ་ཉར་གྱི་ཡོད་ཟེར་བ་བདེན་པ་མ་ཡིན་པ། བོད་མདོ་སྨད་ཨ་མཆོག་ཏུ་གཏེར་ཁ་སྔོག་འདོན་གྱི་དོན་འབྲས་ལ་ངོ་རྒོལ་མང་པོ་རིམ་པས་བྱུང་ཡོད་པ་དང་། གཏེར་ཁ་སྔོག་ས་དེ་ས་ཆ་དེ་ག་ཙམ་མ་ཡིན་པར།གནས་རྩ་ཆེན་པོ་ཡིན་པས་རིག་གཞུང་ལ་གུས་ཞབས་མེད་པ།ཡུལ་ལུང་གོམས་གཤིས་ལ་གུས་ཞབས་མེད་པ། མི་མང་གི་བསམ་ཚུལ་ལ་གུས་ཞབས་མེད་པ།དེས་རང་བཞིན་གྱིས་རྒྱ་ནག་གི་ཁྲིམས་དང་འགལ་བ་བཅས། དེ་འདྲའི་གནད་དོན་བཞིར་གཙོར་འདོན་བྱས་ཡོད།

དེ་ནས་བོད་ཀྱི་ཁོར་ཡུག་ཐོག་རྒྱབ་ཤ་དཀར་པོའི་ལན་འདེབས་ཡིག་ཆ་དེར་ལེ་ཚན་བརྒྱད་ཡོད་ཅིང་། དེ་དག་ནི་གཤམ་གསལ་ལྟར།

༡༽གོ་ལ་སྤྱི་ཡོངས་ལ་བོད་མཐོ་སྒང་གི་གལ་གནད།
༢༽རྒྱལ་རབས་ལོ་རྒྱུས་ཐོག་བོད་ནང་ཁོར་ཡུག་སྲུང་སྐྱོབ་བྱེད་ཕྱོགས།
༣༽གོ་ལའི་གནམ་གཤིས་འགྱུར་ལྡོག་གིས་བོད་མཐོ་སྒང་ལ་ཤུགས་རྐྱེན།
༤༽རྒྱ་ནག་གི་དབང་བསྒྱུར་འོག་བོད་ཀྱི་ད་ལྟའི་ཁོར་ཡུག་གནས་སྟངས།
༥༽འགན་ཁུར་མེད་པའི་ཆུ་མཛོད་ཆེན་པོ་འཛུགས་སྐྲུན་བྱས་ཏེ་ཁོར་ཡུག་ལ་དོ་ཕོག་བཏང་བ་དང་མིའི་ཚེ་སྲོག་ལ་ཉེན་ཁ་བཟོས་པ།
༦༽རྩྭ་ཐང་ཐོག་གི་སྐྱས་སྤོས་བོད་མིའི་འབྲོག་པ་རྣམས་བཙན་དབང་གི་གཏན་འཇགས་གཞིས་ཆགས་སུ་གནས་སྤོ་བྱེད་དུ་བཅུག་པ་དང་རྩྭ་ཐང་གི་བདག་པོ་རྣམས་དབུལ་ཞིང་ཕོངས་པར་གྱུར་བ།
༧༽གད་སྙིགས་གང་སར་བདག་མེད་དུ་བཞག་པ།རྒྱལ་སར་ཁོ་ནར་གད་སྙིགས་གཙང་བཟོའི་ལས་གཞི་སྤེལ་བཞིན་པ།
༨༽འབྱུང་བའི་གོད་ཆགས་ཇེ་མང་དུ་འགྲོ་བ་རྣམས་སྣང་ཆུང་རྒྱ་ཡན་དུ་བཏང་ནས་ཛ་དྲག་ངལ་སེལ་ལས་གཞི་མ་སྤེལ་བ།བཅས་ཚན་པ་བརྒྱད་ཡོད་འདུག